“Con esti estudiu de Noreña, Antonio Martínez contribui a la historia económica d’Asturies

Llucía Fernández Marqués: El premiu d’esti añu d’ensayu sobre la sidra llevolu Antonio Martínez Fernández. David M. Rivas presidiera’l xuráu que tomó la decisión. ¿Quiénes formaben el xuráu del Premiu d’Ensayu Emilio Trabanco – La Sidra?.

David M. Rivas: Taben comigo tres bonos espertos, ún del oriente y dos del occidente –empataos polo tanto-, de disciplines estremaes y bonos conocedores d’Asturies, de les sos cadarmes sociales y culturales y de la sidre en particular. Participara, como yá fixere n’años anteriores, Inaciu Hevia Llavona, un perconocíu etnógrafu que ye miembru de Belenos. Igual ye la persona más documentao anguaño de tol entornu cultural sidreru. Ta acabantes d’espublizar ún de los meyores llibros al rodiu la temática, “Sidre y llagares tradicionales nes tierres de Maliayo”. Cuntáramos tamién con Antón Fuertes, ún de los fundadores de Conceyu d’Asturies de Madrid metanes los setenta. Fuertes ye sociólogu y, al so conocimientu d’Asturies y, mui especialmente, de les rellaciones nel ámbitu rural, amesta que lleva años como asesor de la direición de la Confederación de la Pequeña y Mediana Empresa, colo que mira’l sector sidreru con güeyos mui profesionales. P’acabar, cuntamos tamién con Antonio Fernández Álvarez, profesor de la Universidá Autónoma de Madrid y que, formáu nes universidaes ingleses, ye ún de los principales espertos europeos n’agroalimentación y agroindustria.

L.F.M.: ¿Cómo definiria, en términos xenerales, el nivel de les obres presentaes a concursu?.

D.M.R.: Veo un nivel altu. Hai de tóo, evidentemente. Pero inclusive les obres menos aconseyables úfrenmos una gran esperanza. La temática sidrera llevaba décades enartada en llibros y artículos repetitivos y provincianos. Hai mui poques espublizaciones qu’ameriten el títulu de “científiques” y nin tan siquier puen vese como “alta divulgación”, sacantes de les venceyaes a l’agronomía o a la pomoloxía estrictamente falando. La lliteratura sobro la sidre ye de recién, de xuru que porque tamién la recuperación de la cadarma económica y cultural de la sidre mesmo ye d’hai trenta años. Por eso falaba de que les coses hai veles con esperanza. La mayoría de los concursantes son mozos y, polo tanto, poco avezaos. Ves rapidino qu’hai materia, qu’hai idegues, qu’hai ganes ya enfotu, pero que falta oficiu, que falta métodu. Dices pa ti o ente los miembros del xuráu: “¡qué bona idega y qué mal desendolcao!”. Pero, arrepostiándo-y dafechamente, hebo dos o tres obres d’un altor mui valoratible.

L.F.M.: Vusté lleva nel xuráu dende l’entamu los premios. ¿Nótase dalguna progresión nel nivel de les obres presentaes?.

D.M.R.: Presido esti concursu dende la primer convocatoria y toi arguyosu de facelo y agradecíu de la oportunidá que “La Sidra” ya’l Llagar Trabanco me dieran. Nun ye rendivú innecesariu sinon lo que daveres pienso. Lo de la “progresión” ye complicao d’abordar. Non necesariamente toles obres presentaes esti añu son meyores que les del primeru, pero sí qu’hai una diferencia importante. Va notándose una mayor comparecencia d’autores académicos. Asigún pasen los años ye pescanciable la presencia d’universitarios, normalmente profesores mozos o estudiantes de doctoráu. Eso representa un gran trunfu social d’esti premiu. Evidentemente, nada asegura qu’un universitariu faiga un trabayu meyor qu’un autodidacta que caleya pel país, pero qu’haiga estudiantes y profesores que dediquen el so trabayu a preparar dalgo pa esti certame ye mui importante. Amás, otramiente, naide se pon a esto ensin amor a la tierra, cosa qu’enllena un tanto. Yá dicía Salustio que “ye guapo servir a la patria con fechos, pero nun ye babayo servila con pallabres”. 


L.F.M.: ¿Hubo unanimidá na entrega’l premiu?.

D.M.R.: A mín nun me presta ren asoleyar los resultaos de les votaciones, pero esta vegada súpose l’asuntu, seguramente por un erru de nueso. La decisión fora unánime y los argumentos pal votu foran práuticamente los mesmos en tolos miembros del xuráu.

L.F.M.: Desplíquemos, coles sos pallabres, de qué trata’l trabayu ganaor. 

D.M.R.: Con namás ver el títulu yá sabemos cuálu pué ser el conteníu: “Noreña y la sidra. Apuntes sobre la hestoria sidrera d’un conceyu asturianu”. Ye un estudiu mui bien encadarmáu al rodiu d’una industria anguaño inesistente nun conceyu que ta nel corazón de la rexón sidrera por escelencia d’Asturies. Al empar, tien la villa condal una llarga tradición sidrera, nel sen del consumu, que sigui darréu. Pa min, de trubiecu rural de Villaviciosa, ye dalgo familiar esti cantiquín: “¿D’onde son aquellos güés/que van pela carretera?/Son los de Villaviciosa/que baxen sidre a Noreña”. El trabayu d’Antonio Martínez intenta –y consigui- situar históricamente esa tradición y apurre pa ello bona documentación diplomática, historiográfica ya hemerográfica. Y, dalgo perimportante, améstalo con tradición popular y colo que, nel conocimientu científicu, llamamos “historia mínimo”. 

L.F.M.: ¿Apurre dalgún datu que fore desconocíu pa vusté fasta lleelu?.

D.M.R.: Munchos y de naturaleza estremao. Lo primero, evidentemente, daprendí muncho de Noreña. Yo nun soi d’ellí y sabía de Noreña lo ellemental. Güei sé muncho más y saber más aída a tener amor. Yo güei quiero más a Noreña. De la cultura sidrero no xeneral daprendiera poco col estudiu de Martínez, cosa normal dao que soi bon conocedor y viví esa cultura en casa dende neñu. Ye una cultura mui uniforme en tolos llugares d’Asturies. Pero tampoco voi dicir que nun daprendiere nada porque, magar d’esa homoxeneidá, sí qu’apaecen variantes llocales, riba tóo n’espacios urbanos. Yo conociera bien esa cultura nuna ciudá como Xixón o nunes aldegues maliayes como Quintueles, Quintes y Candanal, pero ye pa mi desconocío cómo furrulaben les coses en villes pequeñes. Y Antonio Martínez desplica eso mui bien. ¡Caro que daprendiera!.

L.F.M.: Ponga dalgún exemplu.

D.M.R.: De xuru que la diferencialidá del mundiu sidreru de Noreña en comparanza con otres villes asemeyaes o más grandes, ye la composición social de los veceros de los chigres. Eso Martínez desplícalo mui bien. El veceru de les collaciones rurales ye l’aldeganu, práuticamente una mesma figura social en tol país. Nes villes, a la escontra, les coses son estremaes. Nes villes industriales y mineres, como Mieres, La Felguera o L’Entregu, el sidreru ye un obreru siderometalúrxicu o mineru, mentanto qu’en ciudaes como Xixón alcontramos una diversidá más grande. Inclusive en Xixón dase’l casu de que cierta alta clas propietaria, la escosa burguesía lliberal, tien afición grande a la sidre, cosa que nun pasa, por exemplu, n’Uviéu. Pero Noreña ye una villa onde les clases populares son artesanes. Ye una villa cuásique preindustrial pero tampoco ye rural sinon de cadarma mui urbana. Amái, tampoco Noreña yera centru d’atraición de población rural, como lo yera La Pola, por citar lo más cercano, pol fechu de nun tener un conceyu d’aldegues y collaciones. Noreña, si adicamos con rigor pa les considerances sociolóxiques, podría ser la villa más “urbana” y más “burguesa” d’Asturies, nel sen clásicu que dieran nel antigu réxime al conceutu de “burguesía”. Estes diferencialidaes dan al chigre de Noreña un calter particular, cosa qu’Antonio Martínez desendolca perfechamente. 

L.F.M.: ¿Qué foi lo que más-y llamó l’atención d’esta obra?.

D.M.R.: Voi dicí-y la verdá. Llamome l’atención qu’un tonel toviera como mote y sellu “Mazzantini”, un toreru. Yo me recuerdo de “Davicín”, “Aida”, “Serruchón”, “Lolina” y hasta “Zeppelin”, pero d’un toreru nun sabía. Ya ye que la “multiculturalidá” nun ye cosa d’agora. Pero, falando más n’académico, prestárame muncho’l bon usu que l’autor fae d’una fonte d’información tan poco emplegada como los programes y portfolios de les fiestes populares, nesti casu les del “Eceomo”.

L.F.M.: ¿Cuál ye’l so interés específicu?

D.M.R: Ye evidente. Hai que dir sacando la nuesa historia, atapecía tantes vegaes. Y nun hai meyor camín qu’el de recuperar la memoria los conceyos, les collaciones, les aldegues… Esti estudiu d’Antonio Martínez va faciendo esi camín. Ye un exemplu pa siguir. Un estudiu de les calterístiques d’esti podría facese en cuásique tolos conceyos d’Asturies, especialmente nos de la fastera centruoriental, nesi espaciu que s’esparde pente’l Nalón ya’l Seya. Ye posible qu’Antonio Martínez abriere una ventana pela qu’acollumbrar llínies d’investigación pa elli y pa otros. 

L.F.M.: ¿Creye qu’aporta daqué al entornu sidreru?.

D.M.R.: Como-y dicía, yo valoro muncho la presencia d’universitarios nesti concursu y, en xeneral, que s’esmolezan por estes materies. Antonio Martínez pon na mesa la metodoloxía científica. Ye un “historiador” fechu y drechu. Esa igual ye la diferencia con otros autores que falaran de la sidre, que nun tiníen metodoloxía científica. Pero agora aporta un científicu, un historiador académicu, y mos ufre una obra sobro’l so conceyu, cenciellina pero metodolóxicamente impecable. Dicía Josep Fontana qu’esto ye lo que mos permite “repensar” la historia. Por eso, col pudor que siempres debemos tener los científicos –magar que siempres tamién con un plizcu de soberbia-, Martínez intitula la so obra como “Apuntes sobre…”.

L.F.M.: Les hestories llocales vense munches vegaes como custiones un tanto inútiles.

D.M.R.: Eso pasa porque con frecuencia la historia llocal ta asociada a unos autores mui poco rigurosos y que namái s’esmolecen pola anéudota y pol acasu popular. Pero hai mui bonos investigadores con interesantísimos estudios sobro ciudaes o rexones relativamente pequeñes. Tenemos un exemplu d’hai poco cola colleición que sobro Xixón espublizara Gea col sofitu l’ayuntamientu. Deben ser ventitantos títulos. Nella alcontramos simplayos aneudotarios al lláu d’estudios rigurosos metodolóxicamente intachables. Cualisquier obxetu ye estudiable, con tal qu’haiga datos y fontes d’información suficientes. La custión ta nel métodu, nel trabayu l’autor. Nun ye lo mesmo un cronista qu’un historiador, por dexalo en curtio. Hai unos díes toviera lleendo un llibru d’un autor asturianu mui prolíficu qu’escribe d’una materia na que yo toi perinteresáu y de la que conozo un tanto. Dábeste cuenta namás ver l’indiz que tabes escontra una persona con una información descomanao, con una montonera documentos nel paxu, pero aquello nun yera una investigación porque nun había métodu dengún. Esti autor sedría más útile trabayando de documentalista pa historiadores que non escribiendo aneudotarios, que ye lo que fae a la postre. D’otra banda, a la contra de lo que se piensa, facer historia llocal d’una manera rigurosa nun ye nada fácile porque ye mui abegoso estremar pente ámbitos. ¿Cómo peñerar lo que ye intrínseco del mundiu sidreru de Noreña pente la cultura sidrera asturiana en xeneral?. Si nun queremos cayer nel pozu l’acasu tenemos que facer un esfuerzu grande. Eso ye lo qu’intenta Martínez y consíguilo con bastante solvencia. Con esti estudiu de Noreña, Antonio Martínez contribui a la historia económica d’Asturies, porque, ensín duldia denguna, esta nun ye una obra costumista como ye lo habitual en llibros que falen de la sidre, sinón un estudiu d’historia económica.

L.F.M.: Veólu satisfechu.

D.M.R.: Sí, toilo. Y toi satisfechu pol nivel de les obres presentaes, pola evolución d’un concursu fechu con gran enfotu pero sobro’l qu’había duldies a dolor cuando entamara y tamién, no más concreto, pola persona qu’algama’l premiu esti añu. Cuando vimos quién ganaba l’Emilio Trabanco allegréme pero bien. Yo nun amatago los sentimientos y, anque nun mañana hubiere diferencies grandes, a les persones qu’estimo guárdo-ys llealtá siempres. Antonio Martínez ye pa min “Toño” porque lu conocí cundo elli yera poco más qu’adolescente. Ye un home de convicciones afitaes y a un tiempu flexible, comprometíu col so país. Pero, al empar, ye un intelectual rigorosu, con epistemes y paradigmes, nada dau a la frivolidá, como sabemos los que lu conocemos y lleimos otros llibros suyos. Equí nun faigo un xuiciu d’amigu sinon de profesor con abonda esperiencia empobinando trabayos d’investigación. Amái, hai otra cosa que pa min ye perimportante: Martínez fae una historiografía pensada dende esti llau de la llende, dende una güeyada asturiana y colos porgüeyos asturianos como horizonte. Xente habrá que diga qu’esto ye “subxetivo”, pero ye posible que si otru autor escribiere dende l’otru llau de la llende diba dicir qu’eso sí que ye “obxetivo”. Ya ye qu’un científicu nun ta obligáu a ser “obxetivu” sinon “honráu” ya escribir ensin armadíes, sopelexando dende l’entamu la so visión del mundiu, la so “weltanschauung”. Eso ye lo que fae Toño, Antonio Martínez Fernández, ya eso ye lo más valoratible.
Imprimir

Comentarios

  1. Francamente, David, nun me llama demasiao esto de lo que fales, pero ye que llevo dellos díes mirando a ver si tienes daqué reflexión sobre lo que vien de pasar nes eleiciones y como nun veo reaición de to parte escribo equí pa animate a que lo faigas. De xuru que tienes un puntu de vista interesante, depués de lleer lo que dicen caún del so lláu Bloque-UNA, Andecha y dellos seutores independientes del asturianismu. Saludos.

    ResponderEliminar
  2. Sí teo opinión formada y toiu preparando un comentariu. Espero que, como dices, seya interesante y sirva pa daqué. Pero esta vuelta quiero ser más prudente, anque normalmente yá lo soi. Lleí l'analís d'Arbesú y dempués el de BPA-UNA y lo que veo ye que-ys cuesta muncho reconocer el fracasu, non de les organizaciones, sinón de tou un movimientu que, hasta hai poco, yera pequeñu pero esistía. Perí va'l mio analís, pero, repítolo, quiero reposalo. Ye'l momentu de nun facer más sangre y nun quiero precipitame. A la fin y al cabu, la mio opinión ye personal y prestaríame conocer meyor les opiniones oficiales de los partíos.

    ResponderEliminar
    Respuestas
    1. Mui bien, David. Aspero entós pa lleete. Y aspero tamién que naide entame a dicir que yes tú falando contigo mesmu, hehe. Saludos.

      Eliminar

Publicar un comentario