Los conceptos de Valledor y la unidá nacional

Álvaro Flórez Estrada
Lleí con muncha atención la entrevista qu’Aruelu-y fixera a García Valledor. Lo primero que me paeció chocante ye la escesiva concisión nes rimpuestes. Igual ye verdá –dícenmelo los amigos- que yo teo’l defectu de falar muncho, cosa seguramente tamién que criticable, pero qu’un políticu que tuvo responsabilidaes de gobiernu y qu’agora suena pa una alternativa asturiana diga tan poco ye, cuando menos, raro. Tal paez que nun-y presta muncho dicir coses que, a lo meyor, lu dexen condicionáu mañana o pasao.

Seya como sía, de les sos declaraciones –les primeres al rodiu d’esti tema- pueden sacase dalgunes conclusiones. Quéxase Valledor de que nel nacionalismu hai desconfianza abondo. Ya ye verdá. Tien muncha razón. Pero cola autoridá que me da’l ser l’únicu nacionalista non cercanu a Izquierda Unida que dixo públicamente qu’igual elli podía ser una solución y, polo tanto, nada sospechosu de desconfianza o “purismu”, dígo-y agora que coles sos declaraciones alienda la desconfianza haza la so persona.

Diz Valledor que’l conceptu de “nación” pertenez al ámbitu de la “subxetividá collectivo”. Afirma qu’una nación namás esiste cuando una mayoría social lo considera asina y que, polo tanto, Asturies nun ye una nación porque nun hai esa subxetividá collectivo pente los asturianos d’anguaño. La verdá ye que nun esperaba tantu idealismu nun profesor afitáu nel materialismu marxista, por mui heterodoxu que seya. Cuando lleí eses pallabres pensé: “coñu, David, equí paez que’l marxista yes tu”.

Igual esa conceptualización de “nación” ye una herencia d’un idealismu hegelianu un tanto “joseantonianu” mui estendíu na Universidá d’Uviéu, aú s’educara García Valledor, onde’l “pieslle categorial” fora consacráu al altor del estructuralismu formal y del estructuralismu fenomenolóxicu nos años setenta, precisamente cuando elli estudiara filosofía.

Pero ye que tamién diz Valledor que nun tien como esencial “la conceptualización” d’Asturies como nación. Paez una declaración inocua pero nun lo ye porque primero sí conceptualizó la nación como perteneciente al ámbitu de la “subxetividá collectivo”. Si ye capaz de conceptualizar la nación, anque namás seya como subxetividá collectivo y más lluéu diz que pa elli nun ye esencial conceptualizar la nacionalidá asturiana, eso significa que poco-y importa Asturies como realidá conceptualizable.

Tamos escontra una persona que representa una posición clara, la de los que nun-yos importa qué ye Asturies. Rexón, país, nación, da lo mesmo, porque lo importante ye otra cosa. Paralelamente sí define perfechamente coses que pa min, igual porque soi más torpón o porque vengo d’otres escueles ideolóxiques, ye mui difícile de pescanciar. Porque conceptos como “altermundismu”, o “esquierdismu”, o “feminismu”, etcétera, son pa min más complicaos que’l conceptu de “nación”.

Y la cosa complícase entá más cuando pa Valledor ye perimportante ya imprescindible lluchar por caltener “la nuesa cultura material ya inmaterial”. Pero resulta que si Asturies tien una cultura específico material ya inmaterial too paez indicar que tamos escontra ellementos obxetivos de nacionalidá. Si Asturies tien ellementos culturales propios y estremables de los de Castiella, Galicia, Inglaterra o Eslovaquia ye que “obxetivamente” ye una realidá distinta. ¿Pero nun quedábamos en que una nación namás podía definise como una categoría de “subxetividá collectivo”?.

Termina García Valledor afirmando que’l proyectu a poner en marcha nun puede “quedase nun proyectu unitariu del nacionalismu”. Diz qu’hai que ser internacionalista, feminista, altermundista, ecoloxista, antineolliberal, antiimperialista ya’l llargu etcétera que toos sabemos. Ya yo toi d’alcuerdu. Nun cabe un proyectu neolliberal, nin machista, nin depredador. Pero cuando Valledor diz esto pon enriba la mesa les sos prioridaes. Nunca un ecoloxista diría que’l so proyectu nun puede quedase namás que no ecolóxico, nunca una feminista diría que’l so proyectu nun puede quedase namás que no femenino. Pero esi ecoloxista ya esa feminista defínense como “ecoloxista” y como “feminista”, ensin necesidá de dicir que son tamién otres coses porque se definen en función de la so prioridá. Ta perclaro: García Valledor ye cuasi tóo menos nacionalista. Eso nun ye nin malo nin bono. Ye, cenciellamente, lo que ye.

Pesie a too lo dicho, sigo pensando que García Valledor ye un bon ellementu pa una opción asturiana. Pero sigo pensándolo porque creyo que l’alternativa pasa por una gran xenerosidá pola parte de los nacionalistes, que tienen que llamar a conceyu a xente que nun lo ye pero que tienen munches coses que dicir pa sacar a esta nación –subxetiva ya obxetiva- del foyeru nel que ta enartada. Ye necesario facer patente lo meyor del patriotismu, por muncho que-ys cafie esta pallabra a dalgunos que tan anclaos na Segunda Internacional. Hai de facer país pente toos, volver a llamar a andecha a tolos vecinos d’esti conceyu tan pequeñu que ye Asturies. A Pelayo nun-y sobró naide pa resistir. A Flórez Estrada tampoco. A Belarmino Tomás tampoco. Un rei, un lliberal ya un socialista entendieron l’asuntu. ¿Nun vamos ser capaces d’entendelo nosotros, xente del XXI?. Equí cabe muncho xente y Valledor tamién, inclusive no alto d’una hipotética llista ellectoral. Pero caún ye caún y la patria única. Ye hora, cenciellamente, de cumplir col deber.

Comentarios

  1. Asina, Rivas, con dos güevos. Namás. Xalú.

    ResponderEliminar
  2. Bon artículu David, pero, ai, cuántu camín ente'l nuestru Flórez Estrada y el socialconversu Valledor. El primeru sabía del país y pensaba nes xeneraciones siguientes. El segundu nun sabe mui bien ónde ta'l so país y piensa nes elecciones siguientes. Pelayo y Tomás pa unos y otros anden mitificaos na irrealidá política y, los mitos, mitos son.
    Despídome alcordándome del Borges que dixere "Hai comunistes que sostienen que ser anticomunista ye ser fascista. Esto ye tan incomprensible como dicir que nun ser católicu ye ser mormón". Y d'esto se trata que non d'otra cosa.

    ResponderEliminar
  3. Lo tuyu David ya nun tien nome. Dices que yes l'únicu nacionalista non-cercanu a IU que dixiste que Valledor podría ser una solución pa nós. ¿A casu UNA ye daqué cercanu a IU? ¿a casu tantos nacionalistes qu'anguaño nun tienen militancia política y que piensen que Valledor ye un valor políticu pa nós tan baxo sospecha de tener el carné d'IU escondíu? YA TA BIEN HOME, YA TA BIEN! Tamos fartos yá de teoríes conspiranoiques y tolo que deriva d'elles.

    Per otru llau, ¿qué nación esiste ensín la concenxa colectiva de la so ciudadanía de ser cosa tala? Podemos tar d'alcuerdu o non colo que diz Valledor de nación pero ¿ye daqué nuevu esi argumentu? ¿ye dalgo que nun se sepa? Llueu busques-y el quintu pie al gatu confrontando les razones oxetives y soxetives pa definir que ye una nación ¡pero ye que la nación ye la suma de toes elles! Pa mi ta bien nidiu qu'a Asturies falta-y una blime pa se una nación plena, y ye la concenxa colectiva de selo, y ello ye la xera de la construición nacional que tenemos per delantre los nacionalistes, si ye que los que tenéis na habitación de los trastos de casa una máquina de facer carnés nacionalistes nos dexáis consideranos como talos.

    ResponderEliminar
  4. El nacionalismu asturianu nun pue ser un ingrediente más nuna carrapotada d'ellos de toa frasca y condición. Porque'l nacionalismu asturianu o ye'l gran vientre au viven otros conceptos (económicos, feministes, ecolóxicos, etc) o nun ye nacionalismu. El conceptu de poner de pies y salvar d'una desapaición inminente d'Asturies énte'l peligru palpable de convertise nuna provincia castellana más bañada pel cantábricu ye prioritario dafechu. Nun ye una reivindicación más. Non. Ye "la reivindicación". Lo demás lleva a los pactos de la izquierda plural, les cases comunes y tola demás recatafila que yá perconocemos y que, dende'l puntu de la reconstrucción nacional asturiana. nun valen. Simplemente, nun valen, porque tenemos esperiencies a esgaya que lo demuestren. Nos últimos tiempos ta faciéndose un ataque en toa regla al nacionalismu asturianu. Dende los que dicen que ye una ideoloxía peligrosa, a los que puñen contra'l fechu identitariu, o a los que lu menten como la pastilla d'avecrem nun potaxe pa da-y saborín a otres reivindicaciones perllexítimes ya importantes. Hai que ser arrongates, y si hai xente que s'avera al nacionalismu pa collaborar, tien de tener la puerta abierta, por supuesto. Pero si s'avera pa guialu, pa ser cabezaleru, la cosa cambia del too. Porque l'aldu del nacionalismu asturianu tien de ser, obligatoriamente y ensin dexar un rispiu pa la dulda, xera de los nacionalistes asturianos.

    ResponderEliminar
  5. Creo qu'hai qu'entender les coses nel so contestu. David nun fue l'únicu nacionalista non cercanu a IU que dixo esto, claro ta. Pero nun mos agarremos a la pallabra concreta sinon a lo que quier dicir, que ye fácil entendelo. Puede que tenga un puntín egocéntricu pero eso ye consustancial a los profesores, los escritores, los intelectuales. Pero los que lu conocemos (y la mayoría d'esti blogue seguro que lu conoz) sabemos que ye tremendamente cooperativu. Polo de Valledor supongo que diz lo que diz pa matizar toles prevenciones sobro la xunidá que vien esplicando desde hai tiempu. Dixo que nun-y prestaba Valledor encabezando una opción y sigue diciendo lo mesmo. Los que siguimos esti blogue sabemos que tien un pensamientu complexu, por suerte pa el y pa nos, y hai que lleer les coses como dalgo conxunto y nun aplaudir o criticar una frase concreta. Anque seya brillante o desgraciada.

    ResponderEliminar
  6. Soi l'anónimu críticu d'enantes.

    En rimpuesta al anónimu de la quinta intervención, dicir que ye precisamente polo que David Rivas lleva escrito n'otros articulos polo qu'indigna más tovía eso de los nacionalistes averaos a IU. Nun ye nada nuevu nél, sicasi otres vegaes intentó ser más sutil que nesta.

    Y pa lo que diz el Xanu del Caborniu. Entiendo'l to argumentu pero yo digote non. Lo que queréis dalgunos ye una xuntanza onde'l nacionalismu s'afite nel centru-derecha, una xuntanza con elementos non-nacionalistes ya inclusu non-asturianistes como ye URAS. Y pela mio parte a esa xuntanza digo non, porque la que quiero ye la xunión de la izquierda, y nesta cosa coincido contigo, onde'l nacionalismu acapare tol marcu d'acción d'una organización d'izquierdes, y quiero que nesa organización tengan abellugu xente asturianista, que nun necesariamente seya nacionalista pero que si conciba que les prioridaes d'Asturies anguaño son les que dende'l nacionalismu d'izquierda creemos. Y les prioridaes güei son, ente munches otres, caltenimientu del bientar social, descensu del paru, llingua, autogobiernu, defensa énte los ataques mediuambiantales qu'anguaño sufre Asturies... y en toes estes coincidimos con xente como Valledor y otra que pueda vinir d'IU y otros sectores. Asina ye lo que pienso yo y creo nun m'equivocar al dicir que tamién la inmensa mayoría de los nacionalistes d'izquierda, si ye que, repito, nos dexáis consideranos como talos.

    ResponderEliminar
  7. Si siguimos discutiendo vamos acabar por entendenos. Pero voi dicite una cosa. Cuando Rivas puso en cuarentena la salida del Bloque del gobiernu o defendió una xuntanza "desde URAS a Andecha" los que pensais asina criticásteis el so "nacionalismu drechista y interclasista". Agora que diz que ve bien la presencia de Valledor nuna "hipotética llista" criticáis una frase, igual desafortunada, pero que nun significa gran cosa. Pero si mañana diz que-y presta'l Bloque diréis que pactó con Palacios pa tener un cargu. Y si participa n'Arribada ye porque ye amigu d'un puntu del PP. Nun digo qu'esta seya la to postura, amigu, pero esa ye la llínia que munchos siguen. Yo nun toi d'alcuerdu con tolo que David escribe. Discrepo incluso de coses d'esti artículu d'agora. Pero paezme de fatos discutir una frase nun artículu de gran calao políticu y ideolóxicu. Un saludu candial, de verdá.

    ResponderEliminar
  8. Yo considero fundamental algamar un frente ampliu con envís d'entrar na Xunta Xeneral, que lo considero tamién una prioridá. Ello nun cuento que lo vayan llograr por separao nin los nacionalistes d'izquierda nin los interclasistes. D'otru llau, pienso qu'habría que dexar nidio y ensin llugar a nenguna dulda que nun se van repitir cases comunes, nin izquierdes plurales, nin pactos de gobiernu col réximen. Yo, nun ve valen un res y yá refalfié d'eso nestes dos últimes llexislatures. Y reitero qu'hai que ser arrogante dexando participar de los proyectos a la xente que quiera facelo, pero que'l timón nacionalista enxamás pue dexase en manes de xente que nun se considera como talo.

    ResponderEliminar
  9. Soi l'anónimu críticu.

    Sobre del Xanu del Caborniu ya ta too dicho, los dos espusimos les nueses postures.

    Pal otru anónimu. Nun me seyas falaz y ramplón. Una cosa ye'l debate y otra que pa retrucame me baxes al nivel de la magaya forera. Toi retrucando argumentos, non pijadines de que si ye amigu d'un del PP o payasaes del ataque pol ataque que tantu presten nos foros de los que de xuru tu participes infinitamente más que yo.

    ResponderEliminar
  10. Perdón. Nun pretendía rebaxate a la mierda forera, de verdá. Lo que te dicía ye que munches vegaes les crítiques son "ad hominem", faense sigún quién ye l'opinante. Nin tan siquiera dixe que fuera'l to casu. Si m'espliqué mal pídote disculpes. Pero una cosa sí ye verdá: pàicístime mui agresivu. Pero pue ser cosa de que nun escribimos como falamos. Un saludu.

    ResponderEliminar
  11. Yo camiento que colo qu'hai que quedase del testu ye col últimu párrafu.
    Si se va entarmar un preyectu ampliu nacionalista-asturianista nel que quepan persones del perfil políticu de Valledor, ehí nun puen faltar tampoco persones como David. Asína que digoilo direutamente a él, David nun se si ties pensao toranar a la política, pero deberíes facelo, creo que ye un momentu perimportante.

    ResponderEliminar
  12. Hai xente a la que-y presta mas dir a arregla-yos la vida al Pueblu Mapuche qu'a los vecinos de Cualloto , asina viaxen , ven mundo y paez que faen daqué polos que tienen menos qu'ellos y siéntense como dios (ye lo que tien ser creyente)

    ResponderEliminar
  13. Anónimu críticu :

    1/ caltenimientu del bientar social , ¿Cuál bientar el que tenemos agora? Nun me faigas rir fai'l favor , con una llei de dependencia que nun furrula porque nun hai un chapu?

    2/ descensu del paru, ¿Qué vais facer pa baxar el paru? Les politiquies que fizo FSA/IU/BXA nel Conceyu Xixón por exemplu? si ye asina tamos guapos.

    3/ llingua, autogobiernu, paezte que fizo poco'l gobiernu actual Nestos 7 años? Oficines de la llingua a mamplén , espedientes toponímicos en cuarenta y pico Conceyos que na realidá nun utilicen . ¿Autogobiernu? Como'l que tenemos agora o daqué mas ambicioso? Y bla y bla y bla bla bla bla bla bla .

    Ser nacionalista ye tener un proyectu de nación , tener el derechu a decidir cómo y ónde queremos tar como pueblu y como nación .Hai munchos ciudadanos asturianos . pa los que Asturies ye un llugar onde vivir ensin mas . Pa otros ye una rexón o una Comunidá dientro d’una nación llamada España . Pa mi como nacionalista asturianu Asturies ye una vieya nación d’Europa y naguo y suaño porque nun futuru vuelva a ser una moderna nación europea , pa ello quiero trabayar anque yo nun lo llegue a ver . Pa esta xera hai que facer andecha y yo toi dispuestu a facela con Valledor ,Xuan Xose , Rivas, Llope , Zapico , Colunga , Palacios y hasta contigo si ye que quies …… con tou aquel qu'asuma qu'hai que refacer un país y qu'esa xera ye prioritaria . Pa los que tengan otros petites y otres prioridades , pues que-yos vaiga bien .
    Xanu ´l Caborniu suscribo lo que dices b por c .

    Puxa Asturies Soberana

    Churchill

    ResponderEliminar
  14. Conclusión: equí nun sobra naide....eso ye pragmatismu a la catalana, o a la escocesa....

    hasta Otegi,el presu políticu de Batasuna del que ningún "purista" de los que abunden equí dirá que nun ye nacionalista abondo, faló ayeri nesa llínia, falando de la contraposición ente el lendakari vascu López y los socialistes catalanes...

    asina que a ver si dexamos de enredar con "etiquetes" o "clichés"...

    ResponderEliminar
  15. Xuan González Fernández19 de octubre de 2010, 0:30

    Yo creo que dalgún díi tará bastante mal vistu el escribir nel interné ensin firmar. Eso de los nicks o de llamase anonimu a seques y entar y poner comentarios ensin firmar, paezme un poco falta de respetu, y pedonaime toos si meto la pata diciento esto, pero paezme que pa tener una discusión seria hay de poner les cartes enriba la mesa, y nun dicir namai les opiniones, si non tamien QUIEN YE EL QUE OPINA.
    David Rivas siempre firma los sos comentarios y da la cara. Toos deberiemos facer lo mesmo y dexar d'escondenos detras de personalidaes inesistentes. Asina podríemos algamar llugares comunes nos que toos pudieremos entendenos. Si non, ye too una mentira y una discusión tipu foro del MARCA.

    ResponderEliminar
  16. Este comentario ha sido eliminado por el autor.

    ResponderEliminar
  17. El "autor" del comentariu anterior fui yo, que metí un comentariu y dempués nun me paeció afayadizu y borrélu. Disculpes.

    ResponderEliminar
  18. Dempués de la entrada de Xuan González Fernández casi me da vergüenza mantener el mio nome de combate. Creo que tien razón. Los que seguís esti blogue conoceis el mio perfil y sabeis que quiero muncho a David, amigu del mio padre dende neños.

    Lo que quiero comentar ye que me paez idiota lo del "anónimu críticu" que basa too nuna frase. Pero ye que l'artículu de David ye fonderu ideolóxicamente. Yo soi una nacionalista reciente (gracies a David, tengo que dicilo) y nun tengo mui claro lo de la oxetividá y la suxetividá. Soi bióloga y poco sé d'eses coses. Pero dígovos una cosa: si David Rivas piensa asina (lo de la unidá) ye porque lo pensó muncho. Ye un nacionalista duru. Si piensa que Valledor u otros valen pa tirar palantre ye porque lo pensó muncho y lo tien claro.

    ResponderEliminar
  19. Churchill, el bla, bla, bla pa ti too compañerín. Si pienses qu'a la sociedá asturiana pa convencela hai que presenta-y un programa políticu únicamente nacionalista de defensa nacional d'Asturies deberíes de ser consciente de la ostia que dibes date, más que nada por que son les mesmes osties que llevamos pegandonos toos. Dices testualmente que "pa esta xera hai que facer andecha y yo toi dispuestu a facela con Valledor ,Xuan Xose , Rivas, Llope , Zapico , Colunga , Palacios y hasta contigo si ye que quies …" parezme a mi que t'equivoques muncho nesa afirmación y ye que Valledor, Llope, Zapico, Colunga, tamién David Rivas, yo mesmo dende esti anonímatu... creo que tamos por ello, Xuan Xosé y xente como tú ta claro que non, que solo queréis que la izquierda comulgue col programa políticu del centru-derecha col argumentu de que la nación ta perenriba de too, hasta de los sos propios ciudadanos talo parez dacuando al lleevos.

    Y pa Vampirella. Fice un par d'apuntes no que non coincido y que me parez faltón pa con muncha xente. Lo que nun val ye caltener el mensaxe de que munchos, Rivas vieno a dicir tolos que quieren que Valledor tea ehí menos él, son/somos cercanos a IU. Y lo tampoco val ye tar poniendo "peros" a cualisquier movimientu que se fai, cuando a la par se ta calteniendo que munchos nel nacionalismu d'izquierda son/somos averaos a IU, por que al final por más que se quiera facer d'un mou constructivo solo val pa entamar a semar dubies nun momentu, nel que como el propiu Rivas diz, fai falta muncha xenerosidá. O si non col tiempu lo veremos.

    Ta bien ser escépticos, yo mesmo entiendo l'escepticismu que la figura de Valledor crea en munchos nacionalistes, pero ye hora de repensar lo que decimos/escribimos enantes de facelu. Ye la mio opinión.

    ResponderEliminar
  20. Hablo asturiano habitualmente pero me cuesta mucho escribirlo. Pido disculpas por ello a los paricipantes de este blog, mayoritariamente "asturfalantes". No quiero ser insultante pero el tal "anónimo crítico" es un perfecto imbécil. Imbécil etimológicamente (que lo mire en un diccionario). Cuando una persona como David Rivas hace un comentario es criticable, defendible, aplaudible, censurable, lo que sea, pero nunca con lo de "lo tuyo David Rivas no tiene nombre". Esta frase define a este anónimo imbécil que desconoce lo que es la lealtad y el patriotismo. Yo discrepo bastante de Rivas pero sigo lo que escribe porque es de lo poco presentable en el asturianismo. Si los asturianistas/nacionalistas fuweran inteligentes, mejor mirarían para este profesor que jodió buena parte de su carrera por mantenerse fiel a su país.

    ResponderEliminar
  21. Intervengo por última vez, pero ye qu'hai lleer coses que dexen a ún, como dicía Tiadoru Cuesta:"pensatible, plasmáu, silenciosu...". Vamos a ver, hom: si un partíu políticu NACIONALISTA ASTURIANU nun presenta un programa políticu de DEFENSA NACIONAL D'ASTURIES... ¿qué presenta entós?, ¿un capeonatu de petanca?, ¿un amagüestu?, ¿un campeonatu de tiru con gomeru?. ¡¡Pues claro qu'un partíu nacionalista tien que presentar un programa de defensa nacional del país!!. Defensa del texíu productivu, ecolóxica, educativa, sanitaria, del autogobiernu, de la cultura, de la llingua... defensa DEL PAÍS en tola so bayura y complexidá.

    ResponderEliminar
  22. Anónimu críticu: nun entiendo tanto cabreo. Vamos aselar. David diz lo que diz, nin más nin menos. Gustarate o non, eso ye normal. Pero centrar l'alderique no que tu lo centres nun ye razonable. Val, David, pídi perdón por insinuar que hai nacionalistres cercanos a IU. Y agora va David y pide perdón. ¿Yá dexa d'haber "nacionalistes" cercanos a IU?. Yo soi nueva nestos asuntos y sí creo que la metada, polo menos, de los que se llamen nacionalistes son xente d'IU o comunistes, cosa que nun ta mal pero que ye otra cosa. Agora, lo que más me llama l'atención ye que l'artículu de David pase desapercibíu y que tol debate seya esti. Ehí ganaste, anónimu críticu. Conseguiste centrar l'alderique en dalgo anecdótico. Ficiste un bon serviciu. Lo que nun sé ye a uién.

    ResponderEliminar
  23. Una cosa qu'escaecí. Como soi nueva nestes coses tiendo a minusvalorar too. Pa eso soi guay. Pero eso nun ye verdá. A mi daprendiéronme a valorar a los mayores, a los que llucharon cuando los tiempos yeran malos. Por eso almiro a Sánchez Vicente, a Marcos Abel Fernández, a Faustino Zapico, a Carlos Rubiera. Agora pienso coses distintes d'ellos y dalgunos nun me gusten nada. Pero taben ehí cuando naide taba. Ya ehí taba David. ¿Qué me va contar un anónimu de la rede?

    ResponderEliminar
  24. Xanu del Caborniu, lleime bien ho, falo del erru que sedría un programa UNICAMENTE en clave nacional, non que l'erru sedría un programa en clave nacional ¿atalantes la diferencia? Yo creo que ta bien clara. Entender les coses a medies ye lo mesmo que nun les entender.

    A Alfredo Costales nun-y retruco ¿pa qué? Ya que se pon a insultar pues la pesetina o'l centimín, como prefiera, pa él.

    Y sobre lo que diz Vampirella. Yo nun pretendía desviar l'atención de nada. Simplemente lleí l'articulu y fice referencia a dos cuestiones nes que taba mui disconforme, lo d'IU y lo del conceutu de nación. Si'l restu la xente siguió dando más bombu al tema nun se me puede responsabilizar a mi. Quicives lo que pase ye que cuando daquién pon discordia hailos que se calecen mui rápidu, a dalgunos sienta-yos mui mal les voces crítiques pa con ellos o pa cola xente que almiren como Rivas, y nun lo digo por ti sinon por otros.

    Pela mio parte tema zarráu.

    ResponderEliminar
  25. Nun pues negar que yes socialcristianu , tu colo de la culpa , el pecau y la penitencia ya lo tienes too solucionao. Que felicidá .

    ResponderEliminar
  26. Xuan González Fernández tienes razón pero solo en parte . Nesti blog esplíquense y confróntense idees non persones .Creo lo importante son les idees que s'esponen con un mínimu de respetu y educación . Sinceramente creo que nesti blog eso se cumple, otra cosa ye saber quien ye quien , pa eso ta'l feisbuk y coses asemeyaes . Yo utilizo'l nomatu de Churchill y respuendo de tolo que firmo con esi nomatu , nun vas alcontrar un insultu ni un llevantu firmáu con esi nomatu . Uso nomatu pa protexeme non pa calumniar nin insultar dende l’anonimatu . David Rivas sabe quien soi y tamién sabe que si el me lo pide yo soi'l primeru que firma con nome ,apellíu y nomatu tamién nun tengo nada de que m’avergoñar.
    Churchill

    ResponderEliminar
  27. Mas Xuan :
    Lo que nun quiero ye que me pase como al mio bon amigu Xune Elipe al que trataron como a un perru y del que dicíen auténtiques barbaridaes que daben ganes de llorar de rabia . Xune que colos sos errores y aciertos lleva trabayando mas de trenta años faciendo país . Bueno un exemplu ridículu foi un que llego a llamalu charnegu pol so apellíu Elipe (nun sabiendo qu'anque escosu ye apellíu asturianu netu , esto non lo digo yo , dizlo Arias que daqué sabrá ) . Bueno pues eso que nun quiero andar peles llamargues d’internet que toos sabemos cuáles son . Yo nesti blog nun veo esi ambiente faltón y bilordieru y si veo abondo respeto y debate . Yo creo que David conoz a tolos qu'usamos nomatu y entramos d’avezo y nun diba consentir faltes de respetu .
    Por cierto Xuan ¿Cuála ye la to opinión so'l tema del articulo? Olvídosete cuntanos-la

    Un abrazu pa toos Churchill

    PD Nun quiero repetime asina que soscribo b por c lo que diz el Xanu y si eso ye ser de centro-Derecha , pues bueno que-y vamos facer .... como dicía Dixebra nun cantar si esto que nos gobierna ye socialismu que venga l'anarquía pero que venga rápido jajaja

    ResponderEliminar
  28. Anónimu diferente20 de octubre de 2010, 2:37

    Pa toes les persones intervinientes:

    ¿Daquién dió en que bona parte de los discutinios primarios (quién ye y quién nun ye nacionalista) y consiguientemente los derivaos (alliances, eleiciones, candidatos, proyeutu de país, etc.) parten de l'abstracción o escaecimientu de definir qué entendemos por nacionalismu, cuanto más de que nun esiste una única definición del mesmu? Si nun empecipiamos pel entamu, tolos alderiques van viciaos. Convídovos a definir lo que caún entiende por nacionalismu, por exemplu.

    ResponderEliminar
  29. IDEOLOXÍA que tien por pegoyos la defensa de la identidá nacional, el principiu de soberanía nacional y l'iguar les condiciones necesaries p'afitar un Estáu propiu pa la Nación. Vamos, la defensa de los intereses d'Asturies, en toles estayes. Y pongo en grande que ye una ideoloxía, en contra de lo que diz gran parte de la izquierda "nacionalista", que diz que'l nacionalismu nun ye nenguna ideoloxía, y que namái que ye un mediu.
    Ye de destacar tamién ye la presencia a embute de xente comunista y antisistema en xeneral que garra la bandera'l nacionalismu asturianu ensin ser nacionalistes. Pero eso yá ye otru tema.

    ResponderEliminar
  30. Hai tantes concepciones de "nacionalismu" como ideólogos nacionalistes y antinacionalistes hai o hebo. Cuando pasa eso y se quier establecer una discusión científica o académica o, cuando menos, positiva (de "positivismo", non de "cosa bona", porque ye mui habitual agarrase a una pallabra), búscase la más cenciella, aquella que tolos intervenientes almiten como basa pa discutir. Y la definición del anterior interviniente cumple esa condición. ¡Claro que ye una ideoloxía definible positivamente, por muncho que tea atravesada por custiones sentimentales o emocionales!. Amás ye una idea "totalizante" (por eso cuerre'l riesgu de disviase a "totalitaria", como bien sabemos los nacionalistes que nun queremos caer nesa posición). Nun ye un mediu pa la revolución socialista nin pa la lliberación de les clases oprimides, anque hai ya hebo nacionalismos que sí cumplieron también con esi papel. Les revoluciones cubana, arxelina, vietnamita, por exemplu, podrán ser discutibles na so vertienmte socialista o comunista, pero nun hai duldia denguna de que yeran nacionalistes. Llueu más sero derivaron haza llugares estremaos, pero dengún interveniente activu nesos procesos duldia de cuála ye la so patria. El glayíu de "patria o muerte" nun ye de la Internacional precisamente, sinon de la herencia del nacionalismu decimonónicu européu.

    ResponderEliminar
  31. Xuan González Fernández20 de octubre de 2010, 14:12

    Yo opino lo mesmo que David: equi nun sobra naide. Y nun sobra naide que trabaye p'Asturies y lo demuestre. Ya valió d mirar les sigles y el pasau de la xente. Los nacionalistes asturianos tamos, creo, cansaos de tantos partíos diferentes y de tantes lluches internes. La unidá del nacionalismu ye agora mas importante que nunca, tamos en puertes de les votaciones pa la Xunta Xeneral mas inciertes. La xente non nacionalista (los nacionalistes ya lo tabemos) ta cansao de les promeses y chiringuitos del PSOE, de les fataes y lluches internes del PP y del servilismu pa con PSOE d'IU. Ye agora, en metá la cris, cuando una opción seria y que presente alternatives nueves pué algamar dellos representantes na Xunta, o siquiera ún, que ye'l primer pasu pa llueu lluchar pol pais, y pa ello tien que presentase a la sociedá asturiana un partíu y un programa fuerte y una opción seria.
    Un programa preocupau pol paru y por buscar salides economiques pa los prosimos años a problemes gordisimos como'l futuru peslle de les mines nel 2014 o l'abandonu del campu asturianu por poner un exemplu, pa buscar el votu de los non nacionaliegos, y un partíu XUNITARIU y con xente capaz y esmolecíos pola cultura y la llingua pa convencer a los asturianistes de tola vida.
    Un exemplu claru: na paxina web del Comercio, dempues del debate pol estau de la "region", apaeció una encuesta pa los lletores sobro "¿quien ganó'l debate?" cuando'l resultau de la encuesta diba pol 80 y picu por cientu a favor del Bloque la encuesta "desapaeció" de la paxina web del periodicu... ¿acaso ye que'l 80 por cientu de la xente que llee'l Comercio ye del Bloque? ¿o ye que la xente del Bloque entró a votar a lo lloco? pa mi que non, pa mi que la xente ta cansao de PSOE, PP ya IU y munchos de los que tengan pensao votar, van facelo pensando en castigar a los mayoritarios. El nacionalismu tien que aprovechase d'ello pa entrar na Xunta y dende dientro lluchar pol futuru del Pais y poner pegollos pa siguir dientro lo que ye'l parlamentu Asturianu nun futuru.

    ResponderEliminar
  32. IDEOLOXÍA que tien por pegoyos la defensa de la identidá nacional, el principiu de soberanía nacional y l'iguar les condiciones necesaries p'afitar un Estáu propiu pa la Nación. (Anónimo).

    ¡Claro que ye una ideoloxía definible positivamente, por muncho que tea atravesada por custiones sentimentales o emocionales!. (...)Nun ye un mediu (el nacionalismu) pa la revolución socialista nin pa la lliberación de les clases oprimides, anque hai ya hebo nacionalismos que sí cumplieron también con esi papel. (David M. Rivas)

    Ehí ta'l megollu la cuestión: ¿cuántos que se definen como nacionalistes asturianos tán d'alcuerdu colo anterior?. Polo que lleo y escucho nun tengo claro'l númberu...

    (Perdón por entrar otra vez, pero solliñar esos dos fragmentos paezme mui, pero que mui importante).

    ResponderEliminar
  33. Llámame muncho l'atención la evolución nos últimos meses de tres de los cinco o sies sitios nos que suelo entrar. David M. Rivas, Carlos X. Blanco y Xanu'l Caborniu tan faciendo un llabor perbono na clarificación de les propuestes. Tan dando a los que somos nacionalistes razones y argumentos pa resistir tantu ataque dende xente que solo lo aparenta. Dende fuera de los partíos amás. Lleguen a un mesmu sitiu saliendo de sitios diferentes, polo menos Carlos y David. Nun llego a pesacancialo too pero creo que tan aportando coses granibles pal debate. Esa ye una bona noticia pà toos nosotros.

    ResponderEliminar
  34. Una última cosa. Nun incidí nello enantes pa nun disviar la discusión que, por cierto, fora, a lo menos pa mín, mui ilustrativa. Lo que nun quixe remachar ye que nunca dixe nin quixe dicir que Valledor tinía de ser el númberu unu d'una llista. Namás falé de que toviere "nun llugar altu". Sigo pensando, como despliqué n'otres ocasiones, qu'hai persones más afayaíces, ensín entrar en valores personales, namái adicando pa la so posición político-ideolóxica.

    ResponderEliminar
  35. Depués que Valledor me llamara, apocayá, per aciu del Facebook, "nazi-facha",por defender una unidá nacional, relleí esti artículu tuyu y veo que teníes más razón qu´un santu.

    ResponderEliminar

Publicar un comentario