15.2.11

¿”Réquiem” pol carbón (con música de La Col.lá Propinde)?

“Yá nun queda carbón,
que lu pechan,
solo queda’l dolor
d’esta tierra”.

La Unión Europea ta dicidía a finar coles aídes a la minería’l carbón asturianu pa dientro ocho años. L’añu 2019 sedrá’l primeru ensin subsidios pal sector, pero de xuru que la minería tará más que pesllada pa esi momentu. La negra espectativa qu’esta anuncia provoca fairá que les empreses van dir zarrando pozos paulatinamente, col sofitu d’unos gobiernos que nun apostarán pola resistencia, porque los llevaría a presenciar pieslles y despidos masivos al final d’esos ocho años. El PSOE ya’l PP tienen un pautu non escritu de permitir un orbayu de pieslles pa nun tener que soportar un bastiazu nel 2019, pa cuando podría gobernar cualisquiera de los dos. Ye evidente que la inestabilidá económica y la protesta social sedrán menores si los pieslles van escalonaos a lo llargo’l periodu.

Qu’un sector económicu nun puede tar subvencionáu eternamente ye de cenciella racionalidá. Los sofitos a cualisquier sector productivu namái se dan en dos circunstancies. En primer llugar cuando se trata d’un sector naciente, un sector que tien necesidá d’abellugu políticu pola importancia que va tener a la vuelta d’unos años. Esti fora’l casu de la industria emerxente de les dómines del proteccionismu y del estáu-nación como instrumentu alministrativu d’una burguesía que necesitaba consolidar un mercáu interior. Evidentemente, nun ye esti’l casu’l carbón asturianu.

La segunda circunstancia posible ye cuando un estáu apuesta pola autarquía, bien por necesidá como la Unión Soviética bloqueda de Lenin, por decisión política como l’Albania de Hoxa, o por un amiestu de les dos coses como la España de Franco. Tampoco ye esti’l casu del carbón asturianu.

“Na cocina’l carbón
yá nun queima
ya entá siento la voz
de mio güela”.
 
N’actual Unión Europea, por embargo, ye necesario caltener cierta protección a determinaos sectores por una tercera razón tan cenciella como la de nun dexar les cadarmes económiques al debalu, nes manes d’un mercáu incontrolable y, en bona miente, impredicible. Ye necesario siguir oponiéndose a esi futuru programáu pal carbón pa dempués del 2018. Nos años vinientes el mercáu enerxéticu va ser tremendamente inestable ya ye necesario cuntar con una reserva estratéxica propia. Ye necesario, dende’l puntu d’agüeye européu, caltener abiertes delles esplotaciones pa garantizar una mínima autonomía enerxética. De fechu, la descomanada demanda enerxética de China ta faciendo xubir el preciu’l carbón nel mercáu internacional como enxamás se viera dende la primer revolución industrial del XIX. Los incrementos de preciu van camín de superar los vistos pal petróleu na cris de los años setenta’l sieclu XX. Güei ye rentable caltener abiertos los pozos carboníferos, sinon tóos, sí unos cuantos.

“Y toos xuntos lluchar
pola tierra.
Lo que’l güelu semó
nun se pierda”.
 
Dexemos de falar del mercáu enerxéticu y del sector carboneru pa falar d’otra cosa, entá más llaceriosa: el futuru de los valles centrales d’Asturies. Les cuenques mineres deben presionar escontra la Unión Europea con criterios ambientales. Si’l protocolu de Kioto ya’l cambéu climáticu –induldable escontra opiniones d’ignorantes ya interesaos- obliga al abandonu pasín ente pasu l’usu’l carbón, tamién debería ser obligao l’atención ambiental a les vieyes cuenques hulleres. Dempués de más d’un sieclu produciendo bayura pa les empreses y pa la sociedá, agora les cuenques vense obligaes a carecer d’una vida nun tarrentoriu tremendamente degradáu.

Por eso una de les víes de desendolcu pa les cuenques ye la inversión ambiental. El VI Programa d’Aición Medioambiental de la Unión Europea prevé la rexeneración de los tarrentorios degradaos dende la primer revolución industrial. Nesti sen, los vieyos fondos mineros podrían ser sustituyíos por fondos ambientales.

Pero hai una verdá incómoda: los gobiernos asturianos y los sindicatos clientelares vienen apostando dende hai cuasi tres décades pol peor modelu posible. Por poner un exemplu clariquino, les cuenques tan enllenes de grandes superficies comerciales qu’arruinaran el texíu llocal y que dependen d’una demanda potente, una demanda que, agora, cola cris, vese aminorgada delantre les negres espectatives a mediu plazu. Tamién los fondos europeos emplegáranse pa grandes infraestructures viaries que provocaron lo contrario de lo prometío: un vaciamientu económicu del Caudal ya’l Nalón ya un resforzamientu de Xixón ya Uviéu como polos de desendolcu.

En resume: el futuru les cuenques a partir del momentu nel qu’acaben les aídes al carbón ye mui peliagudu. Ya otra vuelta la verdá incómoda: enxamás hebo un modelu desendolcu pa les cuenques. Tóo quedara llindao nel “pan pa güei y fame pa mañana”, nuna maniobra permanente pa caltener el clientelismu políticu. Total, que s’enterraran miles de millones d’euros dende hai vente o venticinco años pa qu’agora la ciudadanía se decate de que los tiempos vinientes van ser entá peores. El baxón demográficu va continuar y los niveles de renta van cayer descomanadamente. El futuru ye mui negru pa los conceyos del Caudal, del Ayer y del Nalón.

“Y toos xuntos lluchar
pola tierra
pa que’l val.le Turón
nunca muerra”.


Imprimir

7 comentarios:

  1. Claro, esi ye'l tema. Puen venir recursos europeos p'amatagar los efeutos de la desindustrialización de les cuenques en forma de fondos mineros, ambientales, o del tipu que seyan. Pero, ¿quién los xestiona?. Pues la lexón de pelgares que lo vieno faciendo hasta güei colos resultaos que vemos. Récor en paraos, n'emigración mozo, en falta de nueves empreses, nulu anovar el texíu productivu, planes "ñ" anunciaos con unos lletreros xigantescos p'aparentar que se da trabayu cuando son cortines de fumu... Y, eso sí, una maraviyosa rede clientelar pa los de siempre, que da munchos votinos pa siguir (des)gobernando...

    ResponderEliminar
  2. Ye todo parte de un plan cuidadosu pa esanicialo too, tal parez que l'autovía minera fizose pa que colara la mocedá con mas facilidaes.

    ResponderEliminar
  3. Amás del perbon análisis de la situación, fales d'alternatives, qu'angüaño ye una práutica inesistente de cualesquier analista.

    Yo trabayo en consultoríes informátiques que s'asitiaron nes cuenques mineres por mor de los fondos mineros. Ye daqué positivo, pero nin siquies inxenieros algamamos los 900€ de sueldu. ¿Que ye meyor que nada o que colar fuera'l país? D'alcuerdo, pero non a cualesquier preciu.

    ResponderEliminar
  4. El carbón es el pasado, el siglo XXI nos pide otras alternativas. Tenemos que invertir en I+D+I
    y tener otras fuentes de ingresos. Aquí en Sevilla cambiamos el modelo productivo hace 18 años y nos fue muy bien. Asturias, según lo vemos desde aquí, está al borde del abismo; es necesario que déis un paso hacia adelante y caminar con paso firme a lo que en nuestro caso es una nueva Andalucía.

    ResponderEliminar
  5. Ese pasu ya lo tamos dando, pero de momentu nesta tierra solu esnalen los páxaros. Asina que vamos jodidos.
    Una entruga, sin acritú.¿La nueva andalucia ye pa los señoritos, o son estos los que engrosen el 28,35 de paraos de paraos andaluces,según la EPA del 4ºT de 2010?
    Estos datos tan aquí, por si interesen.:http://www.juntadeandalucia.es:9002/

    ResponderEliminar
  6. Por supuesto, lo que queremos es el dinero fácil
    así es como nos enseñaron. No creo que exista nada malo en eso. En todo momento me estaba refiriendo a las subvenciones y ayudas, tanto estatales como comunitarias. Por otro lado amable Santiago, el término "señoritos", ya nos resulta anacrónico, los andaluces que vivimos de la cosa pública nos gusta más el término "espabilao". Es cierto que tenemos un porcentaje del 14% de parados y otro 14% de quietos, pero tambien en estos grupos tenemos "espabilaos" y entre todos estamos haciendo una nueva Andalucía.

    ResponderEliminar
  7. Ay Rodrigo. Nun vos queda nada por aprender...
    Equi facemos lo mismo y nun se comenta en nengún llau. Nin cope, nin abc, nin mundo, nin onda cero.... nin res.
    Y, bien importante, nin los partios estatales falen dello.
    Vos como sois un poco avarientos.......... nun dexais "mojar el pico" a las demas families y llueu pasa-vos lo que vos pasa. A tomar pol sacu`l chiringuitu.
    Lo que teneis que facer ye eso. (garra un llapiz)
    Poneis la duerna ( bien grande a poder ser).
    Enllenaisla de picadiellu hasta los topes ( nun vos preocupes que nun se pierde res)
    Puestos a revolver, habeis dexar que caciple nella tol mundu ( psoe,pp, iu,sindicatos, empreses, medios de comunicación....)
    Nun vos preocupar, que si nun ye picadiellu bastante echase mas ( lo importante ye que tou dios empuerque les manes )
    A medida que revolviendo va quedando picadiellu ente les manes ( ye normal, lo bono ye mui pegañosu), vais reponiendo.
    Lo importante ye que tol mundo quede bien. ¿entendisteme?
    Venga¡¡ A trabayar nello¡
    Sois nuevos como nenos, pecais d`avarientos ye normal.
    Lulo

    ResponderEliminar

Nota: solo los miembros de este blog pueden publicar comentarios.