3.2.11

“La fuercia d’Asturies ye l’asturianismu cultural”


Enrique Carballeira: David M. Rivas (Xixón, 1957) ye doctor n’economía y profesor titular de la Universidá Autónoma de Madrid. Estos díes espubliza’l so nuevu trabayu, “Incompetentes y autoritarios. La industria de Xixón dende l’autarquía al desmantelamientu”. Trátase d’un ensayu sobre les claves de la evolución de la industria xixonesa ente 1940 y 1990. L’autor ye, dende 1993, miembro de l’Academia de la Llingua Asturiana. Amás de la so bayurosa produición académica tien delles obres lliteraries y ensayos de distintes temátiques. ¿Por qué decidió escribir esti llibru?.

David M. Rivas: Yera una idega que tuvi nel maxín dende siempres. Vengo mui marcáu pola cris industrial de Xixón, na que mio padre fora protagonista, por desgracia. Por eso-y dedico’l llibru a elli y a mio madre. En casa viviéramos en carne propio l’esbarrumbe industrial. Yá escribiera sobro esto dos capítulos na “Historia de Xixón”, obra espublizada hai diez años por “El Comercio”. E.C.: El títulu yá paez un axuste de cuentes, ¿tan mal se fixeron les coses?.
D.M.R.: La nuesa burguesía industrial yera una clas incompetente ya indolente, echada nos brazos d’un franquismu mediocre nel que munchos se fixeron “ricos pola patria”. Sedría interesante espublizar la nómina de les families agora mui bien vistes y que se fixeren riques sobro la esplotación xabaz de la posguerra, inclusive recurriendo a la mano d’obra esclavo. Cuando’l franquismu finó, esa burguesía improductiva amosó la so inutilidá. Conservó los capitales pero fundió la economía. E.C.: ¿En qué momentu tá el paisaxe industrial xixonés anguaño? ¿Y l'asturianu?.
D.M.R.: Xixón sigui siendo’l conceyu central industrial d’Asturies, el motor principal del país. Y Asturies ye la comunidá autónoma onde ta mas esporpollada la industria de bienes d’equipo. Lo que pasa ye que les empreses punteres son, como ye lo propio, discretes y nun salen nos periódicos nin nos telediarios. A la escontra, la oligarquía político-empresarial da noticies tolos díes. Un exemplu d’anguaño: l’enantu d’El Musel, dalgo inútil, antieconómico y ecolóxicamente mortífero, pero mui rentable pa tres o cuatro empreses que nada dan a la sociedá.

E.C.: El llibru tamién cuenta con un apartáu gráficu con semeyes de Xurde Margaride. D.M.R.: Margaride ye un notariu la realidá y les sos semeyes son de gran calidá. Cuntiar con elli nel llibru ye un honor.

E.C.: Nestos tiempos de crisis y paru, ¿tienen los economistes más trabayu que nunca tratando d'esplicar les coses y buscando soluciones?

D.M.R.: Los economistes amuesen la so debilidá cuando les crises porque nun les saben desplicar. Los economistes críticos venimos diciendo dende van años qu’esto diba pasar, pero naide nun mos tomó en serio. Esti modelu ta caducáu dende los setenta, pero nun queremos enteramos. Y si nun mos ponemos a la xera, la muerte’l capitalismu va ser la muerte la nuesa especie.

E.C.: Fálase munchu de la falta de rimpuesta del pueblu ante esta grave situación económica, ¿yera la sociedá más combativa enantes?¿Por qué hai esta apatía? D.M.R.: Si miramos pa Europa vemos qu’en Grecia, Francia o Gran Bretaña la xente nun ye tan apática. Equí entá nun salimos del franquismu y, amái, somos los “nuevos ricos” d’Europa. Y hai otres custiones. ¿Cómo vamos ser combativos cuando los nuesos sindicalistes, por exemplu, son senadores dende hai vente años?. E.C.: Usté ye miembru de l'Academia de la Llingua asturiana y gran defensor de l'asturianu, ¿Pa cuándo la oficialidá?
D.M.R.: La oficialidá va llegar. Nun se puede lluchar siempres contra la razón. Y lleven lluchando tiempu abondo, especialmente los políticos del PSOE, un partíu particularmente etnocida. Dempués de les declaraciones de Fernando Lastra sobro que reconocese como asturianu ye d’estrema drecha, lo del PSOE queda claro.

E.C.: ¿Económicamente sería tan gravosa esa oficialidá?
D.M.R.: Non. Ye más, si’l gobiernu PSOE-IU-BPA-LV nun toviere esa especie de “complexu d’austroúngaros” Asturies taría güei arrecibiendo más miyones pol coeficiente billingüista que lo que cuesta la oficialdá. El gobiernu arrenunció a trenta miyones d’euros con tal de nun reconocer que l’asturiano esiste. Amás la oficialidá permitiría desendolcar una industria cultural que ye intensiva en manu d’obra.

E.C.: A nivel de la caí, ¿pueden facer más los ciudadanos pola defensa de la llingua?
D.M.R.: Siempres se puede facer más de lo que se fae. La sociedá civil asturiana ye débile ya inclusive munches asociaciones o persones que defenden la llingua tan averaes a partíos políticos que son represores culturales. Pero ye verdá que l’asturianismu cultural ye la fuercia más importante de l’Asturies contemporánia, por encima inclusive del movimientu obreru.
E.C.: ¿Qué tá escribiendo agora?

D.M.R.: Terminé hai poco unos apuntes sobro la toponimia de la mio valle, la del altu España. Tamién toi con un estudiu sobro la valoración económica de los espacios protexíos, pero va espublizase n’inglés. Dalgo de lliteratura faigo y preparo un ensayu sobro’l sector agrariu asturianu. Y sigo con una “historia personal del nacionalismu” de la que diera capítulos nel mio blogue. Igual demasiaos proyeutos. Puede que dalgunos queden en nada.

10 comentarios:

  1. Nun sé por qué estes reflexones nun espertaron dengún comentariu, pero equí va'l míu. Personalmete, yo encamentaríate que dexares pa más alantre'l llibru de la historia personal del nacionalismu y priorizares el del seutor agrariu.

    Asturies precisa d'un nacionalismu que sepia peronde se mueve, ú ta'l raigañu de los nuesos problemes y cómo solucionalos. Poro, como movimientu, precisamos más tar enteraos del seutor agrariu, con un analís fechu por un espertu n'economía como yes tu y amás (y cosa perimportante) con una fonda visión de país. Nun precisamos tanto tar enteraos sobro lo que pasó nos caberos trenta años nesti movimientu, ente otres coses, porque, quien más o quien menos, toos tenemos una idea de cómo s'entamó y desendolcó la mayoría de les coses asocedíes.

    Hemos de tar preparaos pa dar soluciones a la llacerieosa realidá asturiana; pémeque yá tuvo bien de mirase l'embeligu como movimientu.

    Un saludu.

    ResponderEliminar
  2. Pelayu, dígotelo ensin segunda intención y tamién ensin falsu afalagu, sospréndesme. Sé cuala ye la to edá, más o menos, y llámame l'atención lo bien qu'analices les coses. Tienes razón no que dices. A mín tamién me llamó l'atención que naide (sacantes delles opiniones en facebook) toviere interés por estes reflexones. Voi siguir cola mio "memoria" pero voi dar prioridá a les otres coses. Gracies pol apunte. Un saludu candial.

    ResponderEliminar
  3. Creese per riba de bien y mal y dedicase a decí-y a la xente lo que ye o nun ye produz que directamente munchos nin siquiera tengan interés en lleete, David.

    ResponderEliminar
  4. Yo nunca tuve perriba del bien y del mal. Cuando te metes en fariña, y yo fícelo, puede decise lo que quieras, pero non eso. ¿Qué prefieres, anónimu, que naide opine?. Yo teo opinión y dígolo. Ye más, camiento que ye un deber. Si lo que pienso nun te gusta, tas nel to drechu. Si nun tienes simpatíes por mí, tamién. Pero considerar que la opinión llibre (acertao o non) ye tar "perriba de..." ye que desconoces lo que ye la llibertá. Agora, si lo que digo nun interesa a naide, nun t'esmolezas... Yá me daré cuenta y pasaré a escribir n'español notros foros onde sí valga pa dalgo la mio opinión. Pero, pel momentu, voi insistir. Polo menos tu llees lo qu'escribo.

    ResponderEliminar
  5. Bonu, cómo me sorprende'l tercer comentariu. Nun ye habitual lleer coses asina de desagradables nesti foru y polo tanto camiento que ye una enorme minoría la xente que piensa asina, Rivas. Yo mesmu póngome como exemplu: entro nesti blogue davezu (non tolos díes nin muncho menos, de fechu a vegaes hai selmanes qu'igual nin entro porque hai munchos blogues y medios de noticies que sigo a diariu, pero independientemente de la frecuencia con que lo faiga siempres lleo tolos tos artículos y cuasi siempres tamién los comentarios, porque paézme'l meyor o de los meyores espacios de la blogosfera asturiana, como intuyo que piensen la gran mayoría (tanto de los qu'intervienen como de los que non). Per otru lláu, qu'escriba equí o non t'aseguro que tampoco nun tien nada que ver con que l'artículu paézame meyor o pior, simplemente cuando veo la necesidá d'añedir daqué porque lo considere polo que seya lo faigo, como ye'l casu presente, sinón non, que ye lo que suel ser, y más que nada porque yá te sueles encargar tú solu de dicir tóu bien acertáu y clarino ;)).

    D'otra miente, ten en cuenta que ye'l caberu artículu, cuido qu'haya más comentarios, pero como digo, qu'haya más o menos intervenciones de la xente nun creo que seya indicativu de gran cosa. Reitero que yo presto gran atención a tolo qu'escribes, y cuando digo tóou ye TÓU, ensin esceiciones, escriba o non un comentariu, y como yo munchos.

    Ánimu, porque yes (y lu sabes) ún de los mayores activos inteleutuales del asturianismu.

    Un saludu candial, grande d'Asturies.

    ResponderEliminar
  6. Yo nun dixe que nun te lleera, nin entro dientru d'esos que pasen de lleer lo qu'escribes. Intento papame caldía tolo que xenera l'asturianismu na rede y esti blogue ye parada obligatoria, pero ello nun diz que bastantes vegaes me preste lo que lleo. Y como conxuntu a la opinión que tengo contrasto pareceres con bastante xente d'esti micromundín asturianista, saco les conclusiones que saco.

    Quiciaves la espresión de per riba del bien y del mal nun fuere la más correuta, pero parecióme afayaíza pa referíme a quien dende'l so púlpitu s'atreve a decir a los demás que son y que nun son. Y ye que d'un tiempu p'acá, les consideraciones de dos o tres blogueros que dende acuantayá pudistis tar llamaos a facer daqué bono pal asturianismu, nun ficieron más que ferir sensibilidaes en dellos sectores nacionalistes. Y d'ehí'l mio camientu de qu'a muncha xente nun-y interese lleer sigún qué coses.

    David, quien s'atreve a metese en fariña, como tu dices, y a dicir lo que piensa de la manera que tu lo ficiste algunes de les veces, tien qu'esperar dacuando recibir la contracrítica que correspuende. Esto nun quier dicir que te dé la razón no que dixiste o nun dixiste.

    Por ciertu, prestaría una analís de to sobre eso que va llamase Conceyu Abiertu. Sedría esclariador de munches coses ver si yes capaz a intentar caltener una equidistancia ente Bloque-UNA y eso, o si non.

    Saludos.

    ResponderEliminar
  7. Selo, Mino, selo. Pero ye qu'a esta xente hai qu'arrepostiá-ys con dureza. A min nun me preocupa qu'haiga más o menos comentarios. Hai otres bitácores, llibros interesantes y, perriba tóo, ta la cai y la llucha na vida real. Y vuelvo al casu de Pelayu: un rapaz mozu, preparáu, qu'argumenta mui bien. Nun-y gustó una opinión mía, echome una bronca, tuvo ensin participar cuasi un añu... pero siguió lleendo lo que yo escribía. Y nun lo fixo porque yo seya mui llistu, nin por mitomanía (que nun la tien), sinon porque ye mui importante qu'haiga debate nesti movimientu de nueso. Y, volviendo al anónimu esi que diz lo de "perriba'l bien...", eso ye vital: yo, con unos cuantos años, daprendí d'un chaval dalgunes coses.

    Un saludu candial y gracies. Dacuando en vez presta sentir pallabres como les tuyes, nesti universucu de nueso, tan cainita munches vegaes.

    ResponderEliminar
  8. Lo importante ye escribir nuna bitácora, nun llibru, etc. pensando n'abierto, en toos esos asturianos que-yos esmolez lo que pasa na nación y non pa grupos mui concienciaos y tamién mui engarraos por desgracia. Ye perimportante enanchar llendes, sestaferies y andeches. Dende'l cainismu ya'l sectarismu internos siempres van cayer carrobexazos, eso ye inevitable y nun tien igua porque ye una constante histórica dende la transición. Pero'l futuru d'esta nación nun ta neses llurigues minoritaries y amantes de la griesca, sinón en qu'una parte importante de los nuestros conciudadanos vayan comprometiéndose na defensa de les coses del país. Ehí ye onde hai que llegar (xera mui difícil, por supuesto) y onde tu concretamente pues facer un llabor importante como inteleutual y economista. Y lo demás, personalmente, pienso que a los que somos talludinos nun nos tendría yá qu'importar a estes altures un res.

    ResponderEliminar
  9. Lulo;
    Toi d`alcuerdu con Pelayu de pe a pa.
    No tocante al interes que la xente pueda tener o non por lleer a David, parezme qu`elli sabe bien qu`hai munchu interes. ( los bloggs apurren unes estadistique d`entraes y demás que saquen de dudes a cualquiera).
    Nun quiero debatir con nadide sobre esti tema, pero llamóme muncho la atención un comentariu;
    " d'un tiempu p'acá, les consideraciones de dos o tres blogueros que dende acuantayá pudistis tar llamaos a facer daqué bono pal asturianismu, nun ficieron más que ferir sensibilidaes en dellos sectores nacionalistes."
    Primero; Munchos tamos a ver cuando esos seutores ferios del nacionalismu activu se paren a pensar lo ferios que tamos tambien los qu`una vuelta tras otra vemos que nun nos escuchen.
    Segundo; esos dos o tres blogueros son una bendición. Apartense del discursu sectariu y tiren de sentíu comun. Benditos sean. Mira que son distintos en muches formes de pensar, y con too ta d`acuerdu en munches coses; dalgo de sustancia tien lo que fiere entos.
    El comentariu de David sobre escribir en castellan ye entendible 100%, pero tengo fe en que siga escribiendo n`asturianu y sobre asturies. Nun hai nacionalista con sentiu comun al que nun-y pasara pola cabeza tres o cuatro veces al añu mandar esti mundin a esparragar, por esteril, por caru a nivel personal y profesional y por tochu y revesosu. Pero... les convicciones d`un nun cambien por muncho que se quiera.
    Yo animote a escribir ensiertos como`l de la sidra vasca, el del plus pal salon, santa olaya, d`economia o el de Valledor. O esi trabayu sobre agricultura q`anuncies
    Estos que yo recuede asi de golpe.
    Lo que fai falta ye xente que explique coses, y que ponga idees concretes enriba la mesa.
    Los nacionalistes y la nuesa historia...... Val mas callar.
    Salu

    ResponderEliminar
  10. La independencia de criteriu siempre tuvo mui mal vista. Munchos prefieren la seguridá con fedor a cuadra que'l riesgu de galopar al aire llibre. Quédame mui claru'l perfil ideolóxicu y moral del anónimu esti tanm fatu.

    ResponderEliminar

Nota: solo los miembros de este blog pueden publicar comentarios.