21.7.10

¿La hora de la esquierda?


Tal paez que les posiciones de los grupos políticos nacionalistes van, pasu ente pasu, afitándose. Ye verdá que les coses pueden camudar un tanto d’equí a unos menses y que, como siempres, tenemos delantre’l test del ocho de setiembre, yá que’l branu vacacional ta entamando. Pero lo cierto ye que nes últimes selmanes vivimos dellos cambeos d’induldiable importancia. Si, pela so banda, el PAS amosó la so perceguera al pautu col nacionalismu d’esquierdes, arremachando la so vocación esclusiva por repetir coalición cola URAS, pela suya’l Bloque por Asturies rompiera’l so alcuerdu gubernamental y paez llamar a una unidá d’acción con UNA y Andecha Astur.

Sacantes un cambéu rumbu na posición de Sánchez Vicente y los suyos, posición sofitada por una declarada vocación de la URAS por nun “contaminase” de nacionalismu, la posibilidá d’una “gran coalición” paez imposible o, como menos, mui poco probable. Los qu’apostaron –apostamos- por esa opción perdieran –perdimos-, a lo que paez, la batalla. La drecha ya’l centru asturianista van facer lo que yá fixeron otres vegaes. Pertrás d’esta decisión –y adicando pa les manifestaciones del presidente’l PAS nes sos columnes de prensa y nel so mesmu blogue- ta la idega de volver lluchar pa ser “terliza”, nel envís de ser necesarios nuna investidura na que tienen decidío dar los sos votos al Partido Popular. Esactamente la mesma política que nel so día aplicó’l BPA que, dende los escaños de la coalición encabezada por Izquierda Unida, apostó dende un entamu por sofitar la investidura d’Álvarez Areces.

Despreciada pol centrodrecha la opción d’una amplia coalición asturiana, yá namái queda la opción de la esquierda. Esta ye la opción pola que más xente apostara dende va tiempu, a lo menos les persones de les que, pola so situación na cadarma social asturianista, meyor conocemos la opinión.

La xebra’l Bloque cola coalición que caltenía con Izquierda Unida y Los Verdes ye, al mio paecer, mui razonable. Les polítiques que’l gobiernu asturianu pretende aplicar como midíes escontra la cris nun son afletables dende postures favorables a les clases más subalternes y, polo tanto, dende un puntu d’agüeye d’esquierdes, son polítiques dafechamente refugables. Trátase de polítiques antisociales que pretenden treslladar el coste la cris capitalista a los que nun la provocaron nin tampoco gociaron del modelu nos tiempos bonancibles.

Pero tampoco hai d’escaecer qu’estes polítiques reaccionaries que se tan aplicando dende’l gobiernu d’Asturies tan compuestes por paquetes de midíes que nun foran decidíos na Xunta Xeneral nin nel mesmu gobiernu d’Areces. A la escontra, ye esta una política anticíclica decidía nes Cortes Generales españoles o nel conseyu ministros de Rodríguez Zapatero. El marxe maniobra que’l gobiernu ya’l parlamentu asturianu tienen nun ye mui grande. Coles escoses competencies que l’actual estatutu d’autonomía-y otorga a los poderes asturianos, pocu marxe queda en política económica. Si a ello-y ametemos el non menos escosu enfotu de los partíos mayoritarios nel autogobiernu, la cosa marcha rodada. Esto quier dicir que la mayor contradicción que’l Bloque por Asturies alcontrara nos tres años de gobiernu fora alcontrala nuna decisión na qu’esi gobiernu tinía mui poca capacidá.

Por embargo, les polítiques ambientales, urbanístiques, d’infraestructures y, por supuesto, culturales y llingüístiques, sí tan sometíes a la competencia de los poderes públicos asturianos. Nun alcontró’l Bloque contradicción denguna nel banzáu de Caliao, nin el plan urbanísticu de Xixón, nin nel enantu d’El Musel cola so regasificadora incluyía, nin la llínia d’alta tensión Sama-Velilla, nin nos escándalos arqueolóxicos de La Campa Torres y de Grandas de Salime –que ta acabando por ser un mesmu escándalu-, nin la incineradora, nin, evidentemente, nes polítiques llingüístiques. Por eso, almitiendo que les midíes económiques actuales son motivu suficiente p’abandonar un gobiernu, unu camienta que la suma de toles anteriores custiones nun son de pesu mui inferior pa tomar la mesma decisión.

Eses polítiques nes que’l sociu nacionalista nel gobiernu asturianu nun alcontró contradicción abondo pa salir del mesmu son, precisamente, les polítiques que afleuten directamente al esfarrape territorial, cultural y llingüísticu d’Asturies. Nun dexa de ser estraño que, escontra elles, se caltenga nel gobiernu un grupu que se diz nacionalista. Nesti puntu Los Verdes son más coherentes: si un partíu ecoloxista aguanta colo de Caliao, la incineradora, Sama-Velilla, El Muselón, etcétera, ¿cómo nun va tirar p’alantre cola política de pensiones o de función pública?. Romper un gobiernu polos sueldos de los mélicos, pongo por casu, dempués de sofitar l’esfaragayamientu ambiental de mediu país sedría incomprensible.

Caltrio mui bien el determín del Bloque y, dende lluéu, nun lu voi criticar. Lo que quiero dicir ye que los problemes que-y esmolecen a esta organización son los mesmos –con esclusividá pa tratase d’una organización “nacionalista”, qu’equí ta la custión- qu’esmoleceríen a cualisquier organización esquierdista con total desapegu al país onde ta trabayando y que, nesti casu, ye Asturies. Toi seguru que’l PCPE taría güei na mesma posición que’l Bloque. Ye más, toi por apostar que’l PCPE, anque namás fora pol so calter combativu y peleón, tamién taría en frontal oposición a munchos de los proyectos y programes del PSOE que, a lo que paez, poca contradicción-y dieran al BPA.

Si la esquierda asturiana pretende caminar haza un pautu de cara a les ellecciones del 2011 o, anque namái fore, una averanza honesta pa trabayar a comuña no que se pueda, supongo que tendrá qu’asitiar como parafita fundamental la idega d’Asturies. Y la idega d’un país afíncase, lo primero, en que’l so activu más importante ye la población. Y, dempués, n’atalantar esa población nun entornu de tres componentes: el tarrentoriu, la identidá y la estructura económica. Por eso la esperiencia del Bloque, qu’agora apaez como la organización más afecha pa marcar directrices –y seguramente ye verdá-, ye bastante relativa. Los sos esmolecimientos empobínáronse en dos direcciones: la política salarial (na qu’Asturies tien competencies mínimes) y la solidaridá internacional (con les posibilidaes que pué tener un país probe y domináu políticamente). Funcionarios, pensionistes y cooperación con Palestina, Cuba o Bosnia: tou un programa “nacional”.

Pero, dempués de dicho lo dicho, camiento qu’esti ye un bon momentu pa intentar lo que dende la dómina la vieya UNA nun s’algamara: la unidá de les fuerces asturianes d’esquierda. Alcontrámosmos nuna situación talamente contraria a la que vivimos nel 2007. Entóncenes les posibilidaes facíenmos ser un tanto optimistes, porque inclusive atopábamos con encuestes nes qu’una coalición como la posible pente Andecha Astur ya IAS raspiaba’l diputáu (cosa sobro lo que yo siempres tuve duldies, pero la encuesta esistía). A la escontra, la situación interna de les organizaciones –especialmente polo tocante a Andecha, que ye de lo que yo puedo falar con mayor conocimientu- yera perdifícile. La unidá nun fo posible porque la fixeran imposible les organizaciones o, si mos peta más, dalgunos dirixentes de les organizaciones.

Anguaño les coses son estremaes. Pesie problemas esistentes –el eternu pleitu de “les dos andeches”, por exemplu- la necesidá ta obligando a caminar haza la virtú y les señales que les organizaciones emiten ofrecen rellumíos d’esperanza. Paez que güei les postures nun tán tan engafentaes y que les “vieyes guardies”, roceanes cuasi siempres, callen o asienten delantre unes direcciones remocicaes que sopelexen un pruyiciu por llegar a alcordaes. Por embargo, aquel escenariu favorable del 2007 ye agora mui peliagudu. Va haber otra vuelta una opción asturianista de centrodrecha (PAS o PAS-URAS); Izquierda Unida ta obligada a dar un arreblagu si nun quier entrar, definitivamente, nel camín del desanicie total; apaecen la UPD de Rosa Díez y los independientes llocalistes de Juan Morales, a la gueta del votu descontentu col “stablishment” actual; y la campaña va ser un mano a mano pente PP y PSOE nuna griesca que va desendolcase en clave española. Total: ún de los piores escenarios pal nuesu nacionalismu.

Pero, con tóo y con ello, habrá qu’aprovecer la situación. Ya equí la posición del Bloque por Asturies ye importante, mientres que les postures d’UNA y d’Andecha escontra’l Bloque van tener una importancia asemeyada. El BPA pué cayer nel retientu de querer capitalizar, o cuando menos dirixir, el posible procesu, acapiando a la so actual situación, muncho más estable, y a que dementres un tiempu va siguir nos focos d’información. Pela so banda, Andecha Astur ya UNA pueden cayer nel erru de siguir analayando vieyes rocées pa col Bloque, amás de caltener les suyes propies, qu’ehí siguen.

Un pautu fírmase pente enemigos o, a lo menos, pente xente que nun se conoz. Naide se sienta a firmar la paz con un amigu. Con un amigu fálase ensin preámbulos nin finxos previamente alcordaos. Nuna guerra, mientres los soldaos muerren y maten, los diplomáticos y los altos mandos militares tan aconceyándose a cada triquitraque hasta que, un día, los enemigos apauten la fin del conflictu. Equí nun fora una guerra, tóo ye menos dramático, pero la comparanza valmos. Una posible xuntanza tien de basase na confianza y, a una mesma vegada, na precaución.

La confianza desixe, non escaecer, pero sí dexar a un lláu les vieyes histories y los vieyos pleitos. Nun importa yá cómo surde’l Bloque dempués del conflictu de Llangréu nel somatu d’Andecha, nin como acabó la batalla interna d’esti partíu hai cuatro o cinco años, nin qué dixo o qu’escribió fulanín sobro la rexón Eo-Navia o si fora más amigu de l’Academia o más amigu del Seminariu, o tantes otres coses. Xente habrá que ponga pilancos, dende dientro de les organizaciones y dende fuera, y dende toles posiciones. Habrá quien desixa que se reconoza’l vieyu tarrentoriu, dende Fisterre al Bidasoa y dende Peñes a Zamora, al empar de quien yá va escribiendo que n’Asturies hai una llingua más: el “castellán montañés”.

Pero tamién precaución. La esperiencia’l BPA y, riba tóo, cuáles son les sos prioridaes, bien visibles adicando pa que ye lo que lu pon na tesitura de francer un gobiernu y qué ye lo qu’asume col mayor axetigu, obliguen a tar sollertes. Nun vaiga ser que, allá pa febreru o marzu, entamen otra vuelta los aforfugos y se plantegue una conversación con Izquierda Unida, cola oficialidá y les plenes competencies enriba la mesa como hai cuatro ya ocho años, y na que’l Bloque cumpla la función de banderín d’enganche. Nun ye dengún secretu que nel nacionalismu asturianu d’esquierdes la llínia menos identitaria –cosa que separta de cualisquier percepción “nacional”, na mio opinión- ye fuerte y ta mui activa. Con namás siguir los debates espublizaos nos últimos dos o tres menses queda claru l’asuntu. Esa llínia, propia del Bloque pero que nunca dexó d’esistir n’IAS (agora UNA), continúa moviéndose ya una bona estratexa diba ser allargar les converses hasta que nun haiga más remediu que recalar n’Izquierda Unida. De fechu, conversaciones con esti propósitu vienen cellebrándose periódicamente dende hai cuasi mediu añu.

Por último, una custión nueva nestos alderiques ye la esistencia d’una opinión pública con un pesu importante. La xeneralización d’internet ta permitiendo a les persones non encuadraes dar el so paecer sobro estes custiones y a les direcciones de les organizaciones saber lo que se cocina fuera de los sos conciliábulos. Al mesmu tiempo, una sociedá civil asturiana, dende les organizaciones de mocedá hasta les asociaciones profesionales, pasando por históriques xuntes pala defensa l’asturiano, deben presionar más nesta mesma dirección. Andecha Astur, Bloque por Asturies y Unidá Nacionalista Asturiana nun puén permanecer inmóviles si tóo se mueve na so rodolada.
Imprimir

33 comentarios:

  1. Una cosa ye crear una izquierda d'ambitu asturianu y otra una izquierda nacionalista. D'otru llau, una cosa ye priorizar la creación d'una izquierda asturiana estremada de les organizaciones estatales d'izquierda y otra priorizar el llogru d'una estructura de país y una conciencia nacional nesta vieya tierra que a la vuelta unes xeneraciones lleva camín de ser una provincia castellana más con vistes al mar. Hai xente que tolo anterior velo compatible y a lo meyor tienen tola razón del mundu. Yo nun acabo de velo claro...

    ResponderEliminar
  2. Lo que yo siempre dixe y ye dalgo que m'esmuel abondo ye que los del Bloqueo a Asturies y dalguna xente d'UNA tán más por defender los intereses de la izquierda que los del pueblu asturianu. Ye dicir, son comunistes cola etiqueta "asturianista". A mí, como nacionalista/asturianista, nun me val esi planteamientu.
    Sinceramente, si el PAS/URAS formara parte d'una coalición nacionalista cola izquierda paeceríame perbien, pero entiendo que Sánchez Vicente nun quiera.
    Un saludu

    ResponderEliminar
  3. Soi perru vieyu. Voi dicir lo que Rivas, que ye como ye, dexa en medies pallabres. Peazme que lo del Bloque ye una cuestión pactada con Izquierda Unida y con sectores d'UNA. David apúntalo: allá pa marzu vamos velo. Tóo esto ye un montaxe nel que tan entrando como xatinos unos cuantos. El Bloque nun ye otra cosa que la quinta columna d'IU nel asturianismu. Eso sábelo mui bien David Rivas y tamién Valledor. Unu por un lláu y otru per otru. ¿Acuéi?

    ResponderEliminar
  4. La URAS nun existe.
    El PAS ta nes últimes.
    El BpA fora d'IX nun ye nada, nin 800 votos.
    UNA ye una partida d'amigos.
    AA tán alloriaos cola babayada santanderina.
    PAS+URAS ye sumar 0 con -1. BpA quieren ser como IX, los mocinos de la películu. Los demás nun van querer.
    UNA quier guiar el procesu, los demás nun van querer.
    AA nun sabe nadie lo que quier.
    La xuntura nacionaliega ye otra vegada imposible. Ente tos nun s'atoparán nin 3000 votos.
    Les próximes eleiciones el PP va arrasar en toa Asturies, el PSOE pegaráse la ostia, IX quedará a piques de convertise n'extraparllamentariu.
    UPD, Ideas, y alguna otra cosa, van facer el ridículu.
    Rivas y cía. nun perdais el tiempu. En nacionalismu asturianu nun resucitará pal 2010 y como los peperos lo faigan un pocu bien, acabóse pa siempre.

    ResponderEliminar
  5. Lo que nunca entendí de xente como David Rivas y otros ye l'abierta aceutación d'URAS como organización del ámbetu asturianista. La equivalencia de lo que fizo'l Bloque pela izquierda con IU, quiero dicir, pautar con una organización non asturianista, féxolo'l PAS pela derecha con URAS, pautando con otra organización non asturianista. Aquel trespasu de militancia del PAS a URAS allá pola fundación d'esta última anguaño quedó en nada, aquel intentu por aciu de les crisis internes del PAS de facer d'URAS una organización asturianista fracasó, de toos aquellos nun queda naide, seique daquien en Villaviciosa. Amás, nun nos fai falta más que repasar les polítiques llocales d'URAS dende la so esistencia, o pa concretar más dende 2007 pa ver lo que ye esta organización. Podemos falar del sexu de los ánxeles, de los guapu que ye garrar la calculadora y sumar URAS-PAS-Andecha-UNA... pero na práctica taríemos metiendo al raposu españolista nel piteru nacionalista. Parezme tendenciosu que Rivas suxera la posibilidá de que tolo del Bloque seya una estratexa pa que toos acabemos n'IU y nin agora nin nel so día fixere dalguna mínima consideración a lo que supón pautar con URAS. Nun soi a pescanciar como ye posible sorrayar lo que supuso la Incineradora, Caliao, el Muselón... pa la presencia del Bloque nel gobiernu y nel so día nun se fixere'l mesmo analisis a la hora de plantegar pautos con quien ta a favor de too ello, ye dicir: URAS. Quiciaves siempres nos seya más facil arimanos al purismu políticu a la hora de facer crítiques, purismu del que nos alloñamos pa cuando los pautos colos que tamos d'alcuerdo.

    Tamos na meyor posición, lo que nun quier dicir que seya bona, que nunca tuviemos pa que dende'l nacionalismu d'izquierda se baltie a IU. Ye daqué que siempres se vio como trescendental nel nacionalismu: el francimientu d'IU pal sorrecer de nueso. Anguaño meyor imposible, por ello parezme increible lleer coses como les que pon David Rivas y dalgún foreru na que se prentende analizar onde ta la raya de lo que dexa de ser asturianista pa ser d'izquierdes y viceversa, parezme llamentable nesti contestu que tamos. Dalgún día debereis de desplicar la praxys de los vuesos plantegamientos pa ver si yo y otros somos a pescanciala. Yo entiendo que la posibilidá de tener una organización nacionalista medianamente seria a la que pueda sumase xente que nun entamu nun ye del nueso ámbetu ye trescendental. Tenemos que fuxir d'esi plantegamientu que parez que tenemos inherente nel nueso subconsciente de qu'una nueche'l pueblu asturianu acostarase español y despertará a la siguiente mañana siendo independentista, porque eso nun va asoceder nin siquier daqué asemeyáu. Somos los que somos y con ello hai que trabayar. Ye de sobra sabíu que tar nuna organización política ideoloxiza, poro, ye trescendental sumar y asturianizar a quien venga con nós ¿o qué facemos? ¿un esamen de preba de quien ye y quien nun ye nacionalista?

    Y per últimu dicir que Rivas vuelve a cometer un erru que yá fixo nel pasáu n'otros articulos. Y ye l'erru d'analizar dende una optica dafechamente andechista la envergadura de lo nacional del Bloque y d'UNA y les sos supuestes llinies menos identitaries. David, fainos falta muncha empatía a toos y pa ello hai que quitase de prexuicios y de discursos aprendios que parez que nos salen n'automáticu. David Rivas dixo: "Nun ye dengún secretu que nel nacionalismu asturianu d’esquierdes la llínia menos identitaria –cosa que separta de cualisquier percepción “nacional”, na mio opinión- ye fuerte y ta mui activa. Con namás siguir los debates espublizaos nos últimos dos o tres menses queda claru l’asuntu. Esa llínia, propia del Bloque pero que nunca dexó d’esistir n’IAS (agora UNA), continúa moviéndose ya una bona estratexa diba ser allargar les converses hasta que nun haiga más remediu que recalar n’Izquierda Unida."

    Menos escribir pa que nos aplaudan los del foru y más sensatez.

    ResponderEliminar
  6. Toi d'alcuerdu con munchos de les coses que diz l'anterior post. Pero hai una que non. Nun se puede invalidar la posición de Rivas (qu'apoyó una xuntanza amplia, polo que nun ye sospechosu de sectarismu) cola tesis de que comete un erru: una visión "andechista" de les coses. ¿Por qué eso ye un erru y nun lo ye una visión "bloquista" o "unanista". Amás, si Rivas optó nel so día por Andecha sedrá porque tien una visión determinada de les coses. Lo que sí ye verdá ye que nesti post aparenta más prevención haza'l Bloque que la que tien de verdá. Supongo que lo fairá por dalguna cosa.

    ResponderEliminar
  7. Nun podemos confundir les coses. David Rivas defiende la xuntanza pero propón una precaución más que xustificada. La historia'l nacionalismu asturianu desixe cambiar de táutica y unidá d'aición, pero nun obliga a escaecer les coses. Sospechar qu'Andecha ye reacia a la xuntanza ye lóxico después de visto lo visto, como pensar en que'l PAS fae trampes, que la UNA tien dos llínies y que'l Bloque gobernó col PSOE. Si Rivas carga les tintes nel Bloque tien la so razón: de la esquierda asturiana ye l'únicu grupu que tocó poder y que puede ser xulgáu por ello. Andecha, UNA y incluso'l PAS nun puen ser xulgaes colos mesmos criterios. El Bloque nun solo tien intenciones, sinon que tuvo responsabilidaes de gobiernu, nun gobiernu claramente "antiasturianu". Nun ye plan echá-y la culpa a un analista (por munchu "andechismu" que dalgunos-y quieran poner) de les contradicciones d'un grupu nacionalista d'esquierdes nel gobiernu d'Areces. Y lo de "más pensar y menos buscar l'aplausu nos foros" sería pa miralo. Nun me paez esti blogue precisamente un monumentu al aplausu fácil. Nun hai más que mirar delles entraes en dellos artículos.

    ResponderEliminar
  8. Yo toi d'alcuerdu col análisis de Rivas no xeneral. Igual carga munchu les tintes en delles coses, pero bono. Ye verdá que siempre consideró al PAS como nacionalista con tolos problemes que-y dio eso cuando encabezaba Andecha. Pero nunca dixo eso d'URAS. De fechu nesti post fala de que la URAS nun quier "contaminase de nacionalismu". Nun digamos mentires que acaben paeciendo verdaes. Lo que pasa ye que nun presta nada que dalguien que sabe de que fala eche agua fría al discursu optimista dominante. Hasta un hipercríticu como Carlos Blanco promete nun falar más mal del Bloque. Home, Blanco, dependerá. Ye mas, les hemeroteques o "blogoteques" tan llenes de frases respetuoses de Rivas pa con Palacios aunque seya dende una crítica distante. Cuando un referente como David Rivas ya dixo públicamente que taba retirau y que'l so tiempu políticu pasó, ver les sos opiniones como sectaries (andechistes) o como que-y duel nun ser "number one" como diz un tontucu n'Infoasturies ye cosa facil de calificar. Pero a ver que pasa. A ver si nun tenemos que tirar tovía d'estos "santones amortizaos" según dellos.

    ResponderEliminar
  9. Yo nun dixi que Rivas fuera sectariu, solo quise matizar qu'un de los sos camientos, el de cuestiones la "calidá" del nacionalismu del Bloque y UNA, taba fechu dende los plantegamientos que siempres se tuvieron n'Andecha Astur, dende esa mesma optica. En nengún momentu fice estensivu esto al restu del so articulu.

    Per otru llau daquién diz que Rivas nunca metió a URAS nel nacionalismu. Pues bien, na entrevista que fizo n'Aruelu a la entruga de la xuntanza del nacionalismu, metiolos dafechu, curtio y pego:

    "Fálase dende va unos meses de la necesidá de xuntanza nel nacionalismu asturianu baxo unos puntos mínimos pero paez qu’entá nun fina por cuayar esi intentu. ¿Qu’opinión tien sobro l’asuntu?.

    D,M,R.: “Enguedeyao aporta’l reináu de Witiza”, como se diz nel mus. Cada país ye un mundiu pero’l modelu p’Asturies ye’l modelu BNG, anque seguramente convién pasar un tiempu con una triba Nafarroa Bai. Prestaríame ser prudente porque les sentibilidaes nesti asuntu son tremendes, pero cuando acepto falar con un mediu, “Aruelu” nesti casu, ye pa dicir lo que pienso. Y pienso que la xuntanza ye necesaria. Ye más; nun hai otra salida. Y, voi dicilo por primera vegada, TIEN DE SER UNA XUNTANZA COMPLETA, DENDE URAS HASTA ANDECHA ASTUR. Esti país ta entrando nel coma y namái qu’un bastiazu proteínicu lu puede salvar."

    (Les mayuscules son míes pa facelu rescamplar) Yo lleendo esto si entiendo que mete a URAS nel tarrén nacionalista. Por ello me parez terrible estes coses que ya desplique enantes.

    Como diz daquién n'Infoasturies, esa fras de que dende'l Bloque y UNA pueda haber xente que quiera empobinar too esto haza IU va sentar mal, permal. A mi personalmente parezme mentira pa él. Pero bueno, David sabrá lo que fai y nun fai.

    ResponderEliminar
  10. A ver, alegres. Paez que tais discutiendo comigo y non con Rivas. El que dixo que tóo esto ye un montaxe soi yo y creo que Rivas quedose cortu. La estratexa d'estos esquierdistes internacionalistes que lleven el "bable" como complementu ye perconocía. Vais acabar por acusanos de romper la xuntanza a los que somos escépticos colos que gobernaron con Areces y permitieron milenta y una barbaridaes. Y, por ciertu, Raposu, una coalición amplia lleva a la URAS pero eso nun quier decir que seya nacionalista. A ver si llees meyor lo que ta escrito mui claro. Tamién Rivas faló nesa entrevista de Valledor y nun lu tildó de nacionalista. Y hai una verdá como una casa: desde hai munchu tiempu que xente d'UNA y del Bloque tan falando pa dexar a la parte nacionaliega d'UNA fuera combate. Pretenden, como diz Xanu'l Caborniu, facer una esquierda n'Asturies pero non una esquierda asturiana. Lo dicho: Rivas, un patriota ensin tacha, quedose cortu.

    ResponderEliminar
  11. Hai ciertos personaxes nel nacionalismu astur que sofren paranoies col mieu que tienen al esquierdismu y a los asturianistes "non pata negra"(sic)...

    O bien necesiten prescripción siquiátrica urxente, o bien hai que quitayos la mazcara porque son el putu palu nes ruedes boicoteando una NECESIDÁ HESTÓRICA DE LA NACIÓN ASTURIANA si non queremos convertinos (como lleí va poco nun se onde) en 2 o 3 xeneraciones "nuna provincia castellana con vistes al mar"....

    Arrógase la potestá de marcar la llinia del nacionalismu "pata negra" o de determinar cuantu esquierdismu ye´l tolerable , ye de fatos y totalmente perniciosu...

    Ayeri reuniéronse en Bilbao EA, la "izquierda abertzale" y Alternatiba (escisión de IU)...

    Señores, eso llámase FACER POLÍTICA!!..el pragmatismu ye consustancial a la política, y si cayemos na cizaña que dellos personaxes meten, al rodiu de personalismo, apaga y vámonos..

    El Bloque ye válidu, Rafa Palacios val muncho, UNA y AA lo mesmo, Valledor un activu, Rivas un referente....

    Hay potencial abondo, que faerá el so llabor, simplemente faciendo lo que faen n'otros paises cercanos

    ResponderEliminar
  12. Asturtxale: totalmente d'alcuerdu. Eso que faes sí ye constructivo. Equí tou dios cabe. Por eso yo siempre (o casi) apoyo a xente como Rivas. Porque siendo mui críticu unes veces y más combayón otres tienlo mui claro. A ver si nos damos cuenta que tamos na mesma barricada. Agora, ye verdá que dalgunos gobernaron con Areces.

    ResponderEliminar
  13. Yo nun se muncho de too esto pero hai coses que me paecen clares. Si un grupu que gobernó col PSOE de la represión a lo asturiano rompe a pocos meses de les elecciones sospecho. Esto ye como too. Les interpretaciones son munches y nun sabemos a que quedanos. Pero entós fiamonos de lo que siempre fue fiable y pa mi fiable ye un home como David Rivas. Igual ta equivocau, seguro que puede pero que un paisanu que nunca sacó nada y que tanto arriesgó diga determinaes coses, val. Yo quiero una xuntanza, la que seya, con quien seya pero les precauciones de Rivas parecenme mui bien.

    ResponderEliminar
  14. Nun se que decir pero siempre me paeció razonable lo de David. Pero ye curioso que los andechos nunca lu apoyaron pa nada. Ta mas solu que la una. Odienlu na UNA y nel Bloque por ser d'Andecha y los d'Andecha nunca lu respaldaron, nin siquiera cuando yera el so cabezaleru. Asina tamos. Decialo nun se quien, los patriotes tan solos. Verguenza ye. Rivas, nun te conozco quitando de foto pero toi contigo. Comunistes, socialistes, internacionalistes. Pero yo soy d'una parroquia machucada, del to conceyu Rivas, de Villaviciosa.

    ResponderEliminar
  15. Alguno gobernaron con Areces....y??...
    ye too tan absoluto como pa crucificar y condenar eternamente??
    Esi tema nun lu tengo claru..nun se dicir si foi bona o mala opción...
    PERO:
    Errar ye de humanos, naide ye perfeutu, dende una perspeutiva de pragmatismu el intentu de meter "cuña nacionalista" (piquiñina, sí, pero cuña...sobre tó siendo realistes del % actual del nacionalismu astur) puede ser valoratible...
    El futuru ye lo importante, y non el pasau (que toos tenemos escuru), y exemplos de compañeros de cama extraños hai per tolos llaos...

    Yo apuesto por menos análisis, crítiques, torgues, etc,etc...

    y por más VOLUNTÁ, PATRIOTISMU, PRAGMATISMU, Y PROGRAMA (como dicía aquel cordobés apodáu "el califa")

    con una bona estructura programática y de comunicación relacional interpartes, pueden llograse metes importantes.

    ResponderEliminar
  16. Non, Asturzale, non. Por tirar un peu naide pue ser tola vida un fediondu. Pero ye que'l Bloque salió del gobiernu hai tres díes y solo nos da promeses. Pa dalgunos un artículu de David Rivas ye un crimen, pero un gobiernu de tres años ye una cosiquina. Colunga votaba hai un mes la política urbanística del PSOE. Un mes. ¿Y agora voi creer a Colunga? Colunga votaba hai un mes les reformes educatives. Un mes. ¿Y agora voi creer a Colunga? David Rivas pon esto nel so blogue y armais la de dios. ¿Cómo ye lo vuestro, Astrurtzale y Raposu? ¿Sois tan míseres como pa xulgar como indecente a un profesor (nacionalista, eso sí) que fae un analís y perdonar too a un políticu (de los vuestros, eso sí) compliz d'Areces? ¿Mirasteis bien pa la vuestra moral? ¿Aú ta la vuestra ética?

    ResponderEliminar
  17. Patriotismu democráticu ye basar los argumentos nel análisis y la crítica. Refugar d'estos dos conceptos ye entrar nel terrén del dogmatismu y del siguidismu ciegu que yá ye otra cosa que, como simple asturianu, nin me va, nin m'importa. Como escribí hai un tiempu, y con permisu de David repito güei nesti foru, hai qu'entamar pola base que ye tener claro qué ye ser demócrata.

    ResponderEliminar
  18. Falé hai unes semanes con David sobre estes coses y vilu mui contentu pol pasu que diba dar el Bloque. Díxome que un posicionamientu claru de Rafa Palacios en pro d'una xuntanza yera fundamental. Dalgo pasaría p'amosar agora tanta prevención. La verdá ye que la entrevista de Palacios en Les Noticies nun daba bones vibraciones pa una xuntanza. David Rivas nun ye de calentones y menos cuando escribe. Ye de les persones más prudentes d'esti mundín. De les que opinen. Porque hailos que parecen prudentes y hasta llistos porque nunca dicen nada. Supongo que toa esta historia durará un par de díes. Pero, na, David. Anduviste bastante pela mar y ya sabes: banda favorable al vientu y avante, siempre avante.

    ResponderEliminar
  19. La diferencia fundamental ente'l BPA y la URAS ye que unos vienen de ser cómplices de la política del psoe y IU nel gobiernu y los otros tovía nun los vimos. Con esto nun toi combayando con URAS. Pero que quede claru quién son los responsables de lo que tenemos.
    Soi abondo pesimista nes xuntances y nos resultaos que pudieren traenos. ¿Qué pasaría si la izquierda nacionaliega se xunta? ¿5000 votos?
    ¿Y si amás se xuniera'l PAS? Igual había muncha xente de la que tá más pola izquierda que pol nacionalismu que ya nun votaría esa coalición. Asina que igual llegábamos a 7000 como muncho.
    Entiendo que X.X.S.V. nun quiera ésa xuntanza porque ye fácil que nun iguara nada y amás éllos perderíen credibilidá al xuntase con Andecha y BPA.

    ResponderEliminar
  20. Acabé de relleer l'astículu y toles entraes que llevamos y decateme de varies coses:

    1. El debate nel foru va más allá de lo que David Rivas diz. Les posiciones de Rivas son muncho más discretes que la de los opinantes. Esto indica que sí ye verdá qu'esiste la necesidá d'aldericar sobro'l papel del Bloque nuna posible xuntanza.

    2. El debate nesti blogue ye aposentáu y razonable, pesie a los enfrentamientos. N'Aruelu y n'Infoasturies, onde lo colgaron como opinión d'una manera bien oportunista, tóo (o casi tóo) son descalificaciones, insultos y opiniones vomitives. Eso ye bono: vamos estremando pente blogues interesantes y "sitios-basoria".

    3. Rivas sigue siendo un elementu interesante. Ye pena que nun quiera volver a la política pero eso ye cosa suya. Nos pasaos tres años recibió golpes de tolos llaos: dende cagalón por nun alfrentase d'otra manera a la crisis d'Andecha hasta de tar camín del PP, pasando por llamalu nazi pol poemariu d'un amigu suyu. Pero ehí sigue, con cambeos como ye lo propio, pero nel mesmu sitiu.

    4. Güei más que nunca son necesaries voces crítiques, acertaes o equivocaes, dependerá. Y ye bona cosa atender a eses voces ensin sospechar dobles o triples intenciones. Nun nos xugamos una hipotética xuntanza, sinon la mesma racionalidá y les bases democrátiques.

    ResponderEliminar
  21. Una bona cosa sería un compromisu non escritu pa nun entrar neses páxines. Miré lo que diz Berto Meana y téngolo claro: nun vuelvo a Aruelu y Infoasturies. Allí nun discuten, insúltense. Potenciemos los blogues sensatos y dexemos a los trolls que se maten pente ellos.

    ResponderEliminar
  22. ¡Cuantu mieu tienen dalgunos al pensamientu llibre! Somos fíos del "nun opines", "a ver si vamos cagala", "nun te metas con esi". y yo creyo que ya ta bien. Hai que discutir les coses tranquilamente pero ensin dexar en casa la radicalidá. Si Rivas desconfía de la xugada del Bloque, ¿por qué nun lo va dicir?. ¿Que va molestar a nun sé quien en UNA?, ¿y qué?. A otros prestará-yos. David Rivas ya ta fuera de la griesca cotidiana, ¿por qué-y tienen tanta manía dalgunos? ¿O ye miéu delantre d'un nacionalista que sabe dalgo más que facer la O col culu d'un vasu?

    ResponderEliminar
  23. Lo de nun entrar en sitios faltosos ye una bona idea. Yo entro en pocos pero hailos de pena, con insultos y sin dengun respetu a les persones. Yo apúntome a la idea.

    ResponderEliminar
  24. Ye una bona idega esa de boicotear eses páxines onde l'insultu ya'l llevantu son normes. Infoasturies (páxina oficiosa d'Andecha Astur) y Aruelu (páxina oficiosa d'UNA) permiten y allenden faltosaes ya insultos. Poner l'artículu de David Rivas como si fuera d'ellos diz bastante de la so política informativa. Pudiendo remitir al blogue personal del autor, prefirieron apuntase la baza l'alderique. Y, como yera d'esperar, el resultáu ye claru: nel blogue de Rivas una discusión dura pero educada y nes páxines d'Andecha y d'UNA un claru reflexu de lo que son como partíos. Glayíos, insultos, razonamientos de neños malcriaos. Lo típico del nuesu nacionalismu, un nacionalismu nel que la xente razonable ta de sobres. Yo esperaba más de los Arbesú y Cueli y de los Llope. Pero paezme que va quedar pa dientro unes décades.

    ResponderEliminar
  25. Na mio opinión, ponese repunante y criticar la eventual xuntanza por caxigalines como que unos gobernaron con Areces, y otros son muy "roxos", y otros son muy "filólogos" y nun se cuantes coses más, ye de PALETOS ...y dígolo con tol respetu.

    El páis ta per entiba too eso, que son tonteries perfeutamente superables.....más dura foi la escisión del PNV, y en pocos años ya taben gobernando colos escindíos...por poner un mínimu exemplu que dexa en evidencia lo "provinciano" de dalgunos resquemores que se ven per equí...

    Otra cosa puede ser que equí, n'Asturies, nun exista la política (con MAYÚSCULES), y ná mas quedemos en el "chigreu" (sic) y nel grandonismu tan consustancial al ser asturianu...

    Rivas, vales muncho, tienes muncha cultura y visión.....fae una bona cena un día d'estos, y fala con Palacios, Valledor, Arbesú , Zapico y cía.....xente toos ellos pernecesarios.

    ResponderEliminar
  26. ¿Veslo, Asturtzale, veslo? Al final vamos tar d'alcuerdo. ¿Cuántes vegaes mos damos d´hosties por presuposiciones? Nun sé si esa cena que tu propones será posible pero sí ye verdá que sería daqué guapo. Toi seguru que si eses peesones que dices ya un par delles mas s'aconceyaran delantre un platu fabes diben entendese. N'Asturies fae falta falar, dialogar. Y de xuru que les diferencies son mui pequeñes. Rivas: súmome a la propuesta d'Asturtzale. Ya que decidiste apartate de la política activa, ¿por qué nun faes de ponte? De tí pensarán mal o bien políticamente pero toi seguru que naide duldia de que yes persona noble y patriota.

    ResponderEliminar
  27. Prestaríame ver a David de ponte, pero los pegollos d'esa ponte esbarrumben por mor d'articulos como esti. Él mesmo zarra les puertes al dicir abiertamente que xente del Bloque y UNA quieren metenos n'IU o repartir carnés d'asturianía como ya fexo tiempu atrás, ente otres actitudes erronees.

    Toi colo que diz Asturtzale, pero Rivas con estes coses desacredítase a si mesmo rebaxándose a la pelea de los foros, porque a la fin estos articulos son la utilidá cimera que tienen: l'ermu alderique foreru. David Rivas n'otru articulu creo recordar que dixo que sigue na rede tolos debates que se dan alrodiu de la xunidá, camiento yo que se somorguió la dinámica mala de la ciberpolítica, y eso lo supongo porque ye la única desplicación qu'atopó pa entender coses como esti articulu.

    ResponderEliminar
  28. Pues claro que sí Noli!!
    una buena xinta patrocinada por Rivas ye el primer pasu!

    ye que cá vegada que pienso nes polémiques nuestres dame una vergoña que muerro!
    Por non siguir con exemplos vascos pa que nun se m'echen a la yugular dalgunos, voy proponer otru exemplu evidente....y que a rivas presta-y más: Cataluña....nun fae falta dicir más!...eso ye pragmatismu anglosaxón a la mediterránea.

    ResponderEliminar
  29. Raposu: faes xusticia al to ñomatu.

    ResponderEliminar
  30. Noli me tangere , ¿Nun te taras pasando un poucunin? , mira ver anda , creo que tas faltando al respetu a Raposu de siguío . Raposu da la so opinión ensin faltar a naide . Pue gustate mas o menos pero si queremos diálogu , habrá que falar ¿nun te paez?.Nesti blog lo prestoso son los artículos de Rivas , que nun te dexen indiferente , que t'afalen a pensar , esi ye'l so gran méritu , que revuelve conciencies y pon a la xente en marcha (un líder a la fin).Pero paezme que dellos , tais mas preocupaos d'ofender al que nun piensa como vos o entamar alderiques que lleven a niundes . Creo que Rivas tien de valorar , opiniones como la de Raposu , mui critiques seique con elli , pero opiniones honestes a la fin . Si non esto va camín de ser una cofradía de fans de Rivas ensin mas .
    "Cultura y respetu pa toos"

    ResponderEliminar
  31. "...a la fin estos artículos son la utilidá cimera que tienen: l'ermu alderique foreru". Discrepo. Tienen una utilidá bien perriba d'eso. Un alderique nun foru pue ser un ermu o pue ser mui granible. Ello depende de los intervinientes y de les intervenciones. De que s'argumente con xacíu (discrepancies incluíes) o que se descalifique ensin más. Repito que l'análisis críticu, el contraste d'opiniones, l'alcuerdu o la discrepancia dende'l respetu son la base de cualquier andecha o proyectu. Si l'alternativa al réximen arecista va ser otra onde s'aperrille al que practique'l pensamientu llibre, incluíu'l drechu a criticar y a discrepar, esa alternativa nun me val.

    ResponderEliminar
  32. Churchill: tienes razón. Raposu: disculpa si me pasé un pelín. Y tamién ye verdá qu'esto nun puede convertise nun club de fans. Amás conozo a David Rivas (nun somos amigos pero conózolu de van años) y nun-y gustaría nada demasiada complacencia. Lo dicho: disculpes pol mal tonu de dalgunes intervenciones y a siguir pel camín d'una crítica constructiva.

    ResponderEliminar
  33. Rivas fai análisis sobre UNA basándose en fontes enquivocaes y eso fai que'l so análisis nun seya axustáu a la verdá, y hai xente que paez que ta cuchando esa teoría nesti blogue dando más "datos", como Noli me tangere.
    Na UNA nun hai nesti momentu eses dos llinies que dicís, pero nin pol forru, nin asemeyao. El que lo diga, seya quien seya, nun conoz la organización. Y facer análisis con esos datos namás pue llevar a conclusiones enquivocaes.
    Lo que pue haber dientro d'UNA ye xente más o menos roceano y desconfiao énte'l Bloque (¿sedrán eses les campanes oyíes?), como ye normal y xente que lo ye menos. Igual que nel Bloque habrá xente que-y faiga más o menos gracia falar con UNA.
    Pero dicir lo qu'insinua Rivas (¡¡¡¡negociaciones pa pautar con IU dende va meses!!!!) o diz "Noli me tangere" con "datos" sobre arrequexamientos de "sectores nacioanaliegos" ye da-y creitu a quien nun sabe, porque supongo que nun lo inventaríen.

    Per otru llau nun entiendo porque Rivas diz que na UNA hai esa tendencia "izquierdista" (¿úla, hai dalgún documentu o artículu que faiga sospechar eso, o ye que la falta de compromisu nacionaliegu "suponse-yos"?) pero nun diz que n'Andecha tamién la hai, y probablemente más, cuando la única persona que firmó un artículu públicu afitando la so militancia con eses posiciones ye un rapaz llamáu Iván militante d'Andecha y cuando amás esa Andecha foi col PCPE al pasáu 8 de setiembre. Polo que yo conozo ye más probable qu'eses tendencies tean más afitaes nes sos mocedaes que n'otros llaos del nacionalismu. Pero non, eso nun se diz nel análisis, los sospechosos de impureza son la UNA.
    Suponse que Rivas intenta ayudar a facer lo que la mayoría queremos, pero como llector pido-y más oxetividá, y otra vuelta, meyor información. Anque l'analista y l'análisis seya bonu si los datos fallen les conclusiones nun pueden ser bones.

    Salú pa Rivas y los demás.

    ResponderEliminar

Nota: solo los miembros de este blog pueden publicar comentarios.