15.11.10

Madrid: dos premios lliterarios


Amigu Valentín Martínez-Otero, vicepresidente d’esti Centru Asturianu de Madrid, amigu Manolo de la Cera, amigos y amigues:

Como cada añu y como presidente del xuráu de los premios de rellatos n’asturiano Xosé Álvarez y José León Delestal toi percontentu de tar nesta tribuna. Enantes de falar del llibru que güei presentamos y que recueye los dos rellatos que ganaran l’añu pasáu, quiero comunicá-ys que los ganadores d’esta convocatoria son Dolfu Camilo Díaz y Lluis Portal. Trátase de dos bonos amigos de mió dende van años, cosa que –como diría’l rei- m’enllena de gayola y satisfacción. Nun piensen mal, por favor, que nesti premiu nun hai trucu.

Como dicía, presentamos agora “Furtivu”, de José Luis Rendueles, y “La boda”, d’Esther García. Ye pa min un placer de verdá falar d’estos dos autores y de los sos dos cuentos. Ya yelo porque son dos autores que tan pente los mios favoritos y, amái, porque me gusten personalmente. Lo mesmo Rendueles que García, estremaos n’estilística hasta dicir abasta y pertenecientes a distinta promoción, son escritores de castra.

Realmente ye complicao clasificar xeneracionalmente caún d’ellos. Aparte de que nun soi nada partidariu del conceptu de “xeneración”, como ye por de sobra conocío, lo mesmo Rendueles qu’Esther García presenten calterístiques mui indivudualizaes. Ye posible qu’alcontremos rasgos comunes na promoción primera, la que naz metanes los setenta y llega hasta bien entraos los ochenta. Ye la camada’l surdimientu, con temátiques asemeyaes y con un afán militante na recuperación de la llingua. Tamién alcontramos un comunión bastante evidente na siguiente fornada, la de los cuarentones d’anguaño, que cambió estilístiques, fízose más intimista y, en destacaos casos, practicó un adanismu lliterariu y políticu. Y, p’acabar, puede qu’alcontremos tamién rasgos comunes nel piñu d’escritores más nuevos.

Pero siempres podemos alcontrar escritores de dómines de transición, de momentos de desiertu lliterariu o, cenciellamente, “raros”. Asina, tenemos a un Fonsu Velázquez, escritor urbanu ya escépticu nun momentu de vindicación ruralista y grandes seguridaes dogmátiques; o a unos Humberto Gonzali o Xosé Nel Riesgo, de la segunda promoción pero mui anclaos en determinaes idegues-fuerza de l’anterior; o a un Xabiero Cayarga, d’un período intermediu tansitoriu. Y si cito a estos ye porque los teo bien lleíos y porque dalgunos son amigos, colo que conozo estremos non namái que lliterarios.

También teo esa consideranza sobro Esther García y José Luis Rendueles. Ella ye una escritora que nun tien xeneración y que caltién temátiques ya estilos mui personales y, siendo como ye más nueva, caltién grandes paralelismos con dalgunos autores de los primeros tiempos. Elli, pol contrario, sí pertenez a un momentu históricu tetermináu, pero tamos escontra un autor que ruempe col corsé que siempres supón la pertenenza a un grupu. Pente les que llamen segunda y tercera xeneraciones hai un momentu nel que la nuesa lliteratura faese un poco “infantil”. Nun quiero dicir que seya mala o peor que l’anterior, sinón que pierde mordiente y “aneña”. Y va ser precisamente Rendueles ún de los primeros en salir d’esa situación, volviendo la güeyada a la “gran lliteratura”, la que tien los sos finxos na lliteratura universal pero tamién nel mundiu más cercanu, el nuesu, el domésticu, el sentimental.

Nel so rellatu, Rendueles llévamos a la viesca y a los animales totémicos. Ye la historia d’un furtivu, ¿o igual ye la historia d’un osu?, ¿o ye la historia d’un pueblu enllamargáu nuna posguerra criminal y negra?. Yo, que soi un cinéfilu encamentáu, cuando tábamos xulgando los rellatos presentaos hai un añu, el que resultó ser de Rendueles llevome a la película de Saura “La caza”. Nun ye lo mesmo, caro, pero vía nel rellatu esi tastu de violencia amatagada ya esa xuntura de necesidá material y de llibertá espiritual.

Amái, hai nel rellatu de Rendueles una fondera conocencia de la ñatura, de la viesca, de la interacción pente’l cazador y la so presa –delles vegaes el so posible verdugu, cuando d’osos o de llobos falamos- ya inclusive de les armes, de los rifles ya escopetes. Pa quien, como yo, vivimos en pueblu y conocemos dende neños estos asuntos, resulta un rellatu cercanu y que mos trai una montonera connotaciones.

Ye un cuentu, el d’esti Rendueles, un pocoñín agobiante ya un mucho desesperanzador. Tien un pesimismu fonderu, como –siguiendo exemplos cinematográficos- les películes de la dómina la gran depresión de los Estaos Uníos. Pero, a un tiempu, tien llugaínes d’esperanza. Esto ye dalgo recurrente na obra de Rendueles, igual porque ye fíu del desmantelamientu industrial y del negru horizonte al que’l so Xixón s’alfrentaba. Pero sabiendo, como persaben los playos (anque Rendueles nun lo ye porque ye nacíu en Vega), que “enxamás tronara que nun abocanara”.

Pela so banda, Esther García preséntamos una obra cuasi “costumista”, amás de tar escrita na variante occidental que, como tol mundiu sabe, tanto-y presta a esti oriental costeru que firma. Cuando lleo a Esther García siempres me recuerdo de los versos de Miguel Hernández nel so “Vientos del pueblu”. Lleendo a Esther García nunca dexo de maxinar la referencia que’l poeta fai de los gallegos, xente que pa elli yera “de lluvia y calma”. Esther García nun ye gallega, que ye valdesana, pero sí ye una escritora “de lluvia y calma”. Faciendo un paralelismu, puede que’l poeta falara de Rendueles, esta vegada sí, asigún el so asturianu arquetípicu, “de braveza”.

Pero, igual resulta chocante, tamién esti rellatu mos devuelve al mundiu rural, a lo meyor a una “arcadia” asturiana na que, munches vegaes ensin damos cuenta, siguimos querer viviendo. Y digo lo mesmo qu’enanties: pa los que tenemos como referente lo rural y, amái, vivimos nello, esti ye un cuentu mui guapu. Pero nun se trata namái que d’una reflexón personal que ye ayena pa otres persones. Los que pensamos q’Asturies ye daqué más qu’un sitiu perguapu onde pasar les vacaciones, aunque “lo diga tol mundiu”, bien que sabemos que los referentes de la tierra, la tierra como madre y sustentu, son d’una importancia vital. Les nueses sociedades, modernes y tecnificaes, marchen siguiendo’l camín marcáu poles ciudades, pero les referencies simbóliques, pol fechu de ser fíos de la revolución neolítica y de les races indoeuropées, siguen siendo rurales.

Sigo col símil cinematográficu. Rendueles ye un John Wayne o un Chartlon Heston, un escritor duru, “gochón” delles vegaes –los sos cuentos eróticos son de lo más marrano, pero escelentes-, con un puntu crueldá en bien d’ocasiones. Esther García ye más a lo Audrey Hepbourn, elegante y cálida, capaz de faer d’un múxaru un poema

José Luis Rendueles ye piedra y restallu. Esther García ye herba ya orpín. José Luis Rendueles ye l’Asturies dura, industrial ya obrera. Esther García ye l’Asturies sele, agraria y campesina. Los dos xuntos son l’ánima d’una tierra, la coral del país nel que nacieran.

4 comentarios:

  1. Un, pa mi, bon plantegamientu de David Rivas. Una posición igual política, pero de fondu calai intelectual (social y antropolóxica):

    "Los que pensamos q’Asturies ye daqué más qu’un sitiu perguapu onde pasar les vacaciones, aunque “lo diga tol mundiu”, bien que sabemos que los referentes de la tierra, la tierra como madre y sustentu, son d’una importancia vital. Les nueses sociedades, modernes y tecnificaes, marchen siguiendo’l camín marcáu poles ciudades, pero les referencies simbóliques, pol fechu de ser fíos de la revolución neolítica y de les races indoeuropées, siguen siendo rurales".

    ResponderEliminar
  2. A mi lo que me llama l'atención de Rivas ye'l cariñu que-y tien a la variante occidental. Ye de Xixón-Villaviciosa y escribe en central. Nun sé si fala bien esa variante porque nun lu conozo personalmente pero ye único nesti mundu asturianista. De verdá que me prestaria saber como ye eso.

    ResponderEliminar
  3. Ye una cosa curiosa qu'a naide-y importen estes discusiones lliteraries. Siendo como ye'l nuesu nacionalismu, rexonalismu, asturianismu, tan cargáu de llingua y lliteratura, ye cosa rara. A mi paezme mui interesante lo que David Rivas fala de les "discontinuidaes". Seguramente que, como economista críticu que ye, ta mui avezáu a alfrentase a estes coses, a les escueles. Da unos cuantos nomes, mui significativos. Y ye verdá que puede tener razón nesos saltos qu'aprecia. Déxolo equí porque paez qu'esta entrada de Rivas nun tien munchu ésitu, pero paezme de lo meyor, intuitivo seguramente porque Rivas nun ye un críticu lliterariu nin va d'ello. Pero la verdá ye que tien bona capacidá de crítica lliteraria.

    ResponderEliminar
  4. Asina a vote pronto estos son dellos de los nomes qu’aporto a la lliteratura asturiana , l'occidente asturianu , eso que dellos llamen Pesicia :
    Xuan Bello , Antón Garcia , Sabela Fernández , Miguel Rojo , Fonsu Velazquez ,Tino’l Rufo , Garcia Arias , Ana Cano, Pin Alvarez , Roberto Quevedo , Elias Veiga , Chimo y Neto Garcia del Castillo , Celso Peyroux , Basilio Garrido ,Xose Maria Rodríguez , Manuel Menendez ………..

    Por riba toos estos por historia o por calidá de la so obra :
    Fernán Coronas , Eva gonzalez Xosé Maria Florez y Nené Losada .

    Nun ta mal pa una tierra na que deben quedar inda unos 30.000 falantes patrimoniales y cuasi monollingües .

    Pésicu del Cuartu Los Val.les.

    ResponderEliminar

Nota: solo los miembros de este blog pueden publicar comentarios.