8.12.09

A propósito de la fala y de Gonzali


D'esquierda a drecha Lluis Portal, Ana López (conceyala de Cultura de Villaviciosa), Humberto Gonzali, Manuel Busto (alcalde de Villaviciosa) y David M. Rivas, na xornada d'empiezu de l'Arribada 2009

Yo nun sé gran cosa de filoloxía y nunca me diera por poneme a facer política llingüística pero, como toles persones de la mio xeneración, a lo menos les que mos metimos na batalla política dende la banda nacionalista o antinacionalista, acabé por entrar n’engarradielles d’esta triba.
Vien esto al casu de les opiniones, metada disquisiciones y metada propuestes, d’Humberto Gonzali sobro la fala más occidental d’Asturies.
Nunca entré nel discutiniu sobro qué ye lo que falen los nuesos particulares mesopotámicos. Trátase de la fala qu’emplegara mio padre hasta que, metanes los años cuarenta, perdiola pente los paisanos de mio güela, nes fasteres de Xixón y Villaviciosa. Ye la fala qu’empleguen -y mui bien por cierto- dellos primos que siguen viviendo nel conceyu de Castropol. Yo, por desgracia, nun lo falo y cuéstame un poco pescancialo hasta que nun llevo un par de díes per eses tierres.
Nun sé y tampoco nun m’importa -mas allo d’un interés científicu del que nun vivo- cualu ye’l tueru la fala. Si resulta ser gallego dame lo mesmo, porque lo que tien importancia ye que la fala se caltenga y que, si ye a ello, rescample lliterariamente y socialmente. Agora bien, lo que teo claro ye que ye una variedá llingüística asturiana, esto ye, d’Asturies. Y, al empar, tamién teo claro que la xente que lo fala ye tan asturiana como cualisquier de Llaviana o de Ribedeva. La mio posición sobro esti asuntu fora -les poques vegaes que me la pidieren- de calter ermunamente político. Siempres defendiera la xunidá d’Asturies y nunca confundiera l’actual principáu cola nación, anque doi menos la turria que dalgunos que meten el mesmu artículu nos blogues una ya otra vuelta, a la espera d’una polémica que nun algamen. Teo nos muros de la mio biblioteca dalgunos mapes vieyos d’Asturies, ún d’ellos fechu pola marina británica nos finales del XVIII, que dexaríen ablucáu al mayor miloseviquín de la Gran Asturies.
Vien, como dicía nel entamu, esti introitu tan llargu a les propuestes qu’Humberto Gonzali facía hai unos díes sobro la popular fala, cultu eonaviego ya oficial gallego-asturiano.
Lo que diz el mio amigu Gonzali paezme mui sensato. Tratar de forma distinta aquello que ye distinto ye un aforismu clásicu y mui encardináu nos vezos políticos y xurídicos anglosaxones. Y paez evidente -ensin entrar, repito, n’alderiques filolóxicos- que la fala mesopotámica ye dalgo estremao na situación llingüística asturiana. Pero tamién toi d’alcuerdu con elli cuando fala de qu’esa variedá ta políticamente instrumentalizao porque nun ye lo mesmo lo que falen en Tapia que lo que falen en Los Ozcos. Si mos ponemos estupendos coles isogloses, cosa que faen los galleguistes a lo burro, podemos alcontrar siete o más variedaes llingüístiques nesi pequeñu tarrentoriu.
Vamos dar por bono lo de que ye una llingua transición. Entóncenes, ¿hasta onde se “transita”?. Porque si en Castropol se fala gallego-asturiano ya en Ribadeo gallego-gallego nun pescancio un res. ¿Llegamos a Burela?: entós pué que mos entendamos. ¿Paramos nel Eo?: entós pámeque nun mos vamos entender.
Les crítiques d’Humberto Gonzali a la nuesa Academia, a la política llingüística (la non-política por meyor dicir) del gobiernu asturianu, a los partíos que, como Izquierda Unida, dicen arre y facen só, tamién son pertinentes. Y la so propuesta d’una oficina académica na mesma fastera y quitar una absurda secretaría bien llantada nel Campu San Francisco tamién me paez bien. Ye más, si los filólogos dan por fecho que tamos escontra una llingua transición, tampoco me paez mal que l’academia gallega toque un pitu nesi conciertu. Pero, eso ta clariquino, posibilidá tala namái ye posible en pie d’igualdá. Mentres la llingua gallega sía oficial y l’asturiana careciendo un xenocidiu, los gallegos na so casa.
Tamién convengo con elli en que lo poco que se fixo, por más que nun vaiga más allo d’una llei llaceriosa y de mínimos, fixeralo la drecha y que’l PSOE nun fixo otra cosa que recortar y reprimir, cola complicidá d’Izquierda Unida ya’l so gazpachu d’esquierda plural. Pero -siempres hai un pero- nun veo yo que’l Partido Popular vaiga facer cosa estremada si ye que llega al gobiernu. Prestaríame creyer que si Gonzali llegare al ayuntamientu de Xixón igual s’iguaben delles coses, pero, a la vista de lo que Felechosa fae n’Uviéu, les mios esperances tan bien aminorgaes. Echar al PSOE y a los sos perendengues esquierdistes ye cosa d’hixene político, pero pensar que’l PP va facer daqué estremao nes custiones de les que falamos ye pecar un tanto d’inxenuidá.
Lo que sí-y hai d’agradecer a Humberto Gonzali ye la so claridá d’idegues, la so valentía ya’l so bon facer. Ye dalgo que llama l’atención que seya un home’l PP el que plantegue recurrentemente custiones que son importantes y que queden arrequexaes en función de discutinios sobro asuntos ayenos. Cuando falo con elli, cosa que faigo dacuando en vez, siempres mos sosprendemos los dos coles temátiques qu’esmolecen a los xestores de les páxines nacionalistes o colos asuntos que ximielguen les conciencies de los que s’autonomen patriotes.
Yo toi seguru de qu’Humberto Gonzali ye un patriota y qu’analiza mui bien la situación d’Asturies, pero tamién pienso que ta políticamente enquivocáu y que’l so partíu ye incapaz xenéticamente de rexenerar esti país.
Imprimir

14 comentarios:

  1. Siempres fixe'l mesmu comentariu. ¿Cómo ye que Rivas, un esquierdista nacionalista, y Humberto, un militante del PP, seyan los únicos capaces de plantegar histories?. Prestame esti artículu porque me presta la intelixencia. Pero Gonzali y Rivas nun van coincidir nel mesmu sitiu. ¿Una pena?

    ResponderEliminar
  2. Fai tiempu que una pregunta ronda por muitas cabezas, porque yía raru que dous homes tan distintos nas cousas de la política coincidan a ca poucu. Siñor Rivas, d'usté dicen que yía masón. ¿Hai que atoupar na masonería las razones pa tanta coincidencia?, pos nun me negará que nun yía normal qu'un nacionaliegu xunte abonda sintonía con un peperu, anque se l.lame Gonzali.

    ResponderEliminar
  3. La capacidá que tenemos d'enguedeyar les coses ensin necesidá ye tremenda. Los habitantes de la fastera más occidental asturiana llamen "fala" a les sos modalidaes llingüítiques. Refugamos esi términu popular (¡y utilizamos el de "asturianu" en vez de "bable" por ser el popular!) y en vez de poner otru más neutru como eo-naviego, inclinámonos pa la opción que más rocees y problemes produz y va siguir produciendo: gallego-asturiano. La política y/o estratexa aplicaes a la llingüística nun son el nuestru fuerte, eso paez claro.

    ResponderEliminar
  4. Toi d´alcuerdu con David Rivas, y tamién col Xanu´l Caborniu. Lo de nomar la fala "gallegu-asturianu" foi un error gordu. CXB

    ResponderEliminar
  5. El nome de gallego-asturianu ye una invitación a los espansionistes bloqueiros. Gonzali ye perclaru na entrevista cuandu fala d'ello y de tolo rellacionao col tema. Ye verdá que Rivas y Gonzali son de los pocos que planteguen algo nel alderique sobre Asturies. Pero discrepo de la parte final del artículu, creo que si Gonzali ye conceyal en Xixón fairía muncho más que Felechosa n'Uvieu.

    ResponderEliminar
  6. humberto nun pinta nada nel pp, ye el floreru asturianista pa engañar a cuatro incautos, nun entiendo que rivas faga un artículu falando d'esi peperu

    ResponderEliminar
  7. Ente'l contuberniu xudeomasónicu y el floreru asturianista anda la capacidá d'análisis del nacionalismu de pubescentes, soplapayueles ya acaponaos inteleutuales.
    A campu rasau ta Asturies, a campu rasu.

    ResponderEliminar
  8. http://www.asturbulla.org/index.php?option=com_content&view=article&id=6730:carlos-x-blanco&catid=143:llingua&Itemid=305

    ResponderEliminar
  9. Pero vamos ver. Si ye mui fácil ponese d'alcuerdo nes coses más cencielles. Nun hai que buscar nada raro nes coincidencies ente Humberto y David. Lo que pasa ye que munchos tienen mieu a coincidir con unu del PP, o otros a coincidir con un "asturtxale". Pero paez que David y Humberto nun tienen esos problemes. ¿Paezvos meyor que los tuvieran?.

    ResponderEliminar
  10. Al ser anónima la mayor parte les entraes, ye difícile empobinar la rempuesta o'l comentariu. Opino sobro les declaraciones d'Humberto Gonzali porque son importantes ensigo mesmes. A mí dame lo mesmo que seya un floreru, la mano drecha de Pilar Pardo o l'amante secretu de Rajoy. Si emplegáramos esi criteriu de que la opinión de daquién ye valoratible en función del pesu nun partíu dibamos dir a sucu baxeru. Si Humberto ye poco en política, ¿qué dicir entós d'otros opinantes que nin esisten políticamente?. Otra cosa estremada sedría que tuviéramos falando de filoloxía estrictamente. Entós sí hai criterios de méritu porque hai doctores en filoloxía, espertos y profanos. Lo mesmo que si falamos de física cuántica o de política monetaria.

    Polo que toca a posibles pertenencies a xermandíes, d'eso namás se fala nel centru xeométricu asitiáu pente la escuadra ya'l compás. En serio, Humberto Gonzali ya yo somos amigos dende van munchos años. Ye lo que se conoz como "amistá inglesa": tiempu y tiempu cultivando lo que xune, evitando lo que dixebra y trabayando a comuña en tolo que se pueda. A mí paezme un bon métodu. Igual val pa poco, pero duldio de que seya malo pa mí, pa elli y pal país.

    ResponderEliminar
  11. Esto que diz David Rivas ye una leición de saber tar y de saber facer. A ver si daprendemos. Asina ye como se fae país.

    ResponderEliminar
  12. “Ye lo que se conoz como "amistá inglesa": tiempu y tiempu cultivando lo que xune, evitando lo que dixebra” .

    Unes preguntines David :

    ¿Como sabes tu lo que cultiva Xune? (si si'l mesmu que pienses esi'l cantante) .
    ¿Como sabes tu, que tien pie y mediu fuera de Dixebra por evitar cantar col grupu?
    En verdá nun yes caderalgu yes un adivín ,vese que te fueron bien les clases con la bruxa Lola.
    Bueno David too esto ye coña como bien sabes ,gracies por tar ehí siempre asonsañándonos .
    Yo esta vuelta voi faceme l'anónimu tamién , pero voi date una pista o meyor dos :
    Nun soi escritor mas que firme manifiestos como tal , soi fontaneru.
    Soi tan anglófilo(nun se si se diz asina lo que me pasa cuando xinto fabes) casi como tu.

    ResponderEliminar
  13. Presta muncho esti blogue. Polo que se fala nel, pero tamién por como se fae. Ta claro que cuando queremos y nun mos faltamos puede falase de cualquier cosa. En tol tiempu que llevo entrando namás recuerdo una faltosada.

    ResponderEliminar
  14. Pal que diz que-y presta'l blogue: toi d'alcuerdo dafechamente. Y quiero ameter una cosa: xamás se retiró dengún comentariu, nin tan siquier el faltosu del que camiento que diz, porque supongo cualu ye. Nun creo qu'un blogue valga pa más de lo que val, que ye poco, pero sí ye verdá que puede contribuyir a daprender a discutir.

    ResponderEliminar

Nota: solo los miembros de este blog pueden publicar comentarios.