González-Río: un vecín ilustre de la valle de Pion y Candanal

La guerra civil y la victoria de los “nacionales” supunxo un mescabu tarrecible na memoria individual y collectiva. Homes y muyeres qu’anguaño deberíen tar nel panteón ilustre de los pueblos son, cenciellamente, escaecíos, tanto que tal paez que nun esistieran. En collaciones como la mía la xente desconoz que toviera hai cuatro díes o un sieclu vecinos que significaron muncho na historia d’Asturies. Pero, pasín a pasu, seliquino, vienen aportando la xusticia y la reparación.

Ya ye qu’una de les figures más importantes, actives y representatives de la política y de la francmasonería asturianes de la segunda metada’l sieclu XIX fora’l pionesu Juan González-Río, qu’apaez nuna bona parte de documentos como Juan Ríos. Esti home ñaciera en Pion (conceyu de Villaviciosa) a finales de 1823 y ye bautizáu el 3 de xineru de 1824 na vecina collación de Candanal, llugar onde yera párracu un hermanu’l so padre. La so familia nun yera ñatural de denguna de les dos parroquies y nun sabemos por qué o pa qué llegaran a eses tierres, anque podría ser que la so familia aprofitara la desamortización que, con llicencia papal, fixera Godoy unos años enantes y qu’afleutó, pente otros, al monesteriu de Valediós, con posesiones na valle l’España. El so padre, Fernando González-Río yera de Dorias, nel conceyu de Salas, mentanto que la so madre, Rosalía Meana, yera de Baldornón, nel conceyu de Xixón. Los güelos matenros tamién yeran de Xixón, de la parroquia de Fano, mentanto que los patenros yeran ñaturales de Muñás, nel conceyu de Valdés.


Tratábase d’una familia de posibles, podríamos decir que rica, polo qu’al neñu dan-y bien ceo una formación y, de xuru que pola influencia’l so tíu cura, acaba por decidir entamar estudios de drechu, carrera que completará en poco tiempu. Sobro l’actividá na valle l’España d’esti abogáu dizmos bastante José María de Labra nun artículu espublizáu en setiembre de 1884 nel periódicu madrilanu “El Porvenir”. Escribe Labra que Juan González-Río “contribuyera al esporpolle del cultivu de mazana y de producción de sidre, siendo, al empar, ún de los primeros mazaneros d’esta zona”. Eso quier dicir que, amái del so llabor como abogáu, caltuvo una cantidá importante de tierres, lo que sopelexa la bona situación económica familiar. Ye posible que fora’l propietariu del primer llagar “modernu” –podríamos llamalu “industrial”- de la valle, que taba asitiáu cerquina’l molín de La Riera, na collación de Pion, nel que se mayaba mazana procedente de la primer pumarada llantada con criterios agronómicos “científicos”, na bárcena’rigu en Roces, na vecina Candanal.

González-Río toviera una vida abondo axitada, dedicáu d’un móu entusiasta a l’abogacía y a la política. De mozu afiliárase al Partido Progresista del xeneral Prim y de Sagasta, que, como González-Río diba selo más sero, yeran masones. Pero la so consagración política produzse cola “gloriosa”, la revolución lliberal de 1868. N’Uviéu y a 30 de setiembre, en plena revolución, González-Río ye ún de los seyes firmantes –en xunción a los que diben ser ministros, Pedregal y Ruiz Gómez, y al que diba ser gobernador civil, González Alegre- del manifiestu de la Xunta Provisional de Gobiernu d’Asturies. El testu d’esi manifiestu dizmos a les clares cómo’l relativamente moderáu pionesu diba arrimándose al pensamientu radical. Acababa asina: “En cortes constituentes que sedrán ellexíes al traviés del sufraxu universal, darase al pueblu’l gobiernu que meyor-y convenga. La llibertá xubiramos al rangu d’una gran nación. Asturianos: ¡abaxo los borbones!, ¡viva la llibertá!, ¡viva la soberanía nacional!”.

Dempués de firmar esti sopelexu, González-Río entra formar parte del comité directivu del Partido Radical y, nes ellecciones d’ochobre, sal diputáu con 2.688 votos, siendo el cuartu candidatu más votáu n’Asturies, y acaba formando parte de la Xunta Permanente de Gobiernu. Un añu dempués, en 1869, apaez como segundu comandante del Batallón de Voluntarios de la Llibertá, pasando al poco tiempu a ser el so xefe. Entós ya ta residiendo n’Uviéu, nel númberu 16 de la cai Rúa.

Si 1868 fora un añu decisivu na vida de González-Río, nun va ser 1872 menos importante. Ye entóncenes cuando ye nomáu secretariu de l’Audiencia de Madrid, polo que tién qu’afinxar la so residencia na capital española.

Ye tamién nesti añu cuando ingresa na masonería, concretamente’l 5 de febreru, onde adopta como nome simbólicu el de “Riego”, custión mui en consonancia cola so trayectoria política y col so orixe asturianu. Hai una gran controversia al rodiu de ónde se iniciara como francmasón. Dellos autores afirmen que la ceremonia fixérase na lloxa Luz Ovetense, pero nel estudiu que Víctor Guerra asoleyara sobro los masones de la nomada agora “Comarca de la Sidre”, esti autor diz qu’esa lloxa nun toviera carta de constitución hasta’l 6 d’abril de 1874, polo que malamiente podía tar dando graos nel 1872. D’otru lláu, tampoco apaez el so nome notres lloxes asturianes de la dómina. Por eso ye polo que lo más probable ye que’l abogáu pionesu entrara na orde’l compás y la escuadra nalguna lloxa de Madrid.

En 1877, Juan Ríos, como yá lu llamen los sos correlixonarios políticos y los sos hermanos masones, asiste como convidáu al pieslle –“baltar columnes” se diz na xerga masónica- de la lloxa Luz Ovetense y a la instalación d’otra que tinía como nome Nueva Luz. A esta lloxa va tar yá siempres afiliáu y algama la “veneratura” –que sedría la “xefatura” en términos masónicos- en 1878, 1880 y 1881. Sedrá precisamente nesta lloxa uvieína na que van iniciase los sos fíos, Manuel col nome simbólicu de “Cicerón” y Arcadio col de “Rossi”. Esta lloxa va tener muncha actividá social, llegando a caltener un periódicu como yera “La Verdad”, muérganu d’espresión que chocaba col duru conservadurismu de la capital asturiana. D’otra banda, nel 1878, González-Río ostenta’l cargu de Soberanu Gran Inspector, el gráu 33, el cimeru del ritu escocés antigu y aceptáu de la francmasonería.

González-Río sigue evolucionando políticamente y llega a un republicanismu mui combativu. D’esta miente va tar na llista de la candidatura d’Unión Democrática al ayuntamientu d’Uviéu, un partíu que cuntaba col aliendu del mesmu Clarín. Sal ellexíu conceyal, dándose la circunstancia de que tamién ta nel so grupu otru conocíu abogáu masón, Pancracio Álvarez Llana. El grupu republicanu que dirixe González-Río caltién una constante oposición al alcalde Longoria Carvajal y, riba tóo, contra’l gobernador civil que lu punxera na siya y que, escontra les crítiques d’aquel grupu tién d’intervenir con un escritu que rezaba “De apercibimiento y amonestación a la mayoría”.

Una de les más sonaes trafulques toviera llugar na seronda de 1879. Yera davezu homenaxar a los milicianos uvieínos que morrieran nel desarme de les tropes carlistes el 19 d’ochobre de 1836, biltu de l’actual “fiesta’l desarme” de la capital. Dende 1845 cellebrábase un actu relixosu na ilesia de San Isidoro, na que s’alcuentra’l panteón d’aquellos milicianos. Lo que plantega González-Río ye que se faiga namás una ceremonia civil y que les perres que-y cuesten a la corporación los oficios católicos se-ys entreguen a los descendientes de los muertos. La engarradiella fora d’órdagu a la grande.

El masón y políticu maliayés muerre nel 10 de setiembre de 1884 a eso les cinco y media la tardi. Al respective, Paloma Uría, nun artículu espublizáu en 1984 na revista “Astura”, desplica que l’intierru civil que describe Clarín en “La regenta” nun ye otru que’l de González-Río. Fora un intierru con una retafila de rasgos: “l’anticlericalismu de los amigos del muertu, la negativa de los cures a dar cristiana sepultura a los que muerren fuera de la ilesia; el calter de manifestación progresista y anticlerical, l’asistencia de públicu abondo, siendo mui importante la presencia de los obreros”.

El 25 d’agostu de 1888, la masonería uvieína rínde-y un homenax al ilustre maliayés. Embaxo los auspicios del Gran Oriente Nacional y con francmasones procedentes de les lloxes Nueva Luz y Caballeros de la Luz instálase la lloxa Juan González-Río, que toviera una abondosa actividá humanitaria y graves choques col obispu Martínez Vigil y, más sero, col so sobrín Maximiliano Arboleya, deán de la catedral.

La lloxa Juan González-Río convirtiérase nuna de les más prestixoses de la masonería asturiana d’entoncies, non namái que poles sos obres y pol so tamañu –llegara cuntiar con ochentaisiete miembros-, sinón tamién pola calidá de los sos componentes. Asina, destaquen los dos fíos de González-Río (Manuel y Arcadio), el zapateru Juan Nepomuceno Martínez (ún de los fundadores de l’agrupación socialista d’Uviéu), Eulalia Menéndez Vizcaíno (que tinía’l gráu de Mayestra Elexía de los Nueve del ritu escocés), Braulio Vigón (historiador y folclorista, miembru del grupu asturianista La Quintana) o los abogaos Álvarez de la Escosura y Benigno Bances.

Como cabera curiosidá, hai que notar que la tumba de González-Río, nel cimenteriu de San Salvador, n’Uviéu, ye una de les poques que conserva un epitafiu masónicu, qu’escapara de la decisión personal de Franco d’arramplar con cualisquier vestixu de la orde, inclusive nos camposantos. Namás queden resclavos asemeyaos nes tumbes de Rosario d’Acuña y de Villar Valdés –que fora “mayestru” del mio güelu Manolo Infante- nel cimenteriu Ciares, nel conceyu de Xixón, y na d’Antuña Ordiales, en Carbayín, nel conceyu de Siero.






Comentarios

  1. Presta deprender sobre asturianos asina, y da murnia sintir que son desconocíos pa la mayor parte de la sociedá.

    Gracies por asoleyalu.

    Taría guapa una entrada sobre la Masonería n'Asturies, la so influencia, los sos personaxes illustres (amás de González-Rio) y la so actividá ya influencia anguaño.

    ResponderEliminar
  2. Victor Guerra tien bastante espublizao, mui irregular polo que cinca a la calidá pero bien interesante. De fechu, parte de la información que doi nesti artículu garráralo d'escritos d'elli, anque, siguiendo un vieyu vezu, comprebé les coses pa nun ser víctima d'erros heredaos, cosa que pasa con frecuencia.

    ResponderEliminar
  3. Un erru: el sitiu de Salas onde naciera Fernando González-Río nun ye Dorias. Ye Doriga o Las Dorigas. Lo que nun sé ye cuála ye la collación concreta: San Antolín de las Dorigas, San Esteba de las Dorigas, San Xustu las Dorigas o Santolaya las Dorigas. Si ye Doriga concretamente, entós ye parroquia de Santolaya.

    ResponderEliminar
  4. Perinteresante pa min esti artículu sobre González-Río con munchos datos que nun conocía. Llamóme l'atención lo de la tumba nel Salvador. Un día que pase per ellí con tiempu a ver si voi a visitala. Taresa de Calcuta.

    ResponderEliminar

Publicar un comentario