Valdediós: un momentu emocionante

Nes vicisitudes más dures de la vida hai intres nes que la muncha humanidá que ta embaxo unos homes mui deshumanizaos risca como un sol de xunu. Son esos momentos nos que la emoción ye incontenible. Esti que se vivió en Villaviciosa hai unos años ye ún d’ellos. Ye daqué peremocionante, tanto que yo mesmu, que nun taba presente, tal me paez que lo taba.

Habrá d’esto unos cinco años, si ye que la cabeza nun me falla, ún de los grupos de l’Asociación de Recuperación de la Memoria Histórica consiguió, por fin y dempués de muncho pelear, abrir los fuexos de Valdediós. Una de les persones que taba trabayando nestes xeres y que lo sigue faciendo ye Pedro García Bilbao, profesor de socioloxía, gallegu allugáu n’alcarreña Guadalaxara y amigu dende va una montonera d’años. Fue Pedro quien me falara del sucesu.

La historia de Valdediós ye una de les más espantibles de la represión faxista n’Asturies. Nesta valle maliaya atroparon los responsables del Conseyu Soberanu a los internos del hospital psiquiátricu, el “frenopáticu” como yera normal dicir n’aquelles dómines. La vida n’aquel improvisáu sanatoriu yera tolo normal que pue ser la vida en medio una guerra hasta qu’aportaran los carlistes navarros del, creyo recordame, batallón Arapiles 7. Yeren, dicíen ellos, los soldaos de Cristo, coles sos banderes blanques y l’aspa de San Andrés.

Nun ta mui claro como fora la cosa pero’l casu fo qu’una nueche acabó col afusilamientu de les enfermeres, un mélicu, un par de celadores y dos neñes menores d’edá, hasta sumar la friolera de catorce persones. Cuntóse siempres que tóo fo la fin d’una folixa onde los carlistes bebieron a fartafarta, qu’obligaron a les muyeres a baillar y qu’hebo episodios de violación más o menos abondosos. Esti últimu estremu ta puestu en duldia polos historiadores pero’l socedíu marcó tanto a los paisanos de la rodolada qu’entá güei cualisquier home o muyer de más de cincuenta años va cuntamos esa versión.

Nuna mañanina soleyera pero fría de primavera, a la vera’l conventín, diben camín de la fosa unes vente persones, la mayoría de l’asociación promotora, amás de los técnicos, los forenses ya’l notariu que diben llevantar acta científica y llegal de lo que diben alcontrar. Pero tamién taben ellí unes cuantes persones, muyeres na so mayoría, que taben, como aquel que diz, “de miranda”.

Al pocu tiempu d’entamar cola xera averose al grupu promotor una muyer de pente los setenta y los ochenta años y que viviere na fastera de neña, precisamente cuando’l matancíu. Quería saber si taben nel fuexu los restos d’un neñu de ocho o nueve años, un neñu col qu’ella xugaba nel patiu’l monesteriu y que yera fíu d’una de les enfermeres asesinaes.

Los promotores de l’apertura de la fosa quedaron mui estrañaos porque la sarracina de Valdediós taba mui documentada ya estudiada y nunca se supo de la posible esistencia del cuerpu d’un neñu. Pero la paisana aneciara. Dio’l nome del neñu ya’l de la madre y desplicó que, dempués d’aquella nueche, enxamás lu viera, polo que siempres pensó que tamién fora afusiláu polos navarros. Y ametió que nunca, ensin dexar pasar un día, escaeció a aquel amiguín de la neñeza.

Los responsables del trabayu, delantre la seguridá tan clara de la vieya, entamaron un alderique y a mirar papeles. Al poco una muyer de Xixón que formaba parte l’equipu allegárase a la maliayesa y apertó-y les manes.

“Señora, ¿ve vusté aquel home altu de pelo blanco que tá nel carel del cagüercu?. Esi ye’l neñu pol que vusté entruga. Ta equí pa sacar los restos de la madre”.

La muyer fue pa escontra elli y diose a conocer. Cuando los dos s’abrazaron, dempués de setenta años, surdieron les llárimes de tolos presentes. Inclusive lloro yo, recordándome un momentu que nun viví.

Comentarios

  1. Un abrazo David,
    (muy cierto cuanto dices, has dado luz a un momento hermoso en una historia terrible)
    Pedro

    ResponderEliminar
  2. David , toi viéndote contame la hestoria , la to emoción al contala y les llarimes a piques de salir.

    Gracies David por ser como yes,gracies por ser unu de los nuesos.

    Churchill

    ResponderEliminar
  3. Emocionante de verdá. Amás, como siempre, mui bien cuntao.

    ResponderEliminar
  4. David, en contra de lo que cuasi tóos te dicen, nun vuelvas a la política. Esta ye la to misión ya'l to deber: daprender a la xente. Y si un gobiernu te ofrez (que nun lo va facer) dalgo, dí que sí, ensin preocupate polo que dirá fulanín o menganín. Nun creo que te vaigas vender por perres a estes altures.

    ResponderEliminar
  5. Plas plas plas. Nada mas

    ResponderEliminar
  6. Col to permisu David , quería recomendar a tola xente qu'entra nesti blog , cuatro blog que me paecen mui bonos y de gran calida'l trabayu que nellos se fai (tean en castellán o n'asturiano) y que son :

    ASTURIES IRREDENTA
    BLOG DE BERNARDO BUSTO
    DEGOLANDO
    CUNDISEMEYES
    De xuru la mayoría de vos ya los conocéis , palos que non dici-ys que merecen la pena y que ye meyor "perder el tiempu per estos caleyos" que por otros donde ta estrao d'insultos , babayaes y puxarra.

    Saludos Candiales

    Churchill

    P.D. Habría crease una rede de blog n’asturianu o castellanu rellacionao col país de calidá y donde l’insultu y la babayada nun tuvieren llugar.

    ResponderEliminar
  7. David: prestaríame que publicaras les tos pallabres cuando la llámpara d'oro de Quintes del añu 2008. Nun lo pusiste en ningún sitiu y nun lu tenemos ni siquiera na asociación. Además va gustayos a los que lleen esti blog. Un abrazu. Marcos el de la Mariña.

    ResponderEliminar
  8. Sí la unidá militar que ta implicada na matanza ye'l IV Batallón de Monte Arapiles nº 7, entós perteneciente a la VI Brigada de Navarra ¿a que vien falar de carlistes?

    Esi batallón taba formáu por soldaos regulares. Otra cosa sería un Terciu de Requetes formáu por voluntarios carlistes.

    ResponderEliminar
  9. Paeces enfadáu. David diz, mui modestamente, que "creye recordar" que yera l'Arapiles 7. Nun asegura nada. Y lo importante ye la historia emocionante de dos persones. Lo menos importante ye qué ideoloxía tiníen los asesinos. ¡Qué poco tienen que facer dalgunos! O son xxx xxx xugando a confundir como siempre. Y, por cierto, l'exércitu regular formáu en Navarra taba compuestu por, mayoritariamente, requetés. Carlistes, fíu, carlistes. ¿O yes ún d'esos raros carlistes autoxestionarios, independentistes, socialistes y mil coses más? Desde que los carlistes dexaron de dir a misa tolos díes equí ya nun hai quien entienda nada.

    ResponderEliminar
  10. Meto esti comentariu equí aunque nun seya'l spo sitiu. Güei salió Palacios nel Panorama Regional falando d'un pautu con UNA y con Valledor de cabezaleru. ¿Andaba David Rivas tan confundíu hai un par de semanes?

    ResponderEliminar
  11. Sí la unidá militar que ta implicada na matanza ye'l IV Batallón de Monte Arapiles nº 7, entós perteneciente a la VI Brigada de Navarra, tamos falando de soldaos regulares, soldaos de quintes, nun de voluntarios carlistes. OTRA COSA SERÍA UN TERCIU DE REQUETES...



    La ecuación Brigaes Navarres=carlismu ye más que falsa pos la creación de tales Brigaes al igual que'l Decretu de militarización de les milicies respondía a una maniobra anticarlista de los franquistes, anular políticamente la realidá militar del carlismu, torgando l'autonomía de les sos unidaes militares, nun dexándo-yos formar un cuerpu d'oficiales propiu y entemeciéndoles con militares regulares y falanxistes.



    La primer vegada que dalguién afirmó tal cosa, foi dalguién a quien se negó l'ingresu nes files del carlismu xixonés. Esi dalguién yera'l falanxista Daniel Palacio, el difuntu esposu de l'actual alcaldesa de Xixón, Paz Fernández Felgueroso.

    ResponderEliminar

Publicar un comentario