Dalgo fiede y non namái qu’en Dinamarca

“Esto nun ye una cris… ye una estafa”. Esa ye una de les frases más cantaes nes manifestaciones, concentraciones y actos en xeneral dende hai unos cuantos menes. Ya ye una xaculatoria qu’amosa la verdá. Quieren facemos creyer que la corrupción ye un sumatoriu de casos ya eso nun ye verdá. La corrupción ye la sencia’l modelu y, no concreto, nel reinu d’España la corrupción nun ye un delitu aislláu sinón que ye’l modelu llantáu dende la santa transición, esa heredá de Franco qu’alministraron ente los partíos políticos, fundamentalmente la esquierda (PSOE-PCE),  y la nefanda dinastía.

Cuando toles nueches ves un mur cuerriendo pel pasiellu nun hai pensar que siempres ye’l mesmu, non. Tas escontra una plaga. Mete un gatu cuantisque seya posible. Cuando tolos díes descubres una corrupción nun pienses que ye la mesma, non. Tas escontra un modelu socioeconómicu. Y tendrás que buscar un gatu. Y procura que’l múxaru salga del somantu de les fuercies populares porque, a poco que nun atiendas bien, apaecerá’l faxismu, bien seya a lo clásico, bien lo seya col modelu UPD.

El xuegu que vivimos llamáralo hai unos años Naomi Klein “la doctrina’l shock”. Básicamente furrula conforme a cuatro pasos que tamos viendo n’Europa dende hai dos o tres años. Primero, dende les axencies de cualificación, una triba entes tocada, a lo que paez, de poderes divinos, funden los países colos sos informes, propiciando ataques especulativos na bolsa. Dempués propónense “rescates” pa qu’estos países caltengan la so posición nel mercáu internacional, pero faese con precisos cálculos pa que los préstamos seyan imposibles de pagar. D’esta manera los países entren nun círculu d’endeudamientu tarrecible.

Entóncenes, tercer pasu, plantéguense recortes sociales y polítiques de privatización, embaxo la menancia de que, de nun ser asina, los inversores retiraranse darréu pola llerza a nun recuperar la so inversión. Y yá ta’l “shock” entamáu porque’l cuartu pasu ye esparder un descomanáu miéu pente la ciudadanía col fin de que la xente aceute cualisquier política con tal de salir d’esa situación.

Ya entós apaecen los salvadores. Normalmente preséntense como “técnicos”, economistes prestixosos que nun tienen res que ver col “modelu caducu” de la política convencional. La xente míralos bien. Son llistos, preparaos y nun tienen ambición política. Pero, ¿quién ye esta tropa?. Vamos falar de tres personaxes: Papademos, Monti y Draghi.

Luca Papademos, presidente anguaño de Grecia y que nun pasara enxamás peles urnes fora gobernador del bancu central griegu ente 1994 y 2002, cuando se falsearon les cuentes del déficit públicu embaxo’l gobiernu drechista. Ya ye llamativo que cuntara col sofitu de la empresa cualificadora Goldman Sachs. Pela so banda, Mario Monti, primer ministru italianu que tampoco nun pasara peles urnes, yera asesor de Goldman Sachs na dómina que s’atapara’l déficit de la república helénica. Y, pa finar, Mario Draghi, güei presidente’l Bancu Central Européu y brazu armáu de la política monetaria d’Angela Merkel, yera vicepresidente n’Europa de Goldman Sachs nesos mesmos tiempos nos que se maquillaran les cuentes griegues.

Pero ye que la historia’l ministru d’economía l’estáu que ta a un pasu’l rescate, el reinu d’España, Guindos, tien un bon curriculum d’asesor y directivu d’otres entidaes del mesmu tenor. La so presencia nel Lemman Brothers, el cartuchu detonante de tola crisis de les “subprime” y les “hipoteques basoria”, nun ye pa escaecer. Ya un ministru d’economía anterior, Rato, marchó pal FMI pa, dende ellí, recalar en Cajamadrid pa poner en marcha la operación de Bankia, que va costar miles de miyones d’euros a los contribuentes. 

Nun soi mui aficionáu a les teoríes conspiratives –o conspiranoiques- pero dalgo fiede y non namái qu’en Dinamarca, que diría Shakespeare.  

Imprimir