Homenax a un “Grande d’Asturies”


Díeron-y un merecíu homenax a García Arias nes xornaes científiques cellebraes n’Uviéu esta selmana. Nun pude tar ellí y bien que me prestaríe, pero compromisos y deberes arreyaos al mio trabayu torgáranme la posibilidá. Escribo estes lletres dende Liubliana, la lluminosa capital d’Eslovenia.
Supongo que García Arias arrecibiríe l’otru día’l reconocimientu de filólogos, estudiantes ya eruditos de les rames del saber nes qu’elli trabayó tanto. Evidentemente, nun faltaríe la consideranza por tolo fecho a favor de la llingua asturiana, pola so presencia nel mundiu académicu, pola so consideranza como llingua respetable y respetada. Y tampoco s’escaecería un granible llabor universitario. Porque, digamos lo que digamos y pongámosmos como mos pongamos, poco ye pa falar de García Arias ya emponderar el so trabayu, tantes vegaes silente, tantes vegaes arrequexáu.
García Arias ye’l nome central de la filoloxía asturiana, non namái que contemporánia, sinon de tolos tiempos. Hasta onde yo pueo llegar nestes materies véolu como la clave bóveda de l’arquitectura fecha nes tres o cuatro últimes décades na investigación sobro l’asturiano. Pero García Arias tamién fora un militante na política cultural más apegada a la cai, un nacionalista “avant la lettre”, que sacrificó carrera docente y renta por defender aquello no que creyía. Alfrentose al “stablishment” de la endogámica y “joseantoniana” universidá uvieína y machucáranlu bien amachucáu. Cabezón ya intransixente, como bon asturianu cuando sabe o creye saber que tien razón, tamién tuvo les suyes cola xente más cercano. Hasta comigo dalguna vuelta qu’otra.
Yo nun soi filólogu pero viviera más debates de los que les mios débiles lluces yeren a illuminar. Supe de García Arias cuando yera poco más que neñu. Yeren les dómines postreres del franquismu ya yo taba estudiando’l bachiller nel Colexu la Inmaculada, en Xixón. Un xesuita aragonés, Paco Zanuy, mui cercanu a les posiciones de xente como José Antonio Labordeta ya Emilio Gastón, llevaba les páxines de “Conceyu Bable” de la revista “Asturias Semanal” a clase y aldericábamos al rodiu d’ello. Pa mín aquello fora, non como una madalena proustiana, sinon como una cayía paulina camín de Damasco. La mio familia yera asturfalante, peles dos partes, anque más pela paterna, afinxada nel conceyu de Villaviciosa, conceyu del que siempres yo me considerara y nel que sigo viviendo. L’asturiano yera la mio llingua patrimonial pero, evidentemente, nun lo escribía, anque sí lo lleía, por mor de l’afición del mio güelu Manolo a la poesía “bable”. Tovía soi capaz de recitar enteru’l “Andalucía y Asturies” de Diego Terrero y Teodoro Cuesta.
El casu ye que discutíamos en clase aquelles opiniones de Conceyu Bable, básicamente les de García Arias (Aries), Sánchez Vicente (El Roxu) y Álvarez (Texuca). Voi aprovecer esti recuerdu a García Arias pa facer una semeya sociolóxica d’aquellos momentos. Nun me recuerdo muncho de lo dicho entóncenes pero sí de que fuéramos yo ya’l cura aragonés los que más puxu fixéramos en defensa d’aquella “babayada”, como calificaben a la iniciativa una bona parte de los “sensatos y pensantes” d’aquel tiempu. Tamién yera mui partidariu un compañeru que se llamaba Ruperto González, significativamente l’únicu que, como yo, tinía la familia n’aldega. Vivía en Llavandera y l’asturiano yera tamién la so llingua familiar.
Pero lo que yera cosa llamativo ye que, polo xeneral, los más comprensivos cola recuperación llingüístico (entóncenes nun se falaba con estos términos) pente los estudiantes yeran los “ricos”, cuasi toos fíos de families asturianes más qu’acomodaes. Los chavales de clases medies (de xente trabayadora poco había, la verdá, porque toi falando de los primeros setenta y d’un colexu xesuita de pago) sopelexaben una perceguera pa cola llingua asturiana tremenda. Tamién ye verdá que munchos d’estos compañeros de mio yeran fíos d’emigrantes, xente que nun pescanciaba un res y que taba n’Asturies como taría en Cataluña o en Sebastopol. Dalgunos inclusive amosaben un odiu irracional a lo asturiano, una perceguera a too aquello propio d’un país que los acoyía xenerosamente, cosa que nun hai d’escaecer cola argumentación de que creaben bayura. Esa circunstancia provocó que yo ya otros como yo acabáramos por considerar a esos castellanos, andaluces o estremeños como xente intratable y poco fiable. Ya ye que neses discusiones colexales daprendí lo que yera la represión cultural exercía polos que dicen carecer represión social. Porque los neños que viníen de fuera, siempres lloramicando por ser unos “probes emigrantes” ya echando de menos a la familia, imponíenmos la so forma de falar y, amái, taben respaldaos polos cures y polos profesores, foriatos bona parte d’ellos, sacantes l’aragonés Paco Zanuy o’l piloñés Vicente González-Cutre, los dos xesuites. Ya esta observación que faigo nun ye daqué anecdótico porque la mio promoción ye la que, básicamente, ta gobernando n’Asturies. Nun ye casualidá l’asturfobia que mos tien empodrellaos.
Vuelvo a García Arias. Tuve con elli por primera vegada na primavera de 1977. Alcuérdome perfechamente. Pa mín yera, non un dios, pero cuando menos un profeta. Yo tinía diecinueve años. Cenamos n’El Garabatu, en Madrid, na cai Echegaray. El chigre tinía un reservau pequeñucu, con una mesa reonda mui grande, onde pa qu’unu saliere a mexar, pongo por casu, tiníamos que llevantamos tóos. Ellí tábamos, paezme recordar, amás d’Arias ya yo, Pín Álvarez, Fonsu Velázquez, Antón Fuertes, Xulio Llaneza, Carme Tineo, Xuan Cándano, Taulfu Gamonal, Alfréu Huergo, Celia Verdasco ya de xuru que dalguién más que nun me recuerdo.
A mín préstame pensar qu’ellí, delantre d’unes cebolles rellenes impresionantes ya un pulpín con pataquines campanudu, s’apautó l’academia asturiana. Sé que nun ye verdá pero aquella cena toviera una gran importancia na evolución de la normativización de la llingua. Ellí los occidentales, los de la “pesicia”, nun xeitu de xenerosidá y de patriotismu, capitularon. Yo, oriental de la costa, callaba, pero bien pensaba que la xente del occidente –Arias mesmu- taba enquivocándose. Demientres dos años más munchos “pésicos” de Madrid resistieron ya insistieron, pero cuando Pin, mui influyíu por Roberto González-Quevedo, aceutó la normativa como académicu cuerrespondiente –nun consideraran que’l so curriculum yera suficiente pa ser de númberu, por más que sí lo fixeran con cantantes y con dalgún profesor que, entá güei, sigui ensin saber falar asturiano-, los conceyeros de la capital del reinu, lleales y disciplinaos, obedecimos como militares.
Dempués d’esos aconceyamientos los de Conceyu d’Asturies arrenunciamos a la nuesa grafía y a los nuesos criterios filolóxicos, que yeran, sígolo pensando, muncho más racionales que los españolizaos a lo xole que güei tenemos como estándar. Anguaño, dempués de tantos años, pienso que mos enquivocamos, ya, especialmente, enquivocáranse los representantes de los conceyos occidentales. Pero García Arias consiguió un sofitu mui importante, el de la diáspora madrilana, un grupu –na mio parcial ya interesada opinión- de lo meyor de lo qu’entós había.
Pero’l casu ye que yo siempres, dende aquello y de muncho enantes, tuvi a García Arias como un referente. Y, voi dicir la verdá, sigo viéndolu asina. Na mió opinión, metiera la pata una montonera veces, “cagola” –permítaseme’l términu- otres cuantes. Pero la delda qu’Asturies y los asturianos tenemos con García Arias ye impagable. La historia d’esti país nun se va poder escribir ensin García Arias. Los vientos de Clio nun dexarán nada d’Álvarez Areces nin de Gustavo Bueno, pero sí d’esti teverganu d’urel.la l.larga. García Arias ta al altor de los nuesos grandes ilustraos, los Xovellanos, los Flórez Estrada, los Campillo, los Argüelles.
García Arias ye tamién un exemplu escontra esa plaga’l “cosmopaletismu” que tanto ta torgando la nuesa progresión identitaria, esa xentaca que, nel so fuelgu, odia lo de nueso y siempres gueta conocimientos y saberes variopintos en púlpitos ayenos y que, inclusive, escribe na llingua d’un pueblu al que desprecia. Pela so banda, Arias ye “universal” porque ye un filólogu reconocíu internacionalmente, un “hermanu de la gran loxa de los romanistes”, un intelectual valoráu en Nueva York, en Berlín o en Roma. Pero, a una mesma vegada, ye reconocíu y, riba tóo, conocíu, en Teverga, Cabrales o Castropol. Va del llar a la cátedra y de la cátedra al llar y hai quien lu vio, dalguna qu’otra vegada, dir a la herba.
Dalguna crítica tendré de facer. Pienso que García Arias echose delles vegaes nos brazos d’un maquiavelismu de campanariu xabazmente mediocre que vía una Asturies que nun yera la rial, una llínia política mui poco nacional ya un tanto muncho al estilu de la esquierda xacobina española. Eses influences lleváronlu en más d’una ocasión a adoutar postures que dende sectores dafechamente patriotes pescanciáranse, con dolor, como la incomprensión ya’l desapegu d’un presidente l’Academia al que consideraben con razón –al que considerábamos- ún de los suyos. Tamién se-y puede censurar, paralelamente y d’un mou aparentemente paradóxicu, una zarrazón erma en delles ocasiones.
El mayor desalcuentru que yo toviera coles posiciones de García Arias nun fora mui sonáu. Pero nun lo fora porque l’asturianismu, con esceiciones notables, nun ta avezáu a esponer con claridá les sos postures y prefier empiesllase na complacencia doméstica de los amigos. Pero, como, por suerte o por desgracia, esti mundiu ye un pañuelu y Asturies una esquinina d’ello, too acaba por sabese. Valoré con dureza la posición de l’Academia o, por ser más precisos, de la dirección de l’Academia, cuando los conflictos de les plataformes dirixíes por una Izquierda Unida gobernante col PSOE, d’un llau, y d’Andecha Astur, del otru, una Andecha Astur onde yo taba como cabeza ellectoral. Y nun fixera esa valoración negativa pola, na mio opinión, posición partidista de la más alta institución llingüística, sinon porque nunca quixo arrecibimos a nosotros, tomando les sos decisiones ensin escuchar les nueses argumentaciones, precisamente les de los que siempres, dende trenta años atrás, defendiéremos la oficialidá de la llingua ensin reserva mental denguna.
Pero nada de tolo anterior implica un cambéu na mio opinión xeneral sobro Arias. Porque García Arias ye lo que ye, paisano, y pa min un “paisano” ye lo más sacrao. Gracies, Arias, munches gracies. Lo qu’esti pueblu que nun quier dexar de ser nación te debe ye tanto que, como dicíen los antigos babilonios, “nin tansiquier ta n’escritures”. Dalgunes persones tendrán un títulu nobiliariu heredáu d’un antepasáu que fixera coses mui importantes, delles vegaes quemar una ciudá o pasar a cuchiellu a los sos habitantes, que de tóo hai na nobleza. Pero pocos son los homes reconocíos como “grandes” polos sos contemporánios. Xosé Lluis García Arias ye un “Grande d’Asturies”.
Como cantaba Xune Elipe colos gallegos Os Diplomáticos n’aquel estraordinariu discu de “L’asturianu muévese”, “García Arias… ¡gaiteru!”.

Comentarios

  1. Políticamente, foi'l que plantegó la necesidá d'una fuerza política radical no asturiano y moderada no social, que tovía güei ye oxetu de xirigoncia por bastante xente. Tamién plantegó que si s'entra en política ye pa ganar, non pa facer testimonialismu. Quiciabes pola incomprensión y hasta mofla de la so postura, nun se decidiere a dar el pasu nesti terrén. El camín escoyíu per una parte bien importante de los qu'autodefinen como nacionalistes foi y ye xustamente'l contrariu: radical no social y moderada no asturiano. Y los resultaos d'esto, dempués de trenta años, tán ehí pa velos los que quieran. Llingüísticamente, ye toa una eminencia nel estudiu de la nuestra llingua y endagora pue apurrinos trabayos perimportantes y granibles per munchos años. Esixímos-y tamién que desendolcare xera política, pero quiciabes eso foi pidi-y muncho yá. Nun podía tar, nin lo pue, en toles estayes, y los de so ye'l llabor llingüísticu. Yo tamién me tocó discrepar y discutir con él na dómina de Conceyu Bable, pero cola distancia de los años teo de reconocer que foi y ye un paisanu, non como otres sacaveres que conocí y conozo que busquen el so porgüeyu y mangoniar dayures pa esguilar. Prestóme la to entrada. Y nun sigo porque podría enrollame col tema tola nueche y nun ye plan...

    ResponderEliminar
  2. Escaeciérame intencionadamente de la vertiente política (sacantes pa falar de la mayor discrepancia que tuvimos, non pente nós concretamente, sinon pente dos opciones), pero ye mui importante eso que comentes de cómo Arias pescanciaba una posible vía nacional. Camiento que s'enquivocó nos términos. Lo de "moderao" no social cayía mal ya yera comprensible. Yo mesmu, que siempres tuvi nel bandu de los "enantes el conceptu de nación", nun me consideraba "moderáu" no social. Ye más, sigo siendo mui poco moderáu no social. Pero -ya ehí ta la clave- prefiero asumir contradicciones sociales que nacionales, a lo menos nesti momentu históricu. Esa fras de "moderao en y radical en" fora mal interpretada dende l'entamu. ¿O ye que vamos considerar a Arias como un home de dreches?. Nunca Arias me dixo lo que votaba, pero si fixéramos una apuesta yo arriesgaría una bona cantidá d'euros porque camiento que diba acertar.

    Y bona nueche, que yá ye hora. Tuve un poco de cuchipanda, dempués d'una selmana enforma complicada.

    ResponderEliminar
  3. Prestame muncho esti artículu que ficisti sobre Arias, que d'otra banda bien merecío lo tien.Yo tengo a Garcia Arias na mas alta de les estimes tanto no profesional como no personal , como toos conocemos la historia nun voi repetir lo que ye sabio .Arias ye "un paisano" y un patriota , colos sos defeutos y virtúes(munches) como toos nos ,les veces que lu trate ya que-y pidi conseyu foi amable y candial a mas nun poder.Nun lo voi negar soi un home qu'admira a Arias(Arianista confesu jaja) por tola so trayectoria y el so trabayu en bien de la llingua, la cultura y la nación Asturiana .
    No político creo que fuimos toos un poco inxustos con elli , siempre quiximos qu'Arias "se moyase" y qu'encabezare una alternativa nacional (que fuere'l nuesu Beiras por poner un exemplu).Arias dixo na cena de los 10 años de CB hacia l'añu 86 u 87 si nun me falla la memoria , que carauteristiques tenia que tener esa fuercia política (radical no asturiano y moderao no social) , eso munchos nun lo entendimos entós cosa normal cuando un tien ventipocos años y fierve'l sangre.Güei munchos de nos ya lo vamos viendo . Hai quien llego a poner en dubia'l so patriotismu y el compromisu pa col país , cosa que ya s'encargo elli de dexar pa prau cola xera fecha en toos estos años.
    Pa terminar quiero contar una anécdota ,coincidi con Arias el día de la declaración d'oficialidá del asturianu en Biemenes.Habíen pasao mas de venti años de llucha y paecía que la cosa entamaba a frutiar ,vímonos y dímonos la mano los dos tábamos percontentos yo dixe-y Arias esto paez qu'entaina y el con esa zuna Tebergana amosó delles dubies . Entós dixe-y mira vamos esfrutar esti momentu como'l nuesu,el que nos toca vivir como una victoria ya que barrunto que pa la declaración d'independencia nun vamos tar aquí .Los dos nos reimos y volvimos danos la mano , creo que nesi momentu los dos pensamos nesa estrofa del Canto a la libertad de Labordeta que diz :
    También será posible
    Que esa hermosa mañana
    Ni tú, ni yo, ni el otro
    La lleguemos a ver
    Pero habrá que empujarla
    Para que pueda ser

    Churchill

    P.D. Como s’entere'l profesor qu'escribes Teberga con V vas topalo

    ResponderEliminar
  4. Lo que son les coses. Cuando miramos patrás nun son munchos los que "se portaron" tola so vida. Colos errores y defeutos que tol mundu tien y cola nula esperiencia que se trayía hubo xente que brengó muncho y bien, xente que nunca escaeció'l país, que nunca se rindió, que nunca se vendió. Y toos ellos tienen un perfil asemeyau. Dos d'ellos tenémoslos güei equí: l'home homeaxeau y l'home qu'escribe l'homenaxe. Exemplar y emotivo. Gracies, Arias, y gracies Rivas. Gracies a los que siguís siendo "de los nuestros".

    ResponderEliminar
  5. Sigo'l to blogue a menudo anque nun suelo tar d'alcuerdu contigo en delles coses, pero pémeque esti testu ye un de los meyores que fixeres y amuesas lo que munchos (de detremaes xeneraciones) pensamos sobro Arias, la normativización, l'Academia y toa esa xeneración primera y segunda d'asturianistes que llevantestis too esto.

    Nun penséis que too eso cayó en sacu rotu, porque equí tamos los más mozos sollertes a toos vosotros y dispuestos a garrar el relevu cuando seya mester.

    Tuvi la suerte de tar nel homenax y emocionéme cola clara defendesa del país que fixo y la crítica al Plan Boloña (plan que toi careciendo n'estáu puru). Radical no nancional y moderao no social; tampoco lo entendía mui bien, pero'l xueves dexólo bien claro. Enantes de nada somos asturianos y hai que ser paisanos.

    Pa finar prestaríame entrugate polo que fales de los occidentales. ¿En qué s'enquivocaron? ¿N'arrenunciar a les particularidaes propies a la de facer la normativa? Paezme un apunte interesante y prestábame que m'esclariares a qué te referíes en concreto.

    Un saludu.

    ResponderEliminar
  6. Paezme qu'esti filu va impartir xusticia. Esta xente de la que tamos falando lluchó partiendo de la nada, tuvo qu'inventalo too, con cuatro coses estudiaes y muncho de tradición oral y popular. Porque si nos fixamos tamién tienen otru rasgu común: intelectuales y profesores reconocíos en munchos sitios del mundu y ninguneaos pola probe y fachona universidá asturiana. A la vez persones mui apegaes a lo tradicional, a lo popular. Son, dizlo mui bien David Rivas, tolo contrario del "cosmopaletismu" de los grupinos que toos sabemos.

    ResponderEliminar
  7. Churchill: podía dicite que lo de Teverga foi cosa'l correutor automáticu, pero non, foi un erru. De toles formes sé bien que ye Teberga.

    Igual tienes razón colo de que se-y pidió demasiao a Arias, pero tamién ye verdá qu'elli xugó a l'ambigüedá munches veces, no tanto nos ochenta (cuando'l décimu aniversariu de Conceyu Bable) pero sí nos noventa. Vivilo yo de primera mano ya inclusive-y fixe una crítica pública nuna entrevista, la primera na mio vida y que me supunxo un encontronazu de pensamientos.

    Pelayu: si yes el Pelayu que t'enfadaste comigo hai un añu ya escribiste que nunca más me dibes lleer (teo bona memoria), y creyo que sí lo yes, allégrome muncho de cuntiar contigo otra vuelta. Si yes tu -y creyo, como te digo, que sí- suponía que siguíes lleéndome porque duldio muncho qu'un mozu col to perfil nun siga un blogue como esti, anque nun te guste lo que cuento o que, inclusive, te caiga mal. Viendo como fales d'Arias yes de los que nun pueden dexar de siguir los nuesos debates.

    Ya, otra cosa, el remplazu tien dase yá, porque tien qu'haber converxencia de xeneraciones. A mín preocúpame muncho l'adanismu infantilista, pero tamién ye necesario que la xente mozo trabaye a comuña colos mayulones. La vuesa preparación ye, en bona midía, mayor que la que nosotros tiníamos hay trenta años. Pero eso nun val un res si se pon en práctica espreciando la esperiencia ya'l conocimientu prácticu.

    Polo que respecta a lo de los occidentales, dexámoslo pa otru momentu, pero queda'l mio compromisu.

    Un saludu pa toos.

    ResponderEliminar
  8. Creyes correutamente, pero tuvo que llegar dalquién como Arias pa que volviere a comentar. Tómote la pallabra no del occidental. No demás toi d'alcuerdu contigo que tien qu'haber converxencia xeneracional y que los mayorones han dar pasu y los mozos predender d'ellos, como diz el refraneru "a capar apriéndese cortando coyones".

    Un saludu.

    ResponderEliminar
  9. Nun se de que falen David y Pelayu pero paezme entendelo. David escribió daque, a Pelayo nun -y gustó y dixo que nun lu lleía más. Pero siguió faciéndolo porque esti blogue ye de los imprescindibles. Y agora too normaliza. Ye bona cosa. Casablanca: "esti pue ser l'aniciu d'una bona amistá". Sobre too porque hai respetu, que neso se basa una amistá.

    ResponderEliminar
  10. Yo conocí a pocos de los qu'entamaron esti movimientu y, por amistá con David, casi toos estudiaron o vivieron en Madrid. Pero sí ye verdá que vía nellos una claridá na visión d'Asturies que mas tarde perdiose. ¿Cómo ye que tardamos tanto en danos cuenta de que la posición nacional de los primeros yera la correuta? ¿Onde entamó y porqué la confusión? Esa sedría una bona reflexón pa tí, David. Responder a la entruga d'aquel personaxe lliterariu de Vargas Llosa (tan de moda agora): ¿cuándo se jodió el Perú?

    ResponderEliminar
  11. La entruga de Vampurella ye perbona. Si conseguimos entender bien qué fue lo que pasó igual entamamos otru camín meyor. Pa mi que too "se jodió" cuando una izquierda que nun alcontraba sitiu nel PCE nin nes istituciones vio na cuestión nacional una ocasión. A esa vía tamién s'apuntaran nacionalistes de verdá que yeren d'izquierda. Pero los "históricos" nun lo fixeron o tuvieron siempre en segundu planu. Namás David Rivas diera'l pasu ya mediaos los noventa y nun intentu d'unidá. Pero'l so discursu yera'l mesmu que'l de, por exemplu, el mesmu Arias. Nun miremos pa los mítines, que son pa convencíos, miremos pa los artículos de fondu y pa les intervenciones ideolóxiques. Cuando, unos años después vio qu'aquello yera imposible marchó y sigue col mesmu discursu no básico. De los "históricos" sí tuvo culpa de munches coses Sánchez Vicente, non tanto pol so "centrismu" sinon pol so personalismu incompatible con una opción coleutiva.

    ResponderEliminar
  12. Yo pienso que la cosa entamó a tracamundiase cola desapaición de los conceyos qu'entamaron tou esti asuntu. Emprimando por Conceyu Bable y siguiendo polos de Madrid, Barcelona, Santiago,etc. De mano, nestos conceyos facíase un trabayu doble. D'un llau cultural y llingüísticu y d'otru políticu. Pa entendelo basta con fixase en dos de les reivindicaciones cimeres de Conceyu Bable: "Bable nes escueles" (llingüística) y "Estatutu Autonomía" (política). Cola desapaición d'estos conceyos entama a esbarrumbar adulces colos años tou esi trabayu cultural-políticu ya'l nacionalismu busca sofitos foriatos y copies de plantegamientos d'otros llaos. Otramiente, éntrase al trapu de mensaxes procedentes d'IU y acéptense mensaxes y militancia procedentes de formaciones estraparllamentaries d'izquierda non nacionalista que van desapaeciendo y que busquen abellugu nun nacionalismu asturianu que nun acababa d'alcontrar definitivamente'l so aldu. Y asina hasta güei. Recuerdo tener plantegao va más d'un añu la necesidá retomar aquél trabayu mixtu cultural y políticu pa facer trabayu de base y que sirva de formientu pa la formación de los nuevos nacionalistes asturianos. Falla estrepitosamente la base, los finxos mínimos que tien que perconocer un nacionalista, llegando a esperpentos como tener qu'escuchar a "nacionalistes asturianos" descalificando y hasta insultando ¡a los que reivindiquen el fechu identitariu nacional asturianu!.El colmu del absurdu.Hai una confusión bastante gorda y, poro, discursos como los d'Arias o David llamen l'atención porque tán cimentaos naquelles dómines y son claramente nacionalistes, tolo d'izquierdes que queramos nel segundu casu, pero nacionalistes a fin de cuentes.

    ResponderEliminar
  13. Ties tola razón, Xanu. Ya ye hora de volver a los planteamientos básicos. Vampirella: el nuesu Perú jodiose cola xeneración fata y petulante de los que güei anden polos cuarentaitantos. Esos que saben d'Asturies lo mesmo que yo de lepidópteros. Nun quiero paecer obrerista o eso pero tanta poesía ya eses coses (nun m'entendáis mal qu'a mi la poesía gústame) dexo de llau lo político. Yo soi un currante y nunca me identifiqué con estos señoritingos. Pero sí con señores como Rivas, como Arias, como Quevedo, como Berto Peña (un señor pese a les pintes que gasta). Comparemos nomes y contestemos a tres entrugues: ¿quién conoz Asturies?, ¿quién llucha per ella?, ¿quién piensa nel so futuru?

    ResponderEliminar
  14. La pena ye que nin García Arias nin David Rivas van aceutar encabezar nada. El so gran patriotismu ye comparable al so gran escepticismu. Tan dedicándose al trabayu intelleutual y, sobro too Rivas dende'l so blogue, a opinar sobro lo que ta pasando. Nun ye casualidá qu'esti blogue seya'l más visitáu de tolos escritos n'asturianu ya'l de más entraes con diferencia. Va ser que to'l trabayu d'esta xente va ser el piensu de Valledor, de Palacios, de Zapico, de cualisquier oportunista d'última hora. Pero entá mos dexen estos "vieyos" que nun lo son (Rivas tien 52 años) una más: lleguen aceutar a Valledor si eso sirve pa encadarmar un movimientu. La so xenerosidá ye mui comparable a la so inxenuidá. Nun son nacionalistes, Rivas, nun lo son. Nun lo ye la xente de la UNA y tampoco un terciu d'Andecha. Llamaránte y meteránte nun problema. Sigue firme. Sigue cebando opinión y pasa d'esa xente. Y qu'Arias faiga lo mesmo. Llegarán meyores tiempos. La xente mozo ta con vosotros y non con estos politiquinos de mexar y nun char gota. La vuestra misión (Arias, Rivas, Quevedo) ye otra: caltener esta nación dende onde podais. Vosotros pensáis na patria, ellos nes conseyeríes. Y que conste que yo pienso como Rivas y Arias: hai que presentase pa ganar, hai que gobernar. Pero estos patayos nun quieren gobernar. ¿Qué van facer estos socialcristianos y comunistes con Asturies nes manes? Nada, fundila na "eterna España", que ye de onde son.

    ResponderEliminar
  15. Sandra...va ser que la única nacionalista del mundiu mundial yes tú...
    Ye esti un mal per carauteristicu del nacionalismu astur, el sectarismu de xente como Sandra, que reparte carnés de nacionalismu "fetén" (términu castizu que permítome usar porque me da pola gana).

    Y per otru llau ye una cuestión que nun veo per otros movimientos nacionalistes cercanos...diferencies hailes, pero la crítica básase en aspeutos concretos y prácticos, non en "esencialismos" ridículos y ensin sentíu,vacíos de conteníu, que a lo más que lleguen a precisar ye a tachar de oportunistes a Valledor,Zapico y Palacios.

    Per otru llau, García Arias ,una figura pa la hestoria,nun puedo tar mas d'alcuerdu coles pallabres de Rivas...

    ResponderEliminar
  16. Verdaeramente nun imaxinais lo que dalgunos podeis llegar a tocar les ñarres. Podía dicir quién soi y cuntar lo que pienso, lo que fice, lo que faigo y lo que tengo pensao facer, pero ¿por qué tendría que facelo? ¿Quién sois? Si nin siquier dais los nomes. Nesti mundín solo cuatro gatos lo faen: David Rivas, Ricardo Candás, Carlos X. Blanco y poco más. Llevais una montonera de tiempu pidiendo, desixendo, criticando, camudando de paecer y orientación. Entamásteis cola xuntanza del nacionalismu asturianu d'izquierdes, que dempués pasó a ser la xuntanza del nacionalismu asturianu. Nun entamu quisisteis la xuntanza d'AA, la de la UNA y la del Bloque. Desplicósevos que nun yera posible y por qué. A continuación metísteisvos colo del xuiciu polo de les sigles d'Andecha ("nacionalismu xudicializáu", yera la espresión). Tamién se vos desplicó, cáun cola so versión, pero en tou casu por qué yeren irreconciliables les dos postures. Más sero metísteis nel ayu a PAS-URAS, porque claro, tinía qu'entrar tol nacionalismu (como si PAS-URAS fueren nacionalistes, la URAS ñegándolo espresamente y nun queriendo saber nada con "nacionalistes escluyentes", colo qu'habrá que pensar que nun tienen por nacionalistes al PAS; y el PAS que lleva una montonera de tiempu moviéndose mui cómodamente nesa ambigüedá de "nin d'izquierdes nin de dereches, nin nacionalistes nin rexonalistes"). Y too ello con un analís matemáticu, suma d'hipotéticos votos, pura aritmética ensin cuntar con condicionante más dengunu. Cuando yá tocasteis los tolanos lo que quisisteis y más, cola inestimable aidanza de los ciberactivistes del PAS y determinaos frikis como Vilareyo, una persona que nun paez tar nos sos cabales, incluso con CXB pidiendo "respetu" pa él, precisamente él que nun respeta a naide, terminais prevocando una serie de reaiciones, como la de Delfo Valdés (que pidía que se trabayara en milenta coses y dicía qu'el nacionalismu había ser d'izquierdes), la del rapaz de Fnast, Xicu Ariza (que dicía que'l nacionalismu dedicaba la so atención prencipal a la llingua pero a costa de dexar munchos otros temes pa práu), y finalmente, con un gráu creciente de virulencia, la d'un militante d'Andecha o Darréu llamáu Iván, y la de Félix Fernández, n'otru tiempu militante d'Andecha y agora mesmo nun sé mui bien si independiente o de la UNA, cuya intervención fue'l cumal, sí, el de los "burros empalmaos", qu'igual nun diba tanto por tanta xente como se dio por aludío como por determinada persona. Y entós vien la reaición, o "contracabréu". Entama a cuestionase quién ye y quién nun ye nacionalista, que si los comunistes españoles, que si los estalinistes infiltraos, que si los carteles pegaos o otra triba de trabayu nun valen pa ná, etc, etc, o seya, descalificaciones pures y dures, ñegación del valir de cualisquier trabayu desendolcáu, porque los que considerábemos nacionalistes nun lo son según el nuestru criteriu, o porque nun lo son lo suficiente. Enfadámonos porque nun los albidramos, y nun los albidramos porque nun los conocemos. Y a too esto CXB escribiendo artículos onde cada vuelta desendolca con más fondura un discursu preñáu de racismu, xenofobia y quesió que más, eso sí, con un envoltoriu mui guapu de retórica supuestamente marxista y dialéctica, pa da-y un barniz que lu faiga paecer menos reaicionariu.

    ResponderEliminar
  17. Yo nun pertenezo a denguna de les organizaciones esistentes. Pero creo conoceles lo suficientemente bien (o polo menos a unos cuantos militantes significativos) como pa tener la seguranza de lo que los sos componentes pueden tar pensando nestos momentos. Si con too esto que montásteis pensais que llográsteis daqué, que tuvieren más xuntos, más prósimos a lo que vosotros queríais, enquivocáisvos. Sí, cierto ye qu'hai pasos d'averamientu ente UNA y Bloque, pero non por vosotros, sinon porque tienen dinámiques propies, autónomes, y en función de los sos analises y oxetivos, non pola vuestra presión. Pero nun pienso enquivocame muncho si camiento que l'estáu d'animu nel interior d'esos dos partíos y tamién d'Andecha tien de ser d'un encabronamientu mayúsculu. En definitiva, nun conseguísteis avance dalu, y nun tais como tábeis, sinon pior, porque camudó la forma na que sois consideraos, l'audiencia y autoridá que pudiéreis tener perdísteisla. Y nun avanzar ye retroceder.

    Había una película protagonizada por Anthony Hopkins y Nicole Kidman, "La mancha humana", basada en fechos reales. Hopkins incorpora un personaxe que ye un profesor nuna universidá americana. La cosa ye qu'esti home en realidá ye negru, solo que ta tan destiñíu que paez blancu, y decide que pa progresar necesita ocultar la so raza. Un bon día ta en clas con unos pocos alumnos, media docena, pero hai un par de sielles vacíes. Yá sabeis, un métodu d'enseñu típicu anglosaxón. El profesor ta faciendo un comentariu d'una obra clásica. Entruga pola llista la opinión de los alumnos, pa ver qué pillaron de la clas. Y casualmente menta los nomes de los dos ausentes. Enfádase porque nun tan presentes, y entós echa mano d'una fras de la obra griega: "¿Esisten de verdá o son solombres escures?" (la obra falaba de pantasmes, espectros). Bona la fai, porque resulta que los ausentes son de raza negra y tomen la so espresión como una amuesa de racismu, lo que finalmente sedrá la so cayía en disgracia. Pero esto vien a cuentu d'una montonera de xente que primero propón, pero como los partíos son autónomos y tienen una vida interna propia que los lleva a actuar según decisiones nun condicionaes por esa mesma xente, envede procurar entendelo y respetalo, compártase o nun se comparta, y llegáu'l casu criticando lo que seya, pasa a desixir, prodúzse una reaición abondo pueril, onde abunden les descalificaciones. Y claro, la xente de les organizaciones preguntándose si esa xente "esiste de verdá o son solombres escures".

    Pues nada, hom, si yá lo dicía la "meletérica", "too pola patria".

    ResponderEliminar
  18. Mui buenes :
    Lo primero que quería dicir ye que pensé qu'esti articulo yera un homenax a un grande del país como ye Arias .
    Como tou últimamente (deben ser los nervios preellectorales o quesio) acaba convirtiendose nun alderique fatu , un pin, pan,pun cola mesma musica de siempres.Una musica cansina a mas nun poder fata , faltosa y babaya a mamplén . Unos tamos queríen construir y otros son auténticos dinamiteros , ya nun se que pensar si d'ellos si ye que son provocadores infiltraos , comediantes o simplemente mazcayos sin mas .
    ¿Intervenciones como la de Sandra que ye lo que pretende? ¿Que piensa consiguir? ¿Cuanto peor meyor? ¿Dir de derrota en derrota a la victoria final? .
    Toi mui fartu de pijaes David ,ya esplique porque utilizo nomatu , David sabe quien soi y tien el mio permisu pa poner la mio identidá si asina el lo considerare (nun soi importante en nada polo demas) . Nunca utilizo ni l'insultu nin el llevantu nin faigo de menos a naide por respetu a los demas, a esti blog y sobre tou a David .
    Güei saltéme un pocu la norma , pero ye que toi mui pero que mui cabreáu , cola actitú de ciertos personaxes . Yo siéntome nacionalista pero nun doi carnets de nada y quiero construir un país colo qu'hai y colo que somos güei y pa eso nun sobra naide faen falta manes ¿ye tan difícil d'atalantar ?
    Perdona David , pero esto ya empieza a cansar y además esta xente que da nomes y pon etiquetes allegremente dende l'anonimatu tan dinamitando'l blog y debía obligase-yos a identificase o bien borra-yos el comentariu, se que tu nun yes partidariu polo demócrata que yes , pero col tiempu nun vas tener mas remediu , sinón esto va terminar siendo ….. lo que toos ya sabemos.
    Anónimu 15 toi contigo nel fondu y nes formes

    Churchill

    ResponderEliminar
  19. Entro nesti blogue frecuentemente pero nunca comento nada porque nun tengo nada importante que dicir, porque toi daprendiendo. Dicir quien yes o utilizar nomatu da lo mesmo. ¿Qué más da que yo firme col mio nome, Adrián Fuentes, que ye cierto, que con Pin de Porceyo, que con Anónimu? Ye importante saber lo que piensa Rivas porque ye quien ye y por eso tien que lo firmar, pero lo que piense Carmen Gutiérrez, Daniel Sánchez o Pepe Cabeza ye lo mesmo que lo que piense Anónimu o Asturzale. Lo importante ye que lo que s'escriba nun seya una fatada o un insultu. Yo, por exemplu, nun sé quien ye Churchill, Vampirella o Xanu'l Caborniu, pero teo una idega perfeuta de qué van y de como son. Y ye xente intelixente, constructiva, non faltona. Presta lleelos. Lo demás sátolo. Rivas: nun esborries porque dexar a la vista les tochaes tamién ye importante. Lo qu'hai que facer ye nun responder. Que queden como una gota babaya nuna mar sensata.

    ResponderEliminar
  20. Yo nun m'ofende un res que me digan que nun soi nacionalista, o que nun soi asturianista, o que nun soi d'izquierdes, de dreches, o cuartu y metá. Por nun ofender, nun m'ofende siquiera que me digan que nun soi asturianu. Yo sé lo que soi, lo que nun soi, y lo que tengo duldes que lo seya. Hai un debate abiertu sobre'l nacionalismu asturianu. Dientro d'él cuestiónase si ye nacionalismu tolo que se presenta como talo. ¿Y qué?. Nun pasa nada. ¿Vamos a estes altures a plantegamos temes tabú?. ¿Vamos sacar una llista sagrada colos temes que podemos tratar y colos que non?. La cuestión ye debatir ensin insultanos, tratar d'argumentar y más nada. El nacionalismu asturianu nun ye propiedá privada de nenguna sigla, organización o persona particular. Debatir sobre él ye un exerciciu sanu y democráticu. Y, repito, nun pasa nada. Ye la mio opinión tán acertada o errónea como pueda selo cualquier otra. Sólo eso.

    ResponderEliminar
  21. Va ser que to'l trabayu d'esta xente va ser el piensu de Valledor, de Palacios, de Zapico, de cualisquier oportunista d'última hora

    Pero estos patayos nun quieren gobernar. ¿Qué van facer estos socialcristianos y comunistes con Asturies nes manes? Nada, fundila na "eterna España", que ye de onde son.
    SI ESTO NUN YE FALTAR (algo ta pasando tamos mui jodios)

    ResponderEliminar
  22. Asusta esto d'homenaxear a daquien vivu, porque la triste realidá ye que sólo se fai cuando ta consideradu "amortizáu" y que nun va dar más guerra.

    Toos debieramos saber qu'hai media docena de persones (y non munches más) que foron les qu'aguantaron y nos pasaron el llume (mortecino, pero cola posibilidá de prender) hasta nuestros díes.

    Nun sitiu normal tendríen avenies, estatues, y taríen nos llibros de primaria ... equí machacámoslos a muerte, y como mucho damos-yos una palmadina nel llombu cuando se retiren y dexen d'espatuxar.

    Garcia Aries (desgraciadamente) tará escaecíu en un década (escepto por filólogos patriotes), pero nun habrá nacionalista, rexonalista o asturianu que lo conoza pal 2020.

    Igual que ya se fizo ... igual que se va facer.

    ¿animánosnos a reconocer a esos padres de la patria?

    ResponderEliminar
  23. Toi d'alcuerdu con Adrián Fuentes. Neñu, y dígotelo porque, a lo que paez, yes un rapaz ("nun tengo nada importante que dicir", "toi daprendiendo"), yes más sensatu tú que munchos más vieyos. Yo mesmu soi dalgo faltón delles veces. La to entrada chapó y si como pienso yes un mozu, doblemente chapó.

    ResponderEliminar
  24. Teneis razón. La meyor forma d'espantar moscardos ye siguir colos alderiques serios y pausaos. D vez en cuando apaecerán pero marchen rápido. Y tamién pienso que lo meyor ye dexar toles entraes y dexar que dalgunes se descalifiquen por si soles.

    ResponderEliminar
  25. Nun quixe opinar enantes pa nun entorpecer el debate. Fálovos de tu porque, dempués de dos años, conocémosmos pente los que siempres participamos nos alderiques. Como sabéis, tamién conozo personalmente -y bastante bien- a Vampirella y a Churchill.

    Lo primero que quiero dicir ye qu'Adrián Fuentes tien muncha razón. Ye conveniente que los comentarios tochos seyan conocíos y, sin son mui tochos, califíquense por sigo mesmos. Otra cosa ye que too se tornara una tochez, colo que namás quedaría suprimir el blogue o, cuando menos, la posibilidá de comentar. L'otro significaría que tendría que tar entrando nello cada par d'hores ya yo nun toi pa eses coses, porque nin puedo nin me gusta.

    Sabéis que nun me presten nada les salides de tonu. Ye más, pienso que la crítica educada ye demoledora, muncho más que'l rutiazu argumental. Poques vegaes viera rutiazos nesti espaciu míu y de toos vosostros. Dalgún hebo pero la propia reacción de los participantes tarazó pela freba l'asuntu.

    Agora bien, tampoco entemezo la educación ya'l saber tar cola corección política innecesaria. Y voi al casu. Sandra -que lo mesmo ye Manolín- nun fae otra cosa qu'exercer un drechu ciudadanu: criticar y desconfiar de quien gobernó. Duldar de quien fora siete años conseyeru d'Areces y tres años director xeneral d'esi mesmu gobiernu paezme un drechu. Llueu pués tener más aciertu o menos nos términos qu'emplegues.

    Considerar a un políticu "oportunista" nun me paez un insultu. L'oportunismu ye una opción política mui estudiada pola socioloxía dende'l sieclu XIX. Otra cosa ye que suene mal o nun-y guste al personax al que se-y aplica o a los sos partidarios.

    D'otru lláu, tampoco creyo que "socialcristianu" o "comunista" seyan insultos. Otra cosa ye que ten suficientemente xustificaos p'aplicá-ylos a dalguién. Pero son dos corrientes de pensamientu más o menos acertaes y a les que pertenecieron y pertenecen cientos de miles de persones.

    ResponderEliminar
  26. Tampoco me paez nada l'otru mundiu lo de duldiar del so "asturianismu". Siendo Valledor conseyeru de Xusticia ya "Igualdá" (igualdá, nun lo escaezamos) cometiose, ensin dir más lloñe, la conocida persecución a una neña menor d'edá y a la so familia pol asuntu de que desixíen escolarizala n'asturiano. Nun digo que Valledor fore responsable, namás digo que yera conseyeru d'esi gobiernu (el titular d'educación yera otru).

    A lo que voi ye a que non toles persones somos iguales. Equí hai persones que tuvieron responsabilidaes públiques y polítiques y otres que nun tuvieran -que nun tuviéramos- nin tan siquier la oportunidá de meter la pata. Nun ye lo mesmo Valledor que Mariu Arbesú, nin Palacios que yo, nin Noemí Martín qu'Inaciu Llope. Por nun ser, nun ye lo mesmo Sánchez Vicente que Daniel Cueli, anque seya n'otru nivel. La crítica a Valledor y a Palacios, tamién en bona midía a Sánchez Vicente, ye un drechu, por mui implacable que seya, porque representaron al ciudadanu y vivieron del presupuestu. La crítica a Llope o a mi será ideolóxica o por mor de les nueses estratexes pero non pola nuesa función como representantes de nada.

    Por eso, pienso que (con pallabres meyores o peores) Sandra sí-y debería una esculpia a Faustino Zapico, porque tampoco pué ser encomparáu con persones que tuvieron responsabilidaes polítiques. Zapico ye un militante nacionalista que lo fae lo meyor que puede. Unes vegaes acierta ya otres non, pero nun ye acreedor de crítiques pola so xestión, que pa eso ya tan los sos alumnos y los dirixentes del centru nel que fae'l so llabor.

    Amás, naide paez que reparó nel llarguísimu anónimu que, bien lleíu, nun tien desperdiciu. Fala d'un "vosotros" nel qu'igual tamos metíos unos cuantos de los qu'equí participamos. Y apellida de "racista", rayando l'apreciación de nazismu, a Carlos X. Blanco. Pero, a lo que paez, como Blanco nun encabeza nada pa les ellecciones venideres, nun pasa nada.

    Y "racista" nun ye namás un insultu, ye que ye la imputación d'un delitu. Pero nesti casu, tal paez, los escuplos de lo políticamente correcho paez que quedaron nel percheru casa.

    Churchill: los ingleses dicen que los representantes de los ciudadanos tienen que tener bolsos de cristal y oyíos de fierru. Cuenta corriente tresparente ya entendederes amplies, cenciellamente porque-yos va nel sueldu.

    Un saludu pa tóos.

    ResponderEliminar
  27. Pues mira David tienes razón no de CXB , escaecióseme dicilo na entrada que fixe . Dime cuenta d'ello pero nun volvi entrar pa nun tar tol día metiendo entraes . Yo por supuesto que nun considero a CXB nin lo qu'elli diz , racista nin xenófobo nin pijaes pol estilu.Yo comparto munches coses de les qu'El diz y otres non claro ta, pero respétolu fondamente .
    Nun me presta la xente qu'etiqueta a xente ensin conocela . Valledor nun ye nengún oportunista , polo menos na so trayectoria política.La historia ta ahí y a Valledor defenden-lu los fechos .Fizo una cosa que nun se yo si toos la seríemos a facer , dexar los cargos y el partíu cuando nun se sintió representáu por ellos. Personalmente preferiría que nun encabezase nada, pero si que tuviera nel proyectu ¿Porque non? .
    Churchill

    ResponderEliminar
  28. Abriose otra vuelta la custión y bien que me presta. Esta intervención de David Rivas ya esa respuesta de Churchill dan pa muncho. David tien tola razón. Y Churchill tamién. Nun son opiniones contrapuestes. Pero, Churchill, l'oportunismu nun ye solo "trepismu". Puedes ser un políticu oportunista pa retirate con honor. Si lleemos la Revolución Francesa de Renan veremos munchos casos arquetípicos. Nun digo esto de Valledor porque nin lu conozo pero ye verdá. Sandra, a lo burro, dixo lo que munchos piensen o pensamos y David Rivas desplicolo como siempre meyor. Pienso como Churchill y como'l mesmu Rivas: equí cabe muncha xente pero caún ye caún y tien la so historia.

    ResponderEliminar
  29. Como yo soi mui burru después de lleer lo último de Rivas volví al testu de Sandra. Y paeciome estraordinariu. Lleeilu por favor. Dexai a un llau los nomes. ¿Nun ye grande? Desplica les coses muncho meyor que lo faen los que la criticaron. Por eso David Rivas salió na so defensa, porque ye paisano (d'eso trataba esti articulín) y porque ye profesor y distingue bobaes d'argumentos. Sandra (espero que nun seyas Manolín como diz David Rivas) quedamos un dia. Por echar el picao que nun quede.

    ResponderEliminar
  30. Yo frótome los güeyos pa creyer dalgunes coses que lleo en defensa d'esa tal Sandra. Conocemonos toos tan bien que se casi a ciencia cierta de que pequeñu sector sal el comentariu en cuestión, pero meyor me callo pa nun desviar el tema. Rescato perles de la intervención de Sandra:

    "Va ser que to'l trabayu d'esta xente va ser el piensu de Valledor, de Palacios, de Zapico, de cualisquier oportunista d'última hora."

    ¿oportunistes d'última hora?

    "Nun son nacionalistes, Rivas, nun lo son. Nun lo ye la xente de la UNA y tampoco un terciu d'Andecha."

    Seguimos siendo condescendientes colos que s'atreven a decir a los demás que son y que nun son. Yo ya empiezo a creyeme que la permisibilidá del propiu David Rivas amestada con dalgunes de les sos intervenciones dexa a les clares qu'él mesmo ta nesi camientu.

    "La xente mozo ta con vosotros y non con estos politiquinos de mexar y nun char gota."

    Supongo que dalgún día veremos la encuesta sociolóxica na que se basa l'autor.

    "Pero estos patayos nun quieren gobernar. ¿Qué van facer estos socialcristianos y comunistes con Asturies nes manes? Nada, fundila na "eterna España", que ye de onde son."

    Perguapu ¿verdá, David?

    Equí parez que too vos val si ta empobináu na vuesa onda. La llinia de lo que ye una falta de respetu, de lo que ta fuera de llugar o lo que ye una salida de tonu ta más allá o más acá en función si lo que se diz vos da o vos quita razones.

    Hubo un anónimu que dexó una llarga intervención enllena d'apuntes interesantes que toos deberíais relleer. Yo recupero unu y ye esi que nos apurre de que'l cabréu pa con vosotros (entendei por vosotros lo que queráis) na base d'UNA, Bloque y Andecha tien que ser mayúsculu. Podéis axuntavos equí los 7/8 que seyáis y davos la razón eternamente, pero nun penséis que sois los primeros que lo facéis nel nacionalismu asturianu, nin sedréis los últimos.

    Ehí queda eso.

    ResponderEliminar
  31. Yo toi con Sandra. Si dalgo peca ye de falar claro. Y si non, al tiempu.

    ResponderEliminar
  32. Home, como diz l'Anónimu del 12 noviembre a les 00:57 (a ver si ponemos nomes, anque seyan inventaos, que llueu ye difícil facer referencies) ye p'ablucar que David Rivas salga defendiendo eses postures, por munchu ciñu que-y apiegue a ese personaxe (Sandra). Dizlo mui bien esti anónimu. Eso de dicir quien ye o non nacinalista ye mui d'esi guetu que siempre alude a "o tas conmigo o yes españolista anti-Asturies". Y esto foi, creo, lo que fizo frayar munches xuntures hai bien de tiempu.

    Llamar "patayu" lo mesmu nun ye insultar. O lo d'oportunista lo mesmu tampoco ye insultar. Pero pregúntome si a David Rivas-y gustaría que-y dieren esos axetivos. Lo de la xente mozo, faime gracia, como diz l'Anónimu, taría bien saber esi estudiu sociolóxicu, esa encuesta ónde ta espublizada. Pa mi que la mayoría de la xente mozo vota a UNA, porque muncha xente mozo con concienca de país marchó d'Asturies, y ehí tan los votos nacionaliegos nes últimes eleiciones pa la UNA vinientes de fuera'l país. Pero esto ye una suposición mía, non una afirmación categórica, como fai Sandra.

    En conclusión, sorpriende la visión de David Rivas, falta de analís seriu, queriendo defender a Sandra (él sabrá l'apegu que-y tien y por qué), pero hai coses como bien apunta l'Anónimu al que faigo referencia que nun tienen perdón de Dios. Como si lo diz el mío fíu. David, nun pues considerar un alderique bonu a aquel nel que se te da la razón y puntu. O aquel nel que namás participen los tos amiguinos. Hai que velo too. Y a veces los que nun son los tos amigos tienen más razón qu'aquellos que conoces.

    Triste qu'haya otru Anónimu (el de les 02:40) que defiende a Sandra, concluyendo que "si dalgo peca ye de falar claro". Hai diferencies ente falar claro y falar con respetu. Si a lo que se refier esti últimu anónimu ye a "falar ensin respetu", pues val, pero esti, entós, nun ye'l mio sitiu, nin m'interesa. Hai tochaes que nun m'interesen nin tengo por qué soportales. Cierto ye que naide me obliga a meteme equí, pero por eso, David, hai que ser rotundu coles tochaes y les faltes de respetu, porque entós, va haber sente que va salir cagando lleches d'equí. Precisamente, los qu'afalen el discursu respetuosu, por mui estremáu que tenga col de los demás. Yo ún d'ellos.

    ResponderEliminar
  33. Igual m'espliqué mal o fui mui tochona nos términos. Por cierto, nun soi Manolín. Pero sí ye verdá que desconfío bastante de Valledor y más tovía de Palacios. Equí hai xente que descalifica a persones que nun pudieron demostrar nada entá y llueu entusiásmase col fechu de qu'un políticu dexe l'escañu. Como somos "españoles" nun conocemos la conxugación del verbu "dimitir". Lo que fizo Valledor ye dalgo normal nes democracies normales. Naide pon nun pedestal al dimisionariu y nun xulguen la decisión, xulguen les razones y los antecedentes. Yo xulgo les razones y los antecedentes y desconfío. Sí hai una cosa de la que m'arrepiento y no que tien razón David Rivas: nun debí meter nesi sacu a Zapico. Neso púdome la visión de la posible coalición BPA-UNA-Valledor. Zapico, pídote disculpes. Tu tampoco tuviste ocasión de demostrar nada y yo nun tengo'l drechu a prexuzgate con maldá.

    ResponderEliminar
  34. Por cierto, pa salir al pasu d'un comentariu insinuosu anterior: a David Rivas nun lu conozo de nada, quitando de lleer coses y de velu na prensa o nos cartelos. Agora, eso sí, suelo coincidir colos sos analises.

    ResponderEliminar
  35. Llevo un tiempu siguiendo esti blogue y nun debí de poner más de dos opiniones. Pero ye qu'esto ta mui raro. Nun me gusten los calificativos al tuntún pero coño, llamar comunista a un señor que taba nel PCE hasta hai quince díes nun me parez nada insultante. Cuando yo yera rapazón yera un insultu que te llamaran burgués. Pero burgueses habíalos. Que me lo llamen a mi agora que cobro 900 euros ya me jode, pero que llamen comunista a Cayo Lara nun creo que-y importe. D'otru llau, acusar a Rivas de que namás quier la opinión de los "amiguinos" nun ye de recibu. Un blogue nel que nun s'esborria nada (debe ser l'únicu d'esti mundín) nun puede descalificase asina. ¡Nun-y cayeren hosties cuando contaba lo d'Andecha, Europa de los pueblpos y too aquello! Y nun esborrió nada y contestó la mayor parte les veces. Un poco de seriedá, por favor.

    ResponderEliminar
  36. Tola razón, amigu. De los blogues pelos qu'ando esti y'l de Carlos Blanco son los únicos nos qu'alcuentro crítiques, brutales a veces, a los sos propietarios. ¡Cosa curiosa! Probar a meter dalgo "incorrecto" n'Asturies Lliberal, n'Aruelu, en dalgunos blogues personales. Otros nun dan siquiera posibilidá de comentarios. Igual Infoasturies se salva, nun lo se mui bien. Por eso precisamente esti blogue tien tantes entraes, porque sabemos que nun son censuraes. La llibertá d'espresión ye lo que tien, que a veces tócanos escuchar coses que nun nos gusten o alcontranos con xente a lo burro. ¿Preferimos otra cosa? Cuando'l franquismu na prensa nun había violencia machista nin pederastia...

    ResponderEliminar
  37. Si home, típico de la xente que diz tochaes, insultos y les primeres pijaes que-y pasen pela tiesta. Refiérome a eso de dicir que borrar un mensaxe faltón (por muncha crítica qu'haya) ye "censura". Eso ye nun tener nin puta idea. Y llueu glayar lo de la "llibertá d'espresión". Claro, sí, a siguir asina, creyendo eses tonteríes. Pues nada, si eso ye asina, el "Sálvame" ye un programa de debate seriu. Tamos no mesmo. Asina mos va.
    Y quedase en que los insultos son los de "comunista" ye probe. O pero, bono, lo de "patayu" eso ha de tar bien visto, voi llamalu yo a mio padre, a ver qué me diz.
    Y llueu diz Sandra que xuzga les razones y los antecedentes y que desconfía. Y queda tan ancha. Repartiendo carnés de "nacionalista": "...Nun son nacionalistes, Rivas, nun lo son. Nun lo ye la xente de la UNA y tampoco un terciu d'Andecha...". Pues nada, que tola razón, Sandra, y si eso ye "argumentar" pues mui bien. Será la to opinión, pero sigue siendo faltona. Por que Valledor y Rafa Palacios, tamién tan criticáu por ti, Sandra, intenten tener presencia nacionalista, non como hasta agora, según tu hemos de siguir asina ad infinitum, siendo cuatro gatos que mos calentamos cuando lleemos una páxina web. Pero la realidá "nacional" asturiana va per otru llau. Ellos intenten una estratexa, más valiosa entá que la tuya, que ye la de facer qu'esista un nacionalismu pal restu de la sociedá non nacionalista, non como tu que tas dispuesta a renunciar a eso por siguir siendo "pura" ya inmaculada. El camin ye esistir, dalgo de lo que carez el nacionalismu. Ye indignante ver cómo tamos torpedeando a xente que, no fondero, llucha polos mesmos fines, anque non colos mesmos medios. Murniu país que llevamos ciegos trenta años.

    ResponderEliminar
  38. Les sinerxies nes que se ta empobinando la mayoría d'esta minoria social que ye'l nacionalismu asturianu van per caminos distintos de pelos que caleyen estos autonomaos defensores de la esencia nacional astur y los sos condescendientes. El PAS decatóse hai años y rompió con ellos y les sos tesis, dempués de tantos años hai una mayoría nel nacionalismu d'izquierda que ya abrió los güeyos. El problema ye que'l fracasu xeneral nel que vivimos val de semiente d'unes opiniones que de nun haber talo fracasu taríen nel reductu que-yos correspón.

    Diz muncho de la inmadurez política (y me reafirmo nesto) y de la baxa amplitú de mires aquello que siempre se fai en tiempos como esti, onde dalgunes diferencies estratéxiques tan a flor de piel. Que los defensores de la esencia astur y los sos condescencientes insistan una y otra vuelta en dicir quien ye y quien nun ye nacionalista o lo suxeran hasta la infinidá nun ye distinto a lo que pasó n'otros tiempos onde les diferencies ente unos y otros yeren que yo yera nacionalista y tu asturianista, yo socialista y tu socialdemocrata, tu esto y yo lo otro... ya inclusu yo asturianu y tu "nun se que".

    Porque resulta graciosu que dempués d'años andaos nesto del nacionalismu y de llegar acuantayá a la conclusión casi unánime de que'l nacionalismu tien que ser alternativa política y que pa ello necesitamos romper cola imaxe de ser los de la llingua, dempués d'esto ye pa descoyonase que cuando se quier facer daqué seriu, daqué abiertu a la sociedá, daqué con capacidá de facer propuestes... vengan los salvadores de la patria falando de la necesidá de la defensa de la llingua y la identidá per enriba de toles coses, REPITIENDO CON ESTO LA MESMA RECETA POLÍTICA QUE NOS LLEVÓ UNA Y OTRA VUELTA AL FRACASU. ¿Acasu dalgún illusu piensa que la sociedá asturiana va dar un puestu na Xunta Xeneral a un partíu políticu con un programa fechu en clave ESCLUSIVAMENTE nacional? Podéis mirar los resultaos n'otres elleiciones, tamién cuando David Rivas foi candidatu, de lo que sal otra cosa que nun acabo d'entender y ye que dalgunos lo beneren como'l candidatu que'l nacionalismu necesita. Ehí tan los sos resultaos.

    Amás na mio opinión una cosa ta clara y ye que pa ser un bon analista políticu nun val con tener toles titulaciones universitaries del mundiu nin con una capacidá intelectual tremenda nin con llevar más hores pegando cartelos que quilometros tien andaos un autobús... pa ser un bon analista políticu primeru hai que tener humildá, capacidá empática, conocimientu, esperiencia y sobremanera una cierta equidistancia, y de too esto nun veo nada hasta la fecha en nengún blog asturianista/nacionalista, nin siquiera de lloñe nesti.

    ResponderEliminar
  39. Nun quixe meter entrada equí hasta agora pa nun esgonciar l´homenaxe merecíu a Arias, que yo quixera facer de mio tamién, como fizo David nel artículu. Solamente pola mor de les alusiones a mio persona (bien d´elles rastreres) voi apuntar daqué:

    Pa tener una visión NACIONAL d´Asturies hai que tener, nestos tiempos, un pocu de cultura xeneral, nun abasta con saber escribir. Los que pretenden descalificar a dellos nacionalistes cola tema del racismu nun fain otro que retroceder los alderiques al más baxu nivel de los bocayones de chigre. Del tema de la raza, como de cualesquier otru, pue debatise llibremente, que pa eso queden blogues llibres tóvía, como esti. Lo que yo pienso ye que nun ye relevante pa la (re)construcción de les identidaes de los pueblos, que son étniques (culturales) non biolóxiques. Y más pa un pueblu como l´asturianu, que ye europeu y, poro, ye resultáu de la mezclienda de races dende cuantayá.
    Calificame a min de "racista" ye un datu de gran interés sociolóxicu, y toi acolumbrando un panorama determináu,porque amuesa:

    1. Qu´hai xente muncho nerviosa con una Xuntanza nacional, masque sía parcial o como simple tendencia a llargu plazu.
    2. Que tan decimonónicu ye´l debate sobre´l racismu como sobre la "llucha de clases versus llucha de pueblos". Les dos lluches tan entretexíes de manera percomplexa nes sociedaes avanzáes.
    3. Que munchos que pasen por "nacionalistes" son nacionalistes adxetivos, ya inda siendo arrogante con ellos. Qu´un izquierdismu importáu y artificiosu nun va ganar un rial nes elecciones, que pa eso yá ta IU con un 9% de votu estimáu.
    4. Que n´Asturies, como n´Europa, yá pue espabilar la esquierda, a la que tán dándo-y como panzorru colos sos esquemes decimonónicos y la so ideoloxía descontestualizada, el so babayu cosmopolitismu. Propongo una esquierda identitaria dende cuantayá.
    5. Como dicíamos nel colexu, cuando guah.es: "el que primero lo güel (el racismu) ye que debaxu´l culu lo tien". Guapu refrán qu´espeya´l mecanismu freudianu de la Proyeición. L´autoodiu del que nun tien raigaños identitarios, o yá nun los sabe manexar, vuélvese contra persones como yo que-yos recuerden LO QUE DEBÍEN SER: fíos y miembros d´una cultura milenaria que namás que necesita recuperar l´arguyu pa llevantase un día de la so postración.
    6. Viva la Xuntanza inda ente los que nun paecen ser mui nacionalistes, porque ye la oportunidá d´elevar so conciencia hasta unos mínimos de llucha pola identidá, ye la oportunidá de contaxalos col virus nacionalista, pa que muten en nacionalistes arrechos. Ye lo que pasó notres naciones y nun tien porqué dexar de pasar equí. Yo nun "repartí carnés" nunca, y nun soi "puru". La política de los coleutivos y partíos tien que ser maquiavélica, dialéctica. La postura de los individuos tien que ser flesible, pero con idees clares.
    7. Nun pierdan tiempu los ciberengochadores conmigo: Yá me llamaron otres coses cuasi peores: ideólogu de la ETA, separatista fraccionariu. Tamién usurparon mio identidá, encasquetáronme nomatos d´otres persones y artículos d´otra xente. Tamién di portazos onde tuvi que los dar y reconstruir mio carrera académica con bien d´esfuerzu. Nun vos va valir de muncho metese conmigo que yo tengo la pelleya dura yá.
    conclusión: l´alderique, con xuntanza parcial o total (que pue ser una etapa táutica) ye nun perder la exa identitaria nunca, y equí tamos los que tamos pa dar esa batalla.
    CXB

    ResponderEliminar
  40. Tamos como los del PP con Cascos. Agora vuelve'l debate sobre si David Rivas ye un bon candidatu o non. Pero, ¿nun dixo yá varies veces que ta a otres coses? ¿Nun mos valdría más discutir los temes que trata si ye que nos presten? Porque esa ye otra. La entrada anterior a la de Carlos Blanco (toi d'alcuerdo al cien por cien) paez querer discutir con Rivas y lo que Rivas escribió ye un artículu sobro Arias. Si Sandra nun se fia de unu o otru nun ye custión del dueñu del blogue, un paisanu que, como ya dixe enantes, ye fonderamente democráticu nesti espaciu, cosa bastante rara nel mundín esti asturianista onde los autoritarios salen como setes na seronda.

    ResponderEliminar
  41. Carlos Blanco na to conclusión final, ta lo mas importante "el noyu de too" al mio talantar .
    A min preocupame que vamos facer a partir de mañana pa que'l campu asturianu meyore y nun muerra adulces , que podemos facer pa meyorar la piesca , caltener la industria qu'hai y traer otres si se puede , meyorar les condiciones de vida de la xente y facelo too con armonía y respetu al mediu nel que vivimos.Dexar un país meyor en tolos aspeutos a los que vengan detrás (digo dexar un país non una provincia castellana mas). Lo demas nun m'intereresa,si somos capaces de facer un discursu y un proyectu prestosu sumaremos y ganaremos.Lo que tengo claro tamién ye que con xente sectario y faltono, yo nun voi perder ni un minutu dígalo quien lo diga .

    En política, lo importante nun ye saber quién ye quién, sinón quién tá con quién.

    “El pilancu de la nuesa domina ye que los homes nun quieren ser útiles sinón importantes”(W,Churchill)

    "Delles veces tuvi que comeme les mios pallabres y descubri que yeren una dieta enforma equilibrada."(W,Churchill)


    Churchill

    ResponderEliminar
  42. Nun viera estes últimes entraes. Presta ver los embistes irracioinales. La impotencia de los que nun tienen argumentos. Ai amiguinos, garrar intelectualmente a David Rivas ye bastante dificil.

    ResponderEliminar
  43. “Voltaire como argumentes rei” da gustu .Nun yes combayón que se diga.A ver cuando t'animes y nos cancies el Trolorolo.

    ResponderEliminar

Publicar un comentario