Anque nun soi naide pa dar la bienvenía a La Llegra porque ye más la casa de tolos presentes que la mía, por más que m’alcuentro en casa, de toles formes gracies por esta afluencia tan numberosa y perdónenme pol retrasu que tuvi. Inaciu Llope va falamos güei de los raigaños celtes n’Asturies, echándo-y una güeyada al pasáu más remotu, al pasáu más reciente y al presente. Tamién, pienso, mos falará de cómo ve elli el futuru. Presentar a Inaciu Llope nun sitiu como esti sedría un poco fato. Nun ye mester presentalu. Tóos los presentes saben de Llope. Ye un nacionalista asturianu d’esquierdes, poeta, lletrista de dellos grupos musicales –particularmente de Llan de Cubel-, etnógrafu. Tamién ye psiquiatra na sanidá pública, concretamene nel hospital de Cangas del Narcea, ya espero qu’esta calterística nun seya la más importante pa los que güei mos aconceyamos equí pero, si ye necesario, meyor Llope qu’otru. Nun voi falar d’elli, nun voi facer una semblanza l’home, sinon que voi echar una güeyada a ónde tuvo elli y a los años nos qu’entamó a trabayar.
A finales de los años sesenta, en plenu franquismu entá, entamara una transición. Siempres que falamos de la “transición” facémoslo en términos políticos pero tamién hebo una transición cultural mui importante, una transición qu’entamó años enantes de la muerte de Franco. Esa transición entamara nos finales sesenta. El réximen entama abrir un pocoñín la manu en custiones culturales, anque non ensín episodios llaceriosos, con artistes qu’acaben na cárcele, nel esiliu, pasando pol Tribunal d’Orde Público, pero, hebo una apertura que permitió que dalgunes coses foran apaeciendo. Esa transición, ese cambéu, diérase, riba tóo nel ámbitu musical. La música ye la primer manifestación que da los pasos haza otra sociedá, de xuru que porque la música ye más difícile de controlar pol poder políticu. Los llibros, la lliteratura, la filosofía, l’analís políticu, ye más fácile de censurar y persiguir. Pela música metiéran-ys un montón de goles a los franquistes. Sintíense verdaderos himnos que güei calificaríen de “batasunos” o de coses asemeyaes. Ye verdá, entamaba apaecer una música, unes canciones feches en vasco. ¿Cómo diben controlar aquello? Tamién entamen los de la “nova cançó”, María del Mar Bonet, Llach, Raimon… Hasta apaez Paco Ibáñez, cantando n’español y que, ente Juan de la Cruz y Góngora, mete a Celaya y a Goytisolo.
Nesa transición cultural Asturies tuvo mui retrasada. El retrasu nestes custiones tién les sos ventaxes y los sos inconvenientes. Cuando llegues sero a los sitios, a les tresformaciones culturales y polítiques, nun consigues xubir al carru de los grandes cambios pero, a esi inconveniente, ametes la ventaxa de que viste la evolución d’otros, los erros y los aciertos, y puedes daprender y actuar. El ser atrasaos económicamente permitiera a dalgunos pueblos caltenese como nación. A nosotros, los asturianos, el fechu de ser mui adelantaos, industrializaos, progresistes, esquierdistes, esfarrapáramos como país. Eses son les contradicciones que se producen na evolución histórica.
Yo soi un poco más mayor qu’Inaciu y alcuérdome perfechamente del ñacimientu de Nuberu, un finxu importantísimu –otra vuelta vamos a lo musical- na nuesa toma de conciencia como pueblu. Cuando Chus Pedro y Manolo entamen yá llevaben otros una década como mínimu.
Los qu’entamamos a trabayar nesta estaya nacional nun lo fixéramos dende la música. Yo, particularmente, teo poca voz y, amái, desagradable. Tampoco toco nin la zambomba en nadal. Los qu’entamamos con esti movimientu a finales de los setenta, los que podríamos llamar “xeneración post Conceyu Bable”, los que somos un pocoñín posteriores a Conceyu Bable, nun entramos nesa transición cultural. Entramos direutamente na transición política. Dalgunos sí qu’entramos no cultural, yo mesmu, por exemplu, pero porque taba estudiando fuera y Conceyu d’Asturies de Madrid, tando politizao como taba hasta les coraes, nacionalistes ensín reserva yéramos, amirara muncho pola lliteratura, la historia o la etnografía. Y definíamosmos como celtes y celtistes. Pero yera dalgo mui epidérmico.
Van ser los que tienen cuatro o cinco años menos que yo los que van dar el pasu no cultural. Ye la xeneración d’Inaciu Llope la que va dar esi pasu y, particularmente, entrar nel celtismu con coñocimientu y rigor. Si nun lo lleyeran, hai un viax iniciáticu a Irlanda, espublizáu nel últimu númberu de la revista “Asturies”, que paga la pena y bien. Ye guapísimo. Paez que ye mentira, que ye como una saga. Ehí ta Inaciu y los collacios d’Inaciu. Ehí, nesi viax, ñaz el celtismu asturianu tal y como güei lo entendemos. Ye’l momentu de la xente de Belenos, de los primeros grupos musicales, Trasgu, por exemplu, con “La isla d’Hélice”, Ubiña, Xuacu Amieva… Otra vuelta la música.
Una cosa mui típica de l’Asturies d’esa dómina ye la desconexón ente lo real y l’oficial. Pasara no cultutal y no llingüístico pero tamién no académico más xeneral. Voi falar de dos custiones mui significatives. La universidá asturiana ye la única universidá del mundiu occidental que, tando nun país industrializáu dende la primer revolución industrial, nun fixo nin un estudiu, nin una tesis doctoral, sobro la reconvesión industrial de los ochenta-noventa. Cuando se desendolquen les autonomíes, el PNV alcuéntrase con una montonera d’estudios sobro esti tema fechos poles universidaes vasques, lo mesmo nes públiques que nes de los xesuites. Muncho-y valiera al PNV aquello pa facer una esitosa política industrial. Inclusive n’Andalucía tiníen estudios, particularmente de la Universidá de Cádiz, con esa bahía tan amachucada cola reconversión. Equí, n’Asturies, la “intelligentsia” prefirió racionalizar la brutalidá ya obedecer, porque la nuesa universidá fue y ye partidista, nun ye nin llibre nin crítica, ye de partíu, del partíu que tóos sabemos, mui especialmente la facultá d’economía.
L’otru asuntu ye’l devenir de los estudios d’antropoloxía. Nunca n’Uviéu s’algamara una enseñanza reglao d’antropoloxía, quedando les materies desta disciplina diseminaes per filosofía y psicoloxía ya embaxo les directrices d’un Gustavo Bueno dafechamente inorante nesta ciencia. La clave tan una fras del mesmu Bueno: “si encadarmamos un departamentu d’antropoloxía va cayer nes manes d’asturchales”. Un razonamientu científici onde los haiga, mui propiu d’esti falanxista dialécticu.
Pero, volviendo al asuntu central d’esta charra, ye evidente qu’el celtismu ye’l movimientu de verdá trunfador n’Asturies. Ye un movimientu, un conceutu si mos peta, discutible, como ye discutible cuasi tóo, pero qu’enraigonó fonderamente na cosmovisión de los asturianos. Hai unes selmanes taba yo nel chigre, en pueblu, y taben dos muyeres a la mio vera, dos muyeres d’eses que-y gusten a Rajoy, muyeres “normales”. Una d’elles, “normal” y cincuentona dicía: “home, bobina, ye que somos celtes”. La otra asintiera cola cabeza. La xente ta identificada plenamente col celtismu, vese como parte d’un mundiu que nun ye mediterrániu nin llatinu. Y persones que saben poco, que tienen poca cultura académico, dícente que somos como los escoceses o como los irlandeses. Y saben bien lo que tan diciendo, al marxe de custiones ideolóxiques y de preferencies polítiques. Na recuperación cultural d’Asturies nun tuvimos munchos trunfos pero hai ún que sí ye indiscutible: la identificación colo celta. Vamos dir de derrota tres derrota hasta la victoria final y el celtismu anticipa esa victoria.
La mayoría de los que tan equí ye bastante más mozo que yo y vive en zones urbanes. Yo soi más vieyu y vivo nuna aldega. La impermeabilidá de la cultura asturiana ye tremenda. Los asturianistes, por emplegar un términu comodín, a la primera que salta dalgo nes redes ponémosmos al monte y armamos la del degorriu. Pero les tocheces que se lleen o que se sienten, la verdá ye que nun lleguen a denguna parte. La cultura popular ye potentísima y non sólo nel mundiu rural, sinon tamién nes ciudades, anque se note menos. La nuesa cultura ye poco penetrable. Ye influyible, caro, y adopta elementos d’otros sitios, d’otres tradiciones, porque la cultura, por definición ye cambiante, ta en permanente evolución. Arrasques nuna cai d’Uviéu y apaez Prubaza. Una custión d’hai unos menses: un periódicu espublizó una investigación fecha n’Avilés donde se dicía que la llínia hereditaria del norte d’África yera más abondosa que la del norte l’Atlánticu. Una primer cosa: Avilés ye la ciudá con mayor númberu d’inmigrantes d’Asturies. Una segunda cosa: el titular del periódicu nun reflexaba la verdá de la investigación. Ya una tercera cosa: si entrugamos a un avilesín, anque seya ñetu d’estremeños o andaluces, con qué tradición cultural s’identifica, ¿qué diría? Pues o nada o falará del celtismu, non de los bereberes. Nun ye malo ni bono nin lo uno nin l’otro, ye, cenciellamente, lo que ye.
Somos una especie ritualística. Wittgenstein dicía que la recuperación de los ritos nun yera siñal d’irracionalidá, sinón de la vuelta a una sana racionalidá. Ya yo ameto: contra l’asaltu a la razón dende la racionalidá, ta la defensa de la razón dende’l mitu. El pensar romanu, el pensar grecollatinu, diéramos la razón histórica, científica si queremos, pero’l pensar célticu diéramos la razón mítica. Les dos son necesaries. Roma y Grecia diéramos el conceutu. La Celtia diéramos la pallabra. Ya’l pensamiento míticu une ya identifica. El simbolismu d’un agricultor del centru d’África ya’l d’un pixuetu ye mui asemeyao. Empleguen distintos signos, distinta codificación, pero la simboloxía ye práuticamente la mesma. ¿Por qué? Porque somos una especie ritualística. Eso vese mui claro cola música. Volvemos a la música. Vamos dir a lo más cenciello: cuando ves una banda gaites en formación, seyas de Grao o de Triana, sí, sí, de Triana, aprecies lo ritual. Yo teo un amigu en Madrid ensín xenealoxía asturiana que diz una cosa mui descriptiva: “cola gaita teo sentimientos distintos, con una danme ganes de llorar, con dos de baillar y con tres o más de garrar un fusil y dir a la guerra”.
Hai una cosa que cuento tolos años en clase. Cuando yera pequeñu nun entendía lo de la guerra fría. Pensaba: ¿cómo tienen tantu miéu los norteamericanos a los rusos? Yo pensaba qu’un misil soviéticu tinía que cruciar toa Europa y toul Atlánticu pa llegar a los Estaos Uníos. ¡Caro!, yo vía’l mapamundi típicu y nun me daba cuenta que pel otru lláu tan a cien kilómetros. La xeografía, dicíalo Reclus, ye un arma pa la guerra. Faigan esto: cuando lleguen a casa garren el mapa d’Europa y pónganlu en vertical. Entós van ver qu’el “mare nostrum”, el nuestru, el de los asturianos, la nuesa mar doméstica, ye esi espaciu que va del Cantábricu al Bálticu. Ye un bon exerciciu.
Muncho d’esto debémos-ylo a Inaciu Llope y a los sos collacios más cercanos. Y, p’acabar, quiero siñalar una calterística d’Inaciu perimportante. Normalmente, les persones valoramos nel d’alfrente los valores que tenemos nosotros mesmos. Si una persona ye sincera valora muncho la sinceridá nos demás; si ye arrogante valora l’arrogancia. Lo mesmo pasa colos defeutos: odiamos nos demás los defeutos que sabemos en nós. Un envidiosu siempres dirá qu’odia la envidia ya un borrachu ye esi paisanu que bebe lo mesmo que tu pero que te cai mal. Yo comparto con Inaciu una condición: nun somos sectarios. Eso ye mui importante. Nesti movimientu nuesu, apellidándolu en xeneral como “movimientu”, seya llingüísticu, políticu, cultural…, si un problema grave tuvimos dalgunes vegaes fora’l sectarismu. Los sectarios son xente normal, polo xeneral bones persones que nun son conscientes de selo. Inaciu, si dalgo comparte comigo, amái d’otros munchos suaños y cosmovisiones, ye nun ser sectariu.
Munches gracies pola so atención y escuchemos agora a Inaciu Llope, que ye a lo que viniéramos.
Comentarios
Publicar un comentario