Reflexón na valle l’Alba

La selmana pasada fixéramos en familia (muyer, fíes ya un hermanu) una caminata pela valle l’Alba, nel conceyu de Sobrescobiu. Nun yera la primer vegada que yo anduviere per eses fasteres. Fuera cosa d’un par d’horines namái, nun llegáramos a les tierres del conceyu de Casu, pero bastantina pa facer una reflexón d’eses que llamen “al tuntún”. Ye una ruta perguapa y fácile de facer pa toa triba xente. Paga la pena que los que nun la coñozan la faigan, como colo de La Meca, a lo menos una vegada na vida. Y nesti entamu de la primavera, lo mesmo que metanes la seronda, ye particularmente sensacional.

Pero, en fin, vamos con otros asuntos. Como yera selmana santa ya’l tiempu yera bonancible y soleyeru, aquello yera una romería. Nunca voi a esos sitios en feches como eses pero, como teo una fía en Barcelona ya otra en Madrid, nun hebo otra manera. Taben n’Asturies y queríen dir al rigu Alba. Lo dicho: una romería. Maxino cómo pue ser l’asuntu en xunetu y agostu… 

Lo primero que llama l’atención ye que tas arrodiaú de domengueros y turistes que tan na valle como podíen tar en La Cuesta’l Cholo o n’El Campu San Francisco. Los andariegos siempres que mos cruzamos con dalguién parámosmos a falar o, a lo menos, saludamos, damos el bon día. Cansé de saludar y arrecibir como rimpuesta el silenciu o esa cara fata que ponen les caxeres de los supermercaos cuando miren pa otru lláu mientres tu teclées el pin de la tarxeta. Esti asuntu nun ye una tochada, non. Esti asuntu dizmos muncho del tipu sociedá na que tamos y de la triba turismu que, nesti casu, aporta a Asturies.

Un espaciu, seya protexíu o non, pero aínda más si lo ye, tién ser xestionáu conforme a la so capacidá carga, lo que los ecólogos conocen como “factor K”. Un práu nun pué soportar más qu’un númberu determináu de vaques si queremos que’l práu persista y que les vaques coman tolos díes. Una sablera namái que pué soportar un númberu determináu de bañistes si ye que queremos conservala. Ya una ruta montaña lo mesmo de lo mesmo. Ye evidente que la valle’l rigu Alba nun pué soportar tanta presión y, repito, maxino la cosa nel branu. Lo mesmo que Sotu, l’aldega d’onde arranca’l camín, perguapa y con trenta habitantes como muncho, nun pue tener, como tién, un aparcamientu asfaltáu pa quinientos coches. 

Tamos, vuelvo dicilo, nun parque ñatural. Alcontré dalgunos botes de cerveza y de refrescos, botelluques plástiques d’augua  y, riba tóo, colielles y paquetes de tabacu ambute. Les colielles nun llamen muncho l’atención pero son un material contaminante de primer orde. Tamién yeren munchos los turistes que llevaben perros, sueltos, caro, cosa que nun se pue facer nun parque sacantes los canes pegueiros qu’acompanguen al ganáu. Nun yera raro ver a los perros nel augua’l rigu, espaciu propiu d’especies estrictamente protexíes.

Recordárame d’otros espacios, protexíos o non protexíos. Un domengu de branu la playa de Rodiles, nel conceyu de Villaviciosa, pue soportar miles de persones y centenares de coches, nun espaciu dunísticu de primer orde. Y dientro nada la vuelta ciclista va volver a los llagos de Cuadonga. Muncho xente piensa que lo del ciclismu nun impacta nel mediu. Ye evidente que los ciclistes non pero los miles de persones qu’enllenen les orielles de la estrada y los tarrenes llendantes por supuesto que lo faen. Son miles de persones nun espaciu que, precisamente, fora protexíu pola so fraxilidá. Eso si nun ye que se ponen dalgunos a faer paelles o barbacoes con “palos” qu’acaben por ser argaña ya espinera en pelligru d’estinción. Y los neños garren lo que ven como “margarites” y que, na realidá, son flores de plantes endémiques de Los Picos d’Europa.

Ye mester qu’abramos otra vuelta l’alderique sobro’l pagu nestos espacios. Nos Estaos Uníos ya en toa América Llatina hai pagar por entrar nos parques y nos espacios protexíos. Nun creyo que dengún interesáu en Redes, en Cuadonga o en La Penubiña dexe de dir por pagar cincu euros. Agora bien, ye necesario qu’esi preciu tea un calter finalista, esto ye, que se dedique la recaudación a conservar l’espaciu y non a lo que-y pete al alcalde de Sobrecobiu o de Casu o al conseyeru competente nel gobiernu d’Asturies. Eso provoca tres impactos positivos: menor masificación, recursos pa llimpiar y acuriosar l’espaciu ya emplegu llocal.

Y como nesta Asturies de la mio esmolición l’esbarrumbe y desaniciu ñatural siempres van de la mano del esbarrumbe y desaniciu cultural, resulta que na valle l’Alba tolos indicadores tan namás que na llingua española, cuando, precisamente, ye nos nomes de les plantes y de los animales onde la llingua propia ta más viva. Vaiga dende estes páxines un agradecimientu al gobiernu d’Asturies y al ayuntamientu de Sobrescobiu por sacar de la inoranza a dos muyeres. La mio fía que vive en Barcelona acaba saber qu’el malvís ye, de verdá, un “zorzal”. La otra, que vive en Madrid, supiera, al empar, qu’el ñerbatu ye, de verdá, un “mirlo”. ¡Mira tu que tener dir a una valle de l’Asturies fondera pa ser más cultes y cosmopolites…!