San Xosé

Xosé, esposu de María y padre putativu de Xesús (d’ehí lo de Xosé “pp”, ye dicir, “Pepe”), ye una de les figures más controvertíes y, a una mesma vegada, más estraordinaries del cristianismu. La iconografía oficial católica faemos velu como un vieyu, dafechamente impotente pa bona parte los fieles, qu’aceuta lo que la so xoven muyer-y diz al rodiu d’una historia que nun tien nin pies nin cabeza. Si aceutamos que María concibió por obra y gracia l’Espíritu Santu, tuvo ser mui duro pa Xosé apechugar cola responsabilidá d’educar al fíu de Dios. Pero si María concibiera per una vía muncho más natural nuna sociedá tan patriarcal como la xudía d’entós, Xosé amosó un amor pa cola so muyer dignu de considerase inclusive nos tiempos que cuerren.

La tradición cristiana ye cruel hasta velo y dexalo con Xosé. D’elli namái dizse que yera un home xustu y que tinía como profesión la de carpinteru. Que yera xustu podemos dalo por de xuru con namái adicar pa la so estraordinaria reaición escontra la situación que-y aportó. Pero la so actividá profesional ye discutible. La ermuna vegada qu’apaez esti datu na plumba d’un evanxelista resulta que lo fae en griego, llingua na que “carpinteru” dizse igual que “mayestru constructor”, lo que nun namás camudaríe la so imax sinon tamién la so situación económica.

 

Nada mos cuentien más del paisanu de María, sacantes que –cosa que nun ta nos evanxelios- morriera garrando les manes d’ella y les de Xesús, polo que san Xosé ye patronu la bona muerte, aidando a los morribundios nel so tránsitu a la otra vida. ¿Ye l’Anubis del cristianismu?.

Pero otres tradiciones abondo más contrastaes asitien a Xosé (que quiciabis se llamaba Xudas Xosé) nel llevantamientu hebréu contra la ocupación romana nos años diez de la nuesa era. Si esto ye verdá, y hai documentos que paecen avalalo, la figura de Xosé cambia muncho. Ye posible que fora crucificáu cerca Xerusalén nel añu once o doce, cosa que marcaría fonderamente al so fíu mayor, de xuru que Xudas Xesús, d’ocho o nueve años daquella. Amás, asigún los evanxelios, yera fíu de David. Elli tresmitía, si ye qu’eso yera verdá, el sangre de los reis d’Israel, heredá que los xudíos atribueron a Xesús cuando lu quixieron coronar. Igual s’alcuentre nel sumatoriu de toos estos asuntos el desinterés qu’al rodiu de Xosé toviera la ilesia.

 

N’Asturies, un país mui apegáu a la diosa madre, la Virxe na versión cristiana, la devoción a san Xosé nun ta mui espardía. Por embargo sí tien el so día una importancia grande nos ciclos productivos campesinos. Ye tradicional que’l 19 de marzu se cellebre la primer espicha l’añu. Ya ye que les fiestes al rodiu la sidre siguen resistiendo a la desapaición o práutica desapaición de la sociedá tradicional. Si’l ciclu serondiegu taba marcáu pola mayada ya’l ciclu ivernal tábalo pola xixilanza la criyanza, el primaveral qu’abre con san Xosé va talo pol consumu.

Imprimir