3.4.10

El final de l’acción política (2)

Tiníamos nueva executiva pero col programa estratéxicu de la vieya. La ponencia aprobada aceptaba ya inclusive allendaba los movimientos pa una alcordada con IAS, pero ametía tantes condiciones que, de fechu, cuasimente torgaba cualisquier ensayu. Yo vía claramente que los alcuerdos taben poniéndose imposibles. Había tres puntos qu’Andecha Astur, conforme a lo aprobao nel conceyu nacional, consideraba innegociables: la integridá llingüístico d’Asturies, el caltenimientu les sigles na coalición y la mio candidatura a la presidencia.
Ya equí hai dir per partes. Les condiciones taben puestes por una organización que nun tinía unanimidá sobro la posible coalición. Amás, nun ye verdá qu’Andecha toviere dixebrada en dos metaes. Esa fora la gran mentira que dalgunos, de les dos tendencies –los “duros” y los “blandos”-, quixeron faer creyer a los demás. N’Andecha Astur alfrentábamos a una montonera tendencies. Asina, por exemplu, Dani Cueli –con una coherencia que lu honra- siguió arre qu’arre defendiendo que la organización tinía dir sola, posición que siempres acoricara, independientemente del pautu concretu o del partíu concretu que tuviere enriba la mesa. Si yá fixera eso cuando Europa de los Pueblos, ¿a quién-y diba estrañar que nun quixera’l pautu con IAS?.
Lluéu taben los que naguaben pol pautu pero que víen perdifícile sacalu alantre porque desconfiaben de los interlocutores, non por deslleales sinon por inorantes de la política. Esos yeran los casos de los esperimentaos Germán Abad y Marcu García, inxustamente trataos más sero polos andechos más puristes. Pué ser qu’Abad nun seya persona mui clara nes sos posiciones, más por calter personal que por otra cosa, pero acusalu poco menos que d’infiltráu d’Izquierda Unida dempués de tolo que pasara dende diben años nun ye d’arrecibu. Y polo que respecta a García, namái que sentí una crítica nel sen de que naguaba por ser el másimu dirixente de la CSI. Igual yera verdá pero, ¿pa eso hai de vender al nacionalismu?, ¿desixe la Corriente traicionar a Andecha Astur pa qu’un militante algame la secretaría xeneral?. La mio entruga yera otra: si’l principal dirixente la CSI fore nacionalista, ¿nun sería un avance descomanáu, lo mesmo pal nacionalismu que pal sindicalismu dafechamente asturianu?.
Ya equí quiero facer un paréntesis. La posibilidá de qu’un nacionalista se punxere al frente la CSI yera mui probable. Yo nun sabía muncho d’estos asuntos porque siempres toviere un tanto alloñáu del mundín sindical pero sí yera conocedor de dellos estremos. Na CSI taba produciéndose entóncenes un alderique internu de muncho calao ideolóxico ya estratéxico. Figures tan emblemátiques como Morala yá poníen en duldia munches de les coses nes que siempres creyeren y la vía nacional abríase pasu, con más rapidez de lo que munchos piensen, nel sindicatu. Inclusive xente afín al PCE “de tola vida” entamaba ver al nacionalismu d’esquierdes como’l so nueu referente. Y nesa griesca, nesi cambéu imposible unos pocos años enantes, la figura de Marcu García yera central. Home comprometíu cola clas trabayadora dende siempres, cultu y que nun pertenecía a los sectores productivos “clásicos”, igual pudiere ser la persona idónea pa un momentu idóneu.
Nun voi esconder que siempres tuve por Marcu García una particular “debilidá”. Elli conocía como naide l’ámbitu llaboral del que yo poco sabía polo que daprendiera muncho, como lo daprendiera tamién con Ezequiel Sánchez. Amás, lo mesmo ún que l’otru calteníen un sentíu l’humor que yo vía perdiéndose pente los nacionalistes. Ya esto nun ye una “boutade”. L’humor siempres fore importantísimu pente los asturianos, tanto que Julio Somoza afitó nello una de les esencies patries.
Vamos volver a la llínia principal, a falar de les “corrientes” que taben presentes n’Andecha Astur cuando aquello. Evidentemente tamién había partidarios del pautu al preciu que fora, con un discursu tremendu que yera, a la postre, una criminalización dafechu d’Andecha, de nós mesmos, pa valorar a IAS como’l nacionalismu progresista y modernu al que tanta bambolla-y dieran ellos demientres años. Con esa posición lo que taben yera avalando les teoríes conspiranoiques d’otros compañeros, que creyíen ver infiltraos per tolos llaos, que creyíen tar arrodiaos de xente que naguaba por finar col proyectu d’Andecha, “entreguistes” nel llinguax de la guerra civil. Yeren poques persones y denguna en puestos de decisión. De fechu, cúestame recordame de nomes pa rellenar esti casieru, sacantes Chus Zapico, agora mui favoratible a IAS cuando históricamente yera –o eso aparenciaba- favoratible a URAS.
Pa finar, claro qu’había compañeros que namái víen esa coalición como francer la tradición pero igual inevitable, a los que yo nomaría los “radicales escépticos”. El so trabayu fora entós el de buscar tolos pilancos posibles pa facelo imposible pero, nel fondón del so maxín, sabíen que, o pasaba dalguna cosa tremenda o l’apautamientu yera inevitable. Pue qu’en delles ocasiones intentaran forzar la máquina pa que’l pautu nun saliera bien, pero enxamás punxeron trabancos al llabor de los negociadores. Nun-yos prestaba muncho l’alcordada pero víenla inevitable y seguramente necesaria. Esa yera la posición de vieyos militantes como Chus Nel Álvarez y a esta tedencia yera a la que más m’averaba yo mesmu.
Tampoco había una postura unánime pente la xente de Darréu y los sos representantes na xunta nacional d’Andecha nunca torgaron esplícitamente les conversaciones. Mariu Arbesú, posiblemente ún de los sos militantes más críticos pa con IAS, siempres sofitó a la comisión negociadora.
Lluéu taben Fernán Gonzali Llechosa, Arturu Bermeyu, Carme Pérez Antolín o Dulce Xil, esto ye, los más contrarios a una posible alcordada. Normalmente éstos apuntábense al discursu de los radicales escépticos, pero sí trataben de torgar los movimientos favoratibles al pautu. Nun-yos faltaben razones pa la so desconfianza, porque, como veremos dempués, falar con IAS yera, en más d’una ocasión, nun tener con quien falar. Pel so lláu, Fernández Marqués, significativamente pa los que conocíamos el furrulamientu íntimu de la organización, taba calláu y nin diba tan siquier a les xuntes nacionales, xuntes nes que s’instalara la desconfianza pente munchos collacios. Y nesta llínia tamién taba Mariano Suárez, que diérase de baxa precisamente polos choques constantes colos qu’agora dirixíen el partíu y que diba regresar dempués de la rotura.
De toles formes, ye necesario facer un analís particular sobro Arturu Bermeyu, que fore secretariu xeneral dementres años. Nel asuntu de les conversaciones pa la xunidá, la postura de Bermeyu yera dalgo complicao. La so trayectoria política –n’Andecha modificar la trayectoria yera poco menos qu’herexía- llevábalu a tar en desalcuerdo col pautu, pero la so llealtá a les decisiones de la organización llevábalu a lo contrario. Bermeyu siempres se comportara, dempués de cualisquier decisión de la organización, como un –permítaseme la espresión- militar disciplináu. Namás que mos la podía armar cuando, ensin decisión tomada sobro un problema, dába-y por actuar pela so mano ya yera capaz de llevar p’alantre polítiques “kamikaze”. Amás, na comisión negociadora taba’l so hermanu, Pin Bermeyu, precisamente’l que mayor enfotu tinía nuna xunión más amplia entá que la suma d’IAS y Andecha, pol que caltenía una fondera almiración ya un gran respetu. De fechu, les frecuentes engarradielles d’ésti cola mayor parte de l’anterior xunta executiva yeren pal secretariu xeneral motivu de permanente atragantón.
Les tres condiciones qu’Andecha ponía enriba la mesa nun tiníen, por llóxica, la mesma potencialidá. D’un lláu, nun querer delir les sigles notru inventu “ilusionante” –pallabra-talismán d’IAS- paecía mui razonable. Los esperimentos como la Coalición Asturiana ya’l BIA yeran pures vacunes nel cuerpu’l nacionalismu. En segundu llugar, que’l candidatu a presentar perteneciere a la organización más fuerte yera de cenciella racionalidá, ametiendo amás que si esi candidatu yera yo mesmu taba garantizao l’ausencia sectarismu, porque si dalgo tinía yo como timbre yera precisamente un escasu patriotismu de partíu.
Agora bien, la tercer condición yera muncho más problemático. La xunidá llingüística l’asturiano yera, dafechamente, ponese a la contra de la denominación de “gallego-asturiano” de la variante llingüística falada pente’l Navia y l’Eo. Ya esti asuntu salíase de fechu d’un puntu d’agüeye políticu pa entrar nun alderique de calter científicu. Políticamente la custión yera refugar claramente l’intentu nacionalista gallegu de, sobro la basa llingüística, falar de catorce conceyos asturianos como tarrentoriu gallegu, la “Galicia irredenta” de los infantilistes de la Unión do Pobo Galego. Pero d’esto a poner nuna negociación político condiciones filolóxiques había una llevia. La mió posición yera perclara no político pero, respetuosu cola ciencia ya’l conocimientu, nun podía afitar unes negociaciones pente dos partíos en custiones que quedaben fuera l’ámbitu políticu.
Si lo que falen en Castropol, en Bual ya en Taramundi –pongo estos exemplos porque sopelexen, nel mio curtiu atalantu, estándares estremaos- ye lo mesmo y nun ye del dominiu asturllionés, yo nun lo sé. Pero conozo bien esa rexón –mió padre naciera n’As Figueiras- y paezme qu’en Ribadeo y Fonsagrada nun falen cosa mui estremada de lo que falen n’A Veiga o Santantolín. Por eso yera fácilemente pescanciable la politización que d’un asuntu llingüísticu facía Andecha Astur: ¿cómo ye qu’en Castropol falen “gallego-asturiano” ya en Ribadeo “gallego-gallego”, gallego dafechamente?.
Nel fondu, con esti pilancu llingüísticu, lo que pretendíen los andechos más duros yera poner a IAS escontra’l paredón, porque dellos cabezaleros d’esa organización implicáranse enforma nes tesis galleguistes –bien ye verdá qu’inocentemente, como yá despliqué- nos primeros años noventa. Tamos falando d’un partíu col mayor númberu filólogos per metru cuadráu de la historia d’Europa, quitando –nun ye con mala intención esta observación- el partíu nacionalsocialista alemán de los años trenta. ¡Probe del país que ponga’l so futuru nes manes de los sos filólogos!. Entóncenes, seguramente que con poderoses razones científiques, los filólogos de la rodolada d’IAS consideraben esa fala de posible transición como del tueru galaico-portugués. Otra vuelta, ya ye raro, lo gallego delantre’l guión ya eso que nesti casu la llingua potente ye la portuguesa. Nesta situación, Andecha Astur politizaba l’alderique porque venía politizáu dende años enantes. Igual científicamente nun tinía xacíu, pero políticamente taba tan clariquino que dicir lo contrario yera tendencioso y antiasturiano.
Pero los negociadores d’Andecha, Bermeyu, Abad ya yo mesmu, nun podíamos poner como estorbiciu fundamental un asuntu llingüísticu, siendo como yéramos conscientes de qu’esa yera l’armadiella que los roceanos pa col pautu mos dexaren. Yera p’avergoñamos como nacionalistes d’un país que taba morriendo que la formación d’una coalición con posibilidaes de representación –había encuestes que mos daben un diputáu- quedara pa práu por unes cuantes isogloses. Esa condición impuesta dende Andecha ponía malos a los Guardado y compaña, qu’entraran como cernetones al enguade, dándomos unes charres de filoloxía románica insoportatibles. Ellos taben más esmolecíos por salvar el so prestixu académicu que por facer una opción política. Nosotros, a la escontra, nun yéramos quien a arreblagar perriba d’aquella condición llingüística tan innecesaria.
El primer aconceyamientu tuviéramoslu, nun ambiente informal, nel café Oriental d’Uviéu. Ellí mos vimos Pin Bermeyu ya yo por Andecha Astur ya Inaciu Llope por IAS. Alcordamos llevantar un acta sobro lo falao y firmala, pa que les dos organizaciones supieren siempres qué ye lo que tábamos tratando. Esi fora l’esquema que siguiéramos hasta lo cabero. Pamidea que tuviéramos otru par de sesiones informales pero les siguientes yá les fixéramos na sede d’Andecha na cuesta d’El Naranco y na d’IAS enriba la vieya estación de los alses. IAS unviaba interlocutores distintos, lo que mos obligaba a volver falar de lo yá falao colos anteriores. Cuando nun tiníen que dir a desaminase a la universidá, tiníen otros problemes propios de la edá. A mín aquello paecíame más un alderique colos miós alumnos qu’una negociación pente organizaciones polítiques. Más de dos menses perdimos hasta que, yá coles ellecciones a la puerta, delegaran, como yá dixe, en Llope, Huergo y Guardado y les coses entamaron a iguase. Unes selmanes dempués, tres de la marcha de Pin Bermeyu, xuntose a la delegación Rober Holgado.
Los delegaos d’IAS tiníen una ventaxa escontra nosotros: la so organización dexába-ys marxe pa negociar mentanto que la nuesa tiníamos amarraos con podrelles pa mastinos. Izquierda Asturiana yera dende la so fundación un partíu d’esquierda clásicu, mentres qu’Andecha Astur yera una organización asambleyaria. En más d’una vegada Abad, Bermeyu, Holgado ya yo entrugáramos que pa qué tábamos negociando si pa munchos collacios l’asuntu reducíase a qu’IAS arrepostiare a los tres puntos innegociables. Nós pensábamos que, si les coses tiníen de ser asina, meyor resolvíamos la papeleta unviando una carta y que mos dixeran si sí o si non. Nun ye posible negociar nada si los negociadores nun tienen marxe dengún y se comporten como magnetofones que repiten y repilen lo alcordao nuna xunta aparentemente perdemocrática. A la contra de lo que pué paecer a una güeyada cenciella, l’asambleyarismu fina por ser, munches vegaes, una forma totalitaria y antidemocrática de tomar decisiones. En delles ocasiones l’aparente democracia directa sovera la dictadura d’una minoría que pretende encarnar les esencies ideolóxiques.
Pesie a tóo, y non ensin tener les nueses más y les nueses menos na organización, dexamos de lláu l’asuntu llingüísticu. Y mira que yera fácile salir del encaboxu: con dexar nel programa namái que la referencia a la oficialidá la llingua taba tóo iguao. Pero si los nuesos se poníen arrechos pa sopelexar el “continuum” llingüísticu, los d’ellos, enchipaos d’universidá, queríen a toa costa qu’aceptáramos galleguidaes filolóxiques. Menos mal que Llope pescanció bien la situación y aceptó aparcar l’asuntu, cola avenencia de Huergo y la resistencia de Guardado.
Mentres tábamos nestos alderiques la situación interna d’Andecha entamaba ponese achanfullada...

9 comentarios:

  1. L'asuntu llingüísticu yera facer un mundu d'una caxigalina, yera'l mieu al otru, yera'l marcar la diferencia ensin conocimientu dende'l fondu de la realidá. Yera la semeya del país. Y el tiempu siguió pasando.

    ResponderEliminar
  2. La idea de les "dos partes" yera una realidá, si bien, dientru de cada parte hebio delles opiniones, pero na prautica taben los que querien pautar con IAS en condiciones d'igualdá y los que querien qu'IAS sumara al proyeutu d'AA, dientru de la mesma.

    Esti caberu perfil llevaben defendiendolu la "executiva vieya" durante 16 años y nun llego a furrular, ente otres coses porque abemos falando de 2.000 contra 800 votos, colo que falar de "referentes" daba perceguera, ¿referentes de que? de 3.000 votos... puxarra si queriemos llegar a la sociedá asturiana, eso si, referentes del nueso guetto, de xuru.

    La to posición David, nunca tuvo nidia nesi asuntu, quiciabes pola to simpatia coles diferentes partes, anque cuando foi necesaríu "tomar parte" mantuvistete al marxen, según el mio paecer.

    ResponderEliminar
  3. Atalanto, Rivas, qu'amuesas tu miesmu la solución al problema de la galleguidá (nel casu que la heba; pa min yía asturianidá, ya soi de los que defenden que nuna parte d'Asturias se fala gallegu) si utlizararamos esi humor asturianu más.

    Nun séi, lleva falandose gallegu n'Asturias dende que se fala tamién asturianu ya gallegu en Galicia. Inda añedo, fálase antes tuvía que n'Angola, Mozambique ya Brasil... Inda se fala antes gallegu n'Asturias de que naciera'l nacionalismu asturianu...

    Poro, el gallegu yía llingua propia d'esi país; pero non por ello somos nin Angola, nin Brasil, anque nun taba mal poner un sambodromu n'Eilao... Séi de muncha xente d'esa fastera a la que nun-y diba paecer mal pa nada.

    Pero en fin, dientro del asturianismu, ta tán penáu casi l'humor de nuesu cumo la outra llingua de nuesu, ou d'una parte de nós. D'una parte de nós, el gallego-asturianu. De todos, l'humor.

    ResponderEliminar
  4. Les 7 diferencies4 de abril de 2010, 18:18

    David, cuanto más te lleo más pienso que tas reinterpretando d'una manera persuxetiva tolo que pasó.
    Nesti últimu artículu hai dellos exemplos. Dices que Mariu Arbesú sofitó a la Comisión. Sofitaríala, pero mira lo qu'escribió xusto cuando se taba negociando:

    http://infoasturies.net/index.php?option=com_content&view=article&id=113%3Ael-xuegu-de-les-7-diferencies&Itemid=59

    Lleendo eso nun fai falta lleer más porque, con tolos respetos, ye muncho más clarificador que'l to blogue. Anque tea peor escrito y menos entretenío.

    ResponderEliminar
  5. Claro que soi subxetivu (nun sé si "persubxetivu"). Nun soi un historiador qu'analiza una dómina o un movimientu. Soi un actor, unes vegaes central ya otres secundariu, qu'interpreto lo que viví. Teo los datos que teo y de xuru que m'engañé o m'engañaran delles vegaes. Si fora un obxetu sería obxetivu, como soi un subxetu soi subxetivu. Nun pretendo tener la verdá nin la obxetividá, pero lo que sí me tengo ye por honráu cuando cuento lo que cuento.

    Polo demás, como siempres, munches gracies poles observaciones. Tan valiéndome muncho, riba tóo les conexones que me dáis, porque munches nun les conocía o tiníales escaecíes.

    ResponderEliminar
  6. El tema de la oxetividá veo qu'a la fin quedó totalmente pa prau. En rempuesta al mensax del enllaz, tampoco ye que'l señor Rivas faiga emplegu de la normativa de l'ALlA, probablemente porque nun pague la pena face-y casu a los filólogos que tán nella. Entrúgome si tamién escribirá cómo-y dea pola gana en castellán o, si nesti casu, escribirá cola normativa establecida.

    Comparar a IAS col Partíu Nacionalsocialista pol númberu de militantes filógodos, de xuru que ye una casualidá. Al igual que lo ye callar qu'AA cuntaba con un porcentax de militantes tan zarraos (que nun víen otro que'l discursu dogmáticu de máximos qu'apautare na fundación) apareyu al del Movimientu Nacional de tíu Pachu; que siempres defendieron y defenden una Asturies: UNA, GRANDE Y LLIBRE. Y si pa ello ye necesario ñegar la situación llingüísitca del Eo-Navia, nun pasa nada, too seya por una Asturies única. Pa facela "grande" tiramos de teoríes vilareyistes y el "llibre" encaxa perfeutamente nun discursu de calter socialista. ¿Veis qué fácil ye esbabayar escontra unos y otros?

    Nun llego a entender como daquién a quien siempres se-y tildó y consideró un inteleutual fale tan bien del fechu de qu'IAS tuviere munchos militantes universitarios; o que los sos negociadores lo foren tamién. O'l porqué echa en cara qu'esos 'universitarios' emplegaren la filoloxía pa falar de llingües.

    Lo más probable ye qu'arrespuenda al sentir d'un profesor que nun pue aceutar que tien de negociar como iguales con 'alumnos suyos'. Arguyu, altanería y prepotencia ye lo qu'arruza esti escritu, pa nada oxetividá.

    En fin. De nada sirven les pallabres candiales y afalagantes del congresu d'UNA si dempués s'escribe eso de xente que güei ta n'UNA y que quixo qu'UNA saliere p'alantre y qu'agora anden intentando xuntar a quien nun se quixo xuntar. Y nun falo solo d'AA, como se pudo ver, tamién tuvieren el PAS y el Bloque.

    Pedieres un llector, que nun soi nada nin naide. Pero ganáreste la mio antipatía a pulsu.

    Saludos nada candiales, Pelayu (que quede constancia que roblo y nun m'abellugo nel anonimatu pa facer una crítica como otros fixeron nesti blogue anteriormente).
    http://republicaasturiana.nireblog.com/

    ResponderEliminar
  7. Pelayu, nun t'encabrones asina. Yo tampoco toi d'alcuerdo con tolos analises que fae David Rivas pero ye la primer vez que se mos da una visión d'estes coses ¿O ye meyor seguir colos alderiques de chigre y con anónimos?. ¿Nun val más poder discutir con quien firma y se responsabiliza?. Ye verdá que Rivas pega unos tiros a veces improcedentes (creo que lo de los nazis hai que tomalo con humor negro), pero hai que lleer estos post en conxuntu. La crítica dura vendrá al final, si ye menester. Yo nun voté nunca Andecha y con Rivas nun falé nunca (y soi ya mayorín) pero pienso qu'esto que cuenta, suxetivo, ye mui importante.

    ResponderEliminar
  8. Aires avilesinos6 de abril de 2010, 0:06

    La política yo la entiendo, amás como cuestión de gobernabilidá, tamién como un instrumentu de tresformación social, conceptu que ye'l que mayormente algama esti significáu nel ámbetu nel que nos movemos dende nacionalismu asturianu, ya seya cuestión d'ámbetu social o nacional. Pal mio mou de ver ye imposible facer política ensin qu'esta s'afite en realidaes sociales científiques y nel tema la llingua Andecha Astur tola vida s'alloñó de plantegamientos científicos pa crear una rialidá paralela y falsa sobre tolo que cincaba llingüísticamente al occidente asturianu. Y non, pal que s'atreva a negámelu, les postures d'Andecha Astur nun son coincidentes coles de l'ALLA, les mentires anque se repitan nun se convierten en verdaes.

    Dame la impresión, David, de que nun quies moyate na cuestión filolóxica del occidente y dicir a les clares lo que pienses de que ye lo que se fala ellí, y me refiero a afirmaciones de to como: "Si lo que falen en Castropol, en Bual ya en Taramundi –pongo estos exemplos porque sopelexen, nel mio curtiu atalantu, estándares estremaos- ye lo mesmo y nun ye del dominiu asturllionés, yo nun lo sé". Creo, viniendo de daquién como tu, que nesti tema tienes una opinión más que perfecha, quiciaves seya esti'l momentu d'amosala.

    Per otru llau, a mi me prestaría, David, que nos dieres más info sobre esa supuesta encuesta que-y daba un diputáu a un pautu Andecha-IAS. Yo yá lo escuchara, pero siempre me pareció más un cantu de sirena qu'una rialidá.

    Y anque pueu entender molesties como les qu'amuesa Pelayu nel so retruque, ye ciertu qu'anque güei toi dafechamente d'alcuerdo col proyeutu d'UNA, nel so día nenguna de les partes nun lo ficieron tolo bien que deberíen como amueses nel to articulu. Anque lo que comentes d'IAS y la poca seriedá qu'amosaben dacuando nes negociaciones, tamién ye ciertu qu'esto casi llega a caxigalina en comparanza a lo que taba aconteciendo n'Andecha Astur.

    Colo que dices de Marco y la CSI, "chapó". Toi como llocu a la espera de ver el "desenllace" de los tos articulos.

    Saludos.

    ResponderEliminar
  9. Aires del Nalón7 de abril de 2010, 0:30

    Yo tamién pienso, David, que lo de la fala Eo-Navia tiéneslo mui claro. Nun te val de muncho escudate en que nun sabes de filoloxía porque sabes más que suficiente d'ello. Entiendo que tas dando pasinos porque romper bruscamente nun ye la to forma de ser, pero dámosmos cuenta.

    Tamién entiendo salides como la de Pelayu pero paezme cosa desproporcionada. Nun se puede responder tan brutalmente a un par de frases a lo meyor poco apropiaes pero que paecen sinceres y, amás, mui matizaes.

    David, la última vez que falé contigo fue n'El Entregu y entrugásteme pola mio opinión sobro estes histories que tas contando. Díxete que p'alantre, que nun apararas por comentarios hostiles y que nun esborriaras nunca nada. Veo que siguiste'l conseyu d'esti vieyu amigu.

    Nun toi d'alcuerdo con tolo que cuentes pero sé que ye como tu lo viviste.

    Un saludu.

    ResponderEliminar

Nota: solo los miembros de este blog pueden publicar comentarios.