Harmonía d’orquesta ya estratexa d’equipu fúbol

Xustamente una selmana dempués de participar nel pieslle’l congresu d’Unidá Nacionalista Asturiana tuvi ocasión de compartir cuasi tres hores con persones y grupos estremaos, les persones y los representantes d’organizaciones qu’acudieran a la convocatoria de conceyu abiertu promovíu por Andecha Astur. Si’l discursu de los dirixentes d’UNA al acabar el congresu incidió particularmente na necesidá d’una converxencia nacionalista, el conceyu abiertu d’Andecha yera, precisamente, p’aldericar al rodiu d’una posible xunidá ellectoral de cara a la convocatoria’l 2011.
A toes estes, quiero facer un paréntesis ensin entrar con ello en más discutinios que los que dalgunos quieran abrir pero sobro los que, anticipo, nun voi arrepostiar independientemente de lo que caún argumente. Voi emplegar el nome “Andecha Astur” pa la organización que tóos llamen “Andecha Astur”, esto ye, la que güei encabecen Mariu Arbesú y Dani Cueli. Del mesmu móu, voi considerar “Unidá Nacionalista Asturiana” a lo que tol mundiu llama asina, esto ye, la organización encabezada por Rober Holgado, Yolanda Huergo y Faustino Zapico. Sé perfechamente que’l cafarnaún ta no d’Andecha y non no d’UNA, porque, en definitiva, estos pleitos son “internos” de la vieya Andecha Astur. Pero vaigan estes declaraciones d’intenciones per delantre. Los problemas llegales d’Andecha hai tiempu que dexé d’entendelos, anque teo una opinión fecha de calter político, opinión que de poco va valir na discusión que güei mos importa. Pero, eso sí, mentres esos pleitos sigan enguedeyándose, les posibilidaes d’aprosimación son pequeñes. Amás, mentanto se siga asina, UNA nun va ser otra cosa qu’IAS más unos cuantos “independientes” y Andecha Astur una organización dependiente de les decisiones xudiciales. Deberíen pensar les direcciones de les dos organizaciones –si daveres allampen por una converxencia- si nun tendrían que pegar un puñetazu enriba la mesa y poner fin a esta situación.
Lo mesmo nel congresu d’UNA como nel conceyu abiertu d’AA aprecié una custión importante: el tonu, la musiquina fondu, yera muncho menos estridente que la que sintiera hai unos años. Camiento –y llevo tiempu abondo ensin ser optimista- qu’hai un pruyiciu por atropar alcordaes. Como siempres, hai –siguiendo col símil musical- notes más agudes y notes más graves, pero l’harmonía paez que quier imponese. Ye mui posible que les nueves xeneraciones, los que yeran mozos cuando les últimes engarradielles, tean algamando francer les zunes de los sos referentes precedentes. Hai una evidente emancipación de los de la trentena con respecto a les vanguardies irreductibles que, formaes por rapazos cuando l’Ensame Nacionalista Astur o la Xunta Nacionalista Asturiana, condicionaron de mayulones a les organizaciones güei en presencia.
Asina lo dixe nel conceyu abiertu y tuvi una intelixente rempuesta d’Arbesú que me prestó muncho. Quexóse’l dirixente d’Andecha de qu’agora quinxéramos dalgunos echar enriba’l llombu de los más xóvenes les responsabilidaes cuando p’algamar una salida tóos somos necesarios, anque naide imprescindible. Y fora una rempuesta intelixente, primero porque ye verdá, y segundo porque vinía dicir qu’ellos diben tener qu’iguar lo qu’otros enantes rompieran. Nun lo dixo asina pero esa triba d’acusación quedó nel aire. Pero, d’otra banda, prestome muncho la rempuesta porque tamién nella reconocía’l trabayu de los anteriores. L’adanismu fora un problema habitual del nuesu nacionalismu pero nes pallabres d’Arbesú, compartíes pol so compañeru mesa, Brunu Gómez –mesma xeneración añu arriba, añu abaxo-, afitábase la continuidá d’enfotos, al empar que, paez ser, pretendíase francer cola continuidá de zunes.
Por embargo, otra vuelta apaició, sinon el vieyu adanismu, sí la repetición de vieyes polémiques que temos dar por finaes, como la de les dos almes del nacionalismu asturianu: l’alma social (más o menos de clas) y l’alma cultural (más o menos d’etnia). Y lligo esto col posible adanismu porque, ensin discutise d’ello pa nada, quien lo punxo nel tapete fora’l representante de la organización de mocedá Fai!. El discursu que fixo taba bien construyíu pero tal paeció que lu sacó porque tinía sacalu ya que naide falara d’ello nes cuasi dos hores delantre la so intervención. De fechu, el discutiniu –si ye que podemos dicir daveres qu’esistiere- diérase pente’l representante de Fai! ya’l del Partíu Carlista, que tamién faló de lo mesmo.
Ya ye que los demás tábamos más interesaos nes esperiencies de les Candidatures d’Unitat Popular de Cataluña, de Nafarroa Bai y del Bloque Nacionalista Galego que de custiones ideolóxiques nel sen más marxanu la pallabra: la ideoloxía como visión falsa de la realidá. Brunu Gómez desplicó la historia y cadarma de les CUP, Paulu Arboleya lo propio de NaBai ya un representante’l BNG faló de la so experiencia. Por cierto, que me prestó muncho esa representación gallega porque dalguna vegada tendremos que finar con unos conflictos ermos y munches vegaes infantiles. Les trafulques pente gallegos y asturianos namái que beneficien a ciertes minoríes marxinales y, riba tóo, a unos enemigos comunes que son muncho más fuertes que nós.
Yo pienso –y asina lo dixe- que la opción de les CUP nun val p’Asturies. Ye verdá que ye un modelu que me gusta, un modelu pol que teo muncha simpatía, pero nun ye’l nuesu. El modelu les CUP namás val pa un país onde los partíos nacionalistes tan nel poder o, cuando menos, son fuertes. Nesti sen, les CUP son un permanente contrapesu de la posiblemente cafiante institucionalización d’ERC y, riba tóo, de CIU. Esa vía, amás, ta asitiada claramente nuna esquierda doctrinaria que nun val p’axuntar voluntaes, sinon p’afitar posiciones dientro d’un bloque social más o menos hexemónicu.
Teo pa mín que’l modelu p’Asturies, “mutas mutandis” ye’l de Nafarroa Bai. Ye una cenciella coalición ellectoral onde naide ta afiliao a la coalición mesma sinon que los militantes pertenecen a cualisquier de los grupos que la formen. Lluéu, como siempres, ta l’asuntu de cómo resolver la situación de los que quieren ser “independientes”. Pero esi problema, que tocara con mui bona descripción el representante’l BNG, nun suscitó munchu alderique, igual porque esi tampoco ye’l nuesu problema d’anguaño. Total, qu’anque cada país ye diferente, camiento que’l modelu más cercanu a nós ye’l de NaBai pero con una calterística que nun se da en Navarra: l’horizonte viable p’Asturies ye un modelu como’l del BNG. Pa mín un modelu como NaBai ye un pasu seguramente imprescindible –por exemplu pal 2011- pero hai dir caminando haza’l modelu BNG. Nesti modelu nun desapaecen los partíos que lu conformen pero hai persones que lo son namás que de la propia organización xunitaria, del BNG, una afiliación qu’anguaño ya acabó por ser la mayoritaria. Vien ser un modelu asemeyáu al d’Izquierda Unida, anque coles sos peculiaridaes.
Tamién surdió l’asuntu de que yá había un procesu d’unidá n’Asturies –en pallabres d’Inaciu Galán- cola Unión Asturianista. Nun sé si’l representate’l PAS pretendió dicilo pero tóo sonara a ufiertar el paragües d’UAS a los qu’ellí tábamos discutiendo. La so idega, refugada pola esquierda nacionalista dende siempres, podía sofitase, precisamente na evolución del nacionalismu gallegu. Dientro’l BNG entá hai –magar que minoritarios- partíos lliberales con un perfil asemeyáu a la URAS y al PAS. Ye bona verdá pero hai una diferencia fundamental: los lliberales galleguistes asumieron el fechu nacional gallegu nos años vente o trenta’l sieclu XX. Podemos pensar que’l PAS tien asumíu esi fechu nacional pal casu d’Asturies –preba d’ello ye la so alcordada con Andecha Astur, cola que comparte cuasi tóos los postulaos culturales ya étnicos-, pero cuesta creyelo d’URAS. Por cierto, qu’esta mesma reflexón cabe, pela otra banda, pa Izquierda Unida. Ya estes observaciones son les que dexen como estemporánies les discusiones pente les dos almes del nacionalismu asturianu.
Ya entá cabe falar del Bloque por Asturies, que se comportó de forma perestremada nel congresu d’UNA y nel conceyu d’Andecha. Cuando’l so representante fixera la salutación a UNA, o yo soi mui tochu o tóo paecía amosar una petición de coalición ellectoral. Con habilidá, Zapico, nel discursu final como portavoz de la organización, marcó les diferencies y punxo al Bloque –en sin nomalu- nel so sitiu. Por embargo, nel conceyu d’Andecha, más llibre y abiertu –nun consistía en saludar protocolariamente- naide del Bloque nun intervino.
Nun esiste la dicotomía pente les dos almes. Ye más, enxamás esistiere. Vamos tener iciniraores y tendíos d’alta tensión porque somos débiles nacionalmente nel contestu l’estáu les autonomíes, la mocedá nun marcha sinon porque somos débiles nacionalmente, nun tenemos capacidá d’alministrar la nuesa economía porque somos débiles nacionalmente. Los nuesos problemas económicos –la dominación que carecemos en términos de división internacional del trabayu- proceden, básicamente, de que somos una nación en decadencia.
Pué paicer mui pedestre, mui coxuntural o mui oportunista, pero nun ye la hora del discutiniu ideolóxicu nesos términos materialistes tan clásicos. Namás que la reconstrucción nacional mos puede llevar a la xusticia social y a la democracia económica. N’Asturies la vía a un modelu socioeconómicu más igualitariu nun ye otra que la reconstrucción nacional. La otra hipótesis, la de camudar el modelu social p’algamar l’autoestima como pueblu ye una quimera.
Por eso, dempués de ver lo que pasó nel congresu d’UNA y nel conceyu abiertu d’Andecha, pienso que’l camín ta desenartándose. Nun consiste n’algamar una gran organización, sinon en ufrir una alternativa ellectoral viable que yá veremos si, más sero, da más de sí. Nun consiste en que, de sópetu, tós seyamos amiguinos del alma, sinon en ser lleales conocíos. Nun consiste en poner sobro la mesa unes utopíes comunes, nin tan siquier unes visiones del mundiu y del país comunes, sinón daqué tan cenciello como unos intereses comunes.
Un apunte final pa los dos bandos en presencia. Los que piensen que lo social ye más importante que lo nacional, ¿ye que conocen dalguna revolución socialista que nun toviera un potentísimu componente nacional?. Y los que piensen que lo nacional ye más importante que lo social, ¿ye que conocen dalgún procesu d’independencia que nun toviera un potentísimu componente igualitarista?. Otra cosa estremada ye cómo saliere a la postre la experiencia. Pero como nun vamos exercer de videntes, lo único que podemos facer ye entamar l’acción.
La pelota ta nel centru’l campu. Los actuales dirixentes d’Andecha Astur y d’UNA tienen qu’entamar el partíu armaos de razones, xenerosidá y “fair play”. Y l’afición tien ser una verdadera “mareona azul ya oru” que-ys desixa un bon xuegu y que, tamién, participe como axente activu. Caún asigún les sos posibilidaes ye responsable de que nesta ocasión nun salgamos goleaos como tolos años dende la temporada 1979-80.
Imprimir