“Asturies ta gobernada por cosmopaletos, por palurdos”

Monchi Álvarez: Cincu y siete minutos. Güei en “La vueltina” quedamos na historia y vamos quedar lligaos a personaxes ya episodios supuestamente propios d’esti país astur. Y pue que mos acompangue la polémica, de manu d’un economista humanista, amigu del programa y repunante, mui repunante, llamáu David Rivas. Hola, David.

David M. Rivas: Hola, Monchi.

M.A.: Bienveníu otra vegada a “La buena tarde”. Pásenme una nota los guionistes onde me dicen lo siguiente: “pregúnta-y a David Rivas pola ruta de la plata o, bien, pola vía de la plata, calzada romana que percorría la península de sur a norte o de norte a sur y parte l’oés”. David Rivas, empezamos fuerte.

D.M.R.: Empezamos fuerte, sí. La ruta de la plata nunca nun esistió.

M.A.: Yá dexa un titular. Yá-ys dixera que yera mui repunante David Rivas.

D.M.R.: Cuando los romanos ocupen la península ibérica tienen dos capitales fundamentales. Una ye Mérida ya otra Tarragona. Bono, esos son los nomes actuales porque entós yeran Emerita Augusta y Tarraco. Son les capitales de les dos provincies nes que dividen la península, Ulterior y Citerior. Cuando Hispania entama ser más importante nel imperiu apaecen más provincies y tienen les sos capitales. Nun van ser tan importantes como Mérida y Tarragona pero ehí tan Hispalis, que ye Sevilla, Lucus Augusti, que ye la Llugo gallega y Asturica Augusta, que ye Astorga. Hebo otres ciudaes más. Astorga yera la capital de los ástures cismontanos, que fueran asimilaos bien ceo, cosa que nun pasara colos tresmontanos, los del norte, los de lo que güei ye Asturies. Los tresmontanos nun se llatinizaron. Y los romanos trataben de facer una rede viaria con centru en Roma. La famosa frase de “tolos caminos lleven a Roma” nun ye de la ilesia, sinón de la Roma imperial. Fixeran calzaes dende tolos puntos cardinales que llevaben a Roma. Dende Hispania ficieron una gran calzada. Diba dende Mérida por Sevilla y subía ata Tarragona, pel Mediterrániu, y de Tarragona a Narbona y d’ellí a la península itálica, a Roma. Pero tamién fixeron calzaes más pequeñes pa usos militares o económicos. Asina, fixeron una que diba de Mérida a Astorga, con dos misiones fundamentales. Una yera la de controlar a los ástures tresmontanos, a los nuesos güelos, que nunca se rindieran a Octavio Augusto y siguíen guerreando.

M.A. ¡Ai aquellos tiempos nos que yéramos llevantiscos!

D.M.R.: Muncho cambiamos, ¿eh?

M.A.: Paez ser que sí.

D.M.R.: La otra razón pa facer aquella calzada yera la de custodiar l’oru ya’l fierru de les mines de Las Médulas. Ye verdá que d’ellí salíen calzaes menores. Una, por exemplu, la que va pel puertu La Mesa, ya otres qu’entren en Galicia. Pero yeren víes menores y poco custodiaes pol exércitu, como si que lo yera la Mérida-Astorga, la Mérida-Sevilla o la que llevaba a Tarragona, la más importante. Cuando lleguen los árabes y quieren dir pal norte, ¿qué faen?: emplegar les calzaes romanes. ¿Qué meyor camín qu’una “via strata” que va dende Mérida ata Astorga? Y los árabes llamen a esa calzada “al-balat”, que significa, cenciellamente, “el camín”. Media España, sobro tóo al sur del Taxu, tien docenes de pueblos que se llamen Albalate, porque taben “nel camín”. Cuando los asturianos derroten a los árabes ya entamen la so espansión vuelven a emplegar esa vía, la vieya calzada romana na so marcha haza’l sur. Por eso los reis asturianos tomen Mérida mui ceo, d’aú traxeron los restos de santa Olaya, ya un poco dempués Llisboa. Lo que güei son Valladolid o Segovia nun cayeron, anque saquearan Magerit, Madrid. Nun había calzada que lo facilitara. El casu ye que los asturianos, al oyir a los árabes falar de “al-balat” entienden “la plata”.

M.A.: Ye una mala traducción.

D.M.R.: Sí, ye una mala traducción del árabe. La “ruta de la plata” ye una mala traducción del “al-balat” árabe. Yera la calzada romana ente Mérida y Astorga. Nunca hebo una vía que llegara a Xixón ya enxamás circulara plata ente Sevilla y Xixón. Vamos, que “la ruta de la plata” significa “el camín del camín”.

M.A.: Y agora, ¿qué tenemos que facer?

D.M.R.: Hai munchos mitos que pueden convertise en recursos turísticos y a min nun me paez mala cosa, pero ye mester que se sepa, que se diga. Nun voi poneme repunante, namás pido que nun mintamos.

M.A.: Esto non. Si vusté ye repunante tien que selo siempres.

D.M.R.: Y soilo. Si non que-ys entruguen a la mio muyer y a les mios fíes. Pero, mire. Tol mundiu sabe, por exemplu, que lo de los reis magos de xuru que ye mentira pero ye importante y nun-ys vamos quitar a los neños esa nuechi máxica. Igual ye por pura repunancia, pero ye mester que les coses se sepan. Por exemplu, güei tol mundiu sabe que la ciudá de Gigia, si ye qu’esistiera, porque nun ta claro, taría no que güei ye’l norte de Palencia. Sábelo tol mundiu. Dícenlo los historiadores, los arquéologos, los estudiosos de la toponimia… Y dalgunos en Xixón siguin emperraos. Pero nun ye verdá. Cenciellamente, mienten.

M.A.: Yá-ys dicía que la polémica mos diba acompañar con David Rivas.  Ya una segunda notina de los guionistes. Segundu tema polémicu pa David Rivas nesta vueltina pela historia: Carlos de Gante. Falamos de Carlos I d’España y Carlos V del Sacru Imperiu Romanu Xermánicu. Tienen una querencia en Villaviciosa a Carlinos tremendísima…

D.M.R.: Yo a Carlos de Gante pondríalu como patronu de la OTAN: fora “primeru” n’España y “quintu” n’Alemaña.

M.A.: En Gante tampoco-y tiníen munchu amor porque cuando pidió perres pa la guerra contra los franceses dixiéron-y que tararí que te ví.

D.M.R.: Nesto pasa como colo de la ruta de la plata ya otres coses. Si en Tazones quieren conmemorar el desembarcu de Carlos porque ye un recursu turísticu o porque faen una fiesta pa pasalo en grande, a min paezme bien.

M.A.: Tolo que seya cellebrar…

D.M.R.: Sí, caro. Lo que me paez mal, porque me paez un falseamientu de la historia, ye que conviertan una anéudota marxinal en dalgo fundamental na historia del conceyu de Villaviciosa y d’Asturies. Carlos de Gante llegara d’arribada a Tazones, el so destín yera Laredo, porque los flamencos nun sabíen navegar. Daquella sólo tres pueblos sabíen lo que yera la mar océana: los portugueses, los vascos y los asturianos. Los demás, cabotax y gracies. Agora dicen dalgunos que vino a Villaviciosa porque quería visitar Valdediós. ¡Home, nun me falten a la intelixencia! Un flamencu educáu na corte de Bruxelles, embaxo Chartres, Colonia, Estrasburgu, Santa Gúdula…, ¿va metese na peor mar d’Europa pa dir a Valdediós? Pero, ¿quién pué caltener semeyante cosa? A min eso paezme una tontada de lloxa esotérica d’andar per casa. ¿Vusté ye a maxinar al ñetu de los reis católicos y del emperador d’Alemaña, con una corte flamenca y valona, peregrinando a Valdediós?

M.A.: Non, non, la verdá ye que non.

D.M.R.: Llegó a Tazones don Carlos, a Asturies. Nun volviera nunca. Asigún Laurent Vidal, el so cronista, echó pestes del país, dixo qu’enxamás viera clima peor, que nunca viera muyeres más fées, que lo que comíen yera intragable…

M.A.: Y sobro lo de la guapura de les muyeres taba bon elli pa falar, col so prognatismu. Yera más feu que Picio, col prognatismu y con tolos dientes mal colocaos.

D.M.R.: Yera feu de coyones y de tolo demás. Y casó cola, dícenlo los escritos y vémoslo nos cuadros, la muyer más guapa de l’aristocracia d’entóncenes, Sabel de Portugal. Yera tan guapa que cuando morriera, mui xoven, Francisco de Borja, el más potente de los Borgia, al vela descompuesta cuando abriera l’ataude pa dar fe, fíxose xesuita y arrenució a tolos títulos y propiedaes. Nun sé si los oyentes lo recuerden: “nun voi servir más a señores qu’en guxanos se conviertan”.

M.A.: Vaya, que don Carlos yera un repunante.

D.M.R.: Non. Carlos de Gante, amás d’un mal home ya un mal rei, nun yera repunante. Yera maltomáu. Por eso yera cruel y sanguinariu. Ye llamativo. Los españoles piensen d’elli que fora un gran rei. Yo pienso que fora lo peor que mos cayera nel tiempu aquél. Yera dignu fíu de Felipe, el guapu, ambiciosu y de mala corada.

M.A.: Y nunca volvió Carlos a Asturies.

D.M.R.: Nunca. Asturies yera nominalmente parte de Castiella pero cuasi naide pagaba impuestos y nun diben a la milicia del rei porque yeran nobles.

M.A.: Como la so mesma familia maliaya.

D.M.R.: Sí, pero yo nun pueo remontame al XVI. Voi facer un viax maxinariu. La mio familia, ou otra d’entós, noble, anque seguramente probe, nun debía pleitesía a Carlos. Dixera lo que dixera’l flamencu nosotros tinámos la carta de Sabel la Católica, firmada en Segovia, aceutada polos comuneros en Toledo y confirmada por Xuana I en Tordesillas. Eso desplicaría por qué los asturianos, que siempres tuvieran al marxe de los pleitos castellanos, sofitaton a Xuana, a la que los aragoneses y catalanes llamaben “lloca”. Nun sé yo… Ye una intuición, pero pamidea que pudo ser una gran raina.

M.A.: David Rivas va más allá de lo que yo esperaba.

D.M.R.: Ye que a xente como yo nun mos dan muncha cancha nos medios y tenemos qu’aprovechar. Y vuelvo a contar lo que cuntara nel programa que dirixe vusté, “La viquina”. Yo contaba qu’el primer rei d’España que visitó Asturies fora una raina, Sabel II. Tamos a finales del XIX. Y nunca hebo cortes n’Asturies. Nunca. Tábamos al marxe completamente de la corona a la que pertenecíamos, a la castellana. Nun pagábamos impuestos y nun contribuyiamos a la milicia’l rei. Siguiendo con Carlos: cuando quixo sacar les perres, el “serviciu” que llamaben entós, tuvo que convocar cortes en Coruña, porque no que yera la vieya Castiella nun-y les dieran, nin nes cortes de Toledo, nin nes de Segovia, nin nes d’Ávila. Convocoles dempués en Compostela ya ellí tamién les-y ñegaron. Al final sacó les perres en Coruña.

M.A.: Comenció a los coruñeses.

D.M.R.: Non, non, non a los coruñeses. Dio privilexos a los representantes que fueron ata Coruña a facer cortes. La mayoría yera de mui lloñe. Compró a unos cuantos nobles y burgueses castellanos. Eso diba provocar la rebelión comunera porque les perres pagábales la vieya Castiella, Llión y Andalucía, non Asturies nin Vizcaya y poco Galicia. La rempuesta de Carlos y d’Adriano d’Utrecht, dempués papa por gracia de Carlos, ye armar milicies flamenques y olandeses, xunto con milicia servil castellana y mercenarios catalanes, pa acabar coles comunidaes castellanes, que yeran la primer burguesía d’Europa. Carlos de Gante torga que Castiella se convierta nel primer país modernu y “capitalista”, esto ente comines, d’Europa. Pa elli ye más importante la naciente industria de Flandes, que ye lo que de verdá ye pa elli valoratible. Por eso ordena arrasar Medina del Campo, el centru llaneru y testil del reinu, la cabeza d’una industrialización naciente, el gran centru comercial de Castiella y, seguramente, de toles corones ibériques. ¿Ya entá dicen que fora un gran rei? Si, caro, pa Flandes y pa Olanda. Y, ye llamativo otra vuelta, denguna villa nin denguna casa nobiliaria d’Asturies participa, nin col rei nin colos comuneros. Aquello nun yera cosa de los asturianos.

M.A.: Pero, ¿por qué tanta querencia a Carlos en Villaviciosa? Ta bien lo de Tazones, la folixa, la recreación del desembarcu… Pero, como vusté comentaba, aquello nun pasó de ser una anéudota. Llegó a Tazones y fue a Villaviciosa. ¿Pasó una nuechi o dos?

D.M.R.: Pasó mui poco tiempu y marchó per tierra pa Laredo. Per mar nun lo fixo. Aquellos marineros podíen acabar cola so vida. Ellí, en Laredo, lu esperaben los embaxadores de les cortes de Castiella. En Villaviciosa durmiera na casa de los Evia. La querencia de Villaviciosa a esti personax vien de cuatru eruditos ociosos y de posibles a los que-y presta pasar a la historia llocal. Y van pasar, como babayos, pero van pasar. Ye como cuando nos años sesenta l’ayuntamientu franquista de Xixón decidió poner una estatua d’Augusto n’El Campu Valdés. Amás de ser una copia mala de la peor representación del césar ye que trátase del home qu’arrasó Noega, la vieya Xixón. Ye como si los xixioniegos llevantaran agora una estatua a Enrique III de Castiella, el que quemó Xixón, pasó a cuchiellu a la población y semó de sal toles tierres de llabor. Pero son figures pa llucimientu del palurdu eruditu qu’escribe na prensa. Más lluéu sal otru eruditu que matiza y dempués otru… Son coses ensín interés históricu dengún.

M.A.: Amás, cuando llegó a Tazones, yera “Carlinos”, nun yera’l gran Carlos.

D.M.R.: Non, caro. Y hai más coses que la xente descoñoz. Carlos I d’España namás que lo fue de vieyu, porque la raina titular de Castiella siempres fora Xuana. Elli fue enantes rei d’Aragón y conde de Barcelona que rei de Castiella, porque Fernando’l Católicu morriera ensín más fíos. Por eso Carlos llevó mercenarios catalanes a arrasar los burgos castellanos. Y Felipe, el fíu, nunca fuera príncipe d’Asturies porque la raina siguía siendo la so güela. Xuana I (nun escaezamos que de Trastamara, d’Avis y de Lancaster), nunca arrenunciara a la corona y les cortes siempres la recoñocieran como llexítima soberana. Carlos exercía’l poder pero nel nome de la madre porque la corona yera d’ella. Yo teo una enorme simpatía por Xuana. Ye posible que tuviera un poco desequilibrada, como la so güela Xuana de Portugal y la so sobrina María d’Inglaterra, pero comprendió perbién que los tiempos yeran otros. Apautó colos burgueses, firmó docenes de fueros de llibertá a les villes y ciudaes, fixo una reforma xudicial, suprimió potestaes de les grandes families y de los obispos, quitó-y poder al inquisidor xeneral, amplió los drechos que la so madre diera a los indíxenes d’América… El casu ye que Carlos namás que se llama “primeru” a la muerte de la madre, cuando yá ye vieyu.

M.A.: Entós quiero volver meter el de una fería. Yo sé qu’ama vusté a la so Villaviciosa, el so conceyu y la so villa del alma, onde vive ya onde tien los raigaños. Y vemos el cartelu de les fiestes d’El Portal y ehí que ta otra vuelta Carlos de Gante. Pongo un exemplu.

D.M.R.: Eso sí que yá resulta ofensivo. Lo otro, lo de Tazones, resúltame absurdo pero pueo entendelo. Que Tazones alcontrara nel desembarcu un reclamu turísticu, una forma de sacar beneficiu, ye comprensible. Pero lo del cartelu de les fiestes de la villa ye una patochada. Equí coincido, como notres munches ocasiones, con un gran mayestru que tuvi de rapaz, con “El Fidalgo”.

M.A.: ¡Home, José Antonio Fidalgo!, otru repunante illustre y habitual de “La buena tarde”. Ye qu’equí vien la bona xente…

D.M.R.: Ye un gran paisanu. Yo quiérolu muncho. Fidalgo dicía, a un comentariu míu nes redes sociales, que qué tinía que ver la Portalina con Carlos de Gante. El diseñador, bien presionáu pol ambiente o bien dándose cuenta que ye mui rentable la figura de Carlos pa ganar el concursu y que te paguen los papanates de Villaviciosa, o poles dos coses a un tiempu, fae lo que fae. Yo nun coñozo al cartelista. Por cierto, el cartelu ye de bona fechura, ye obra d’un bon artista.

M.A.: Sí ye verdá qu’el cartelu ye bonu, pero choca.

D.M.R.: Ye una d’eses coses rares que facemos los asturianos.

M.A.: Vusté defínelo con una palabra qu’a min m’encanta: “cosmopaletismu”.

D.M.R.: Son cosmopaletos. Tenemos n’Asturies un montón de cosmopaletos. Ye que tamos gobernaos por cosmopaletos, por palurdos. Mire una cosa. Yo lleo tolos díes unos cuantos periódicos y, amás, lleo en papel y lleo cuasique tóo. Yo soi d’esos a los que nos chigres obliguen a lleer n’alto porque teo cada periódicu media hora.

M.A.: Fae lo mesmo Jerónimo Granda: diz que llee los periódicos n’alto nel chigre.

D.M.R.: Otru repunante.

M.A.: Otru repunante, sí. Por eso mos caye bien.

D.M.R.: El casu ye que lleo en páxines de “El Mundo” y en páxines de “El País” anuncies del gobiernu gallegu y de empreses privaes gallegues que tan en gallego. Y naide nun refuga l’asuntu, nin n’Asturies nin tampoco en Madrid, que son los llugares onde yo lleo periódicos nos bares. Ya equí son capaces de cambiar el nome d’un pueblu por si se pierden los turistes que siguen el GPS. Toi falando de los cosmopaletos del conceyu de Parres, que dicen qu’eso de “Les Arriondes” lleva a confusión. Eso ye cosmopaletismu n’estáu puru.

M.A.: ¡Qué bien que se desplica David Rivas! Tercer posit de la tarde. Estos guionistes… ¡con tal de nun gastar papel! ¿Qué sabemos de Pelayo? Afiliación de Pelayo, datos personales, seguridá social… Pelayo, ún de los símbolos del país astur. ¡A ver lo que va dicir David Rivas de Pelayo…!

D.M.R.: Ye evidente que nun tenemos datos de la filiación de Pelayo. Dalgunos dicen que fuera espatariu de Witiza y podría ser, y más llueu de Roderico, el que pasa a la historia como Rodrigo, y tamién podría ser. Nun voi ponelo en duldia. Llega la batalla del Guadalete, la de la llaguna de La Janda, y, posiblemente, si yera home de confianza de Roderico, pudo tar ellí ya inclusive combatir. Pero eso, ¿qué mos diz?: que yera un home cercanu al rei, mui cercanu seguramente. Los godos yeran mui pocos. La monarquía goda asentábase nuna base hispanorromana en tol interior y la rexón mediterránia y con restos de tribus y naciones non romanizaes nel norte y nel noroeste. Nesi mundiu la llealtá al rei yera de calter feudal. Ye colos godos colos que ñaz el feudalismu precisamente. Entós Pelayo podía ser un home lleal al rei, feudatariu, pero non necesariamente godu. Los árabes ganen la guerra y Pelayo afuxe pal norte y abellúgase n’Asturies. Teamos en cuenta qu’Asturies nunca fuera dominada polos godos. De les tribus xermániques namái que queden resclavos de los suevos y poca cosa. Los godos nunca dominaron el norte de la península. De fechu los árabes aprovecharon pa invadir Hispania el fechu de que Roderico taba asediando Pamplona. Les tropes toledanes nun taben xuntes y centralizaes. Equí entamamos colo plausible. Si Pelayo busca abellugu nun pueblu nel que nun hai godos y que ta en guerra colos godos, lo normal, lo plausible, ye pensar qu’elli tampoco lo yera o, que siéndolo, la so muyer nun lo yera. Pelayo taría regresando a les tierres de só o a les de la so muyer. Ye que, si nun ye asina, la historia sedría que llega un enemigu y, non que namái lu aceuten, sinón que lu nomen rei. Nun ye plausible. N’historia, cuando nun hai documentos, emplégase la plausibilidá. Yo nun pueo dicir nun congresu científicu que Pelayo yera de Cangues d’Onís o de Piloña, anque, personalmente, si tuviera qu’ubicalu, pondría como trubiecu la zona de Piloña.

M.A.: Entós, ¿yera asturianu?

D.M.R.: Yo creyo que sí, anque esto enxamás lo podría defender nun aconceyamientu científicu. ¿Qué podría dicir nun aconceyamientu asina?: que daos los datos que teo, lo más probable, lo plausible, ye que fuera asturianu, o bien que tuviera casáu con una noble asturiana. Ye que ye de xacíu. Si dientro de doscientos años alcuentren la mio tumba y ven que toi con una muyer, lo normal ye pensar que trátase de la mio esposa, la mio madre, la mio fía, la mio hermana o la mio güela. Si tenemos el mesmu ADN descarten a la esposa. Si ella tien vente años más que yo sedrá mio madre, si tien vente menos sedrá la mio fía, si ye como yo sedrá la mio hermana y si tien cincuenta más sedrá la mio güela. Al final nun se sabrá tóo. Naide sedrá a afirmar, si se trata de mio madre, cuándo me parió, onde y si yera roxa o morena, pero naide dirá que toi enterráu con una muyer que pasaba pellí. En cambio, nesti país de cosmopaletos, cuando nun hai documentos, envede plantegar como probable lo que ye plausible, plantegase lo que ye cuásique imposible. Remembremos la navaya d’Ockham: lo más cenciello suel ser lo verdadero.

M.A.: ¿Y la batalla de Cuadonga? Tamién hai polémica sobro la batalla de Cuadonga, ellí, na borrina de la lleenda.

D.M.R.: Pienso que la batalla de Cuadonga, seguramente la escaramuza de Cuadonga, fuera n’El Priena, non na cueva. Hai tradición popular que mos fala d’esto. Y la batalla verdadera, na batalla na que los asturianos derroten a los árabes dase en Contranquil, nos llanos nes bárcenes del Güeña. Los árabes afuxen haza l’oés, haza Xixón.

M.A.: ¿Pero taben de verdá los árabes interesaos n’Asturies?

D.M.R.: Yo creyo qu’aquello fora más bien una espedición, pa ver que yera lo que pasaba pequí. Pue que tuvieran interés nel valle baxu d’El Nalón. La ria d’El Nalon siempres fuera mui importante. La llocalización de Pravia ye estraordinaria dende tolos puntos de vista, como son Llondres, París o Llisboa. Esa ría podría ser interesante pa los árabes. Paez ser que tuvieron un gobernador en Xixón, un tal Muza o Munuza. A min paezme qu’eso pertenez a les histories populares, por aquello de que cortexaba a la hermana de Pelayo. Xixón nun tinía dengún interés, nin económicu nin militar. Amás yera una villa tremendamente vulnerable frente a los normandos, que yá andaben per estes costes. Lo de Cuadonga ye más una custión mítica. Teo la opinión, en viendo’l llugar, analizando los topónimos (Cuadonga, Deva) y faciendo mitoloxía comparada, qu’ellí había un cultu a la diosa madre, a la madre tierra, a la virxe negra. Esi cultu ye’l qu’hereda la virxe María y por eso María ye tan popular, perriba’l mesmu Dios munches vegaes. La veneración a María ye dalgo natural, nun ye mester desplicala y facer d’ello teoloxía. Ye qu’el dios padre requier pensar. La diosa madre namái que requier esistir. La idega que yo teo ye qu’un grupu, nun sé si mui grande o mui pequeñu, escontra la invasión, metiérase na cueva. ¿A qué se pué dir a una cueva ensín salía cuando yes atacáu?: a una de dos coses, a defender a la madre o a morrer con ella. Tamos falando d’un pueblu mui poco cristianizáu, un pueblu que, dicen los obispos, caltenía rasgos paganos ata finales del XIX. Yo diría qu’inclusive nel XXI. Porque’l mitu real de Pelayu y de Cuadonga ye’l de la cruz qu’apaez nel cielu, con esa voz de “con esti signu vencerás”, que ye lo mesmo que ve Constantino enantes de la batalla de Milvio con Magencio. Esti sí que ye un mitu cristianu y mui posterior a la fundación del reinu d’Asturies. Pero el mitu de la cueva de la madre ye un mitu que mos lleva, como poco, al neolíticu o más atrás. De fechu ye normal falar de la virxe de la santa cueva. La santidá tienla la cueva.

M.A.: ¡Qué habilidá tienen los cristianos pa quedar con tolos mitos!

D.M.R.: Toles relixones fixeron lo mesmo pero los cristianos fueron más llistos. La relixón cristiana, que debería llamase “paulina” porque nun la funda Xesucristo sinón Pablo, ye la meyor construyía de toes, mui superior a les demás. El cristianismu, magar tener aniciu semita, incorpora l’helenismu, la filosofía griega. Vamos fixamos nel símbolu central del cristianismu: la eucaristía. Falamos de la transubstanciación: la forma permanez pero la esencia camuda. Eso ye Aristóteles. Eso nun lo compartiría nunca nin un xudíu nin un musulmán, los otros heriedes del monoteísmu semita.

M.A.: David Rivas, tién vusté que venir más vegaes a “La buena tarde”.

D.M.R.: Encantáu.

M.A.: Préstamos falar con vusté. Amás en “La viquina” tien fans, pero fans.

D.M.R.: Eso yo nun lo sabía.

M.A.: Y, vamos a descubrir una de les claves d’esta charra: hai un congresu de repunantes.

D.M.R.: Pasao mañana.

M.A.: ¿Qué ye eso d’un congresu de repunantes?

D.M.R.: Esto surdiera l’añu pasáu. Yo teo un perfile en Facebook. Sólo ando por Facebook porque nun teo nin tansiquier washap. Debo tener dos mil amigos pero, al final, fales con trenta. D’esos trenta, doce o trece son amigos de siempres, de los que ves nel chigre o nel campu fúbol, pero otros son mamás que virtuales. Y pensé, “¿por qué nun mos vemos esti branu?”. Y viendo les discusiones que tenemos habitualmente decidiera convocar un congreso de repunantes. Anque fora mui precipitáu tuviéramos ésitu, con una concurrencia de quince-vente persones en Los Pomares, en Xixón, al abellugu de Pili Ramos, la más repunante de Venta les Ranes. Y pasao mañana cellebramos el segundu congreso. Va tener menos afluencia porque la convocatoria fora muncho peor y la fecha ye mala, pero seremos doce o trece, seguramente más que los de la cueva de la diosa madre. Anque igual me dan un güelpe d’estáu y me derroquen.

M.A.: Vusté ye’l presidente.

D.M.R.: Presidente soberanu. Tomámoslo direutamente de Belarmino Tomás, un puntu tan repunante que rompiera con España y pidiera sofitu a la Sociedá de Naciones.

M.A: Pero, volviendo a Carlos de Gante, ye meyor ser repunante que maltomáu. Eso ta clariquino. Pero ye que, últimamente, paez que ganen los maltomaos a los repunantes.

D.M.R.: El repunante caltién sentíu l’humor. El maltomáu non. El repunante mosquéase pero tien humor y ye a rise de sigomesmu. Un repunante ye’l que cuenta esti chiste. ¿Qué diferencia a un madrilanu que pasa El Payares d’un asturianu que pasa El Payares? Qu’el madrilanu ta de vacacaciones y l’asturianu ta emigrando. Esi ye un chiste de repunante. Ye sangrante, durísimu, pero los repunantes, con dolor, rinse. Un maltomáu armaría la de dios ye cristo.

M.A.: Pues munches gracies, repunante David Rivas.

D.M.R.: Munches gracies, repunante Monchi Álvarez.