31.1.11

La Candelera y san Bras


Pa pola nueche’l primer día de febreru, entama la fiesta “pequeña” –pequeña como ye lo propio n’iviernu pero “grande” na historia y na tradición- de la mio collación, Candanal, nel conceyu de Villaviciosa. Como ye lo propio, la fiesta “grande” cayi pal branu, la llamada “sacramental” –na realidá una fiesta pagana de collecha-, concretamente nel Carme, el 16 de xunetu. A la Candelera ta consacrada la ilesia parroquial y la so fiesta cellébrase especialmente n’Argañosu, l’aldega na que yo vivo, la más alta la valle. Esti día iverniegu yera cellebráu na intimidá con un gran ciñu namás que’l Sol muerre. Poniénse candeles nes caleyes y lluces nos corredores y nos horros. Como cuasi tóo, la tradición fora perdiéndose asigún una falsa “modernidá” que nunca fora tala diba trescalando. Pero nos últimos años tamos intentando revitalizar dalgo d’ello. Llevamos unos años nos que colocamos veles na puerte o nes ventanes y procuramos cenar o tomar daqué xuntos.

Trátase d’una fiesta matriarcal y por eso ye nuecherniega, embaxu’l sábanu la Lluna. Ya ye que’l 2 de febreru cellebra la ilesia la fiesta la purificación de María. Na sociedá xudía la dómina rexía un preceptu recoyíu nel “Llevíticu” qu’obligaba a toles muyeres a aportar al templu pa purificase cuarenta díes dempués del nacimientu’l so fíu. María fixéralo como un actu d’humildá y de sometimientu porque, como afirma la tradición cristiana, nun taba obligada na realidá, porque concibiere a Xesús ensin acometer actu impuru dengún. Tamién ye conocíu esti día como de “la presentación” o fiesta “del hipopante”. El nome provién de que María llevó al so fíu pa ser presentáu a los sacerdotes.

Por embargo n’Asturies esti día ye conocíu como’l de la Candelera. Trátase de la virxe María con una o delles veles, buxíes, un candil, etcétera, ya ye la suplantación d’un ritual paganu perespardíu, especialmente pente los romanos. Per estes dates de febreru les muyeres cellebraben la fiesta les lluces, na que conmemoraben a Proserpina. Esta perguapa muyer fora raptada pol dios Plutón, borrachu pasión, que la fixo muyer de so y camudárala en diosa. Cuando los sos padres supieron de la so desapaición entamaron una llarga guetada per viesques y gumiales, allumándose con antorches y llamparielles.

Amái, cada cinco años, los romanos allumaben les cais con antorches nestos mesmos díes, como homenax a Februa –d’ehí febreru-, que yera madre de Marte, y d’ehí marzu. Con estes aiciones pidíen-y que la mesma fuercia que-y diere al so fíu, dios de la guerra, otorgára-yla a los xefes de les lexones imperiales.

De toles maneres, los ritos de purificación asociaos al fuéu tan espardíos per toles cultures, colo que la identificación de les candeles cola purificación de María fixérase ensin resquiebres, magar que siempres arrequexare un raigañu paganu mui visible nes ceremonias que se desendolquen pela Candelera. De fechu, l’actual 2 de febreru cuerrespóndese col “imbolc” celta, festividá asociada a la fertilidá, cosa mui en paralelo a la presentación por parte de María del frutu’l so vientre delantre los sacerdotes. Si vemos un poco más p’allá de lo que mos inculcaren los cures, a lo menos a los que yá tenemos unos añinos, el mesmu “avemaría” desplica mui bien les coses:

“Dios te salve, María,
llena tas de gracia,
el señor ye contigo,
bendita yes pente toles muyeres
y benditu ye’l frutu’l to vientre”.

Esta oración ta tornada, directamente, del misal romanu de 1526. El señor nun “ta con ella” sinon que “ye con ella”: el dios nun “ye”, nun “existe”. ensin ella.

Ye mui posible que tres la Candelera s’arrequexe’l vieyu cultu a Deva, la diosa Tierra, que mos ufier los sos frutos, colo que sedríen entóncenes fiestes de fertilidá. Esta tradición desplicaríamos por qué la Candelera normalmente ye una virxe negra, siendo la patrona de les islles Canaries la última qu’apaiciere na historia, nomada ellí como “Candelaria”. La collor de la virxe procede del negro la tierra y la primera diosa d’esa collor nun ye otra qu’Isis, hermana d’Osiris y madre de los sos fíos.

P’acabar, ye bono siñalar que nestos díes de febreru ye cuando entama notase con más potencia l’espoxigue los díes y l’amenorgamientu les nueches, colo qu’una fiesta lluces tamién pode remitimos a l’anuncia la cercana primavera o a una rogativa pa qu’aporte bien ceo. Nun ye casualidá qu’al día desiguiente de la Candelera se festexe a san Bras, cuando se da anuncia’l final l’iviernu o, polo contrario, de la dureza y duración del mesmu.

Asina dizse en Torrebarriu (Babia):

“Si la Candelera rire,
l’iviernu por venire,
si la Candelera l.lora
l’iviernu fora,
que l.lore y que cante,
l’iviernu atrás ya alantre”.

De la mesma forma, n’A Caridá (El Franco), dicen:

“Si a Candeleira chora
l’iviernu xa vai fora,
si a Candeleira ri
l’iviernu ta por vir.”

Y nos conceyos de Villaviciosa y Xixón dizse, quiciabis con menos precisión y más contundencia que:

“la Candelera
echa l’iviernu fuera”.

Anque na parroquia de Fano (Xixón), apuntando meyor, dizse que:

“la Candelera echa l’iviernu fuera,
pero si llueve, ñeva o ta pa ñevar,
entós l’iviernu ta por pasar”.

Toles cellebraciones de la Candelera tienen el fuéu como centru, pero non como’l fuéu potente que quema –que ye lo propio de la nueche san Xuan- sinon como’l fuéu pequeñu qu’illumina.

Ya’l 3 de febrero festexamos a san Bras. La figura d’esti santu tien un abondu paecíu a la de san Antón, siendo les dos figures más importantes del ciclu festivu ivernizu. Dizmos la tradición que Bras fora obiespu de Capadocia, n’actual Turquía, y que, escontra la persecución que l’emperador Diocleciano desendolcó contra los cristianos –la décima y cabera pero la más sangienta- afuxó y abellugose nuna cueva, na que viviera como anacoreta.

Mentanto vivió na gruta toviera por compaña dafechamente a los animales, munchos d’ellos fieres montunes anque especialmente páxaros. Dalgunos d’estos páxaros apurrién-y comida nos sos picos. Pola so parte, san Bras abellugábalos de les correríes de caza que’l gobernador romanu organizaba. Igual ye por eso polo qu’asociamos a san Bras cola llegada les primeres aves migratories y col entamu la fin del duru iviernu. Si estos animales nun aporten a la fiesta san Bras ye porque l’iviernu entá va ser llargu y la ñeve va siguir caendo hasta mesmamente abril. Tamién ye protector escontra les gafures del gargüelu, porque dizse que salvara de la muerte a un neñu que tinía una espina grandona espetada na parte alta’l tubu dixestivu. Por eso dizse que:

“El día san Bras
comiendo castañes
nun duel la garganta más”.

Nuna cierta manera, la lleenda san Bras améstase a la de san Antón y ye bona parte de la suplantación de los ritos paganos pola parte’l cristianismu, cosa que yá viéramos cola Candelera. Cúntiase qu’alcontrose con un gochu que perdiera una muyer mui probe, un gochu que yera lo único que tinía. Bras, mui amigu de los animales, dialogó col gochu, garrolu y llevó-ylu a la muyer, Unos díes dempués la muyer supo que Bras taba presu por orde del delegáu de Diocleciano, nuna cárcele na que diba ser decapitáu más sero. Entóncenes la muyer mató’l gochu y llevó-y a la cárcele la cachola y les manes, xunta un panchón ya una candela.

Si la ufierta’l gochu mos remembra san Antón, la candela llévamos, direutamente, a la Candelaria. De fechu, el día san Bras los romeros lleven una candela a la ilesia pa ofrecé-yla. Como vemos, el mitu san Bras xúncese al de la Candelera un día dempués. Esto ye un resclavu’l paganismu, porque lo mesmo l’”imbolc” que les “februes” duraben varios díes.

De fechu, el ciclu de san Antón, la Candelera y san Bras recuéyese nel acervu popular:

“per san Antón
la pita pon,
pela Candelera
la nueva y la vieya,
y per san Bras
más y más”.

Hai un dichu que mos fae sospechar qu’hebo dalguna manda o que se caltuvo dalgún tabú que torgaba filar o texer nesta dómina, anque ye cuestión entá nun estudiada. La menacia ye más qu’evidente:

“Al que fila per san Bras
vuélvese-y la boca p’atrás”.

San Bras tamién acompanga a la Candelera nes creyencies populares al rodiu la climatoloxía:

“pela Candelera y san Bras
l’iviernu botarás,
y si san Bras nun quier
l’íviernu volverá”

La fiesta san Bras ta considerada como la cabera enantes de pascua. Ye por eso polo que se diz lo que va darréu:

“andái moces a san Bras,
que fiestes yá nun hai más”.

6 comentarios:

  1. Na mia parte, (Salas) que yá remembre cellébrase La Candelaria en Cabruñana (Grau, anque hai casas inda en Salas) ya San Bras en Figares, parroquia de Villazón.

    Son fiestas nomadas, sí señor, pa la agricultura, por exemplu; pa semar, pol fríu ya esas cousas. Pa min que soi de campu, prestosa entrada.

    ResponderEliminar
  2. Diestru: l'otru día punxe en facebook esta fras: "Asturias ia peor que Sicilia porque, polo menos, de Sicilia faen películas". Paez ser que ye d'un profesor d'institutu de Salas. ¿Fueras tu quién lo cuntara hai un tiempu?.

    ResponderEliminar
  3. Sí, sí, hahahaha.

    La frase dixéramela un profesor míu, Armando Graña. Un vienres de nueiche, coincidiéramos por Uviéu ya tomaramos una cerveza: Falando de la cousa pública asturiana, you dixiera: "Asturias yía cumo Sicilia" ya él retrucara: "Qué va ser peor, ¡Polo menos de Sicilia faen películas!" You fui facendo la frase, ya divulgándola hahah

    Armando Graña yía profesor de xeografía ya hestoria nel IES Arzobispo Valdés Salas ya yía espertu n'horros, paneras ya arquitectura popular ruraliega d'Asturies.

    ResponderEliminar
  4. Conozo a Graña y la so obra, anque nunn teo rellación personal con elli. Pero téngolu n'alta consideración.

    ResponderEliminar
  5. "Qué va ser peor Sicilia... ¡Polo menos de Sicilia faen películas!"

    (Coláraseme).

    Armando Graña yía bon paisanu ya mui intelixente, de munchu talentu.

    ResponderEliminar
  6. ¡David, ayeri, tuvi papando castañes y güei máncame’l gargüelu! Voi camudate dalgún cuentu de San Bras, garro dalgunu y amiesto estos:



    Per San Bras, tien el día hora y media más.

    Per San Bras, las patacas semarás.

    Per San Bras, la tua yerba al mediu verás.

    En San Bras, la cigüeña verás; si nun la vieres, añu de nieves.

    San Bras ya la Candelera echan l'iviernu pa fuera si !!ueve o nieva, sinón acó queda.

    Al que fila per San Bras, tórnase-y la hora p´atrás.

    Si nun nieva´l día San Bras, nieva outru día detrás.


    Un candial abrazu,

    Pindesierra

    ResponderEliminar

Nota: solo los miembros de este blog pueden publicar comentarios.