19.9.16

San Mateo


Asigún la tradición, Mateo yera un xudíu que recaudaba impuestos, nun quedando mui claro si yera pal templu o pa los romanos ocupantes. Ye más aceutable que fora recaudador del templu, seguramente un fariséu, y que lo mesmo careciera nes costielles les vergaxaes de Xesús cuando’l mesíes echara a los mercaderes d’aquel llugar sacráu. “Esta ye casa d’oración y camudára-ysla a cueva de lladres”, como quedara escrito nel mesmu evanxeliu qu’atribuin a Mateo. El casu ye que, dexándolo tóo, lo que paez importante tiniendo en cuenta que ye perprobatible que toviera una situación acomodao, dicicidiera siguir a Xesucristu y ser el so apóstole.

A Mateo se-y atribuí un de los cuatro evanxelios canónicos, ún de los tres sinópticos, el que tenemos que llamar “asigún Mateo” porque ye mui poco probatible que lu escribiera dalguién que coñociera a Xesús. Demientres munchos sieclos supúnxose qu’esti evanxeliu yera’l más antigu, ente otres coses porque taba escritu n’arameo, la llingua materna del mesmu Xesús. Güei sabemos que l’evanxeliu más antigu ye l’evanxeliu “asigún Marcos”, un hipotéticu apóstole que tampoco pudo conocer a Xesús de Nazaret.
Mateo nun tién denguna relevanza relixosa n’Asturies, como preba’l fechu de que namái que ye festexáu na so capital, n’Uviéu, una ciudá na que, d’otra banda, la veración a Mateo ye inesistente. El patrón d’Uviéu ye san Salvador, el mesmu Cristu, y la titular de la diócesis, de la “sancta ovetensis” ye santa Olaya. San Mateo ye una fiesta neto profana magar que tien un aniciu nuna celebración relixosa de fondera antigüedá.
Metanes el sieclu XV la catedral d'Uviéu arrecibiera la prerrogativa del xubiléu de la Santa Cruz, el de la Cruz de la Victoria y la Cruz de los Ánxeles. Esti añu xubilar finaba’l 22 de setiembre, col equinocciu de seronda. Por ello, seguímoslo viendo anguaño, se-y presenta al pueblu la principal reliquia de la cámara santa de los reis d’Asturies, el pañolón, el sudariu del que dicen qu’atapara la cara de Xesucristu nel so sepulcru. Ya esi día yera’l día de san Mateo.
Dende aquel llonxanu día los uvieínos cellebren la efeméride del pañolón y, pasín ente pasu, alreol d’una fiesta que yá nun caltenía rituales relixosos –yá nun había xubiléu-, fora engromeciendo’l númberu d’actos profanos, mercantiles y llúdicos. Ye d’ehí d’aú vienen les fiestes de san Mateo.
Dende’l puntu vista relixosu, el xubiléu de la Santa Cruz entamara’l día 14, cuando, amosando al públicu la reliquia, cuntamos los siete díes de la perdonanza, qu’acaben el 21, día de san Mateo, con otra exhibición del pañolón na nave mayor de la catedral. El sudariu ta abellugáu na cámara santa y namás que sal d’ella esos díes 14 y 21 de la perdonanza, la indulxencia plenaria, ya’l vienres santu. Vien la ilesia asturiana faciendo esto dende’l sieclu XVI. Entóncenes los balcones de les cases principales orniábense con tapices ya estandartes y la catedral permanecía día y nuechi arrodiada por centenares d’antorches.
Siendo arquiobispu Gabino Díaz Merchán fixéranse estudios científicos sobro’l pañolón. Esti Díaz Merchán yera –entá ye porque vive- un home bonu, un preláu que posó pa la prensa col gomeru de los fuelguistes, que torgó con valentía que la policía entrara na catedral pa sacar a los obreros del metal encerraos na torre y que yá nos años de la transición permitiera que les ilesies foran cuarteles del movimientu obreru, siendo como yera fíu d’un matrimoniu asesináu por incontrolaos socialistes nuna d’aquelles prietes nueches alrodiu del 18 de xunetu de 1936. Los resultaos nun son concluyentes y les duldies son les mesmes que les qu’alcontramos cola “sindone” de Turín. Los fieles más creentes dan por seguro qu’el pañolón atapó la cara de Cristu, los menos creentes duldien pero almiten el so valor y los que nin somos fieles nin creentes pensamos que ye un obxetu venerable porque asina lo fuera pa los nuesos antepasaos y porque ye parte perimportante de la nuesa historia y de les frebes de la nuesa nación. El pañolón ye venerable pero non adorable. La diferencia ye grande.
Como vemos, san Mateo nun apaez per nenyuri. Queda Mateín, eso sí, el carbayón de boina y xilecu que representa l’Uviéu popular, esi Uviéu que quier resurdir dende los fosos d’una ciudá qu’abondoses vegaes quixo ser lo que nun ye nin pué ser, un burgu castellán al norte de Payares, esi Uviéu del que dixo’l poeta: “la capital renomada, la qu’arreniega d’Asturies anque se diz asturiana”. Porque, quiéranlo o non los sensatos y pensantes, los cierrecategoriales, los estructuralistes pepinescos, los gracies y grecietes ya otros cuantos, Uviéu ye la capital d’un país más que milenariu, un país qu’ata pué presumir d’una de les reliquies más importantes, sinón ye la más importante, de la cristiandá.      

No hay comentarios:

Publicar un comentario

Nota: solo los miembros de este blog pueden publicar comentarios.