Una fuelga pa setiembre


Tamos nes puertes d’una fuelga xeneral, magar qu’eso de convocala pa d’equí en 102 díes suena a chiste. Esto ye como si Hitler-y manda un telegrama al gobiernu polacu a mediaos de mayu de 1939 pa dicí-y: “vamos invadilos el primeru de setiembre, avisaos queden”. Tal paez que CCOO ya UGT pretenden empixar al gobiernu, na esperanza de que la mesa negociación igüe les coses o que la economía pegue un cambéu importante, cosa esta última mui poco probable nos menses vinientes. Pero, como “la roja” gane’l mundial y venga un branu bonancible climatolóxicamente –y nun digamos nada si ETA rinde les armes-, la inyección d’optimismu va ser tala que Rodríguez Zapatero podrá dir a Rudermu a cantar “La internacional”.
Ye verdá que la cosa resulta un poco ridículo. Tamién ye verdá que los sindicatos oficialistes o mayoritarios nun son precisamente les instituciones más exemplares y que formen parte del réxime franquista remocicáu que carecemos y que, en casos como’l d’Asturies, son verdaderos cómplices del esaniciu social, económicu y nacional. Pero tamién ye verdá que, col pretestu d’esta realidá incuestionable, la drecha más ultramontana –bien antroxada de “lliberalismu”, eso sí- ta armando una campaña contra los más elementales drechos de los trabayadores y, en xeneral, de la ciudadanía.
Naomi Klein desplicara hai unos años d’un mou mui correchu lo que ye la “doctrina del shock”. Los grandes capitalistes, esa oligarquía que yá ye la única clas enfrentada a tolos ciudadanos del planeta, aprovez les crises –si nun les provoca directamente- pa frenar cualisquier avance nos drechos civiles, tanto los sociales como los económicos.
Nun foran los sindicatos los que provocaron esta cris, nin los trabayadores, nin los funcionarios, nin los pensionistes. La cris provocáronla los grandes capitales, a comuña con unos gobiernos que, como’l norteamericanu o’l británicu, contribuyeron allegremente a la orxía desreguladora; o d’otros gobiernos que, como l’español, minimizaron cola so demagoxa la que mos vinía enriba. Nel nuesu casu, concretamente, fora la banca y los “señores del ladrillu” los que provocaron la cris diferencial, esi “plus de recesión” qu’España amete a la cris xeneral, pero tamién un PSOE ignorante y prepotente na so falsa progresía de salón, cebando bien los peselbres “guapos” ya escaeciendo lo elemental.
Y agora apaecen los irresponsables del PP, encantaos ellos con que seyan los socialdemócrates los qu’apliquen les sos propies polítiques, unes polítiques pensaes namái que pa que la tasa beneficios xuba lo más ceo posible. Y, si mañana gobiernen, nun pasará nada: la mesma política y mayor poder de la CEOE. Pero ehí anda Dolores de Cospedal (ya Ibárruri) diciendo que’l PP ye’l partíu de los trabayadores. Acaba ñacer el Partíu Popular de los Trabayadores, de nome inconfundiblemente de freba maoísta. Ya veo a Rajoy, un fuboleru tan encamentáu como yo mesmu, animando a Corea’l Norte nel mundial.
El panorama pinta mui mal pa unos drechos llaborales algamaos pol movimientu obreru con sangre abondo. Porque pente l’alderique sobro cuántos años son la basa pa la pensión o cuántos díes pa la indemnización, pente los discutinios de la temporalidá ya otres coses –importantes, evidentemente-, ta escaeciéndose sistemáticamente l’elementu central d’esti verdaderu asaltu al estáu social de drechu y a los algames históricos de los trabayadores.
Esi asaltu nun ye otru que pretender que les negociaciones seyan feches nel somatu la empresa, franciendo coles tradiciones de negociación colectivo. El presidente’l BBVA dicía l’otru día que “se requier un sistema de negociación salarial muncho más flexible y descentralizao, qu’arrepostie a les condiciones de cada empresa”. Más claro augua. Munchos trabayadores, fartucos de los peronistes de la UGT y de los estalinistes viníos a menos de CCOO, tan aplaudiendo esta midía, como amuesa de refuga a esos sindicatos clientelares nos que nun se ven representaos. Pero llevar la negociación al despachu’l xerente la empresa ye frayar lo poco que queda de los mecanismos de solidaridá y de la capacidá de llucha y resistencia de los trabayadores.
Escontra esto, CCOO y UGT allancen la “fuelga a llargu plazu”. Tan nel so drechu y, amái, van cuntiar colos sindicatos pequeños y combativos, a los que ningunéen y desprecien sistemáticamente. Porque ensin CSI, CGT, CNT o SUATEA van tenelo mui complicao pa desplicar la so posición. Pero, sábenlo, van cuntiar con ellos. Y cuando pase l’afoguín, volverán a lo de só: les prebendes, los escaños senatoriales, los lliberaos con sueldu de fubolistes de primera, etcétera, etcétera. Por exemplu, los representantes de CCOO ya UGT nel conseyu de RTVE cobren diez mil euros mensuales, pa nun poner exemplos d’Asturies.
De toles formes, perye necesario entamar a entrugase si una fuelga xeneral ye l’arma afayadiza o si nun tamos yá escontra una forma llucha del pasáu. Yá nun hai oligarquíes nacionales abellugaes por gobiernos nacionales, polo que les rempuestes obreres y ciudadanes tienen qu’entamar a guetar otres víes de resistencia o, directamente, d’ataque. La fuelga –especialmente la xeneral- yera’l meyor indicador de la potencia y de la capacidá sacrificio la clas obrera. Una fuelga xeneral significaba, normalmente, la declaración l’estáu guerra por parte’l gobiernu. Inclusive pequeños conflictos demientres el franquismu llevaben apareyaos, inmediatamente, un estaú escepción. Pero nin tamos nel capitalismu concurrencial de la fas imperialista nin una dictadura semicapitalista y semifaxista.
Ye lo mesmo que los boicot a los productos israelinos, norteamericanos o turcos. Nuna economía globalizada yá nun hai productos israelinos, norteamericanos o turcos. Hai años los horticultores de Murcia y de Valencia propunxeron el boicot a los productos franceses. Los obreros de Citröen de Vigo y los de Renault de Valladolid respondieron rápidamente: los coches franceses esos fabricámoslos nosotros. Hai menos tiempu la drechona y la COPE pidieron el boicot al cava catalán. Los xornaleros del corchu d’Estremaúra y Portugal glayaron bien alto que Cataluña yera’l so principal cliente: llevaismos a la roína. Agora’l código comercial d’Israel ampara a cientos d’empreses de Gaza y Cisxordania y nes empreses israelines trabayen miles d’obreros palestinos, seguramente los primeros que van dir pal paro si la empresa perde beneficios.
Diremos a la fuelga porque hai d’amosar que tamos fartos, pesie a qu’esi día que mos van restar de sueldu van capitalizalu UGT y CCOO, esa “clas obrera” tan rara. Tamién trataremos de mercar productos lo menos contaminaos posible por xenocidios, explotación de menores, esclavización de muyeres, amachucamientu los ecosistemes ya un llargu etcétera. Pero tamién hai d’entamar a repensar les formes de llucha.
P’acabar. La única noticia que mos permite sorrir nestos últimos díes ye que Barbara Bush, fia del gran estadista Georges W. Bush, declaró en “Fox News” que “la sanidá debía ser un drechu universal”. Non contenta con esto, acaba fundar, con otros activistas de los drechos humanos, la ONG Global Health Corps. Entá hai esperanza: hasta nes families más integristes y reaccionaries espoxiguen persones con dos deos de frente y sentimientos de solidaridá haza’l restu la humanidá. Y, afortunadamente, esta mociquina vien dicimos que nun ye siempres verdá eso de que “familia que reza –y afusila- unida, permanez unida”.
Imprimir

Comentarios

  1. Paez que nun metí bien el comentariu enantes. Présta muncho esta entrada, David. Dempués del to artículu "proisralita" pensé que igual pasabes por un conversu al drechismu. Yo se que non, pero ya sabes como son estes coses. La xente que nun te conoz o que te conoz poco nun sabe que yes sobre too un radical, nel términu más precisu d'ello. Pero la xente nun ta preocupao pola precisión. Somos amigos dende van ya décades y siempre tuve preocupada porque a veces nun paeces d'esti mundu. Siendo como yes tan pragmáticu a lo inglés tas emperrau nuna liturxa terminolóxica que ya naide sigue. Yes un medieval nesti mundu posmodernu. Sábeslo y préstate. Pero nun t'embales. Sigues siendo mui necsariu nesti mundu asturianista, o asturianu por meyor dicir.

    ResponderEliminar
  2. Gracies, Mami. Hai años que nun mos vemos, a ver si lo facemos pronto. Lo de poner el ñomatu que te dimos cuando yéramos neños tráxome munchos recuerdos. Un besu.

    ResponderEliminar
  3. Mui bon artículu, David. Hai que tar onde hai que tar pero sabiendo qué tipos de compañeros de viaxe o de fuelga lleves. CCOO y UGT culpables de l'asesinatu d'Asturies.

    ResponderEliminar
  4. Mui bien, como siempres. Yo trabayo en concesiones d'obra pública. Si vos contara lo que faen UGT y CCOO a comuña coles empreses y los fondos de solidaridá...

    ResponderEliminar
  5. Toxo gana más que Zapatero. Ta tou dichu. Son gandaya.

    ResponderEliminar
  6. aurora intrmitente18 de junio de 2010, 21:51

    Hola David
    enhorabuena por el articulo
    un besin

    ResponderEliminar
  7. Un saludu a toes y toos. ¿Qu'hai, Davizu?. Llámome Paco y soi miembru de la Executiva de la Corriente Sindical d'Izquierda (CSI) na comarca d'Avilés.
    Sé que ye imposible dicir nun sólu artículu tolo que se camienta sobro un tema; entá más si'l tema en custión ye tan fonderu comu ésti. Poro, teo de dicir que toi d'alcuerdu, en términos xenerales, colo que ta plantegando David.
    Pero hai una custión que teo de comentar. Dices que na prósima fuelga xeneral de setiembre, CCOO y UXT "van tenelo mui complicao pa desplicar la so posición ensin los sindicatos CSI,CGT, CNT y SUATEA. Pero, sábenlo, van cuntiar con ellos".
    Nesti puntu, y polo que se refier a la CSI, teo d'esclariar delles coses. Barrunto que lo que quies dicir (si m'enquivoco, corríxesme) ye qu'a la CSI nun-y va quedar más remediu que sofitar la fuelga xeneral de CCOO y UXT, porque nun tien otra (sedríe incomprensible que la CSI llamare a los y les trabayadores a dir a trabayar un día de fuelga xeneral). Pero d'ehí a sofitar los plantegamientos de CCOO y UXT va un mundu. Na anterior fuelga de funcionarios, la CSI nun sofitó a CCOO y UXT y fizo un llamamientu separtáu a la fuelga, faciendo una crítica contundente, con pallabres y fechos, a les práutiques corruptes d'esos dos sindicatos.
    Persabemos que la fuelga xeneral de setiembre nun ye más qu'una comedia apautada y una llavada de cara d'unos sindicatos, nomaos mayoritarios, que yá nun representen a naide y que lo único que busquen ye'l peselbre fácile y el sillón cómodu de lliberáu. Nesi sen, la normativa interna de la CSI prohíbe la esistencia de lliberaos nel sindicatu y l'aceutación de les sovenciones públiques a les que llegalmente tendríemos drechu. Y por eso llevamos años pidiendo que se ponga fin a cualisquier triba de sovención (direuta o al traviés de mecanismos comu los cursos de formación o los cargos sindicales remuneraos en bancos, caxes, conseyos de direición y otros organismos).
    Por embargu, na CSI talantamos qu'hai de facer, non sólo una fuelga xeneral, sinon les que seyan afayadices fasta parar esta agresión frontal a los y les trabayadores y al conxuntu la ciudadanía. Camentamos qu'a esti problema (sofitar la fuelga sedríe da-y ales a UXT y CCOO, y nun sofitala sedríe da-yos el nuesu consentimintu a los planes del Gobiernu y la patronal) podemos intentar da-y una salida: ellí onde seyamos quien, tenemos de desbordalos y facer que la fuelga se-yos vaiga de les manes. Ye abegosu, precisa de munchu esfuerciu, pero tenemos d'intentalo na midía de les nueses posibilidaes.
    Sabemos lo que decimos y nun ye la primer vegada que la CSI lleva alantre esto na so práutica sindical. Yá pasó anantes (por exemplu, Naval-Xixón, Duro-Felguera en delles ocasiones, y otros conflictos), pasa agora (comu na fuelga del Tren d'Alambrón d'Arcelor) y podemos intentar que torne a suceder otra vegada n'Asturies.
    Y, rellacionao con ello, quería comentar que, dende la CSI, notamos un puquiñín de despreocupación nel nacionalismu d'izquierda asturianu alrodiu'l tema llaboral. Nin yo nin el conxuntu la CSI somos naide pa dicir a denguna otra organización lo que tien o nun tien de facer; pero paeznos que tan arrequexando una faza imprescindible nel trabayu cotidianu de cualisquier organización política. Salvo esceiciones, la xera sindical del nacionalismu asturianu d'izquierda amenórgase a comunicaos de prensa ensin dengún trabayu realmente enxertáu na xera sindical. Y esto, al mio entender, quíta-yos credibilidá y sofitu delantre de muncha xente que, si tovieren otra actitú, podríe sofitalos, inclusu, elleutoralmente.
    Y yá, pa finar, quería deci-y al collaciu Voltaire que nun fai falta que cuente denguna fechoría de CCOO y UXT. Na CSI tamos fartos y fartes de velos actuar en toles empreses nes que tamos. La verdá ye, compañerín, qu'estos sindicatos dexaríen ablucada a la mesmísima camorra napolitana.
    Un saludu y perdonai la llargura'l comentariu.

    ResponderEliminar
  8. Nun toi mui al tantu de la cosa sindical, pero lo que diz el collaciu de la CSI ye triste y sangrino. Una presencia del nacionalismu astur nes organizaciones sindicales crítiques sedría fundamental, y eso como pasu previu (y sine qua non) pa tener equí un sindicatu nacionalista propiu, como los hai n´Euskal Herria, o al menos una unidá d´aición cola CSI y colos minoritarios. Tamos en pañales en too. CXB

    ResponderEliminar
  9. Ye difícil alcontrar nueves víes diferentes a la fuelga y al boicot porque, si les alcontramos, tendríamos que probales como alternativa a la fuelga. Eso quier dicir que nun secundaríamos una fuelga pola so ineficacia pero quedaríamos como equiroles. Y eso de "quedar mal" ye insoportable pa munchos seutores de la esquierda. Pro hai qu'atrevese. A mí ocúrreseme poco porque nunca viví nel mundu sindical y poco nel llaboral, pero paezme que dalgo habrá que pensar y facer.

    ResponderEliminar
  10. Estos sindicatos van a la convocatoria setiembre porque pese a lo que gasten son unos vagos y suspendieron en xunu. Lo meyor ye que vaigan pa casa y dexen los estudios d'una puñetera vez.

    ResponderEliminar
  11. Hola David :
    nun vien munchu a cuentu d'esta entrada , pero prestaríame que me dieras la to opinión sobre estes dos cuestiones :
    1º El rector de La Universidá d'Uviéu diz :
    Vicente Gotor alvirtió que la institución "nun ta en condiciones óptimes" pa l'adaptación al Espaciu Européu d'Educación Superior (EEES), tamién conocíu como'l Procesu de Boloña.

    En declaraciones a los medios, Gotor destacó que "va haber que tomar decisiones pa optimizar recursos, y algunes van "ser dures" en relación al contestu económicu, les dificultaes de financiación de la Universidá y los recortes previstos.

    Y yo digo:
    Nos años ochenta del pasáu sieglu , pa 45000 alumnos que tenia la Universidá, había 2000 profesores y 1000 trabayadores pa xestionar la Universidá.
    Güei pa ventipocosmil (o seya la meta d'alumnos qu'entós) sigan tando'l mesmu númberu de profesores y el mesmu de trabayadores .¿Como se como esto? .¿Les reconversiones que son solo pa los trabayadores industriales?.Lluego sal algún guru d'estos , seya economista o filósofu , diciendo a les clases trabayadores qu'hai qu'apretase mas el cinchu enta . Digo yo que si hai qu'optimizar recursos,habrá que facelo en toles estayes de la sociedá y si toca en funcionarios pues toco y si toca a profesores universitarios pues tocara tamién ¿Non te paez?.

    2ºQue te paez a ti,que la Universidá nun tenga les siguientes especialidaes:
    -Comunicación Audiovisual
    -Arquitectura
    -Traducción e Interpretación
    -Farmacia
    -Bellas Artes
    -Agronomía
    -Veterinaria
    -Ingeniería Lingüistica.
    Esta última ya ta implantada nes universidaes de la mayoría de los países europeos .
    Mientres la Universidá , caltién titulaciones que nun interesen a casi naide güei(supongo qu'a los profesores que viven d'elles si).Esto conderga a munchos de los nuesos fíos a la emigración en busca d'estes titulaciones, col consabíu perxuiciu enconomicu y lo peor pa min l'esllarigamientu de munchos d'estos mozos del so país.
    Prestábame que como profesor de prestixu que sos me contestares a estes entrugues y que me dieres el to paecer , sobre'l papel que xuega l'universidá na sociedá asturiana .Yo tengo la sensación como ciudadanu , qu'en vez de ser un motor de la mesma , ye un cáncanu , un pozu sin fondu , llenu d'endogamia y tolos ismos que se t'ocurran .

    Un abrazu candial

    ResponderEliminar
  12. Muncho pides, Churchill. Pero sí taría bien que DMR falare d'estes coses. ¡Anímate, David, que te lo piden los tos más fieles!

    ResponderEliminar
  13. Setiembre ye mes galanu pal llabrador asturianu.

    ResponderEliminar

Publicar un comentario