21.7.12

La Malena


El 22 de xunetu cellebramos a la Malena, a María Magdalena, mui venerada n’Asturies, lo mesmo que nes otres más vieyes naciones d’Europa, y que tién munches capiyes per tol país y fondera güelga na toponimia. 
Malena ye una de les figures centrales del cristianismu. Asigún la tradición más ortodoxa trataríase d’una prostituta redimía por Xesús. Pero, magar que ye verdá qu’esiste nel evanxeliu canónicu una muyer con estes característiques, nada mos indica que se trate, precisamente de Malena. Lo que sí ye cierto –y cafiante pa dalgunos- ye que Malena yera la persona a la que más quería Xesús, lo que motivaba ataques de celos ente los apóstoles, particularmente en Pedro. Xesús tinía con ella un tratu cercanu y, como diz la escritura, besábala na boca. Tóo paez indicar que nun yera otra cosa que la so muyer y que, seguramente, la boda de Caná fuera’l casoriu d’entambos, una boda na que María, la madre, y Xesús tienen un protagonismu nada consonante cola figura d’unos convidaos cualisquiera.

Malena ye también la primera en saber de la resurrección de Xesús, dempués de ver que nun ta na tumba y dicir lo mesmo que dixera Isis tres la muerte’l so esposu ya hermanu Osiris: “llevaron el cuerpu’l mio señor y nun sé aú lu punxeren”. Pero también fora ella la que, enantes del arrestu y postrera crucifixón, unxiéralu con óleos y perfumes, conforme a un ritu d’aniciu exipciu que los apóstoles desconocíen y que criticaron como un actu de despilfarru.
Tamién Malena toviera al pie la cruz onde amorrecía Xesús, al delláu de María, la madre, mientres los demás discípulos renegaben d’elli o andaben arrequexaos pelos caleyones de Xerusalén.
Dalgunos autores piensen que’l “discípulu amáu” nun yera Xuan, sinon Malena. A partir d’equí la historia dispárase. Como si la custión del matrimoniu de Xesús nun fora asuntu suficiente pa enxundriosos alderiques, llega plantegase que, tres la so muerte, Malena viaxa haza l’occidente preñada d’una neña que va ñacer no que güei ye Francia, anque más bien Occitania. D’ella y de la so fía cúntiase que yeren negres, d’etnia etíope posiblemente, como tamién lo fuera la raina de Saba, l’amante principal de Salomón, a la qu’ésti dedicára-y “El cantar de los cantares”. Asigún esta creyencia, la dinastía davídica sobroviviera na familia merovinxa, los primeros reis francos, ya esi sangre real, la “sang reel”, ye, precisamente, el “santu grial” que artúricos, templarios y francmasones taríen acubiciando hasta los nuesos díes.
El santu grial sedría, entóncenes, non un vasu sinon l’úteru de Malena, onde’l sangre real de la casa de David tomara cuerpu nuna neña. Esa neña o la so madre sedríen la base de la iconografía de les virxes prietes, veneraes polos primeros reis cristianos, los d’Asturies ente ellos –la Virxe de Cuadonga tien toles calterístiques d’una virxe negra pero la imax actual ye del sieclu XVIII- y diera orixe al cultu a “notre damme”, bierzu l’arte góticu ya impulsao polos templarios. Volvemos al vieyu cultu a Isis, la diosa madre, tamién negra, y que repite una ya otra vuelta la mesma iconografía, no namás que en Malena, sinon también n’Ana ya en Candelera.
Precisamente na iconografía de Malena apaez claramente la fondera discrepancia qu’alcontramos al rodiu la so realidá. La más canónica preséntala siempres como penitente, rezando nuna cueva por mor del so pasáu pecaminosu pero, llamativamente, cuasi siempres colos pechos desnudos y bien llenos. La otra versión, la de la reina oscura o negra, preséntala curiando por un recién nacíu embaxo una parra, símbolu de la vida y la fertilidá, y xixilada dende los matos por una rapiega que nun ye sinon la ilesia romana qu’acesma a la dinastía sacrada. Tamién ye frecuente que la so familia, la de Xesús en definitiva, te asociada icónicamente col alicorniu. Pero, en toles representaciones, ortodoxes o herétiques, siempres tien nes manes o cerquino una copa, el frascu perfume pa unos y l’úteru maternu pa otros.
Na relixosidá popular, Malena defende de la llépara, custión quiciabis desplicable pol emplegu d’ungüentos cuando llavó y unxió a Xesús, pero también ye sanadora de los dolores menstruales, auxiliadora de la fecundidá y protectora nos partos. Como vemos, otra vuelta se mos presenta vinculada a la maternidá y, polo tanto, rellacionada coles tradiciones herétiques.
Ensin duldia ye en Llanes onde se vive con más vitalidá la fiesta de la Malena, riba tóo porque la villa –y cuasi tol conceyu- porten con arguyu el clavel de Malena, la simpreviva de Roque o’l nardu de Guía. Pero l’aniciu d’esta división ye de naturaleza político y remóntase a los años trenta’l sieclu XIX. Tres la muerte’l sátrapa Fernando VII el trunfante lliberalismu dixébrase ente exaltaos y moderaos. En 1836 los moderaos ganen nes ellecciones constituentes, pero en 1837 los exaltaos ganen nes llexislatives y, con esi motivu, cellebren una fiesta en Llanes el día 22 de xunetu, día de María Magdalena. Unos pocos díes dempués los moderaos arrepostien con otra folixa, que van facer el 16 d’agostu, día de san Roque. Los dos bandos llenaran coles sos trafulques el sieclu XIX, polarizando la vida social de la villa. Pero, entráu yá’l sieclu XX, apaez nel panorama un tercer bandu, el de la Guía. La verdá ye q u’esti sector resultaba ser el más antigu, ya que taba compuestu polos marineros, que tiníen como patrona dende’l sieclu XV a la Virxe de la Guía.
Munchos son los pueblos que n’Asturies festexen a Malena, pero petaríame remebrar dos d’elles, lo mesmo polo que signifiquen que pol so estremáu destín. Asina, en Tañes, nel conceyu de Casu, vieran como la so Malena quedara nel fondu’l banzáu construyíu nos años sesenta’l sieclu XX. Malena yera protectora de les vaques y los casinos llévaben-y mantega pa enzafarrinar les veles y los cirios y tener la seguridá de que nunca s’apagaren.
Pela so banda, n’El Monsacru, nel conceyu de Morcín, la capiya templaria ta consacrada a Malena, conforme a les tendencies magdelenistes de la orde que yá viéramos. Ye tradicional llevar cardos a la fiesta, concretamente cardos azules, del xéneru “Eryngium”. El cardu ye un emblema solar que nel cristianismu representa la centralidá de Xesús y tamién ye tradicional notros países europeos como Escocia, Piemonte o Aragón. Mentanto, nel País Vascu tien como nome “eguzkilore”, esto ye, “flor del sol”. Un ritu propiu de los asturianos ye que’l  mozu-y de a la moza un cardu mientres-y diz:
“si vas a la Malena
de recuerdu traime un cardu,
a ti valte d’aliviu,
a min valme de regalu”.

Imprimir

No hay comentarios:

Publicar un comentario

Nota: solo los miembros de este blog pueden publicar comentarios.