15.4.14

Contra’l PIB y col PIB

Na mio universidá lleven un tiempu los miembros de l’Asociación d’Estudiantes de Económiques (AEE) con una campaña contra’l productu interior brutu (PIB) como indicador de desendolcu y de bientar d’un país. L’AEE ye la organización más importante na facultá d’economía y coles sos ximielgues de filosofía, ciencies y drechu, constituin la cadarma de la esquierda estudiantil. La campaña, enmarcada nuna más xenérica de llucha contra lo que se vien denominando  “economía autista”, ye perinteresante y, dende lluéu, necesaria. Amás, ye mui importante que seyan los mesmos estudiantes d’economía los que pongan en tela xuiciu la más importante macromagnitú cola que son educaos nes aules.
El PIB namás que mide la renta d’un país nun añu ya esi criteriu ye’l que permite calificar a esi país como ricu o probe. Ye un indicador que mos diz abondes coses d’esi país pero non toes. Dos países cola mesma renta pueden, y de fechu socede, ser descomanadamente estremaos. Desaxerando, un hipotéticu país onde la metada de la población traficare con armes o drogues y la otra metada exerciere la prostitución, de xuru que cuntaría con una renta mui alta, pero a nadie-y paecería qu’esi ye un modelu económicu pa siguir.

Pero, ensín dir a un casu tan estremu y macabru, hai milenta casos a lo llargo de la historia. Por exemplu, nes pasaes décades de los ochenta y noventa hebo diez años que se consideren “perdíos” nes economíes llatinoamericanes. Tolos países carecieron d’un estancamientu y dalgunos inclusive decrecieron. Tóos sacantes cincu: Chile, Colombia, Dominicana, Barbados y Cuba. Chile, al ser el primer país qu’abriera al esterior el so mercáu consiguiera aprofitar les sos ventaxes comparatives; Colombia medraba, ente otres razones, pol tráficu de cocaína a gran escala; Dominicana basaba la so posición nun turismu que dualizaba la so economía y nes tresferencies de los sos emigrantes, particularmente muyeres en trabayos domésticos n’España; Barbados, col so pabellón marítimu de conveniencia; Cuba pola aída soviética, fundiéndose na miseria cuando’l períodu especial tres la desapaición de la URRS. Si quitamos el casu de Chile, nun paez que teamos escontra modelos centraos y, amás, en Chile l’espoxigue provocó perfuertes desequilibrios sociales.       
A la fin el datu’l PIB nun puede midir si’l país en custión ta en paz o en guerra; si ye una dictadura o una democracia; si’l consumu de recursos naturales ye racional o non, o si espoxiga, estanca o decrez; si’l repartu la renta ye xustu o si, por contra, una minoría vive na bayura y la mayoría pasa necesidaes y hasta fame; si les persones tienen trabayos estresantes y penosos o si gocien de tiempu llibre suficiente que pueden emplegar porque tienen recursos económicos pa ello; si les muyeres tienen igualdá de drechos colos homes o tan discriminaes; si ye una sociedá na que se esparde la confianza nel futuru o la medrana y la llerza.
Dende un puntu vista macroeconómicu l’ésitu o’l fracasu d’un país mídese, polo tanto, col PIB, lo mesmo que microeconómicamente l’ésitu o’l fracasu d’un individu o d’una empresa mídese polos beneficios, dos variables monetaries. La moneda, el dineru, tien dalgunes ventaxes pa medir la marcha de la economía: nun ye un indicador variable, el so preciu ye común pa tóos asigún marquen los bancos centrales y los mercaos de cambiu, ye fácile de remanar. Pero tamién s’alfrenta a un problema insalvable que devién en decisivu: puede amosar valores de cambiu pero non la utilidá de les mercancíes, lo mesmo la utilidá individual que, riba tóo, la utilidá social.
Les persones necesiten satisfaicer les sos necesidaes con recursos ya un recursu nun ye otra cosa que dalgo que ye útil, que reporta una utilidá. Un  valor de cambiu nun val pa calecese, nin p’alimentase, nin pa guarecese. Tampoco pa dar y arrecibir amor y amistá. La xente necesita alimentos, vestimenta, vivienda, relaciones sociales, ecosistemes naturales lo menos degradaos posible… El PIB ya’l beneficiu individual nun informen con fiabilidá de la utilidá, de les utilidaes, como tampoco lo faen al respective de la so disponibilidá y de la so distribución. Dengún espoxigue del productu mos va indicar si hai viviendes pa la población, o salariu suficiente, o seguridá alimentaria.
Como resume, nun cartelu que taba puestu hai unes selmanes nel vestíbulu la facultá, l’AEE sopelexaba: “el PIB nun ye capaz a midir lo que realmente cuenta”.
Pero tampoco podemos escaecer qu’esta triba campañes pué tener una llectura segunda, un tanto retorcía, que mos podría llevar a contradicciones y a polítiques erraes. Como’l PIB nun val pa midir lo que ye verdaderamente importante, podemos pensar que nun importa indicador talu. Ye más, podemos pensar que nun importa que descienda o quede estancáu. Esa sedría una posición peligrosa porque, nel mundiu nel que vivimos y como tamos viendo dende hai unos años, les recesiones económiques páguenles, precisamente, los que nun controlen los valores de cambiu y que carecen de malnutrición, desemplegu, enfermedá, falta de vivienda y barrios degradaos ambientalmente. Si’l PIB, esi indicador tan poco fiable, cayere, la depresión diba cebase sobre les clases populares y la dualidá económica sedría más acusao, como ya ta pasando col so escosu incrementu de los últimos años.
D’otra banda, embaxo criterios maximalistes, podríamos facer un “aponderamientu de la probetú”. Nun ye raro alcontrar persones d’ente cincuenta y setenta años que remembren la dómina d’hai cuarenta con frases como esta: “tiniámos menos pero yéramos felices, como nun tiníamos coches díbamos tola familia na furgoneta de fruta del mio tíu hasta les playes de media Asturies, quince persones tiraes nel suelu cuando cruzaba la guardia civil, años de vida cenciella”. Yo, personalmente, recuérdome d’esi tiempu con gran señardá. Pero la xente morría ensín hospitales, pasaba fríu nos iviernos, diben a males escueles sacantes los ricos. Cuando’l PIB creció, finales de los sesenta, xeneralizara la atención mélica, acabara la restricción alimentaria, les cadarmes sociales camudaron y hasta’l réxime políticu entamó la decadencia y nun tuvo otra qu’abrir la mano en delles coses.
Repítolo, d’alcuerdo colos miós alumnos de l’AEE: el PIB nun indica la realidá socioeconómica d’un país y, por muncho que medre, escuende les desigualdaes ente grupos sociales, ente una minoría privelixao ya unes mayoríes escluyíes. Pero tampoco debemos entrar en determinaes llamuergues programátiques.

No hay comentarios:

Publicar un comentario

Nota: solo los miembros de este blog pueden publicar comentarios.