El final de l’acción política (1)

Nel 2006 les coses diben obligaes. Andecha Astur namái podía colgase la medaya de ser la organización resistente pente’l nacionalismu, non namái d’esquierdes sinon de tol nacionalismu. Pero poco más podíamos ufiertar. Fora entóncenes cuando s’abrieran les negociaciones con Izquierda Asturiana. Yo recordeme de los alderiques en Cuideiru y de la visita de Riesgo a Llábana Prieta, n’Argañosu, nos años 1997 a 1999. Pin Bermeyu, mui activu como siempres, ufriérase pa falar con IAS, pero tamién cola URAS de Marqués y col PAS de Sánchez Vicente. Bermeyu, hermanu del entós secretariu xeneral d’Andecha, camentaba que yera una bona ocasión pa unificar l’asturianismu, conceptu –esi d’”asturianismu”- que munchos de los nuesos refugaben.
La xunta nacional d’Andecha Astur nomó como negociadores a Pin Bermeyu, a Germán Abad y a min. Pola parte d’IAS nun se sabía y aquello yera un cafarnaún, pero acabaran por ser Inaciu Llope, Iván Huergo y David Guardado. Tóo paecía dir bien. Los seis representantes asegurábamos la honradez nos discutinios al rodiu la xuntura porque yéramos tóos pautistes, anque con tonos diferentes.
Posiblemente tábamos nel meyor momentu pa entamar un procesu d’unificación o, cuando menos, de sincera aprosimación. Cada añu ellectoral andábamos colo mesmo pero nunca cuayaba dengún proyectu. La verdá ye que pocos tovieran la valentía de dicir lo que de verdá pensaben, de forma que yera pa quedase plasmaos delantre d’una entruga tan simplaya como comprometida: si toudiós quier una xunión del nacionalismu asturianu, ¿cómo ye que nunca s’algama?. ¿Igual yera porque, de verdá, mui pocos lo queríen?; ¿o igual nun había nada qu’ameter porque nesi espaciu políticu nun había nada fuera de la propia organización?; ¿o yera tala la incompatibilidá pente les organizaciones que finaba por ser tochez voluntarista aconceyase y falar col envís de llegar a alcordaes?.
El procesu d’averamientu políticu nun yera fácile por dellos motivos, pero igual el más importante yera’l más cenciellu, teóricamente, de tratar. Pa poder falar de xunidá de grupos nacionalistes lo primero yera llendar qué cosa ye “nacionalista” y qué cosa nun lo ye. Ensin una demarcación política ye imposible discutir de política ya, aínda más, facer política. Concretar les idegues y les postures ye daqué imprescindible pa encadarmar una política concreta ya una estratexa concreta coles sos táctiques tamién concretes. Hai unes llendes clares. Otra cosa ye que daquién tea una elasticidá tan grande qu’acabe pensando que les fronteres polítiques son les del mundiu porque, a la fin, toos somos d’una mesma especie humana y, polo tanto, toos tenemos los mesmos porgüeyos y les mesmes esperances.
A esti respective, naide podía duldar de la mio postura favoratible al unitarismu dende los tiempos más primeros. Tuvi de mozu na única organización nacionalista, el CNA, nun volví apostar por nada hasta la creación de la UNA –la gran ocasión perdida d’aquella dómina- y nun llegué a Andecha Astur hasta l’añu 1999, nun momentu nel que, precisamente, taba faciéndose un proyectu xunitariu pa les ellecciones, sólo que les coses salieran como salieran. Nes mesmes ellecciones de 1999 falé públicamente de la necesidá de qu’Andecha Astur s’entendese con Izquierda Asturiana. Pero nada dixi del PCPE nin del mesmu BIA porque nunca tracamundié les llendes polítiques del nacionalismu asturianu. Y tampoco falé de la URAS o del PAS porque yera a estremar pente drecha ya esquierda, pente rexonalismu y nacionalismu y pente lo popular y lo populista. Por eso, cuando falábamos d’aprosimaciones, yo atalantaba que tábamos falando d’averar posiciones pente Andecha Astur ya Izquierda Asturiana, a lo menos como pasu previu ya imprescindible. Más nada nun había, dexando de llau los alderiques que se caltuvieren con otres fuerces como Los Verdes o agrupaciones llocales.
La mió idega, que la espublicé en Les Noticies y que me valiera un analís psicoanalíticu del so columnista Xandru Fernández, onde facía una llectura metallingüística mui al tenor de les sos contribuciones periodístiques y del mediu nel qu’escribía. A esti repective, Fernández –ensin culpia personal más alló de lo elemental- formaba parte d’una nueva promoción lliteraria, de calidá evidente en munchos casos, pero que, por esi fechu namás, sentaba cátedra en política, n’economía, n’antropoloxía o en física cuántica si yera mester. Dalgunos de los sos conformantes, más qu’escribir, reñíen dende les sos columnes o daben conseñes a los que tábamos trabayando na política del día a día, con mayor o menor suerte, pero nel esbrexe. El casu ye que Xandru Fernández dicía daqué asina como “Rivas diz querer la xunidá pero na realidá íntima nun la quier…” pa, a continuación, faceme un retratu de psicólogu arxentinu de tebeo.
La verdá ye que los emplegaos parapúblicos de Les Noticies nunca me fixeran una entrevista –y foran unes cuantes- que nun fora metaconceptual, qu’igual ye una forma displicente de llamar a lo tendencioso. Chocantemente, igual la única sincera, na que pretendíen de verdá saber lo que yo pensaba fixéramela Xuan Bello cuasi al final de la mio presencia activo na política, cuando yera –camiento- responsable de la edición del periódicu. Porque les de Ramón Lluis Bande, José Luis Piquero y Beatriz R. Viado siempres tovieren un sesgu d’antipatía, a lo meyor non pa comigo, pero sí pa con Andecha Astur. La profesionalidá nun yera’l fuerte d’esi mediu precisamente. Puedo entender que tovieren como opciones otres organizaciones –anque saltaben del BIA al PAS y a IU asigún pegaben los vientos- pero enxamás comprendiere’l so añoriciu pa con una minoría. L’odiu a les minoríes polítiques, cuando nun tamos falando de xente inmnoral –racistes, machistes, antisemites, criminales, etcétera-, diz bastantina de les persones y de los grupos. Eso por nun falar de Francisco Álvarez, que, azorrando la so condición de candidatu’l BIA, atizárame bien dende’l periódicu como si fora un columnista independiente cualisquiera analizando l’actualidá político.
Pero, en fín, que tampoco voi dar más importancia a estes coses, anque-y les diera nel so día. Ye conveniente mirar toles coses con perspectiva, con un poco de distancia, pero la verdá ye que, na griesca del día a día relativices con dificultá y cuando, como yera’l mio casu, apuestes por una batalla que ta, nel entamu, perdida, cáfiate muncho que te vengan apaniarguaos a tocate los bemoles, másime cuando, en teoría, son de los tuyos o de la rodolada. Yo siempres conociera les mios llimitaciones –pesie a un razonable egocentrismu- pero nunca entendiera tantu güelpe dende la mio banda. El nacionalismu asturianu ye ún de los movimientos políticos con más baxes de lo que los militares llamen “fuéu amigu”.
Volviendo a la historia, el casu ye que la situación yera incaltenible. Les organizaciones taben embaxo mínimos ya yera evidente la necesidá de llegar a alcuerdos. Pero tábamos nel 2006 y les ellecciones taben convocaes pal 2007. Tiníamos menos d’un añu. Entós, escontra esto, la mio idega, espublizada con medies pallabres –cosa que-ys dio pa muncho a los freudianos de la “intelligentsia” patria- yera bien cenciella. Pero desplicarela un pocoñín más sero.
Al mesmu tiempu convocárase’l conceyu nacional, nun ambiente de tensión interna. Aconceyaos n’Uviéu, nuna sala l’auditoriu Príncipe Felipe, les custiones centrales yeran tres: la ponencia sobro estratexa, la ellección de los cargos directivos y la nomación de la cabeza llista a la Xunta Xeneral.
Yera evidente dende menses atrás que diben alfrentase dos ponencies sobro estratexa, centraes les dos nes polítiques de posibles pautos. Una d’elles, la menos proclive a les alcordaes con IAS, taba impulsada pola executiva saliente y sofitada básicamente poles xuntes de Xixón, Noreña, Siero, Llangréu, Morcín, Llaviana y Villaviciosa, amás de polos conceyos del esterior, particularmente Madrid. Pela so banda, la otra, favoratible dafechamente a les alcordaes, taba respaldada polos grupos d’Uviéu, Carreño, Avilés, Illas, Corvera, Piloña, Tinéu, Samartín del Rei Aurelio y Gozón. Les xuntes de los demás conceyos con importancia por númberu militantes (Parres, Ribeseya, Riosa, Llanes, El Franco, Castropol, Mieres, Cangas del Narcea, Pravia) nun tiníen posición o nun l’amosaben.
El ponente sobro estratexa fora Fernández Marqués, secretariu d’organización y alma’l partíu dende los anicios. Ya equí entamara’l toletole. Rober Holgado, faciéndose voceru de la otra opción, pidiera’l votu contra la ponencia, pero ensin presentar alternativa. Tóo paecía señalar que la opción contraria a la dirección saliente diba ser encadarmada y presentada por Pin Bermeyu, pero ésti nun aportó al conceyu. Los de la so llínia namás tiníen unos esquemes que debíen ser apuntes pa la discusión, si ye qu’ésta se producía. Asina les coses, Holgado fora incapaz de desplicar con um mínimu miramientu la so postura ya escontra una ponencia escrita y defendida lo que mos pidía yera fe y confianza. L’alderique fora surrealista, con un documentu d’un lláu y una retórica del otru, hasta’l puntu qu’un vieyu militante como Antón Fuertes, del conceyu de Madrid, mui dáu a los pautos pero cola seriedá que lu calterizaba, encaróse-y a Holgado por considerar aquello una tomadura pelo. El casu ye que la ponencia oficialista, discutible en bona midía, salió p’alantre, pente otros col mio votu. Nun ye que me prestara abondo pero yera la única presentada y, amás, siguía la llínia tradicional. Lo de Rober Holgado nun llegaba nin a medio seriedá, anque’l so sector, nun exerciciu de responsabilidá, abstúvose.
Polo que cinca a la directiva nun fóramos a algamar un alcuerdu mínimu y aplazáramos cuasi por tres menses la convocatoria. Pesllamos el conceyu nacional con un comité de circunstancies que yo presidía y nel que tuve’l sofitu d’un intelixente Brunu Gómez que, pesie a la so mocedá, llevara los debates del conceyu nacional como presidente d’una forma estraordinaria. Asina fora que yá en Candás, nel llar social d’Andecha, sacamos p’alantre una nueva executiva ya’l candidatu pa les ellecciones del 2007. Yera la executiva más numberosa de la historia d’Andecha, con una edá media mui remocicada.
La “vieya guardia” dexaba d’esistir orgánicamente. Marcos Fernández Marqués, Carme Pérez Antolín, Arturu Bermeyu, Fernán Gonzali Llechosa y Mariano Suárez, los padres d’Andecha, los resistentes en tiempos duros, quedaben fuera. Pero quedaben fuera voluntariamente, nuna xugada mui bien pensada. Nun tiníen denguna confianza nel trabayu de los entrantes nin en que foran a caltener la organización, colo que siempres pensaran que la militancia, delantre d’una ineficacia que daben por seguro, diba recurrir a ellos en poco tiempu. Amás, dexáben colocada la bomba de reloxería de la ponencia estratéxica, cola que podríen amarrar a la dirección precisamente na política de pautos.
Polo que cincaba a les ellecciones, como yera d’esperar, siguí siendo’l candidatu y amás con unanimidá, cosa que nun algamara nel conceyu de Corvera nel 2003.
Yo pensé entós que la salida de tolos veteranos yera un erru que los nuevos tiníen d’evitar porque, amás de que practicar l’adanismu nun ye nada bono, l’anovada organización amosaba, a lo menos no simbólico, una rotura poco conveniente de cara al esterior. Pa mayor confusión nun elleximos secretariu xeneral específicamente, lo que diba traer problemes asgaya unos menses dempués. La secretaría d’organización, particularmente importante na cadarma d’Andecha y ocupada pol eficaz pero desmasiaes vegaes intransixente Fernández Marqués dende la fundación, recayera n’Holgado. Yo, que nunca toviere nuna xunta executiva, acepté participar n’esta ocasión, non tanto pa les estayes d’economía y de rellaciones internacionales –que yera l’oficial- como pa tratar de tender pontes aprofitando la mio posición. Nun pertenecía a la “vieya guardia” pero sí yera d’una dómina dura y primixenia –yá me consideraben un “históricu”-; tampoco taba colos “renovadores” pero sí compartía les sos esmoliciones. A la fin dediqué tiempu ya esfuerzu a facer de “pontífice” y, a la llarga, como veremos, de poco sirviera.
Tiníamos nueva executiva pero col programa estratéxicu de la vieya...
Imprimir