Santana


El 26 de xunetu cellebramos Santana. Ana, madre de María y, polo tanto güela de Xesús, tuvo una veneración mui seroña ya escosa pente los cristianos, lo que ye mui chocante si tenemos en cuenta quién yera. Asina, san Xeromu reconoz nun saber res d’ella y ponse a investigar, sacando poco provechu de la so pesquisa. De fechu, los evanxelios canónicos nin tan siquier la mencionen, anque sí lo faen los llamaos “apócrifos”. Tuvo ser, diz la tradición cristiana popular, la mesmísima Virxe la que s’apaició a un xustu varón de nome desconocíu pa dicí-y que la so ma, por selo, merecía veneración.

Por embargo, Santana, teóricamente güela’l fíu de Dios, ye mui venerada n’Asturies. Ye considerada aduyaora pa parexes infértiles, bona comadrona nos partos y, en xeneral, entemediaora nos problemes matrimoniales. Amái d’esto, hai un esconxuru perespardíu per Asturies que mos introduz la sospecha de qu’embaxo’l cultu a Santana amatágase’l cultu a la diosa madre antigua. L’esconxuru entama asina:

“Ana parió a Santana,

Santana parió a María,

María parió a Xesús”.

Si, como paez lo normal, Santana ye la güela de Cristo, ¿quién ye la bisgüela Ana cola que la tradición fae entamar la saga femenina’l fíu de Dios?. Y, d’otra banda, ¿por qué san Xuacu, esposu de Santana y padre de María, siempres queda tapecíu pola muyer?.

El casu ye qu’Ana tien el so tresuntu notros países del paganismu atlánticu: Anna, Ahu Dana o Dón. En toa Irlanda los “tuatha de’Danann” son, testualmente, “les tribus d’Ana”, mientres que nos montes de Kerry alcuéntrense unos gumiales a los que llamen “paps of Ann”, esto ye, “les tetes d’Ana”. Pel so lláu, en Gales llámenla Dón y reconócenla como Riannon (“la gran raina”) o Modron (“la maternal”). Y, pa terminar, Dana ye considerada como la diosa madre de siete fíes que queden identificaes colos siete grandes rigos conocíos n’antigüedá: Nilu, Tigris, Éufrates, Danubiu, Indu, Níxer y Rin.

Nos rellatos griálicos cúntiase que les hermanes del rei Arturu yeren tres: una yera Ana y les otres dos Morgana y Bibiana. Evidentemente “Ana” ye “Ana”. Pela so banda, el nome de “Morgana” (“Fata Morgana” delles vegaes, ye dicir, “la fada Morgana”) vien del mestedal del britónicu “morigena” (“nacía de la mar”) y del gaélicu “morrigan” (“la gran raina”), diosa l’amor y la guerra y que se manifestaba en forma de cuerva. Y Bibiana (nome mui espardíu per Asturies) ye la diosa’l llagu de les histories artúriques y ta relacionada con Bo Vinda (“la vaca blanca”), llevando por nome nel antigu irlandés Boann y Boyne (“la madre nutriente”).

Pero tamos escontra un mitu más espardíu o más universal. Na India alcontrámosmos con Anna Purna (“Ana la qu’apruve”) y nel imperiu romanu con Anna Parenna (“Ana la que pare”).

N’Asturies les xanes que cuntien con nome son toes Ana. El mesmu nome “xana” yá mos remite a “ana”. N’El H.ortigueru (Cabrales) ye Ana Susana, en Cangues (Cangues d’Onís) ye Ana Quiliana, n’Urbiés (Mieres) ye Ana. Amái, en países vecinos asocede lo mesmo colos personaxes asemeyaos a la xana: nel Ourense de cultura astúrica –nun pasa lo mesmo nel restu de Galicia- ye Ana Manana y nel País Vascu ye Ana Mari.

Asina les coses, n’Asturies el cultu a Ana hebo ser perantigu, mui anterior al cristianismu ya inclusive a los escosos cultos que los romanos introduxeron nun país que dominaron poco y a dures penes.
Imprimir

















Comentarios

  1. Interésame muncho toa esta conversición d'Asturies de nación celta a rexón católica. Daba pa un llibru que taría perbien, anque ya afondaste nello nel llibru les Fiestes d'Asturies.

    Pero tou esa xera de pasu del paganismu al catolicismu coles reconversiones de fiestes y dioses en cultos católicos ye dalgo que debería sabese pa estudialo y conocer meyor la nuesa hestoria.

    Abluco con tolos Festivales Intercélticos, Beltaines y demás n'Asturies que nos pon como "Nación Celta" ensín nenguna reflesión detrás de tolo qu'eso supón, un reconocimientu a dalgo distinto d'España, con hestoria propio. Nun lo digo por enfrentanos col todopoderosu imperiu, que nun m'importa un res, sinon por dir concenciando que muncha de la nuesa historia, ritos y folixes tien más que ver con otros países del norte que col que tenemos al sur.

    Alrodiu d'esto discutía l'otru día que qué podemos esperar d'una educación n'Asturies con unos llibros fechos fora onde aprendiemos los afluentes del Guadiana y non los del Nalón.

    ResponderEliminar
  2. Dixebra, afirmar la celtización de la cultura astur no es un ejercicio de enfrentamiento col todopoderosu imperio, es la constatación de que nuestro pais y nuestra cultura comparten muchos componentes de esta cultura atlántica que debemos conocer, estudiar y difundir como parte de nuestra herencia cultural. Los que niegan esta celtización tendrán que explicar sus argumentos aunque ahí considero que hay unas connotaciones que se salen de la cultura y que tienden a menospreciar la cultura astur desde el desconocimiento, la ignorancia y en muchos casos la mala fe.

    ResponderEliminar
  3. Comentar estos artículos ye complicao porque nun caben opiniones simples como cuando escribes de política. Por exemplu l'anterior sobro Cascos y la crítica a los nacionalistes. Pero a mi gústenme más estos. Nun sé como t'arregles pa desplicar les coses tan claro, lo mesmo nesto de la mitoloxía que d'economía. Ye impresionante que un economista sepa tanto de relixón.

    ResponderEliminar
  4. >>Dixebra dijo...
    Interésame muncho toa esta conversición d'Asturies de nación celta a rexón católica. Daba pa un llibru que taría perbien,

    Home, ho...
    Que me perdone David pero ye que esto ye frustrante.
    Señores, esi llibru ESISTE, escribilu yo y asoleyelu ensin sovencion dala, abondo fatu fui. Esi llibru entitulase "La Creacion del Mundo y Otros Mitos Asturianos" y nun fui a escosar la edicion mentanto la xente mercaba Harry Potter y Carlos Zafón. El mi llibru cuenta tolo que diz David y mas, dende Anna Perenna al guñu paganu de la xana como diosa de la soberanía.
    Nun voi engañavos, toi seguru que`l noventa per cientu de la mitoloxia y el panteón de los astures sumiose dafechu, pero la gran diosa polifuncional, que ellos llamaben Nabia o Navia, yera tan importante nel so pensamientu y foi tan facil adautala a la devoción catolica, que podemos recuperar y reconstruir casique tolos sos rasgos.
    Perdona David que vaiga aprofitando el to blog pa la mio publicidá pero tarás d`alcuerdu comigo que ye pa tirase de los pelos.

    ResponderEliminar
  5. Pues perdona pol mio desconocimientu, nun pue ún tar a la última na produccción de llibros asturianos.
    Y nun será pa tanto tirase del pilu, ho, será una bona ocasión pa garrar un nuevu lletor, non?

    ResponderEliminar
  6. Pues yo sí lleí esi llibru y prestome muncho. Regalómelu David cuando él volviera d'unes xornaes culturales en Ponga, hai dos años o más.

    ResponderEliminar
  7. Tú yes una enchufada paezme a mí ...

    ResponderEliminar
  8. ¡Anda! You sí teo'l llibru!!! Hasta lu imprimí, milenta páxines.... hahahahaha.....

    Munchas Gracias, Milio, por escribilu, y a David pola entrada tan guapa

    ResponderEliminar
  9. Préstame que vos preste pero, ¿Puedo pidivos que si vos parez un bon llibru, lu encamentéis a otros?
    Paime que hai abonda xenti que-y puede interesar y fáesme, amás, que si los asturianos foren conscientes de la bayura de la nuesa mitoloxía, si sopieren tolos vencieyos que caltenemos colos nuesos güelos, podíen cambiar abondes coses n`esti país, dende la percepción de la nuesa identidá hasta les tendencies polítiques.

    ResponderEliminar

Publicar un comentario