8.8.11

San Salvador

D’una miente un tanto chocante, la fiesta de san Salvador pasa desapercibía nun calendariu braniegu enllenu de folixes y de fiestes de toa triba. El 6 d’agostu namás s’enteren de que dalgo pasa los vecinos (pocos y menos esti añu que cayera en sábadu) y los turistes qu’anden a eso’l meudí na rodolada la catedral d’Uviéu. Y digo que ye chocante porque tamos falando d’una cellebración que mos vien dende’l sieclu VIII, dende los primeros tiempos de la nuesa monarquía.

El reinu asturianu y la ilesia uvieína, cuando tuvieran que ponese embaxo la tutela de dalgún santu o santa, nun s’entaramangaran pa tirar parriba y sofitáronse directamente en san Salvador, esto ye, nel salvador, nel mesmu Cristo. De fechu, la diócesis asturiana sigui tando embaxo l’advocación de san Salvador. Ye de una gran importancia la talla de Cristo, de piedra policromada y cola esfera l’universu na mano esquierda, mientres que fae cola drecha un signu bendición. Atópamosla na catedral asturiana, la “sancta ovetensis”, a la manzorga l’altar mayor. Esta imax de Xesucristo en maxestá, datada pente finales del sieclu XI ya entamos del XII y que mide 180 centímetros, ye una bona amuesa de cómo les formes d’un góticu naciente diben penetrando n’anterior tradición iconográfica románica.

Demientres les cruzaes, cuando empezó garrar un espoxigue descomanáu el camín de Compostela, los pelegrinos francos, que formaben la mayoría, falaben nos sos primeros romances de “saint Sauveaur d’Esture”, esto ye, de san Salvador d’Asturies, ya un poco más sero cantaben lo siguiente:

“qui a esté en saint Jacques

et n’esté a saint Salvateur

a visité le serviteur

et a laissé le seigneur”.

El conciliu de Nicea, cellebráu nel añu 787, diera un emburrión perfuerte al cultu directu a Xesucristo y a les reliquies de la so vida y les de la vida los sos allegaos. Entrambes coses supunxeran qu’Asturies se convirtiere nun referente européu de pelegrinación. Non namái que yera la nación cristiana avanzada contra l’islam nel occidente, sinon tamién la sé’l santu sudariu (el “pañolón”), les sandalies de san Pedro, el llechi la Virxe, el cachu más grande de la cruz de Xesús ya un llargu etcétera. Entá anguaño, escaecíes dalgunes reliquies de calter ridículo, como les plumes del arcánxel Gabriel, el pañolón sigui siendo obxetu d’investigación científica.

La ceremonia principal de san Salvador tien llugar, llóxicamente, na catedral d’Uviéu, anque, como dicía, ye mui poco popular y prácticamente namás que relixosa, lo que contrasta colo qu’esta advocación significó pa l’Asturies naciente. En definitiva, al salvador fora consacráu el primer reinu cristianu d’Europa –aunque ye necesario dicir que namás que determinaes élites yeran cristianes daquella- ya embaxo la so protección punxo Adefonso II a tolos territorios del reinu asturianu pente’l Cantábricu, l’Ebru ya’l Taxu, quier dicise, lo que güei ye Asturies, Galicia, Castiella y Llión, Cantabria, País Vascu, La Rioxa, la metada de Portugal y la metada d’Estremaúra.

Nel so día órniase la imax de Cristo con ramos de lloréu y cellébrense mises con muncha pompa y siguiendo los antigos rituales. Cuando acaben les ceremonias los fieles lleven ramos o fueyes d’esi lloréu pa protexer les sos cases de les fuerces del mal. Hasta hai bien poco vendíense les “paxarines pintes”, feches de fariña y azafrán, qu’inda güei son vistes pa san Mateo, festividá profana que ganó la batalla al mesmu Xesucristo.

Tamién tien interés el festexu de Fuentes, nel conceyu de Villaviciosa, riba tóo pola presencia na procesión de la so lexendaria cruz, la conocía, precisamente, como “cruz de Fuentes”. Trátase d’una cruz procesional de l’alta edá media, pero na parroquia maliayesa namás que podemos contemplar una copia, porque la cruz orixinal salió d’Asturies hai munchos años y güei ta asitiada nel Metropolitan Museum de Nueva York.
Imprimir



















16 comentarios:

  1. Mui prestosas estas entradas cola hestoria las fiestas ya la sua rellación colos Santos, ya'l sou orixe.

    Munchas gracias

    ResponderEliminar
  2. Tien razón Diestru. Estes coses son mui importantes. Y dígote lo mesmo: gracies, DMR.

    ResponderEliminar
  3. La nuesa Edá Media, y más concretamente les dómines del Reinu d'Asturies son una ayalga histórica fundamental y básica que, adulces, vamos redescubriendo y conociendo. Tocántenes a les cuestiones relatives al santoral, choca como güei tán casi nel escaezu lo qu'antaño yeren finxos fundamentales de referencia pa los nuestros antepasaos como San Salvador o Santolaya.

    ResponderEliminar
  4. Ya aproveichando, si me permites un apunte, esqueiciste dientro de la entrada ún de los Monesterios más importantes del país: San Salvador de Corniana, el más grande del Conceyu Salas ya ún de los más importantes d'Asturias dende la Edá Media

    ResponderEliminar
  5. Tienes razón, Diestru... Dexé nel tinteru munches coses bien interesantes.

    ResponderEliminar
  6. ¿Y qué fizo que saliera la cruz de Fuentes camín de Nueva York?

    A mí estes coses préstenme la de dios, pero quémame abondo'l nun saber na d'ello por mor de nun estudialo nel colexu. Esto ye dalgo perimportante pa la nuesa cultura y ¿quien lo sabe? naidie que nun tea daqué esmolecío pola hestoria d'Asturies y a vegaes nin con eses, depende muncho con quien deas.

    ResponderEliminar
  7. Bueno, Dixebra, a ti la escuela aprovechóte más bien poco, conque pues consolate pensando qu'anque toes estes coses tuvieren nel temariu tampoco les dibes deprender.

    ResponderEliminar
  8. Ye bien raro, porque ye lo mesmu que suel decir tu ma. Poneisvos d'alcuerdu?

    ResponderEliminar
  9. Sí home, si yo toi igual que tu, como un tapín.

    ResponderEliminar
  10. La cruz de Fuentes vendiose en 1898 a J.P. Morgan que a su vez donola al Matropolitan en 1917. Les perres sirvieron para restaurar la cubierta de la iglesia.

    ResponderEliminar
  11. Coméntame un amigu que la decisión de cellebrar san Salvador el 6 d'gostu data del sieclu XVII, dempués de que los turcos foran rechazaos en Belgrado (paez ser, anque podría tratase d'otra ciudá). Nel asediu morriera'l mesmu papa. La veneración vien de la edá media pero la cellebración esi día ye más recién.

    ResponderEliminar
  12. Güei (Diez d'Agostu) yía San Llourienzu. [La Lluna llámase Catalina, ya'l Sol Llourienzu... canturreaba mia buela].

    Camiento que bien de fiestas cumo Les Piragües ou'l Xiringüelu tean rellacionadas con San Llourienzu, pero nunca nun lo soupe. Nin l'orixe ya restu de la coplina de San Llourienzu ya Catalina.

    Nel miou pueblu de Salas, la fiesta (primer domingu d'Agostu, depués del día 5, ou sinon el siguiente domingu) camiento que tea rellacionáu con San Llourienzu tamién, anque'l patrón yía Samiguel Arcánxel. Asina, en Salas, yía fiesta en Llinares, en Samarciellu, en Santiagu La Barca, ya en Viescas de Carllés, tamién; Sicasí, Llaniu sí cellebra San Llourienzu

    ResponderEliminar
  13. San Llorienzu ye una cristianización d'Apolo y ta rellacionáu colos mitos de los cuervos. Ye un santu solar. Y mira esto: la playa de Xixón ye San Llorienzu (con una capiella dedicada al santu), zarra al és col cabu San Llorienzu y al oés cola Talaya Santa Catalina. Y lo cimero de San Llorienzuye La Colina'l Cuervu.

    ResponderEliminar
  14. Ayer precísamente falando d'esto con una presona que trabayó'n dalguna les restauraciones de la Catedral d'Uviéu, díxome como'l deán de la Catedral guardó les prebes de manches de sangre propies de mises negres na imaxen de San Salvador.

    ¿Faladuríes?

    ResponderEliminar
  15. Nunca sentí, David, eses histories. Pero ye cosa probable. Nun digo que seya probable la cellebración de mises negres (posible sí que lo ye). Lo que ye probable ye que la talla de Cristo presente manches de sangre. Esa talla ye de la dómina del milenarismu y de les visiones apocalíptiques. En munchos otros llugares d'Europa los pelegrinos y los penitentes flaxelábense y firíanse delantre los santos.

    ResponderEliminar

Nota: solo los miembros de este blog pueden publicar comentarios.