Ilesia ya estáu: un clásicu imprescindible

El 7 de setiembre de 1910 morría na estación de tren d’Astapovo, en Rusia, Lev Tolstói. Seguramente que nos meses vinientes asistiremos a celebraciones, homenaxes y saraos organizaos poles más variopintes instituciones. Por embargo, el meyor homenax que se-y pue facer a un escritor ye espublizar la so obra, y si se trata d’una obra inédita o poco conocida meyor que meyor. Ya eso ye lo que ta acabantes facer n’español la editorial Kairós con un llibru impresionante, el caberu ensayu que l’autor de “Guerra y paz” escribiera. Trátase de “El reinu de Dios ta en vosotros”. El llibru, que recueye panfletos escritos por Tolstói pente los años 1890 y 1893, namái tuvo una edición española de tirada pequeña en 1902. Ye prácticamente imposible d’alcontrar –inclusive en llibreríes de vieyo-, siendo también difícile dar con él nes ediciones inglesa y francesa. Tamos delantre d’un llibru asitiable nun cistianismu anarquista y pacifista que, allá na mió mocedá, fora una de les llectures que más güelga me dexara. Mio güelu, un anarquista kropotkinianu, recomendómelu con ciñu y, amás, taba na biblioteca casa dende aquellos primeros años del XX. Más lluéu supe que Gandhi, un hindú educáu a la inglesa, dixo, testualmente, que “la so llectura apolmonárame”.
Nos tiempos que cuerren paez importante asomase a esta obra de Tolstói. El gran escritor rusu, con obres cola fuerza de la yá citada “Guerra y paz”, “Ana Karenina”, “La muerte d’Iván Illich” y tantes otres, diera como caberu mensax una obra de sublime radicalidá, lo mesmo no político que no filosófico. Y camento que ye bono porque nun momentu como ye’l d’anguaño, con una sociedá qu’apondera de contino unos presuntos valores “xuveniles”, nun ta de más averase a un autor que fora radicalizándose ya ufriendo idegues más tresgresores asigún diba avieyando. Esa máxima tan espardía de que “quien nun ye anarquista a los vente años ye un inmoral, quien lo ye a los cuarenta ye un babayu” bien a refutala un home l’altor de Tolstói. Esti ensayu de Tolstói déxamos perclaro que les idegues revolucionaries, la crítica al “statu quo” y los pruyicios de tresformación nun tan rellacionaos necesariamente cola edá pero siempres lo tan cola conciencia y col conocimientu.
Tolstói, fiu d’un conde y d’una princesa –raigañu aristocráticu que compartía colos teóricos anarquistes tamién rusos Bakunin y Kropotkin, esti últimu sobrín del zar-, dempués de pasar pel exércitu y de toa una trayectoria lliteraria vivida nel mayor de los ésitos y los reconocimientos, entrara nuna fondera cris esistencial ya espiritual. Queda somorguiáu nuna depresión tremenda y llega tar nel carel del suicidiu. Busca entóncenes un nuevu sentíu a la vida y, como fíu que yera del naturalismu la dómina, non namás que s’abelluga na filosofía sinon que, pa nun esmaniase peles caleyes de la metafísica, afita la so esperanza na ciencia. Como nun consigue salir del pozu esistencial volve los güeyos a un cristianismu del qu’enxamás abxurare y gueta una salida na ilesia ortodoxa. Pero nin la filosofía, nin la ciencia, nin tampoco la relixón-y amuesen el camín.
Ye entós cuando se pon a investigar sobro les frebes del cristianismu, estudiando fonderamente les sacraes escritures y mui particularmente’l “Nuevu testamentu”. Tolstói llega a la conclusión de que la doctrina cristiana orixinal afítase nel que se conoz como “sermón de la montaña” y tamién como “sermón de les bienaventurances”. Elli piensa que la ilesia traicionare los enseños pacifistes y revolucionarios de Cristo ya entama a dexar de lláu la ficción pa centrase na publicación de panfletos de conteníu políticorrelixoso. La descomada fama de Tolstói –cuasi veneráu poles élites culturales ruses- nun evitó que “El reinu de Dios ta en vosotros” fora prohibío, anque percuerriera tol imperiu clandestinamente. Nun foren quien los censores zaristes, amás, a torgar l’ésitu la obra en Francia, Alemaña, Inglaterra ya Estaos Xuníos.
Tolstói arremete contra la ilesia y contra l’estáu, un binomiu col que yá la tomare Bakunin nel so imprescindible “Dios y l’estáu” trenta años enantes. De la ilesia diz que ye la institucionalización de la perversa conciliación pente la violencia y la relixón, del estáu que ye una cadarma que val namás que pa oprimir a la población pal beneficiu d’unos pocos.
Tolstói enllaza nestos ensayos con toa una tradición rusa d’anticlericalismu y d’antiestatismu, una tradición que supunxo pa Rusia ser la patria de los principales autores anarquistes. Por embargo, la so orixinalidá ye que llega a les mesmes idegues dende una utopía cristiana y non dende la dialéctica hegeliana de Bakunin, del positivismu de Kropotkin o, muncho menos, d’una corriente nihilista que llegó a motivar al mesmu Dostoyevski. Pesie a ello, podemos alcontrar en “El reino de Dios ta en vosotros” idegues comunes cola solidaridá o la defensa de les comunidaes pequeñes autoxestionaes del príncipe Kropotkin –podemos ller “El sofitu mutuu” y “Campos, fábriques y talleres”-, pero los dos grandes autores sepártense na custión relixosa. Tolstói ye un cristianu radical y atormentáu, mentres que Kropotkin ye un antiteoloxista –paez ser que francmasón- que creye nel comunismu llibertario.
Lo que sí ye decatable nesti ensayu de Tolstói ye la influencia que-y causare la obra de Thoreau “La desobediencia civil”, llibru fundamental pa pescanciar tolos movimientos sociales de sieclu y mediu, dende les sufraxistes al movimientu “okupa”, pasando pola insumisión o la llucha polos drechos civiles d’un King o d’un Mandela. Esta resistencia non armada escontra l’estáu que güei tantos siguidores mozos tien nos países occidentales ye deldora –tantes vegaes ensin sabelo los sos practicantes- d’un lliberal radical y d’un cristianu radical. Polo que cinca a Tolstói, llega escribir que “l’auténticu cristianismu y l’estáu son dos conceptos irreconciliables. La profesión del auténticu cristianismu non namái escluye la posibilidá de reconocer l’estáu, sinon qu’estriza los sos cimientos”.
Contra la ilesia emplega los mesmos mandamientos mosaicos cuando diz cómo s’esmolecen los sos representantes pol incumplimientu’l sestu, “nun fornicarás”, y cómo relativicen el quintu, “nun matarás”. Diz testualmente lo siguiente: “la ilesia nun almite situación denguna na que pueda incumplise’l mandamientu contra la luxuria. Pero nun pinta lo mesmo col mandamientu de la non resistencia. Afirmen que cumplilu diba ser percomplicao y qu’ello pertenecería al ámbitu la perfección. Por embargo, ¿cómo nun va ser enguedeyoso cumplir con ello cuando ye la mesma ilesia la qu’allenda directamente pa que sea incumplío al dar la so bendición a tribunales, cárceles, cañones, fusiles, tropes y batalles?”.
L’estáu queda tan mal paráu como la ilesia. Diz que la xente fina por creyer, a base de sentilo con repilu permanente, que los gobiernos son representación de los ciudadanos, cuando, la verdá, ye que nun son más “qu’aconceyamientos d’homes que violenten a otros”. Por eso, escribe unes llínies más p’alantre que “mañana vendrá cualisquier gobernante alloriáu, dirá cualisquier babayada, otru arrepostiará-y de la mesma manera, ya yo voi tener dir xugame la vida y asesinar a persones que nun me fixeran res”. Y fina con una fras bárbara: “nin la tropiella malfaedores más engafentada ye tan terrible como una organización estatal”.
Como tolos clásicos –por eso ye, pente otres razones, polo que los nomamos “clásicos”-, Tolstói anticípase a la historia. Hai unos años Bush, Blair y Aznar decidieron allanzar una “guerra preventiva” contra Iraq, col pretestu de qu’igual Sadam Hussein tinía armes perpotentes y qu’igual atacaba al “mundiu llibre”. A esti respective, Tolstói escribe: “cuánta descomada cantidá de mal pue xenerar, y xenera de fechu, que la xente creya tener el drechu a prevenir la gafura que pudiere venir. El noventainueve por ciento’l mal qu’hai nel mundiu –dende la inquisición, les bombes de dinamita, hasta la execución y tormentu de decenes de miles de presos políticos- perafítase enriba esi razonamientu”.
Unos díes enantes de finar, Tolstói –qu’escribió más de diez mil cartes na so vida- escribió-y una a Gandhi (recoyida na edición de Kairós) na que desplicaba que la non violencia yera la meyor arma revolucionaria. Nella dicía que “los gobiernos saben d’aú-yos bien la mayor amenaza”. Quien pudiere lleer esa epístola nesi 1910 pensaría de xuru que yera una ronca o una sublimación política d’un amor idealista de basa cristiano. Pero unos años dempués, el receptor de la carta de Tolstói encabezaba un movimientu mases que, ensin pegar un tiru, derrotó al perpoderosu exércitu británicu qu’ocupaba la India.
Imprimir