28.12.13

Los arguyosos babayos del boicot



Ye una plaga lo qu’acaba ún por aguantar peles redes. Alléguenme mensaxes d’asturianos que dicen ser “arguyosos de ser asturianos” pa pidime qu’estes fiestes nadaliegues consuma sidre brut envede cava catalán. Argumenten que, si los catalanes quieren la independencia, que lo beban ellos. Pienso que la sidre brut tien una calidá suficiente, y a más que va dir, pa competir col cava o con cualisquier otru vinu, espumosu o non. Ya ta abriendo fuércigues en dellos mercaos, entá poco a poco, pero con pasu firme. Ya esi ye’l camín. Yo nun tuvi qu’esperar a que’l gobiernu catalán convocara un referéndum pa beber sidre brut. Yo siempres, dende qu’esiste, bebiera sidre brut, pero tamién cava catalán, tequila mexicano,  xinebra inglés y, como dicía l’otru, l’augua los floreros anque l’augua seya del Árticu y les flores orquídies d’Ecuador.

Hai que ser inorantes pa facer campañes como estes. Esta xente camienta que ta nel sieclu XIX, cuando les empreses nun taben internacionalizaes y cuando les burguesíes yeran, dafechamente, “nacionales”. Cuando entro nes redes sociales dame vergoña que m’identifiquen con una banda de babayos y descerebraos, una banda que tien más testosterona que llíquidu raquídiu. La imax que tan dando d’esi país del que tan arguyosos dicen tar ye más que llamentable.
Cuando l’anterior boicot a los productos catalanes, l’entamáu pola emisora episcopal y sofitada pol sector más ultramontanu del PP, el mesmu Aznar saliera a la cancha pa tratar d’aparar aquella tochada. Les empreses catalanes del cava son de les principales demandantes, por exemplu,  de corchu d’Estremaúra y de vidriu de Burgos. D’otru lláu, entóncenes Cajamadrid, enantes de que Rato y Blesa la saquearan, yera una de les principales fontes de financiación del mayor productor de cava de Cataluña. Eso quier dicir que munchos madrilanos, y xente d’otros llugares, tiníen parte del, pongo por casu, el so fondu pensión n’inversiones nel sector del cava catalán. D’otra banda, eses empreses de cava daben y siguin dando emplegu a cientos de persones, munches d’elles inmigrantes andaluces, murcianos o marroquinos.
Hai unos años, cuando España entá nun taba na Unión Europea, daquella Mercáu Común, yera habitual que los agricultores franceses asaltaran camiones murcianos, valencianos y andaluces que tresportaben fruta. Tiraben la mercancía y dalguna qu’otra vuelta agredíen a los camioneros. Plantegárase un boicot a los productos franceses. Nun tardara n’haber reacciones. Les primeres llegaran dende Galicia y dende Castiella: los citröen fabríquense en Vigo y los renault en Valladolid. ¡A ver, señores, a quién tamos perxudicando!, desplicaben, porque esos coches “franceses” fabricámoslos equí.
Cuando la inorante esquierda europea, escontra la instalación de la muria de Gaza, propunxo un boicot a los productos israelinos, les autoridades palestines tuvieron que poner les coses nel so sitiu. Una gran parte de les poques empreses palestines qu’hai venden los sos productos nel mercáu internacional col códigu barres d’Israel porque fabriquen nel tarrentoriu israelín. Y, a mayores, argumentaben, si les empreses israelines van entrando en perdes y deciden dispidir trabayadores, ¿por cuálos van a entamar sinón polos palestinos? 
¿Por qué esos asturianos “arguyosos de selo” nun entamen por nun comprar n’El Corte Inglés, nin en Zara, nin nos bazares chinos? Ehí nun se venden productos “independentistes”, sinón cenciellamente mugor y sangre de neños analfabetos y de muyeres esclavizaes. ¿Por qué esos asturianos “arguyosos de selo” tienen coche y calefacción? El so combustible nun ye un productu “independentista” sinon el frutu d’invasiones, guerres, ocupaciones militares y rexímenes feudales onde, por exemplu, se-ys ñega a les muyeres los drechos más ellementales o se executa a los homosexuales. ¿Por qué esos asturianos “arguyosos de selo” tienen teléfonos celulares fechos col coltrán arrancao con pura esclavitú de les coraes de la tierra africana? Que vaigan col paxellu, que consuman namái que carbón de Mieres y que se comuniquen con papel procedente de Navia y llápiceros del mercáu d’artesanía d’Avilés.
Y pa que se den cuenta de la zupinez na que cain, nun ta demás que analicen, si ye que son a ello, la entrevista que con motivu de la consulta de marres-y fixeran al presidente de Freixenet. Entrugáben-y pol posible boicot nestes fiestes y pol futuru la empresa si Cataluña se separtaba ya España ponía pegues a los sos productos. Dixo munches coses pero una yera mui significativa. Resulta que’l boicot anterior viniéra-ys mui bien porque los punxo n’alerta y fueron dexando’l mercáu español pa internacionalizase más. Agora, como frutu d’aquel percance, namái que venden n’España una tercera parte de la so producción y calculen qu’en cincu años será sólo d’un diez por cientu. ¡Éxitu total de la campaña de boicot!
¿Por qué faen dalgunos estes coses? Porque esos asturianos “arguyosos de selo” son unos babayos qu’atapen los sos complexos d’inferioridá y la so sumisión al amu de Madrid con un grandonismu tan ermu como demente. Ye xente con una maldá que namás que ye menor que la so tontuna. Ye xente que nun se da cuenta de que, por exemplu, munchos asturianos trabayen en Cataluña, lo mesmo n’altes cualificaciones que notros llabores porque, arguyosos de ser asturianos munchos d’ellos, tuvieron que dexar una tierra que nun-ys da futuru;  que l’antigu Bancu Herrero ye del Grupu Sabadell, colo que los aforros de miles d’asturianos tan agora nun bancu catalán; que la Caixa ye la entidá que meyores creitos hipotecarios diera n’Asturies na última década, colo que miles de families asturianes son deldores d’otru bancu catalán; o que la Esquerra Republicana fixo la intervención más importante defendiendo la llingua asturiana nel parlamentu español de la historia democrática d’esti reinu. Ye xentecaya que nun sabe de nada y que, información teo y mui directa, tan dexando la imax d’Asturies a l’altura’l betún y dexándomos na rexón caciquil ya inorante que’l PPSOE quier que seya, envede un país modernu y, al mesmu tiempu, de fonderes tradiciones. 
Teo una fía como investigadora nuna universidá catalana y que ta tan “arguyosa de ser asturiana” que fuera dos vegaes nuna llista nacionalista nel nuesu conceyu de Villaviciosa. Pues bien, falando con ella l’otru día, dicía tar escandalizada de les coses que dende Asturies, d’asturianos “arguyosos de selo”-y llegaben al corréu institucional. Y más escandalizada taba cuando-ys llegaben esos mensaxes a los sos compañeros. La vergoña que pasa ye tremenda. Ni ye de CIU nin d’ERC y nun sé si va votar si hai consulta, o si va abstenese. Evidentemente, nun va votar “non”. Y, tamién evidentemente, bebe cava y la so llingua habitual ye’l catalán.
Miren, asturianos “arguyosos de selo”, nun-ys voi quitar el títulu d’asturianos porque nun soi quién pa dar diplomes de nacionalidá, pero aconséyo-ys que l’arguyu lu metan onde-ys seya posible. Y beban sidre brut porque ye bono y non por castigar a naide, porque los sos mensaxes amuesen que nun son vustedes consumidores d’ello y que namás que lo van facer –que, de pasu, creyo que va ser mentira- por ideoloxía españolista. Estudien un poco más, si ye qu’estudiaron dalguna vegada, y preocúpense más por Asturies, qu’andamos como andamos, emprobecíos y dependientes, y menos por otros pueblos muncho más “arguyosos de selo”, más desendolcaos, que tiren más polo suyo y que, nel fondu, tienen drechu a faer lo que meyor-ys paeza. ¿O vamos decí-ys nosotros lo que tienen de facer dende la barra d’un chigre, eso sí, con munchu arguyu? ¿Acuéi?  

No hay comentarios:

Publicar un comentario

Nota: solo los miembros de este blog pueden publicar comentarios.