18.2.12

L’antroxu o les folixes infames de les ciudaes asturianes

El final del ciclu iverniegu pieslla col antroxu, tamién antroidu y antroiru nalgunes rexones. El términu “antroxu” vien de la pallabra llatina “introitum” (“entrada”) porque ye cuando la primavera ta abriendo la puerte. Siempres fora pa los asturianos una de les principales fiestes del añu, amái de ser la que, xunto col nadal, más s’allargaben nel tiempu, porque llegaben a ser d’una selmana, del xueves de comadres al martes d’antroxu, anque nun fore folixa tolos díes. Pero, con tóo y con ello, nuna sociedá rural tradicional afitada nel autoabastecimientu, tantu festexu llendaba col esbardie.
Col antroxu, pesllando, como dícía, el ciclu l’iviernu, acababen tamién los samartinos, finxos centrales del ciclu serondiegu. Si nuna casería nun mataren el gochu alló pal antroxu yera pola cenciella razón de que nun lu tiníen. Poro, el refraneru dizmos que
“antroxu fuera,
el que nun mate
nun come morciella”.


L’antroxu entama col xueves de comadres o col vienres de comadrines pero los díes grandes son el domengu gordu, el llunes d’antroxu y, riba tóo, el martes d’antroxu. Ye entóncenes, el martes, cuando tradicionalmente apaecíen les mázcares y los mazcaritos (o mazcarinos), que, anque agora pensemos que yeren coses de fiestes urbanes, cellebrábense tamién –entá anguaño podemos velo nalgunes collaciones pequeñes- nos grupos familiares, nes caseríes. Los mazcaraos facíen risión de la vida campesina y de la vida urbana, tal y como si naguaren por facer una paréntesis catártica pa poner en custión l’orde social perafitáu. Ye por eso polo qu’ún de los calteres qu’entá güei ye adicable y que sigui darréu a los antroxos tradicionales ye’l de la tresgresión. Los homes faen de muyeres, putes munches vegaes, los ateos fáense cures, los acomodaos camuden pa méndigos y los méndigos pa reis. Tamién yera –ya ye-  corriente recitar poesíes zuniegues ya encoplar versos irreverentes. Yera tala la subversión de los roles que dalgunos autores calificaren, ensin entaramangase dafechamente, al martes d’antroxu como “día de la venganza”.

Una de les traces del antroxu ye que se comía a fartafarta. Na casa campesina de la sociedá tradicional consumíase lo meyor que se tinía y convidábase a los vecinos a tan gayaspera andecha. Nun ye pa cayer embaxo que nel asturiano actual el verbu “antroxar” significa “correr l’antroxu”, pero tamién “comer ensin tasa”. De fechu, el nuesu refraneru dízmoslo clariquino:

“n’antroxu fartura,
dempués fame segura”.

L’antroxu cellébrase en toa Asturies, con delles variantes pente llugares pero con calterístiques comunes. Pero ye pernecesario desplicar la llaceria inacostaciable na qu’acabaron estes manifestaciones culturales nes tres grandes poblaciones del país. Lo de Xixón, Avilés ya Uviéu ye de xulgáu de guardia, si ye que se pudiere denunciar (que deberíe podese) l’asobayamientu a la cultura d’un pueblu.

En Xixón vien cellebrándose l’antroxu dende, a lo menos, el sieclu XVII. Esti datu tenémoslu porque fora entóncenes cuando’l párracu de San Pedro, un tal Bolde, asoleyó perdures y gafientes amonestaciones pa que los mazcaritos, asigún elli “nos sos descomanamientos y llicencies”, nun profanasen el “suelu santu”. Ye mui posible qu’a lo que se refiría esti cura yera a l’antigu vezu d’entrar nos cimenterios nes nueches de los ritos de pasu.

El casu ye que Xixón cellebra l’antroxu dende’l xueves de comadres hasta’l martes. El llunes d’antroxu, al morrer la seronda, entama un desfile de carroces, comparses y charangues, con una participación de públicu descomanada. Al día desiguiente, martes, cellébrase l’intierru la sardina –que nun ye propiamente un intierru porque la tiren a la mar- , acompangada de plañieres vistíes de llutu. Y too fina con fueos d’artificiu.

Por embargo, la recuperación de l’antroxu, prohibíu pol gobiernu de Franco –pola ilesia pa meyor dicir- en 1937, namás tomar la ciudá y llograr la capitulación del Conseyu Soberanu d’Asturies (abandonáu pol gobiernu republicanu español, traidor y xacobinu), y autorizáu otra vuelta nel 1976, amosa evidentes ellementos d’aculturación. Poques manifestaciones culturales hai n’Asturies tan poco “asturianes” como esta de la que tamos falando.

Los antroxos de Xixón, y asina lo recueyen cronistes ya investigadores, poco tienen de ver colos desfiles d’anguaño. Inclusive tenemos la preba visual de los nuesos grandes pintores del XIX y principios del XX. Hasta la victoria’l faxismu na última guerra civil española, los mazcaritos yeren, no xeneral, figures grotesques que sopelexaben zuniegamente les miseries y les contradicciones de la sociedá d’entoncies. Diben armaos con escobes, coles qu’escorríen a los viandantes de “bones costumes” ya enllordiábenlos con burraya. Les sos vestimentes y les sos menes de facer son asemeyaes a los guirrios y a los zamarrones del añu nuéu, desplicable polos camudes de calandariu qu’hebo nos últimos dos sieclos.

Pero agora l’antroxu de Xixón ye un probe calcu de los carnavales de Ríu de Xaneiru o de Tenerife, con emplumaxes, vistíos al entallón y música tropical. Xixón y les sos comparses son una caricatura y, ye más, una mala caricatura. Agora bien, xusto ye dicir qu’esti añu hai un intentu por recuperar aquelles tradiciones, iniciativa de dellos colleutivos que paez tener sofitu dende la ca’l conceyu.

Lo mesmo podemos dicir del antroxu d’Avilés. Nesta villa ameten un “descensu” per Galiana nel que tiren calderaos d’augua a los presentes. Facer eso metanes febreru ye una putada, pero ye cosa que paez de muncha gayola.

Sí caltenía Avilés una cosa perguapa y ancestral, la quema la vieya. Y dígolo bien… tiníalo. Nel añu 2009, a instancies d’una conceyala d’Izquierda Unida, d’alta cultura ensin duldia dala, la quema fora arrefugada. Esta “miembra” de la “izquierda plural” consideró que manifestación tala atentaba, al empar, contra la muyer y contra los vieyos (ella diría de xuru que “tercera edá”). Eso de “quemar la vieya” sonaba mui mal. Pero resulta que la quema la vieya nun ye otra cosa qu’un ritu de quemar l’iviernu, ritu cellebráu –con una vieya como protagonista- en munchos llugares de la Xermania y de la Escandinavia. De la cenrada la vieya ñaz la neña, la primavera, granible y briza, la que trai otra vuelta la vida al mundiu. Tamos escontra un mitu la diosa madre, el principiu femenín que gobernara’l mundiu hasta’l güelpe políticu patriarcal. Pero esto, ye de caxón, nun lo sabe la nuesa conceyala, que de xuru sedrá una encamentada feminista.

Lo más probatible ye qu’estos políticos de la esquierda plural española, de débile formación humanística, inclusive desconozan que lo que los de más pallá del Esla llamen “arco iris” equí conocésmolo como “arcu la vieya”. Tamién ye tradicional una canción infantil primaveriega que mos remite a la mesma diosa madre, magar que munches vegaes la “vieya” ye sustituyía pola “virxe”:

“que llueva, que llueva,
la vieya ta na cueva”.

Ye más, por siguir tirando de tradición, nel conceyu de Salas, cuando van engromeciendo los díes, cerquino’l solsticiu d’iviernu, dicen que

“per santa Llucía
la vieya estira la pía”.

¿Y qué nun falar d’Uviéu?. Equí faen lo mesmo que nes otres dos ciudaes pero, a mayores, cellebren l’antroxu en plena cuaresma. Ruempen con tóo. Uviéu y los sos munícipes representen a los babayos que piensen que lo importante ye dar pan y circu. Como en cuaresma nun hai muncha folixa y como nun podemos competir colos antroxos de Xixón y d’Avilés… facémoslos cuando mos sal de la fañagüeta. Eso piensen los ediles ya eso-ys presta, a lo que paez, a los ciudadanos, que tanto-yos da un solsticiu, qu’un corpus, qu’un añu nueu, que lo que la conceyalía programe. El casu ye facer “botellón institucionalizao”.

Lo que dicía: inacostaciable, infame.

6 comentarios:

  1. L'antroxu ye un espíritu, daqué que se lleva dientro o non. La recuperación del antroxu, como de les mazcaraes ivenales depende de caún de nós. Nun necesitamos pa nada del dineru públicu p'amazcaranos y pa facer de moxigangues ancestrales asturianes o pa camudar nel iviernu colos mazcaritos tradicionales (sidros, zamarrones, bardancos, zaparrastros...). Depende única y esclusivamente de la nuestra VOLUNTÁ. Convídovos a antroxar, a salir ehí fuera y recuperar l'antroxu de nuestro. Folixa, pitanza y salú.

    ResponderEliminar
  2. D'alcuerdu dafechu, Xanu. La recuperación de lo civil, tradiciones incluyíes, tien de venir de la sociedá. Les recuperaciones culturales dende les instituciones acaben por ser impostaciones.

    ResponderEliminar
  3. Correición. Cuando falo de que los calandarios camudaron nos dos "últimos sieclos" quixe dicir "milenios".

    ResponderEliminar
  4. David, la conceyala d'Avilés ye del PSOE, qu'ainda ta nel puestu de festexos. Por otra banda ties toa la razón, y lo que más esmolez ye que nun importa a naide lo que faigan d ende les instituciones cola so tradición. To se fai con un porgüeyu económico, si l'antroxu ye bono en cuaresma pa los chigreros, nun se fale más, eso ye lo que yos importa. Particularmente nun festexu l'antroxu dende cuantayá, ni voy facelu hasta que nun torne la vieya, peru tengu la impresión de que ye hasta politicamente correutu, ya nun ye nin transgresor. Con to, el antroxu avilesino de lo meyor que tien yel descensu galiana, que polo menos surdio per iniciativa popular, porque nun escaezamos que les tradiciones camuden, lo que nun ye malu, esu quier decir que tan vives, que nun ye este'l casu, equi lo que hai, ye impostura, ya imposición, y lo peor, el desaniciu de les nueses tradiciones.
    Santiago

    ResponderEliminar
  5. Muncho te lo agradezo, Santiago. Y si val pa dalgo, pido esculpies a IU pol infundiu. Nun yera la mio intención. Esa yera la información que tinía. Erru de mió, debiere contrastalo.

    ResponderEliminar
  6. You sabía que "Por Santa Llucía menguan las nueches ya medran los días", pero esa outra que pones non.

    Outra cousa que se facía yera antroyar, que consistía en facer colas pescadoras pixuetas un trueque: Ellas venían con pescáu ya vendíanlo polos cuartos más por pan del de pa casa. Supuengo que yera cumo una especie d'aguinaldu, ou pa compensar el viaxe dende Cuideiru.

    ResponderEliminar

Nota: solo los miembros de este blog pueden publicar comentarios.