Hola, soi David Rivas ya
esto ye La Viquina.
Güei, envede cuntáis
histories del güelu Cebolleta, voi cuntáis una que-ys va prestar y que ye más
bien del bisgüelu Cebolleta. Mio güelu maternu, el padre de mio madre, yera
playu, de Cimavilla, y llamábase Manolo. Estudiara na Cátedra y más lluéu na
Escuela Neutra, con Eleuterio Quintanilla, un home al que siempres, ata la so
muerte, llamara “el mio mayestru”. Siendo alumnu de tal mayestru, llóxicamente,
mio güelu acabó afiliándose a la CNT. Manolo yera un home de la FAI. Y
cuntárame munches coses d’aquelles dómines.
Cuando la guerra los
anarquistes, que n’Asturies yeren, básicamente, de La Felguera y de Xixón,
formaron dos batallones. Asturies yera dafechamente socialista, mui pocos
comunistes ya eses dos islles anarquistes que yeren La Felguera y Xixón, amás
de Candás y dalgunos puertos de la costa más occidental. Dicía que los
anarquistes formaran dos batallones: Aida Lafuente 1 y Aida Lafuente 2. Al mio
güelu tocói l’Aida Lafuente 2, que combatiera nel País Vascu, nel cercu de
Bilbao, y dempués, tirando pal occidente, de vuelta pa casa, tres la traición
del gobiernu vascu y del PNV. Acabaron n’El Mazucu.
La historia d’El Mazucu
ye mui interesante, non namás que dende un puntu vista políticu o simbólicu,
sinón dende un puntu vista militar. Nun fora una batalla de les más
sangrientes, anque lo fora bastante, pero sí mui interesante dende esi puntu
vista militar. Cincu mil homes resistieron a cuasi cincuenta mil, a una tropa
formada por españoles, alemanes, marroquinos ya italianos, cubiertos dende
l’aire pola Llexón Cóndor de la Luftwaffe. A los faxistes mandábalos Solchaga,
el xeneral carlista de les brigaes navarres, un criminal de guerra. Dicía mio
güelu que siempres yera meyor, nel frente oriental, entregase a los italianos,
pero nunca a los navarros. Lo mesmo nel frente occidental, meyor a les falanxes
castellanes y nunca a los gallegos.
Esta ye la historia que
tol mundiu sabe, más o menos. Pero yo quiero cuntá-ys una anéudota distinta. Fue
tando yo en Viena, faciendo un estudiu sobro la güelga ecolóxica de la Unión
Europea. Tábamos tomando dalgo en casa d’un amigu y saliera el tema de la
guerra, nun sé por qué, ya yo falé de la batalla d’El Mazucu. Esti amigu míu,
austríacu, díxome que-y sonaba lo d’El Mazucu. Pensé: ¡qué cosa más rara qu’un
paisanu d’Austria y dempués de setenta años sepa d’El Mazucu! Pues resulta
qu’el güelu d’elli yera un oficial de la Luftwaffe, que llegó a mariscal, y que
combatiera nel frente’l norte na guerra civil. Yera’l mariscal von Hengelberger,
conde de Hastalt, ún d’aquellos aristócrates que se fixeron nazis encamentaos
pol arume del vieyu imperiu. El casu ye qu’el ñetu tinía un llibrín escritu pol
que fuera asistente del conde entóncenes. Fue a buscalu y lleyérame un par de
párrafos. Nuna cena colos sos oficiales, von Hengelberger entrugó lo siguiente:
“¿quién manda les tropes que mos tienen paraos equí, n’El Mazucu?”. Y siguiera:
“el puntu que ta mandando nesto, con tan poco material como tién, que námai
que-y queda material llixeru, en viendo cómo resiste ya organiza los
contrataques, aparte de conocer perbién la fastera, tien tener fonderos
conocimientos de táutica militar”. Entós, ún de los oficiales dixérai: “señor,
el que manda eses tropes ye un anarquista que nunca pasara per una academia
militar y llámase Hixinio Carrocera”. Von Hengelberger púnxose de pies,
llevantó la so copa y dixo: “señores, brindemos por esi comandante y polos sos
homes, que mereceríen ser alemanes”. ¿Verdá que ye una anéuduta mui guapa?
Los batallones Aida
quedaron unificaos na 192 Brigada Móvil y me paez que con tal nome combatieron
n’El Mazucu, pero nun toi seguru. Más llueu la historia fora acelerando, pa
mal, y los supervivientes d’El Mazucu acabaron n’El Musel. Hixinio Carrocera
intentó, llóxicamente, escapar d’una muerte segura pero resultaba que nel barcu
británicu había sitiu pa elli pero non pa los sos soldaos. Y Carrocera dixo
qu’ensín los sos homes, soldaos pero tamién compañeros, nun marchaba. Yeren los
“aides”. “La muerte con camaraes ye menos dura”, escribiera’l príncipe
Kropotkin cuando fora condergáu a pena capital en París. Carrocera quedó en
puertu y fuera condergáu a muerte. Falaron por elli cures, falanxistes, monxes,
empresarios, xente de la CEDA… Nun alcontraron nin un dellitu menor en tola so
historia. Pero la pena de muerte confirmose porque l’afrenta que fixera al
exércitu de Franco n’El Mazucu, magar de perder a la postre, fora pergrande.
La última anéudota de
Carrocera, que sopelexa cómo yeran aquellos paisanos nuesos, cómo yera mio
güelu ente ellos (los dos güelos, que del otru falaremos notra ocasión), ye
que, enantes de que lu afusilaran, pidió unes tenaces coles qu’arrancó les
mueles d’oru. Diérailes al carceleru, un republicanu camufláu, y díxo-y: “toma,
llévailes a mio madre, qu’ella va necesitales más que yo”. Esa mañana pasaran
peles armes a Hixino Carrocera, el comandante d’El Mazucu. Ellí, nel paredón de
la cárcele modelu d’Uviéu quedó la memoria d’aquellos homes valientes,
d’aquellos guerreros lleales del Conseyu Soberanu. Pero, dicía mio güelu, trece
de los aides, asturianos de la CNT, entraron de los primeros en París y, cuando
víen caer la bandera nazi, llevantaron los fusiles n’honor del so comandante.
Soi David Rivas, esto ye
La Viquina. Un saludu a los oyentes de la radio pública asturiana.
Comentarios
Publicar un comentario