27.5.10

Xuntanza, clas, burros… ya’l “plus” pal salón

Sigo con muncha atención los alderiques al rodiu d’una posible xuntanza del “asturianismu”, pallabra que xenera más debate de lo que merez, y vuelvo reafírmame no que yá dixe n’otres ocasiones pero viéndome obligáu a matizar delles coses. Eses matizaciones nun provienen de cambeos de percepción, sinon de les mesmes circunstancies que tan produciéndose nes últimes selmanes.
Ye cosa chocante que nesta ocasión, con muncha más fuerza que n’anteriores momentos, ta poniéndose enriba la mesa la dicotomía que dalgunos ven pente la esquierda y la identidá. Como ya teo “mocedá acumulao” abondo, recuérdome d’esos debates cuando’l CNA, cuando se formó l’antigua UNA, cuando s’apautó col PAS pa encadarmar Coalición Asturiana, cuando s’intentara una xunidá nel 1999 y cuando’l fracasu de la cabera intentona, nel 2007. Nunca en degún d’esos momentos se confrontaron tanto les posiciones como agora, ya eso que la ideoloxización de los estremaos sectores sociales yera muncho mayor entóncenes.
Ye posible que la razón pa esi zurriburri ideolóxicu tea en que, igual por primera vegada, l’alderique abriérase dende grupos, sectores y persones claramente encuadraes nel nacionalismu d’esquierda pero non estrictamente militantes de les organizaciones presentes. Nes ocasiones anteriores foran los partíos políticos los que capitalizaron el debate, anque enxamás faltaran opiniones de fuera, como, por exemplu, les d’un García Arias que siempres apostara por una coalición amplia “radical no nacional y moderada no social” y pa la que munchos vieron al mesmu Arias postulándose pa encabezala. Agora, nun sen contrariu, operaciones como’l blogue “Pola Xuntanza” ya otros munchos espacios na rede tienen un pesu específicu que nun se pue menospreciar. Ya ye que nesta ocasión la xeneralización d’internet ta condicionando les decisiones. Hasta hai tres díes, como aquel que diz, toles discusiones trescuerríen pelos pesllaos círculos políticos o, como muncho, n’aconceyamientos pequeños de chigres y domicilios. Agora, pa bien del minoritariu nacionalismu asturianu, les opiniones tienen miles de receptores potenciales. Dende esti puntu d’agüeye queda enforma desplicada l’abondosa producción d’idegues ya opiniones.
Pero esta tamién ye la primera vegada na que nacionalistes d’esquierda necesiten recurrir al ataque a la identidá pa reafirmar el so esquierdismu. Esto sí que ye nuevo nel debate. Nin nel CNA, nin na vieya UNA nin n’Andecha Astur, proyectos claramente d’esquierda –riba tóo’l primeru, onde’l que nun yera trosquista yera maoísta- y nos que, modestamente o como cabeza visible, participé, se punxo tantu énfasis na custión de clas como pa llegar a llamar “burros empalmaos” a los qu’apuesten –apostamos- pola coalición más amplia posible. Debemos ser “asturcones identitarios”, pos el términu “burru” aplicase n’asturiano más al “asturcón” qu’al “pollín”. Nesti casu yo sí dexo’l blogue abiertu y nun necesito que m’arrepostien con nome y apellidos nun artículu perfechamente encadarmáu. La mió experiencia dende va más d’un añu díctame que, quitando tres o cuatro cafres, la xente ye respetuoso cuando tien delantre opiniones serenes y argumentaes.
Hai socialistes que nacionalizaríen la banca y hailos que non. Hai comunistes que sofiten al réxime cubanu y hailos que non. Hai anarquistes que lleguen a votar nes municipales y hailos que non. Hai lliberales que caltendríen la seguridá social y hailos que non. Hasta hai franquistes católicos y nazis paganos. Lo que nun alcuentro en dengún lláu del planeta ye nacionalistes qu’arrenieguen de la identidá. Igual la mio opinión a favor d’una coalición peramplia ye un erru. Ye posible que tea enquivocáu, pero si contrapunxere la identidá asturiana a cualisquier otra categoría sociopolítica, nun ye que pudiere tar enquivocáu, ye que nun sedría nacionalista. Podría ser una persona coyonuda, bon padre familia y bon collaciu nel tayu, pero non nacionalista.
El modelu neocapitalista que carecemos dende hai dos o tres décades ye la primer fase d’esti mou de producción na qu’hai de verdá dos clases sociales. Na obra de Marx apaecen dos clases en dalgunos llibros, tres n’otros y hasta cinco n’otros. Ya eso pasa, pente otres coses, poque’l filósofu enxamás definió conceptualmente qué yera una “clas”. Pero lo de dos clases, la vieya dicotomía cristiana pente “ricos” y “probes”, yera muncho más fácile de remanar pa los sos intelectualmente perezosos siguidores. Falar de “burgueses” y “proletarios”, esa simplificación metodolóxica na que nunca cayere Marx, supunxo, pente otres coses, eliminar a cientos de miles de campesinos porque, apegaos a la tierra y a la propiedá, foran catalogaos por los “zares roxos” como “enemigos del pueblu”, “axentes del imperialismu”, “quintacolumnistes del faxismu” o, cenciellamente, “contrarrevolucionarios”. Pela so banda, munchos comunistes y anarquistes, especialmente estos últimos, falaben de les fuerces “del pueblu y del proletariáu”. Y fixéronlo precisamente na guerra civil española, una sociedá na que, tamién precisamente, los campesinos yeran la inmensa mayoría. Por eso la “vanguardia proletaria”, el PCE, nun tinía cuasi militancia nos tiempos de la república.
Pero agora sí qu’hai dos clases: la oligarquía y los demás. Un trabayador de Renfe que tien casa en propiedá, un fondu pensiones y lletres del tesoru, sedría hai cuarenta años un burguesón. Güei ye lo que ye, un paisanu qu’aforrara cuatro perres. Un profesor d’universidá sedría hai esos años un reproductor de la ideoloxía dominante. Güei ye lo que ye, un funcionariu con un sueldu mediu. Un ganaderu de lleche con trenta vaques sedría un terrateniente. Güei ye lo que ye, un trabayador que trabaya pa sigo mesmo.
Pero escontra esi ferroviariu, esi profesor ya esi ganaderu, sí hai una clas perafitada: la oligarquía comercial y financiera. Esa oligarquía tien les sos ramificaciones n’Asturies, mui poderoses. ¿Y daquién va dicime qu’esa oligarquía ta representada pol PAS o pola URAS?. ¿Nun tará muncho más abellugada por un gobiernu nel que tan Izquierda Unida, Los Verdes ya un grupu aparentemente nacionalista d’esquierdes que firma como BPA?. ¿O ye qu’El Muselón, les redes d’alta tensión, los centros comerciales o la especulación urbanístico potenciolo un gobiernu PAS-URAS mientres Andecha Astur ya UNA aplaudíen les actuaciones?.
Pero, ná, que nun s’espavorie naide. El PAS yá dixo que namái quier dir con URAS ya URAS diz que nun quier ver a los nacionalistes nin en pintura; el BPA siguirá con IU o, como muncho, dirá con UNA y García Valledor de cabezaleru; y Andecha Astur tirará sola porque l’alcuerdu con UNA sigue tan enartáu como siempres. Asina que, pa norabona de los esquierdistes, nun va haber interclasismu que valga. Otra vuelta a votar a la UNA o a Andecha pa repartimos los como muncho cuatro mil votos del 2003 o aprovecer esi domengu pa tomar unos vermús colos amigos. La esquierda nacionalista caltendrá les esencies y siguirá fiel a lo qu’ella considera “clas obrera”, compuesta al paecer por sectores que voten al PP o al PSOE pero que, eso sí, nun tienen el mal gustu d’”empalmase” cola identidá nacional.
Imprimir

21 comentarios:

  1. Plas, plas, plas. Desde la esquierda.

    ResponderEliminar
  2. Dixisti xusto lo que yo pienso, pero como siempres, muncho meyor espresao. Equí faláramos d´una allianza del pueblu contra la Oligarquía, una Oligarquía por ciertu venceyada a esi falsu conceutu d´"Esquierda Plural", onde bin se vio que´l Bloque ta perfechamente a gustu. Nun val con que se nomen "nacionalistes", hai que lo ser nel comportamientu real. Dixi en mio blog que XXSV nun se quier xubilar, nun se da por amortizáu d´una vez. El de los "burros empalmaos" y otros esencialistes d´esquierda nun maurecen d´una vez (adolescencia teórica o ideolóxica) y otros, los más nenos, son criatures que zuquen del tetu, y ensin esi tetu nun esistiríen. Dígolo equí otra vuelta: va haber que pensar enrefundar una cadarma d´autodefensa y pedagoxía nacionalista, sobro nuevos finxos que sían a llegar a la sociedá. La xuntanza pa min tenía que ser amplia, pero l´embeligru ye´l centru de rotación d´estos satélites d´IU, al empar, IU ye´l satélite de la FSA y asina mos va. En cuantes yo acolumbro les oreyes d´IU, yá se me va tola escitación. Marcho corriendo. CXB

    ResponderEliminar
  3. Yo toi nestos momentos convencíu de delles coses, dexando mui claro que puedo tar bien equivocáu. Por exemplu:
    Una, qu'un nacionalista que refugue la cuestión nacional o identitaria cola xida que seya nun ye un nacionalista.
    Otra que utilizar l'insultu descaráu como sustitutivu del razonamientu como tamos comprobando en ciertes persones estos díes caberos ye amosar unes nidies carencies de calter democráticu.
    Y tamién observo unes zunes totalitaristes en ciertes atitúes y discursos qu'arrecienden al más ranciu estalinismu.
    Saludos
    Saludos.

    ResponderEliminar
  4. Mio padre ye médicu de la seguridá social, mio madre administrativa nun despachu d'abogaos, yo soi bióloga y pongo copes nun bar y'l mio hermanu estudia oceanografía. ¿A qué clase pertenez la mio familia? Mio padre casi siempre votó al PSOE, mio madre nun vota nunca y yo voto Andecha Astur. ¿Son ellos la burguesía y yo el proletariáu? ¡Vaya analises que faen dalgunos!

    ResponderEliminar
  5. Nun teo'l vezu d'escribir nos blogues, anque dalgún, como esti, sígolos davezu. Pero esto yá sobropasa cualquier racionalidá. ¿Ye que hai que lleer esto que diz Rivas pa sabelo? ¿Ye que nun ta claro dende siempres? Si los comunistes de les organizaciones "nacionalistes" nun creyéis na nación, coño, pues marchar. De xuru qu'esos criterios que tenéis pa los asturianos nun los tenéis pa otros. ¿Cómo ye que defendéis la causa palestina? ¿Ye que Hamas ye un partíu "de clase"? ¿Y los indíxenes del Amazones?, ¿otra clase? Valvos tóo en mediu mundu y ponéivos estupendos n'Asturies. Lo que tenéis ye fobia a la identidá asturiana.

    ResponderEliminar
  6. Un bon murniu repasu d'esta sociedá na que vivimos. Pue paecer de bobos, pero presta atopar xente con un «diagnósticu» tan asemeyáu al qu'ún tien (va pol autor, y polos comentaristes). Otra cosa ye la «prescripción» afayadiza pa esti país, mandáu que cuasi lu dexamos pa la seición de «psiquitaría». Saludos.

    ResponderEliminar
  7. Rivas ye decepcionante qu'acabares escribiendo obviedaes pa la clá de los foros.
    Paezme que tu yes otru síntoma más de como ta too.
    Saludos a Vampirella y a Voltaire.
    Vendrán tiempos meyores.

    ResponderEliminar
  8. Toi d'alcuerdu con Wittgenstein en dalguna cosa. Que Rivas tenga que baxar a pelease nos foros ye un síntoma de lo que mos pasa. Pero yo entiéndolo. Que xente con mui poca trayeutoria y formación nun reciba respuesta a les sos incongruencies ye de dolor. Agora, Wittgenstein (que ya te val), de la to intervención solo queda pensar que n'internet namás quede pa zoquetes. Yo pienso lo contrario. Ye mui importante que xente como David Rivas participe no que güei ye un modu comunicación. Anque seya pa criticalu.

    ResponderEliminar
  9. Toi d'acuerdu con Rivas en munches, munchisimes coses pero equivocase de planu n'otres. Por exemplu equí tamos debatiendo sobre la responsabilidá de los partíos de la izquierda nacionalista nel fracasu de la xuntanza pero escaecemos que quién dixo abiertamente que non ye'l PAS. Totalmente d'acuerdu que la oligarquía ta venceyada a la "izquierda plural" esa y qu'hai que facei frente pero coime, hai que pidir responsabilidaes a quien les tiene. La UNA fizo un conceyu nacional nel que convidó a muncha xente, Andecha fizo un conceyu abiertu colo mesmu. Los que nun abrieron la mano nin un pocu foi'l PAS, nin mencionar a la URAS,y eso nun hai qu'escaecelo. Tamién dicir al raposu colorau que'l to planteamientu ye simplón y esos ataques nun favorecen a naide mas que a ti que taras arguyosu na to casa por escribir eso. Digote esto porque yo mesmu me considero socialista, o comunista como quieras, y soi muncho mas radical no nacional qu'otros que nun lo són. Yo nun milito nun partíu pero munches amistaes si y opinen como yo. Medré no ideoloxico colos Cubanos, los arxelinos, los irlandeses, los vascos, los catalanes o los Mau-Mau donde lo social diba al empar de lo nacional y asina sigo y siguiré pero ensin escaecer que vivo nun mundu que tamién merez ser salváu, como Asturies. Un vascu dixolo meyor que yo: " Un nacionalista vién a ser un ecoloxista. Un ecoloxista de calter internacionalista. Un ecoloxista que busca los derechos de toles especies. De la mesma manera qu'un ecoloxista quier conservar tola biodiversidá, un nacionalista, como nosotros pescanciamos, un nacionalista ye una persona que defende los derechos de tolo...s pueblos a sobrevivir. Que ye daqué totalmente estremáu a lo que defienden los españoles, Hitler n'Alemaña, lo que faen los EE.XX. El so nacionalismu, mal llamáu nacionalismu lo usen pa ñegar los derechos a otros pueblos. Ye la diferencia ente un nacionalista y un hexemonista.."

    ResponderEliminar
  10. Una aclaración. Ye verdá, tienes razón, qu'Andecha y UNA amosaron una xenerosidá y una intención d'abrir files que nun tuvo'l PAS. Sánchez Vicente sopelexó siempres un despreciu evidente pola posibilidá d'una gran coalición. Pela so parte d'URAS nun supimos nada. Namás que la esquierda tuvo amplitú de mires, mientres que'l centru-drecha sigue pensando que "solos podemos". Una vegada dicho esto, l'artículu míu nun ta pensau pa criticar a UNA o Andecha, tolo contrario. Ye una crítica a los que, dende posiciones teóricamente d'esquierda asturiana, paécenme mui poco asturianos y mui deficientes analíticos d'esquierdes. Nun sé lo que va pasar definitivamente pero yo, concretamente, voi tar el sábado en Villaviciosa, cola xente que, pesie a la que ta caendo, sigue siendo la mía: la esquierda nacionalista.

    ResponderEliminar
  11. Al final la izquierda marxista que quier d'Asturies que sía la reserva espiritual del comunismu d'Ocidente yá tien lo que quería. Salvando les esencies, nun va haber interclasismu nengún en beneficiu del País. Y ye que pa esta xente val más morrer pero ensin contradición nenguna.
    Tocántenes a lo que diz Rivas de qu'hasta agora nengún izquierdista necesitaba recurrir al ataque a la identidá nacional, tien una esplicación bien cenciella. Y ye qu'agora hai muncha xente de la izquierda española que nun ve nel proyeutu d'IU y demás satélites una ferramienta amañosa y desembarca nel nacionalismu pa llevalu per onde ellos quieren. Más nada. Podrán ser tolo izquierdistes, marxistes, socialistes, maoístes que quieran, pero de NACIONALISTES nada, porque pa cualesquier nacionalista nel mundu lo primero ye la Nación, y esta xente sí qu'anda tol día empalmao con too menos cola identidá nacional, que ye'l pegoyu del nacionalismu. Anden empalmaos cola llucha de clases, col manifiestu comunista, cola plusvalía, cola revolución del 34, la rusa, la república española, garzón...con too menos con Asturies. Estos mesmos son los que refuguen tamién la vindicación de la historia medieval asturiana y la etapa de formación de la Nación na dómina del Reinu.
    P'acabar, cuantu dañu fizo y sigue faciendo anguaño'l socialismu y l'internacionalismu proletariau, que nun traxo a esti País más que miseria y despreciu y odio a lo asturiano, a lo propio.

    Gran artículu David, como la gran mayoría.

    ResponderEliminar
  12. Ties razón pero tampoco nun dixe que l'articulu fora escontra UNA y Andecha pero nel alderique que se desendolcó alredor de la xuntanza quiciás un erru foi que tol pesu cargose al llombu de los partíos de la izquierda nacionaliega. Quiciás porque los entamadores de la iniciativa tan encasillaos nesa opción politica, nun lo sé, pero ye probatible. De toes formes yo creo que l'apaición de los dos articulos d'opinión de los militantes d'Andecha y UNA respuenden a dos coses mui asturianes.
    Primeru que los asturianos tenemos la costume de calentanos mui prontu. Por eso hai tantu politicu de chigre. Nes selmanes pasaes hebo pelos foros auntentiques salvaxaes de "trasgos" que curiosamente taben cola xuntanza anque llograron tolo contrariu. Yo ensín ser militante de dengún partíu reconozo que coses que se dixeron me firieron, que nun fadrien a los militantes... Tal vez, y esto digolo ensín acritú dala, los que vos moyasteis mas pola xuntanza nun disteis la cara en defensa del indiscutible patriotismu d'estos militantes. Ye posible que'l pidir y pidir responsabilidá pero ensín pasar la mano pel llombu nun dea un bon resultáu.Ye la mio opinión anque a toru pasáu too ye mas facil.
    Lo segundu ye lo del discursu. Esto nun ye un mal de la izquierda nacionalista, ye un mal de tola sociedá asturiana. Yo que mamé del catalanismu veolos a años lluz en madurez y responsabilidá. Y nun falo de los partíos oficiales, falo de les CUP, Endavant, CAJEI, Maulets... precisamente estos ultimos cayeron nel pozu de discursu feble (independencia, socialismu, autodetermin...pero ensín conteníu) y les CAJEI en 3 años duplicaronlos en militancia. Agora estos dos ultimos tan en procesu de xuntanza, lleven ya un añu aconceyandose selmanalmente pa ello. Esto amuesa una madurez que ya mos prestaria a munchos. Por eso digo que nun se pué acusar a 2 mozos de lo que ye un mal endemicu na sociedá.
    Pero yo camiento que de too pué salir coses bones:
    -Amosaron que los militantes de los dos partíos nun son tan estremaos.
    -Dieron la cara, cosa non mui normal.
    -Salieron en defensa de les sos idees. Que pué paecer retrogadu pero pa min ye loable.
    Ensin mas. Salú.

    ResponderEliminar
  13. Si nun lo entendí mal ye mal síntoma que David Rivas entre na "cla" de los foros. Yo pienso lo contrario. Yo nun toi apegada al ordenador pero lleo noticies un par de veces al día, como otru llee El Comercio. Solo qu'esto ye interactivo. Y préstame lleer coses interesantes y non blogues babayos. Pero amás ye que a David insultáronlu directamente dende Aruelu. Ye l'únicu nacionalista d'importancia qu'apostó claramente por una coalición amplia, razonándolo. Y llamáronlu "burru empalmáu". El contestó con un artículu mui bien fechu. Yo igual saldría devolviendo insultos.

    ResponderEliminar
  14. Atropar la Cai dixo: "Tal vez, y esto digolo ensín acritú dala, los que vos moyasteis mas pola xuntanza nun disteis la cara en defensa del indiscutible patriotismu d'estos militantes."

    Ye que ye eso precisamente lo que se discute. Que se diga "indiscutible patriota" al de la famosa fras del "empalme" ye p'alloriar. ¡Si lo qu'equí se ta denunciando ye que ye un atentáu a la nación y a los que puxamos por ella! Por si hai dulda, copio la cita darréu otra vegada:

    "Y nel asturianismu dellos empálmense cola oficialidá, la identidá y l’autogobiernu, talos como los burros colos güeyos tapaos pol amu de tal manera que namás pueden mirar p’alantre y non pa los llaos. Falen de xuntanos pola salvación de la patria, de facelu pol bien d’Asturies, asina, por un supuestu “bien” que ye abstractu, vacíu, ensin definición dala más alla de la cuestión de la llingua ya identidá." - Félix Fernández.

    Yo siéntome dafechu identificáu cola definición del nacionalismu como ecoloxismu cultural qu'apurristi más arriba. Lo qu'equí tamos viendo ye un ataque direutu a ESI nacionalismu: a la xente que mos esmolecemos, lo primero, pola vindicación d'una nación que quieren esborriar de la Tierra.

    Pa éstos, eso ye secundario. "Vacío".

    Tenemos que los sacar de los nuestros partíos DARRÉU. Que colen pa los partíos comunistes españoles ya internacionalistes onde pertenecen. Cáncanos antiasturianos yá tuvimos abondos infiltraos nos nuestros partíos.

    ResponderEliminar
  15. Y otra cosa que dexé nel tinteru. ¿Qué ye eso de "nun me contesten, manden un correo"? Esa ye otra diferencia: nel blogue de David nunca s'esborria nada.

    ResponderEliminar
  16. Palos na romería29 de mayo de 2010, 14:08

    Tuve lleendo la entrevista a Carlos Blanco n'Infoasturies y llámame l'atención la so coincidencia con David Rivas. Lo de Blanco ye siempre más farragoso, pola terminoloxía tan marxista qu'emplega pero los dos dicen lo mesmo: una xunión frente a la oligarquía que ta matando Asturies. Lo que sí me presta muncho ye que tamos delantre dos persones valientes intelectualmente, que nun tienen mieu a "quedar mal", que son llibres. ¿Por qué será que los dos tuvieron que buscar la pancheta notres tierres? Menos mal que Rivas ye quien a seguir viviendo n'Asturies, cosa que Blanco nun pudo. O, yo que sé, igual ta meyor viviendo nun llugar de La Mancha.

    ResponderEliminar
  17. David, creo tamos nel bon camín. Un camín llargu, abegosu y con un final entá llonxanu, pero nun queda más que bregar.
    Prestame muncho la to valentía.
    ¡¡Puxa Asturies!!

    ResponderEliminar
  18. Esta ye la esquierda que se necesita: crítica y ensin clichés. Ya valió de tantos años d'eslóganes y de tirar d'autores santones que naide vio nin pel forru. ¡Vémosmos nes escueles de la villa!

    ResponderEliminar
  19. Cuanto mas lleo a David Rivas más lu entiendo. Nun m'alcuerdo muncho de como fueron les coses cuando abandonó la llista d'Andecha hai unos años pero, visto lo visto, seguro que tinía razón y razones. Ye difícil nun tar d'alcuerdo con él en xeneral porque tien una visión d'Asturies clarina y esprésalo entá más claro. Cuando marchó igual ganamos un bon críticu intelectual pero perdimos l'únicu políticu brillante y xenerosu que tenía'l nacionalismu.

    ResponderEliminar
  20. Tuve trabayando nuna bra de la de dio cerca de Toledo. Luego anduve un poco mamau por Madrid y acabo de dame cuenta d'esti ertículu. Yo non puedo decir nada pero toi d'acuerdo. Separaos nun vamos a ninguna parte. Pero en fin, yo non soy responsable, Seralo Sanchez Vicente o UNa o Andecha, nun lo se. Y tu David tampoco vas ser culpable. Tas faciendo lo que buenamente puedes. Un saludin

    ResponderEliminar
  21. Como diría PiXi: "la culpa ye de los pás, que vistenlos d'asturianistes!"

    salú David, como presta lleete

    ResponderEliminar

Nota: solo los miembros de este blog pueden publicar comentarios.