Harmonía d’orquesta ya estratexa d’equipu fúbol

Xustamente una selmana dempués de participar nel pieslle’l congresu d’Unidá Nacionalista Asturiana tuvi ocasión de compartir cuasi tres hores con persones y grupos estremaos, les persones y los representantes d’organizaciones qu’acudieran a la convocatoria de conceyu abiertu promovíu por Andecha Astur. Si’l discursu de los dirixentes d’UNA al acabar el congresu incidió particularmente na necesidá d’una converxencia nacionalista, el conceyu abiertu d’Andecha yera, precisamente, p’aldericar al rodiu d’una posible xunidá ellectoral de cara a la convocatoria’l 2011.
A toes estes, quiero facer un paréntesis ensin entrar con ello en más discutinios que los que dalgunos quieran abrir pero sobro los que, anticipo, nun voi arrepostiar independientemente de lo que caún argumente. Voi emplegar el nome “Andecha Astur” pa la organización que tóos llamen “Andecha Astur”, esto ye, la que güei encabecen Mariu Arbesú y Dani Cueli. Del mesmu móu, voi considerar “Unidá Nacionalista Asturiana” a lo que tol mundiu llama asina, esto ye, la organización encabezada por Rober Holgado, Yolanda Huergo y Faustino Zapico. Sé perfechamente que’l cafarnaún ta no d’Andecha y non no d’UNA, porque, en definitiva, estos pleitos son “internos” de la vieya Andecha Astur. Pero vaigan estes declaraciones d’intenciones per delantre. Los problemas llegales d’Andecha hai tiempu que dexé d’entendelos, anque teo una opinión fecha de calter político, opinión que de poco va valir na discusión que güei mos importa. Pero, eso sí, mentres esos pleitos sigan enguedeyándose, les posibilidaes d’aprosimación son pequeñes. Amás, mentanto se siga asina, UNA nun va ser otra cosa qu’IAS más unos cuantos “independientes” y Andecha Astur una organización dependiente de les decisiones xudiciales. Deberíen pensar les direcciones de les dos organizaciones –si daveres allampen por una converxencia- si nun tendrían que pegar un puñetazu enriba la mesa y poner fin a esta situación.
Lo mesmo nel congresu d’UNA como nel conceyu abiertu d’AA aprecié una custión importante: el tonu, la musiquina fondu, yera muncho menos estridente que la que sintiera hai unos años. Camiento –y llevo tiempu abondo ensin ser optimista- qu’hai un pruyiciu por atropar alcordaes. Como siempres, hai –siguiendo col símil musical- notes más agudes y notes más graves, pero l’harmonía paez que quier imponese. Ye mui posible que les nueves xeneraciones, los que yeran mozos cuando les últimes engarradielles, tean algamando francer les zunes de los sos referentes precedentes. Hai una evidente emancipación de los de la trentena con respecto a les vanguardies irreductibles que, formaes por rapazos cuando l’Ensame Nacionalista Astur o la Xunta Nacionalista Asturiana, condicionaron de mayulones a les organizaciones güei en presencia.
Asina lo dixe nel conceyu abiertu y tuvi una intelixente rempuesta d’Arbesú que me prestó muncho. Quexóse’l dirixente d’Andecha de qu’agora quinxéramos dalgunos echar enriba’l llombu de los más xóvenes les responsabilidaes cuando p’algamar una salida tóos somos necesarios, anque naide imprescindible. Y fora una rempuesta intelixente, primero porque ye verdá, y segundo porque vinía dicir qu’ellos diben tener qu’iguar lo qu’otros enantes rompieran. Nun lo dixo asina pero esa triba d’acusación quedó nel aire. Pero, d’otra banda, prestome muncho la rempuesta porque tamién nella reconocía’l trabayu de los anteriores. L’adanismu fora un problema habitual del nuesu nacionalismu pero nes pallabres d’Arbesú, compartíes pol so compañeru mesa, Brunu Gómez –mesma xeneración añu arriba, añu abaxo-, afitábase la continuidá d’enfotos, al empar que, paez ser, pretendíase francer cola continuidá de zunes.
Por embargo, otra vuelta apaició, sinon el vieyu adanismu, sí la repetición de vieyes polémiques que temos dar por finaes, como la de les dos almes del nacionalismu asturianu: l’alma social (más o menos de clas) y l’alma cultural (más o menos d’etnia). Y lligo esto col posible adanismu porque, ensin discutise d’ello pa nada, quien lo punxo nel tapete fora’l representante de la organización de mocedá Fai!. El discursu que fixo taba bien construyíu pero tal paeció que lu sacó porque tinía sacalu ya que naide falara d’ello nes cuasi dos hores delantre la so intervención. De fechu, el discutiniu –si ye que podemos dicir daveres qu’esistiere- diérase pente’l representante de Fai! ya’l del Partíu Carlista, que tamién faló de lo mesmo.
Ya ye que los demás tábamos más interesaos nes esperiencies de les Candidatures d’Unitat Popular de Cataluña, de Nafarroa Bai y del Bloque Nacionalista Galego que de custiones ideolóxiques nel sen más marxanu la pallabra: la ideoloxía como visión falsa de la realidá. Brunu Gómez desplicó la historia y cadarma de les CUP, Paulu Arboleya lo propio de NaBai ya un representante’l BNG faló de la so experiencia. Por cierto, que me prestó muncho esa representación gallega porque dalguna vegada tendremos que finar con unos conflictos ermos y munches vegaes infantiles. Les trafulques pente gallegos y asturianos namái que beneficien a ciertes minoríes marxinales y, riba tóo, a unos enemigos comunes que son muncho más fuertes que nós.
Yo pienso –y asina lo dixe- que la opción de les CUP nun val p’Asturies. Ye verdá que ye un modelu que me gusta, un modelu pol que teo muncha simpatía, pero nun ye’l nuesu. El modelu les CUP namás val pa un país onde los partíos nacionalistes tan nel poder o, cuando menos, son fuertes. Nesti sen, les CUP son un permanente contrapesu de la posiblemente cafiante institucionalización d’ERC y, riba tóo, de CIU. Esa vía, amás, ta asitiada claramente nuna esquierda doctrinaria que nun val p’axuntar voluntaes, sinon p’afitar posiciones dientro d’un bloque social más o menos hexemónicu.
Teo pa mín que’l modelu p’Asturies, “mutas mutandis” ye’l de Nafarroa Bai. Ye una cenciella coalición ellectoral onde naide ta afiliao a la coalición mesma sinon que los militantes pertenecen a cualisquier de los grupos que la formen. Lluéu, como siempres, ta l’asuntu de cómo resolver la situación de los que quieren ser “independientes”. Pero esi problema, que tocara con mui bona descripción el representante’l BNG, nun suscitó munchu alderique, igual porque esi tampoco ye’l nuesu problema d’anguaño. Total, qu’anque cada país ye diferente, camiento que’l modelu más cercanu a nós ye’l de NaBai pero con una calterística que nun se da en Navarra: l’horizonte viable p’Asturies ye un modelu como’l del BNG. Pa mín un modelu como NaBai ye un pasu seguramente imprescindible –por exemplu pal 2011- pero hai dir caminando haza’l modelu BNG. Nesti modelu nun desapaecen los partíos que lu conformen pero hai persones que lo son namás que de la propia organización xunitaria, del BNG, una afiliación qu’anguaño ya acabó por ser la mayoritaria. Vien ser un modelu asemeyáu al d’Izquierda Unida, anque coles sos peculiaridaes.
Tamién surdió l’asuntu de que yá había un procesu d’unidá n’Asturies –en pallabres d’Inaciu Galán- cola Unión Asturianista. Nun sé si’l representate’l PAS pretendió dicilo pero tóo sonara a ufiertar el paragües d’UAS a los qu’ellí tábamos discutiendo. La so idega, refugada pola esquierda nacionalista dende siempres, podía sofitase, precisamente na evolución del nacionalismu gallegu. Dientro’l BNG entá hai –magar que minoritarios- partíos lliberales con un perfil asemeyáu a la URAS y al PAS. Ye bona verdá pero hai una diferencia fundamental: los lliberales galleguistes asumieron el fechu nacional gallegu nos años vente o trenta’l sieclu XX. Podemos pensar que’l PAS tien asumíu esi fechu nacional pal casu d’Asturies –preba d’ello ye la so alcordada con Andecha Astur, cola que comparte cuasi tóos los postulaos culturales ya étnicos-, pero cuesta creyelo d’URAS. Por cierto, qu’esta mesma reflexón cabe, pela otra banda, pa Izquierda Unida. Ya estes observaciones son les que dexen como estemporánies les discusiones pente les dos almes del nacionalismu asturianu.
Ya entá cabe falar del Bloque por Asturies, que se comportó de forma perestremada nel congresu d’UNA y nel conceyu d’Andecha. Cuando’l so representante fixera la salutación a UNA, o yo soi mui tochu o tóo paecía amosar una petición de coalición ellectoral. Con habilidá, Zapico, nel discursu final como portavoz de la organización, marcó les diferencies y punxo al Bloque –en sin nomalu- nel so sitiu. Por embargo, nel conceyu d’Andecha, más llibre y abiertu –nun consistía en saludar protocolariamente- naide del Bloque nun intervino.
Nun esiste la dicotomía pente les dos almes. Ye más, enxamás esistiere. Vamos tener iciniraores y tendíos d’alta tensión porque somos débiles nacionalmente nel contestu l’estáu les autonomíes, la mocedá nun marcha sinon porque somos débiles nacionalmente, nun tenemos capacidá d’alministrar la nuesa economía porque somos débiles nacionalmente. Los nuesos problemas económicos –la dominación que carecemos en términos de división internacional del trabayu- proceden, básicamente, de que somos una nación en decadencia.
Pué paicer mui pedestre, mui coxuntural o mui oportunista, pero nun ye la hora del discutiniu ideolóxicu nesos términos materialistes tan clásicos. Namás que la reconstrucción nacional mos puede llevar a la xusticia social y a la democracia económica. N’Asturies la vía a un modelu socioeconómicu más igualitariu nun ye otra que la reconstrucción nacional. La otra hipótesis, la de camudar el modelu social p’algamar l’autoestima como pueblu ye una quimera.
Por eso, dempués de ver lo que pasó nel congresu d’UNA y nel conceyu abiertu d’Andecha, pienso que’l camín ta desenartándose. Nun consiste n’algamar una gran organización, sinon en ufrir una alternativa ellectoral viable que yá veremos si, más sero, da más de sí. Nun consiste en que, de sópetu, tós seyamos amiguinos del alma, sinon en ser lleales conocíos. Nun consiste en poner sobro la mesa unes utopíes comunes, nin tan siquier unes visiones del mundiu y del país comunes, sinón daqué tan cenciello como unos intereses comunes.
Un apunte final pa los dos bandos en presencia. Los que piensen que lo social ye más importante que lo nacional, ¿ye que conocen dalguna revolución socialista que nun toviera un potentísimu componente nacional?. Y los que piensen que lo nacional ye más importante que lo social, ¿ye que conocen dalgún procesu d’independencia que nun toviera un potentísimu componente igualitarista?. Otra cosa estremada ye cómo saliere a la postre la experiencia. Pero como nun vamos exercer de videntes, lo único que podemos facer ye entamar l’acción.
La pelota ta nel centru’l campu. Los actuales dirixentes d’Andecha Astur y d’UNA tienen qu’entamar el partíu armaos de razones, xenerosidá y “fair play”. Y l’afición tien ser una verdadera “mareona azul ya oru” que-ys desixa un bon xuegu y que, tamién, participe como axente activu. Caún asigún les sos posibilidaes ye responsable de que nesta ocasión nun salgamos goleaos como tolos años dende la temporada 1979-80.
Imprimir

Comentarios

  1. H.oder que valiente yes. Tu que yes de los ideólogos del nacionalismu desde fai años dices esto. Toi d'acuerdo al cien per cien pero van caete unes cuantes hosties.

    ResponderEliminar
  2. El símbolu del Bloque por Asturies dende fai yá un añu nun ye esi.

    ResponderEliminar
  3. toi d'alcuerdu casi dafechamente col to artículu, sacantes una cosuca: el PAS enxamás dixo que yera lliberal y enxamás en nengún de los documentos internos punxo esta pallabra nin se comportó como talu.

    Incluso falaben los sos militantes y Xuan Xosé nos medios de la URAS como de "derechona" (anque nun atopo agora'l link) anque anguaño vaiga de la manina con Marqués.

    El PAS anque ellos mesmos quiciabes intenten vender otra cosa (p'algamar más votos probablemente) son un partíu abondo de centroizqda ya izquierda, polos raigaños de munchos de los militantes(CNA, ENA y UNA) y pola so condición de nacionalistes y progresistes (esto ún pue lleer entovía nos sos testos internos).

    ResponderEliminar
  4. el link:
    http://www.elpais.com/articulo/espana/SUAREZ/_CELESTINO_/PSOE/MARQUES/_SERGIO/LLAMAZARES/_GASPAR_/IZQUIERDA_UNIDA/ESPANA/ASTURIAS/PARTIDO_POPULAR_/PP/elpepiesp/19981124elpepinac_8/Tes

    ResponderEliminar
  5. Yo nun comparto pa nada esa dicotomía final Andecha-UNA del articulu de David Rivas.

    Les posibles xuntances nun va venir con nengún condicionante de qu'Andecha Astur tea que tar presente nella. Esi papel central y referencial qu'Andecha Astur tuvo siempres nel nacionalismu d'izquierda ya nun ye talu . La rialidá de 2007 a güei camudó y anguañu ensin ellos toles posibilidaes tan abiertes, comu diz el dichu ellos ya nun tienen "la sarten garrada pel mangu" del nacionalismu d'izquierda y eso obliga a replantear tolos plantegamientos.

    ResponderEliminar
  6. A la fin va ser too agua moyao, como siempres. Namái qu'un proyeutu'n comuña con David de cabezaleru iba tener punxu abondo pa espoyetar dafechu.

    ResponderEliminar
  7. Acepto la matización sobro la ideoloxía'l PAS. Ye verdá que tien un componente social y medio esquierdista si miramos pa dalgunos testos o plantegamientos internos. Pero lo que ye la so pretensión de cara a la galería ye otra. Precisamente lo que los dirixentes del PAS intentaron siempres fo quitase esa imax d'esquierdes cola que lu ve la mayoría la xente. Dende esti puntu vista ye dende'l que yo falaba.

    Sobre Andecha-UNA. Ye verdá que les circunstancies cambiaron, si non muncho, bastante. Pero si la cabezonería hexemónica d'unos vamos cambiala pola cabezonería hexemónica d'otros, mal vamos. Si la situación de van tres o cuatro años llevó a desprecios mutuos y a falta de xenerosidá y patriotismu -tóos tuvimos culpes anque unos más qu'otros-, agora tien de ser distinto. Si nun ye asina d'esta vegada, meyor dexalo too y confiar na bona voluntá d'Izquierda Unida o del Partido Popular.

    ResponderEliminar
  8. Marañueles candasines I22 de marzo de 2010, 17:50

    Bones, pertenezo a esi seutor invisible pa David, al qu'él nin da-y lexitimidá pa decise Andecha Astur, nin da-y entidá bastante pa que vea qu'UNA seya daqué más qu'IAS y cuatro independientes . Llaméntolo enforma, porque militamos con David n'Andecha munchos años, y amás fuimos el seutor mayoritariu d'Andecha nel momentu de la rotura de la organización. Esa invisibilidá sólo ye entendible dende la perspeutiva d'aquellos que consideraron y consideren a Andecha Astur patrimoniu personal d'ellos, y non de los sos militantes. Ye “entendible” esa invisibilidá hacia nós, nos guardianes de les siegles d´Andecha Astur, nun ye entendible en David.

    Fala David llamando a la unidá. Como diría Riesgo, ¡polos dioses del panteón celta! ¡qué tarde llega esi llamáu! Concretamente dos años tarde. Qué pena que David tardare tanto en facelo, qué fácil y qué diferente pudo ser too. Esi debate diose n'Andecha Astur hai dos años, y l'eficaz - según David- MAF, secretariu d'organización d'AA, prefirió frañar la organización enantes que siguir falando con IAS. Cuánto echamos de menos una posición contundente de David nun momentu nel que per primer vegada en munchu tiempu militantes d'organizaciones polítiques estremaes, entamaben un procesu d'atropamientu de fuercies nel asturianismu y atópábense enfrente cola belixerancia d'otru seutor contrariu (los qu'agora usen les sigles d´Andecha Astur) a cualesquier procesu de xuntanza.

    El procesu d'unificación siguió p'alantre con munchu esfuerzu y grandes costes personales pa dalgunos.

    Agora una vegada que'l procesu d'aquella xuntanza tomó forma n'UNA , organización que nun ye que crea tácticamente nun procesu de xuntanza, sinón que ye un principiu fundacional, y que dexóse y déxase'l pelleyu nel intentu, el seutor que trabayó enforma escontra l'alcuerdu eleutoral de 2007, que tien nel so ADN la rotura como marca identitaria de la so trayeutoria política y que ta arrequexáu, pide agora unidá que naide ye cree que seya sincera

    Ye evidente pa tol asturianismu, la nula credibilidá d´esi pequeñu seutor qu'utiliza la sigla d'Andecha Astur.

    ResponderEliminar
  9. marañueles candasines II22 de marzo de 2010, 17:52

    Sigo :
    El procesu de xuntanza del asturianismu/nacionalismu entamó hai dos años, y entamólu la mayor parte d'Andecha Astur ya IAS. Esi tren ya pasó pa dalguna xente que nun lu quixo garrrar.

    Que nadie s'engañe, el próximu pasu haza la unidá nun pasa per esi seutor. Y nun pasa per delles cuestiones, la fundamental ye que nun hai nenguna confianza de naide – salvo David y dalgún despistáu- hacia esa xente que protagonizó les últimes trés ruptures na izquierda nacionaliega. Meter a esa xente nun procesu de xuntanza ye meter al llobu a curiar de les pites. Ye inasumible tener qu'arriesgar el posible proyeutu de xuntanza por meter a esta xente que representa anguaño tan poca cosa.

    La xuntanza con esi seutor malpenes atroparía a les escases dos docenes de militantes y poco más, el capital humanu a sumar nun significaría un incrementu bultable. Mediáticamente tampoco tendría repercusión nenguna. Nun hai qu'escaecer tampoco que'l problema llegal d'Andecha Astura día de guei nun tien pinta d'iguase. Por nun entrar en cuestiones de táctica política o discursu. Ye dicir, ye arriesgar muncho por tan poca cosa.

    D'otru llau, David intentes presentar a “Andecha Astur” , como una organización anovada con cares moces garrando'l relevu . Entiendo esi intentu, pero nun ye creyible. Dicir que Dani y Mario encabezen Andecha Astur nun lo cree naide, esi seutor ta capitaneáu por MAF, Bermeyu y compañía, y siempre sedrá asina, faeránlo dende la solombra o públicamente, pero sedrán ellos siempre quienes lideren esi seutor, pa ellos Andecha Astur ye de la so propiedá.

    Pero mira, pa que salgas de dubies sobre la sinceridá de la petición d'unidá d´esi seutor, y poniéndonos nel casu de que seya verdá que Cueli encabece Andecha Astur, entrúga-y a él si quier qu'Andecha Astur vaya a unes eleiciones con otres organizaciones. Tu ya sabes la rempuesta, siempres foi la mesma : Ye non.

    En definitiva, David, nun gastemos esfuerzos tan necesarios nesti momentu n'imposibles, y utilicemos toles nuestres enerxíes n'algamar un proyeutu xunitariu, vidable y final.

    Les pontes puen ser muy necesaries nun proyeutu xunitariu, pero les pontes tienen que tar bien afitaes nes dos orielles que xunen. Una ponte que nun llega a la otra oriella, nun ye ponte.

    ResponderEliminar
  10. Préstame enforma esti últimu comentariu de "marañueles candasines". Ye dir asitiando les pieces nel tableru de xuegu, y al mio mou d'entender d'un xeitu correutu.

    Soi simpatizante d'UNA, votelos dende la so fundación, pa posicioname y nun andar con xueguiquinos fatos.

    Dende fuera da la impresión que se ta esbrozando'l camín sele pero con sentíu, sicasí prestábame que too fuere muncho más rápido, muncho más eficaz, muncho más granible. Lo que nun quita pa que seya consciente de la rialidá na que nos movemos, y por ella siga enfotáu. Tamién dalgo de culpa tenemos los que tovía nun nos moyamos, y seguimos viéndoles vinir. Sedría hora d'entamar facelo, yo'l primeru.

    Esta cabera intervención, nun sé si ye mayoritaria n'UNA o non pola mio parte ta'l deseyu que lo seya, entama falar claro nos alderiques que llevo siguiendo nesta bitácora dende les primeres entraes d'esta saga.

    David Rivas, lleves defendiendo persones y actitúes qu'entiendo nun son defendibles, solo dende la ceguera y el fanatismu se pué entender esa defensa numantina. Siéntolo David, nun tas demostrando esa intelixencia y esi bon facer que se te supón. Sigues dándo-y llexitimidá a l'aición política de persones que nun lo merecen y que deberíen tar totalmente desaniciaes nel alderique políticu asturianista.

    Pretender intentar colanos a Mariu Arbesú, Daniel Cueli o Paulu Arboleya como dalgo ayeno a les práctiques seutaries del to amigu Marcos Abel, ye d'ilusos.

    El tren púnxose en marcha fai tiempu, hailu que xubió, hailu quien nunca se quiso xubir y quedó na estación. Ye una falta de respeutu pola to parte, David, pidir xenerosidá pa con quien fizo tolo posible pa que descarrilare.

    ResponderEliminar
  11. Yo tengo una pequeña esperanza en que la xente de Noreña y dalgunos otros peguen un puñetazu na mesa y ruempan con Marcos Abel y la xente que lu arrodia. Ya instisto que ye pequeña la mio esperanza, pues veolo casi imposible. De la so mano ta.

    A traviés de lo d'Atracu Astur asoleyaronse munches coses de quien ye cada quien y lo que fain. A la fin aceuten reconocer el despíu d'aquel rapaz como improcedente y van a paga-y un añu de cotización. Tien coyones que quien tola vida uso l'eslogan esi de "Independencia y Socialimu" namás que pa llevantar muries ente los distintos grupos entame estes histories coles persones a les que emplega llaboralmente y tien coyones que los sos acólitos de Noreña y Villaviciosa callen como afogaos. Esta ye la ocasión, y non otra, de demostrar que se pue cuntar con ellos.

    Creo que'l tren pue facer dalguna parada pa recoyer a della xente si les sos intenciones son buenes, pero han demostralu. Aquel Conceyu Abiertu pue ser un pasu, pero cola desconfianza de toos hacia ellos ye tovía mui insuficiente, porque, nun se pue dexar de llau esti argumentu: los que tienen que convencer que rialmente quieren una xuntanza son ellos, los demás ya lo ficieron, y depués de tolo pasáu los pasos que tienen que dar son munchos y grandes.

    ResponderEliminar
  12. Como cuasi siempres hai traces de razón en munches posiciones. Prometí nun falar deles dos andeches o como queráis llamalo, pero nun teo otru remediu que facer otra cosa. Yo nun creo invisible a dengún sector, namás que nun me gusta falar nos términos nos que se fala normalmente.

    Nel congresu d'UNA tuve falando bastante, tolo que da una xinta ya una sobremesa, con esos "invisibles" y siempres falé como siempres lo fixéramos,
    como collacios d'Andecha dementres seis o ocho años.

    Presténme, daveres, estos últimos post, anque me zumbáis un tanto, por más que con respetu y, en delles ocasiones, ciertu cariñu. Si queremos de verdá que les coses cambien ye mui útil falar claro, inclusive ponese coloraos dalguna qu'otra vuelta. Eso ye lo que pretendí abrir con dellos artículos nesti blogue y voi siguir faciéndolo.

    Munches vegaes dicimos que de los erros dapréndese, anque Hegel escribió que la historia namás mos enseña que nun daprendemos nada de la historia. Como yo toi al marxe de la mayor parte les coses, doime por satisfechu si contribuyo a abrir un debate que siempres circuló como bilordiu cantineru o en foros d'internet faltones ya insultantes.

    Les visiones de caún nun son sólo personales, tienen anicios, condicionantes y zunes de toa triba. Precisamente'l pensamientu críticu ye'l que permite facer el exerciciu que tamos faciendo. Ya ye curioso que los analises qu'aporten a esti blogue son toos d'una mesma llínia. Eso sí ye significativo y desplica munches coses, non toes pero munches.

    ResponderEliminar
  13. El monstru les galletines24 de marzo de 2010, 10:14

    Taba pensando si pagaba la pena escribir equí daqué cincante a lo que se fala, más bien pienso que non, pero dao que güei dexe’l Zero nel hangar namás quería dicir a los candasos dalgo: por favor, dexai de soltar eso que repitís nos últimos tiempos:

    “El procesu d'unificación siguió p'alantre con munchu esfuerzu y grandes costes personales pa dalgunos”.

    Sona abondo farisaico viniendo de daquién que nun amosó nin llealtá, nin compañerismu, nin solidaridá nin valentía pa con esos dalgunos. Too ello al meyor tanta causa como les griesques del coste habíu, ési que despachais con tan poques pallabres, d’otra banda normal nun partíu-tampax: “que nun se mueva, que nun se note, que nun trespase”.

    Los de MAF nun tendrán credibilidá por comportamientos históricos equis, pero los otros tampoco: primero hai que ganala y, fuera de la rede, les espectatives que munchos punxeron en proyeutos nuevos tan gastaes y estiñíes. Podeis creyelo o non, pero nun tendríeis duldes si tuviéreis un mínimu de contautu cola esquierda real, y esi contautu ye ínfimu. Pásavos un pocu como a los personaxes de Pirandello, que nun sois conscientes de la imaxe que dais al espectaor, que nun ye precisamente’l garrapiellu de xente de determinaes páxines web.

    Camentais que vais poder atopar atayos cola propaganda mediática, o que’l trabayu van facévoslu foriatos d’otres tierres, y non, el trabayu hai que facelu equí, pero eso nun se consigue si partimos d’una metá de miéu y otra de pereza.

    Y ensin más despídese dalguien que torna al manicomiu onde polo visto tan los cuerdos (curiosa unanimidá que los unos me llamaren “majara” y los otros dixeren que tinía puestu un embudu na tiesta).

    Haiga salú.

    ResponderEliminar
  14. Solo un matiz qu'apurro ensin ser del conceyu de Carreño: supongo, Monstruu de les Galletines, que'l nacionalismu d'izquierda nel to conceyu puede servir d'exemplu a los nacionalistes d'izquierdes de Carreño ¿non? Nun hai más que ver como tan les coses a nivel organizativu, d'implicación, de repercusión y de representación institucional en Carreño y nel restu de conceyos d'Asturies onde "esiste" el nacionalismu d'izquierda.

    ¿A que izquierda "real" te refieres? A la xente qu'usa les sigles d'Andecha? al PCPE que dempués de frayar en dos parez que vuelve a frayar en dos? a los d'Iniciativa Internacionalisa enviendo aquel mapa d'Asturies que talo parecía una madreña? Camiento qu'hai que relativizar munchu les coses en tolo que cinca a la izquierda "real" porque da pena venos a toos.

    Toi esperando les tos recetes máxiques p'aplicales al mio conceyu.

    ResponderEliminar
  15. Monstru les galletines24 de marzo de 2010, 11:16

    Anónimu, evidentemente tu nun tienes nin idea de quien soi, a diferencia de los candasos, porque si lo supieres al meyor preferíes nun facer esi tipu d'entrugues, nun vaiga ser que nun te presten les rempuestes. Ye lo que tenemos los kamikazes.

    Y como esto me resulta d'una aburrición tremenda y too lo que tinía que dicir yá lo dixe onde y cuando correspondía, lo dicho, marcho pal manicomiu.

    Alón.

    ResponderEliminar

Publicar un comentario