Homenax a un “Grande d’Asturies”

Díeron-y un merecíu homenax a García Arias nes xornaes científiques cellebraes n’Uviéu esta selmana. Nun pude tar ellí y bien que me prestaríe, pero compromisos y deberes arreyaos al mio trabayu torgáranme la posibilidá. Escribo estes lletres dende Liubliana, la lluminosa capital d’Eslovenia.

Supongo que García Arias arrecibiríe l’otru día’l reconocimientu de filólogos, estudiantes ya eruditos de les rames del saber nes qu’elli trabayó tanto. Evidentemente, nun faltaríe la consideranza por tolo fecho a favor de la llingua asturiana, pola so presencia nel mundiu académicu, pola so consideranza como llingua respetable y respetada. Y tampoco s’escaecería un granible llabor universitario. Porque, digamos lo que digamos y pongámosmos como mos pongamos, poco ye pa falar de García Arias ya emponderar el so trabayu, tantes vegaes silente, tantes vegaes arrequexáu.

García Arias ye’l nome central de la filoloxía asturiana, non namái que contemporánia, sinon de tolos tiempos. Hasta onde yo pueo llegar nestes materies véolu como la clave bóveda de l’arquitectura fecha nes tres o cuatro últimes décades na investigación sobro l’asturiano. Pero García Arias tamién fora un militante na política cultural más apegada a la cai, un nacionalista “avant la lettre”, que sacrificó carrera docente y renta por defender aquello no que creyía. Alfrentose al “stablishment” de la endogámica y “joseantoniana” universidá uvieína y machucáranlu bien amachucáu. Cabezón ya intransixente, como bon asturianu cuando sabe o creye saber que tien razón, tamién tuvo les suyes cola xente más cercano. Hasta comigo dalguna vuelta qu’otra.

Yo nun soi filólogu pero viviera más debates de los que les mios débiles lluces yeren a illuminar. Supe de García Arias cuando yera poco más que neñu. Yeren les dómines postreres del franquismu ya yo taba estudiando’l bachiller nel Colexu la Inmaculada, en Xixón. Un xesuita aragonés, Paco Zanuy, mui cercanu a les posiciones de xente como José Antonio Labordeta ya Emilio Gastón, llevaba les páxines de “Conceyu Bable” de la revista “Asturias Semanal” a clase y aldericábamos al rodiu d’ello. Pa mín aquello fora, non como una madalena proustiana, sinon como una cayía paulina camín de Damasco. La mio familia yera asturfalante, peles dos partes, anque más pela paterna, afinxada nel conceyu de Villaviciosa, conceyu del que siempres yo me considerara y nel que sigo viviendo. L’asturiano yera la mio llingua patrimonial pero, evidentemente, nun lo escribía, anque sí lo lleía, por mor de l’afición del mio güelu Manolo a la poesía “bable”. Tovía soi capaz de recitar enteru’l “Andalucía y Asturies” de Diego Terrero y Teodoro Cuesta.

El casu ye que discutíamos en clase aquelles opiniones de Conceyu Bable, básicamente les de García Arias (Aries), Sánchez Vicente (El Roxu) y Álvarez (Texuca). Voi aprovecer esti recuerdu a García Arias pa facer una semeya sociolóxica d’aquellos momentos. Nun me recuerdo muncho de lo dicho entóncenes pero sí de que fuéramos yo ya’l cura aragonés los que más puxu fixéramos en defensa d’aquella “babayada”, como calificaben a la iniciativa una bona parte de los “sensatos y pensantes” d’aquel tiempu. Tamién yera mui partidariu un compañeru que se llamaba Ruperto González, significativamente l’únicu que, como yo, tinía la familia n’aldega. Vivía en Llavandera y l’asturiano yera tamién la so llingua familiar.

Pero lo que yera cosa llamativo ye que, polo xeneral, los más comprensivos cola recuperación llingüístico (entóncenes nun se falaba con estos términos) pente los estudiantes yeran los “ricos”, cuasi toos fíos de families asturianes más qu’acomodaes. Los chavales de clases medies (de xente trabayadora poco había, la verdá, porque toi falando de los primeros setenta y d’un colexu xesuita de pago) sopelexaben una perceguera pa cola llingua asturiana tremenda. Tamién ye verdá que munchos d’estos compañeros de mio yeran fíos d’emigrantes, xente que nun pescanciaba un res y que taba n’Asturies como taría en Cataluña o en Sebastopol. Dalgunos inclusive amosaben un odiu irracional a lo asturiano, una perceguera a too aquello propio d’un país que los acoyía xenerosamente, cosa que nun hai d’escaecer cola argumentación de que creaben bayura. Esa circunstancia provocó que yo ya otros como yo acabáramos por considerar a esos castellanos, andaluces o estremeños como xente intratable y poco fiable. Ya ye que neses discusiones colexales daprendí lo que yera la represión cultural exercía polos que dicen carecer represión social. Porque los neños que viníen de fuera, siempres lloramicando por ser unos “probes emigrantes” ya echando de menos a la familia, imponíenmos la so forma de falar y, amái, taben respaldaos polos cures y polos profesores, foriatos bona parte d’ellos, sacantes l’aragonés Paco Zanuy o’l piloñés Vicente González-Cutre, los dos xesuites. Ya esta observación que faigo nun ye daqué anecdótico porque la mio promoción ye la que, básicamente, ta gobernando n’Asturies. Nun ye casualidá l’asturfobia que mos tien empodrellaos.

Vuelvo a García Arias. Tuve con elli por primera vegada na primavera de 1977. Alcuérdome perfechamente. Pa mín yera, non un dios, pero cuando menos un profeta. Yo tinía diecinueve años. Cenamos n’El Garabatu, en Madrid, na cai Echegaray. El chigre tinía un reservau pequeñucu, con una mesa reonda mui grande, onde pa qu’unu saliere a mexar, pongo por casu, tiníamos que llevantamos tóos. Ellí tábamos, paezme recordar, amás d’Arias ya yo, Pín Álvarez, Fonsu Velázquez, Antón Fuertes, Xulio Llaneza, Carme Tineo, Xuan Cándano, Taulfu Gamonal, Alfréu Huergo, Celia Verdasco ya de xuru que dalguién más que nun me recuerdo.

A mín préstame pensar qu’ellí, delantre d’unes cebolles rellenes impresionantes ya un pulpín con pataquines campanudu, s’apautó l’academia asturiana. Sé que nun ye verdá pero aquella cena toviera una gran importancia na evolución de la normativización de la llingua. Ellí los occidentales, los de la “pesicia”, nun xeitu de xenerosidá y de patriotismu, capitularon. Yo, oriental de la costa, callaba, pero bien pensaba que la xente del occidente –Arias mesmu- taba enquivocándose. Demientres dos años más munchos “pésicos” de Madrid resistieron ya insistieron, pero cuando Pin, mui influyíu por Roberto González-Quevedo, aceutó la normativa como académicu cuerrespondiente –nun consideraran que’l so curriculum yera suficiente pa ser de númberu, por más que sí lo fixeran con cantantes y con dalgún profesor que, entá güei, sigui ensin saber falar asturiano-, los conceyeros de la capital del reinu, lleales y disciplinaos, obedecimos como militares.

Dempués d’esos aconceyamientos los de Conceyu d’Asturies arrenunciamos a la nuesa grafía y a los nuesos criterios filolóxicos, que yeran, sígolo pensando, muncho más racionales que los españolizaos a lo xole que güei tenemos como estándar. Anguaño, dempués de tantos años, pienso que mos enquivocamos, ya, especialmente, enquivocáranse los representantes de los conceyos occidentales. Pero García Arias consiguió un sofitu mui importante, el de la diáspora madrilana, un grupu –na mio parcial ya interesada opinión- de lo meyor de lo qu’entós había.

Pero’l casu ye que yo siempres, dende aquello y de muncho enantes, tuvi a García Arias como un referente. Y, voi dicir la verdá, sigo viéndolu asina. Na mió opinión, metiera la pata una montonera veces, “cagola” –permítaseme’l términu- otres cuantes. Pero la delda qu’Asturies y los asturianos tenemos con García Arias ye impagable. La historia d’esti país nun se va poder escribir ensin García Arias. Los vientos de Clio nun dexarán nada d’Álvarez Areces nin de Gustavo Bueno, pero sí d’esti teverganu d’urel.la l.larga. García Arias ta al altor de los nuesos grandes ilustraos, los Xovellanos, los Flórez Estrada, los Campillo, los Argüelles.

García Arias ye tamién un exemplu escontra esa plaga’l “cosmopaletismu” que tanto ta torgando la nuesa progresión identitaria, esa xentaca que, nel so fuelgu, odia lo de nueso y siempres gueta conocimientos y saberes variopintos en púlpitos ayenos y que, inclusive, escribe na llingua d’un pueblu al que desprecia. Pela so banda, Arias ye “universal” porque ye un filólogu reconocíu internacionalmente, un “hermanu de la gran loxa de los romanistes”, un intelectual valoráu en Nueva York, en Berlín o en Roma. Pero, a una mesma vegada, ye reconocíu y, riba tóo, conocíu, en Teverga, Cabrales o Castropol. Va del llar a la cátedra y de la cátedra al llar y hai quien lu vio, dalguna qu’otra vegada, dir a la herba.

Dalguna crítica tendré de facer. Pienso que García Arias echose delles vegaes nos brazos d’un maquiavelismu de campanariu xabazmente mediocre que vía una Asturies que nun yera la rial, una llínia política mui poco nacional ya un tanto muncho al estilu de la esquierda xacobina española. Eses influences lleváronlu en más d’una ocasión a adoutar postures que dende sectores dafechamente patriotes pescanciáranse, con dolor, como la incomprensión ya’l desapegu d’un presidente l’Academia al que consideraben con razón –al que considerábamos- ún de los suyos. Tamién se-y puede censurar, paralelamente y d’un mou aparentemente paradóxicu, una zarrazón erma en delles ocasiones.

El mayor desalcuentru que yo toviera coles posiciones de García Arias nun fora mui sonáu. Pero nun lo fora porque l’asturianismu, con esceiciones notables, nun ta avezáu a esponer con claridá les sos postures y prefier empiesllase na complacencia doméstica de los amigos. Pero, como, por suerte o por desgracia, esti mundiu ye un pañuelu y Asturies una esquinina d’ello, too acaba por sabese. Valoré con dureza la posición de l’Academia o, por ser más precisos, de la dirección de l’Academia, cuando los conflictos de les plataformes dirixíes por una Izquierda Unida gobernante col PSOE, d’un llau, y d’Andecha Astur, del otru, una Andecha Astur onde yo taba como cabeza ellectoral. Y nun fixera esa valoración negativa pola, na mio opinión, posición partidista de la más alta institución llingüística, sinon porque nunca quixo arrecibimos a nosotros, tomando les sos decisiones ensin escuchar les nueses argumentaciones, precisamente les de los que siempres, dende trenta años atrás, defendiéremos la oficialidá de la llingua ensin reserva mental denguna.

Pero nada de tolo anterior implica un cambéu na mio opinión xeneral sobro Arias. Porque García Arias ye lo que ye, paisano, y pa min un “paisano” ye lo más sacrao. Gracies, Arias, munches gracies. Lo qu’esti pueblu que nun quier dexar de ser nación te debe ye tanto que, como dicíen los antigos babilonios, “nin tansiquier ta n’escritures”. Dalgunes persones tendrán un títulu nobiliariu heredáu d’un antepasáu que fixera coses mui importantes, delles vegaes quemar una ciudá o pasar a cuchiellu a los sos habitantes, que de tóo hai na nobleza. Pero pocos son los homes reconocíos como “grandes” polos sos contemporánios. Xosé Lluis García Arias ye un “Grande d’Asturies”.

Como cantaba Xune Elipe colos gallegos Os Diplomáticos n’aquel estraordinariu discu de “L’asturianu muévese”, “García Arias… ¡gaiteru!”.

Imprimir