A propósito de la fala y de Gonzali

D'esquierda a drecha Lluis Portal, Ana López (conceyala de Cultura de Villaviciosa), Humberto Gonzali, Manuel Busto (alcalde de Villaviciosa) y David M. Rivas, na xornada d'empiezu de l'Arribada 2009

Yo nun sé gran cosa de filoloxía y nunca me diera por poneme a facer política llingüística pero, como toles persones de la mio xeneración, a lo menos les que mos metimos na batalla política dende la banda nacionalista o antinacionalista, acabé por entrar n’engarradielles d’esta triba.
Vien esto al casu de les opiniones, metada disquisiciones y metada propuestes, d’Humberto Gonzali sobro la fala más occidental d’Asturies.
Nunca entré nel discutiniu sobro qué ye lo que falen los nuesos particulares mesopotámicos. Trátase de la fala qu’emplegara mio padre hasta que, metanes los años cuarenta, perdiola pente los paisanos de mio güela, nes fasteres de Xixón y Villaviciosa. Ye la fala qu’empleguen -y mui bien por cierto- dellos primos que siguen viviendo nel conceyu de Castropol. Yo, por desgracia, nun lo falo y cuéstame un poco pescancialo hasta que nun llevo un par de díes per eses tierres.
Nun sé y tampoco nun m’importa -mas allo d’un interés científicu del que nun vivo- cualu ye’l tueru la fala. Si resulta ser gallego dame lo mesmo, porque lo que tien importancia ye que la fala se caltenga y que, si ye a ello, rescample lliterariamente y socialmente. Agora bien, lo que teo claro ye que ye una variedá llingüística asturiana, esto ye, d’Asturies. Y, al empar, tamién teo claro que la xente que lo fala ye tan asturiana como cualisquier de Llaviana o de Ribedeva. La mio posición sobro esti asuntu fora -les poques vegaes que me la pidieren- de calter ermunamente político. Siempres defendiera la xunidá d’Asturies y nunca confundiera l’actual principáu cola nación, anque doi menos la turria que dalgunos que meten el mesmu artículu nos blogues una ya otra vuelta, a la espera d’una polémica que nun algamen. Teo nos muros de la mio biblioteca dalgunos mapes vieyos d’Asturies, ún d’ellos fechu pola marina británica nos finales del XVIII, que dexaríen ablucáu al mayor miloseviquín de la Gran Asturies.
Vien, como dicía nel entamu, esti introitu tan llargu a les propuestes qu’Humberto Gonzali facía hai unos díes sobro la popular fala, cultu eonaviego ya oficial gallego-asturiano.
Lo que diz el mio amigu Gonzali paezme mui sensato. Tratar de forma distinta aquello que ye distinto ye un aforismu clásicu y mui encardináu nos vezos políticos y xurídicos anglosaxones. Y paez evidente -ensin entrar, repito, n’alderiques filolóxicos- que la fala mesopotámica ye dalgo estremao na situación llingüística asturiana. Pero tamién toi d’alcuerdu con elli cuando fala de qu’esa variedá ta políticamente instrumentalizao porque nun ye lo mesmo lo que falen en Tapia que lo que falen en Los Ozcos. Si mos ponemos estupendos coles isogloses, cosa que faen los galleguistes a lo burro, podemos alcontrar siete o más variedaes llingüístiques nesi pequeñu tarrentoriu.
Vamos dar por bono lo de que ye una llingua transición. Entóncenes, ¿hasta onde se “transita”?. Porque si en Castropol se fala gallego-asturiano ya en Ribadeo gallego-gallego nun pescancio un res. ¿Llegamos a Burela?: entós pué que mos entendamos. ¿Paramos nel Eo?: entós pámeque nun mos vamos entender.
Les crítiques d’Humberto Gonzali a la nuesa Academia, a la política llingüística (la non-política por meyor dicir) del gobiernu asturianu, a los partíos que, como Izquierda Unida, dicen arre y facen só, tamién son pertinentes. Y la so propuesta d’una oficina académica na mesma fastera y quitar una absurda secretaría bien llantada nel Campu San Francisco tamién me paez bien. Ye más, si los filólogos dan por fecho que tamos escontra una llingua transición, tampoco me paez mal que l’academia gallega toque un pitu nesi conciertu. Pero, eso ta clariquino, posibilidá tala namái ye posible en pie d’igualdá. Mentres la llingua gallega sía oficial y l’asturiana careciendo un xenocidiu, los gallegos na so casa.
Tamién convengo con elli en que lo poco que se fixo, por más que nun vaiga más allo d’una llei llaceriosa y de mínimos, fixeralo la drecha y que’l PSOE nun fixo otra cosa que recortar y reprimir, cola complicidá d’Izquierda Unida ya’l so gazpachu d’esquierda plural. Pero -siempres hai un pero- nun veo yo que’l Partido Popular vaiga facer cosa estremada si ye que llega al gobiernu. Prestaríame creyer que si Gonzali llegare al ayuntamientu de Xixón igual s’iguaben delles coses, pero, a la vista de lo que Felechosa fae n’Uviéu, les mios esperances tan bien aminorgaes. Echar al PSOE y a los sos perendengues esquierdistes ye cosa d’hixene político, pero pensar que’l PP va facer daqué estremao nes custiones de les que falamos ye pecar un tanto d’inxenuidá.
Lo que sí-y hai d’agradecer a Humberto Gonzali ye la so claridá d’idegues, la so valentía ya’l so bon facer. Ye dalgo que llama l’atención que seya un home’l PP el que plantegue recurrentemente custiones que son importantes y que queden arrequexaes en función de discutinios sobro asuntos ayenos. Cuando falo con elli, cosa que faigo dacuando en vez, siempres mos sosprendemos los dos coles temátiques qu’esmolecen a los xestores de les páxines nacionalistes o colos asuntos que ximielguen les conciencies de los que s’autonomen patriotes.
Yo toi seguru de qu’Humberto Gonzali ye un patriota y qu’analiza mui bien la situación d’Asturies, pero tamién pienso que ta políticamente enquivocáu y que’l so partíu ye incapaz xenéticamente de rexenerar esti país.

Imprimir