16.2.10

Europa de los Pueblos (1)

Heribert Barrera y David M Rivas en Menorca, na primavera de 1990
Les ellecciones europées siempres representaron problemes pal nacionalismu asturianu. Les organizaciones, a lo menos a onde llega’l mio saber, tiníen estatutariamente ámbitu esclusivamente asturianu, polo que namás podíen presentase a ellecciones dientro’l Principáu d’Asturies, lo mesmo n’autonómiques qu’en municipales. Pa poder xugar n’otres circunscripciones yera necesario cuntiar cola firma de cincuenta cargos ellectos, que lo mesmo daba que foran del conceyu de Pravia que de Santa Cruz de la Palma. Eso daba milenta problemes porque na perdemocrática Asturies un partíu pequeñu nun conseguía sacar cincuenta firmes de los partíos con representación, aferraos a una visión oligárquica de la política. Trátabase namás que de tener drechu a presentase, drechu que cualisquier demócrata tien la obligación de facilitá-y a otru demócrata. Voltaire dixera aquello de “nun toi d’alcuerdo colo que dices pero daría la mio vida pa que pudieres siguir diciéndolo”. Yo, volterianu en bona midía, en siendo diputáu o conceyal, enxamás-y negaría la mio firma a un grupu que quixere presentase a unes ellecciones, quitando partíos faxistes, racistes o asemeyaos, a los que, evidentemente nun-ys diba apurrir dengún sofitu.
Comprendo perbién que los partíos asturianos se llegalicen namái que nel tarrentoriu autonómicu porque la otra opción ye llegalizase como partíos d’ámbitu español. Pero ye una custión ideolóxica un tanto fata que yo nunca respaldara. El tener ámbitu esclusivamente autonómicu –y falo d’”autonómicu” intencionadamente- torga la posibilidá de, por exemplu, presentase a les ellecciones europées porque la circunscripción ye única pa tol tarrentoriu español. Pero ye que, a mayores, torga la posibilidá de presentase nel ámbitu “nacional”, porque nun permite facer candidatures, pongo por casu y si se diera la ocasión, en Palacios del Sil o Sayambre porque formen parte del tarrentoriu alministrativu castellanollionés. Un escuplu integrista facía que les organizaciones asturianes nun tovieren, pa lo ellectoral, calter “nacional” sinon “autonómicu”, esto ye, “rexonal”.
Nes anteriores ellecciones europées, nel añu 1999, yá pasáramos pol purgatoriu les firmes. Daes les históriques rellaciones del nacionalismu asturianu d’esquierdes, cincuenta avales sacábense cola gorra con namás dir al País Vascu y pidí-yles a Herri Batasuna. Los nacionalistes de cualisquier parte dan ensin problemes les sos firmes a otros nacionalistes pero les amistaes de los nacionalistes asturianos taben dende siempres nel País Vascu y mui poco en Cataluña. Les rellaciones con gallegos, andaluces, valencianos, baleares, aragoneses y canarios yeran inesistentes. Nun sé cómo resolviere Andecha la situación na convocatoria de 1994, anque supongo que tiraría de los collacios vascos, pero nel 1999, coincidiendo con unes ellecciones asturianes nes que yo encabezaba la llista ya onde pa les europées diben dos independientes emigraos en Madrid, nun paecía lo más conveniente presentase con cincuenta firmes d’Herri Batasuna y cercaníes. La histeria espardía dempués del cruel asesinatu de Miguel Ángel Blanco taba faciendo estragos naquellos díes.
Esti camientu nun yera ermunu de mió sinon que tola organización, inclusive los que tiníen bones rellaciones colos vascos, atalantaba lo mesmo. El problema yera que los contactos con otres organizaciones de fuera d’Asturies yeran mui escases, esto ye, que nun había a quién pidí-y la firma. Ya equí entraron en xuegu les mios rellaciones personales. Andecha Astur presentose a les europées de 1999 con avales del Partido Democrático de la Nueva Izquierda d’Arganda, Rivas y Coslada, y del Partido Popular de Leganés y Xetafe. Persones como Pedro Díez Olazábal –alcalde d’Arganda y presidente nel so día de l’Asamblea de Madrid por Izquierda Unida- y José Luis Moreno –entós portavoz del PP en Xetafe- amosaron un saber facer en democracia que los dignifica. Ya eso que-ys dixi ensin falcatrúes, especialmente al segundu, qu’igual acababen nuna nómina de sofitos onde se podríen alcontrar con compañíes que nun-yos diben gustar. Y asina fo porque tovía tuvimos que rellenar la llista con firmes d’Herri Batasuna.
Siempres esistiera l’alternativa de nun presentase a les europées pero yera una posibilidá qu’Andecha siempres refugara. Dende la so fundación Andecha Astur presentose a toles convocatories, d’una miente fuerte, débile o na más llaceriosa precariedá. Había dos razones fonderes. D’un lláu unes ellecciones delimiten quién esiste y quién ye virtual, quién fae política y quién ye un grupín, respetable y valoratible pero al marxe de lo político. D’otru lláu, al ser les ellecciones europées de circunscripción única española, n’Asturies podía votase cualisquier llista, dende’l PSOE a l’Agrupación Independiente de Tomelloso. Si Andecha Astur nun comparecía, los medios de comunicación, los rexonalistes del PAS y los nacionalistes que nunca se presentaran a nada diben atribuí-y los votos que n’Asturies sacare Herri Batasuna o les sos sigles de referencia. Nun hai d’escaecer que dende’l PAS llegó a dicise que les perres qu’Andecha tinía pa les campañes ellectorales yeren donaciones d’Herri Batasuna, lo que, nel so mundiu referencial y n’aquellos años yera cuasi dicir que les perres poníales ETA.
Esti ye un de los llugares comunes del nacionalismu asturianu: el “batasunismu” d’Andecha. Ye verdá que la estética de les campañes yera asemeyao a la de HB, pero tamién yera asemeyao a los d’otros grupos nacionalistes d’otres partes del mundiu. Tamién ye verdá que munchos militantes calteníen simpatíes por Herri Batasuna, pero otros munchos tiníen les sos simpatíes n’otros llugares y n’otros países ya otros tantos nun necesitaben referentes más o menos paternales.
Pero lo que sí ye una verdá incustionable ye qu’Andecha Astur siempres se presentara al marxe d’Herri Batasuna, mientres qu’otres persones y grupos pidíen el votu pa esta organización vasca. Paradóxicamente, foran otres les persones –más sero dalgunes mui significatives, cuando’l gobiernu PSOE-IU, nos plantegamientos llingüísticos, tribunes varies, comités de toponimia ya otros ámbitos- les que sofitaron a Herri Batasuna cuando la so campaña del “vota lo que más-yos manca” de 1991. Nun ta demás repasar la nómina de sofitos a HB, espublizada nun folletu qu’entá munchos conservamos, o la participación de destacaos militantes del más lluéu “antiasturchalismu” en mitines como’l d’El Natahoyo, en Xixón. Y que conste que nun lo toi censurando. Caún sofita a los partíos que más-y preste. A lo que voi ye a que, nun momentu nel qu’Andecha Astur se presentaba como única organización nacionalista asturiana d’esquierdes, otros prefirieran sofitar a Herri Batasuna. Y tóo esto ensin entrar en posiciones más estremistes, como les de los que cuasi lleguen xustificar el matancíu d’ETA nel Hipercor de Barcelona, dengún d’ellos militante d’Andecha dempués. Porque nomes hai pero ye meyor callalos, por responsabilidá o por cenciella amistá, por más que dengún saliera a echar un gabitu cuando mos apellidaran de terroristes por un par de petardazos anónimos en Sotrondio, L’Infiestu y Xixón unos años más sero.
El casu ye qu’agora, añu 2004, les coses presentábense d’otra manera, o podíen presentase d’otra manera. Esquerra Republicana de Catalunya, dempués del so descomanáu ésitu nes ellecciones catalanes d’un añu enantes, yera l’alma de l’Allianza Democrática Europea, na que tamién taben Eusko Alkartasuna, Bloque Nacionalista Galego y Chunta Aragonesista, amás d’otros grupos d’otres tantes naciones ensin estáu d’Europa. Andecha Astur trató, al traviés d’ERC, de participar nos aconceyamientos y consiguió que la convidaran a ello.
Yo caltenía bones rellaciones cola Esquerra dende años, cuando la presidía Heribert Barrera. La casualidá fixo qu’elli presidía l’Atenéu Barcelonés cuando yo yera secretariu del Ateneo de Madrid. Participé en unos cuantos eventos d’ERC como convidáu d’honor. Dempués, con Ángel Colom na secretaría xeneral, dexé de tener contactu col partíu, qu’entraba, pal mio tastu, nuna dómina de frivolidá aparentemente radical mui basada nuna Pilar Rahola de pose sensual nes cadenes de televisión. Volví a saber d’ERC andando un tiempu, cuando tiníen un cargu públicu por cada diez de CIU, que nel 2003 camudaron por una rellación d’ún a tres.
Nes custiones referenciales del nacionalismu yo siempres fora un bichu raru n’Asturies. Nun tuve nunca entusiasmu abondo pol nacionalismu vascu, más alló d’esa almiración que siempres se tién pola xente que resiste. Pero nunca me gustaron los nacionalismos que, pesie a evidentes evoluciones, tienen el so aniciu nun pensamientu católicu integrista y antimodernu que tresllada la so visión monoteísta’l mundiu a lo político. Tolos nacionalistes bebemos de la tradición alemana, de los discursos de Fichte y de la mitoloxía d’un pueblu que ye únicu y que busca’l so destín. La nación entra de lleno nos ámbitos de lo sentimental y la idega de nación ta más p’alló del bien y del mal. Por eso ye necesario rebaxar tantu idealismu con una idega de la nación ilustrada y republicana. Ya esa fundamentación revolucionaria ya ilustrada fora lo que fixo Esquerra Republicana de Catalunya nos años trenta’l sieclu XX.
La nación ye como un árbole. Les frebes enraigonen nel somantu la historia, nel sangre y los muertos, como bien despliquen los teóricos románticos alemanes. Pela so parte, el tueru ye la república, la ordenación política que da forma a una nación entá incorpórea. Ye’l plebiscitu cuotidianu del que falaba Renan. Pa finar, les rames, coles sos fueyes y los sos frutos, ye la enorme diversidá que-y da prestancia a esa nación que bebe de la historia y conformose cola república. Esta idega de nación ye lo que me llevó dende siempres a les miós simpatíes por ERC. Amái fora un partíu que supo facer lo que yera necesario nos sos años fundacionales: espoxigar pa dientro, resforciando la catalanidá y marchando haza la independencia; y contribuyir pa fuera, aidando a civilizar a la España machadiana de charanga y pandereta que mos dexaran la ilesia y los borbones.
Por embargo, xusto ye dicir, porque ye mui corriente sentir qu’Andecha Astur entró n’Europa de los Pueblos gracies a los miós oficios, qu’eso nun fora esactamente asina. Ye verdá que la mió figura ya’l mió perfil aidó sobromanera a desenartar el camín, pero quien, con un emperre cuasi enfermizu, llogró lo que’l nacionalismu asturianu enxamás suañara fora Pin Bermeyu. Poles circunstancies que más sero se dieran, les coses nun salieron como yo pensaba que tiníen de salir, pero l’esfuerzu de Pin Bermeyu fora escomanáu y a elli-y debe Andecha –y polo tanto’l nuesu nacionalismu- un de los principales pasos políticos de la so historia. Home neciu y cabezón como pocos, aburrió hasta dicir valió a los dirixentes d’ERC y tampoco se llibraran d’elli los d’Eusko Alkartasuna.
Bermeyu algamó una invitación pa la reunión que l’Allianza diba cellebrar en Barcelona. Tóo paecía rodao pero, nesi momentu, entamó un rosariu de problemes que poníen un día sí y al otru tamién les nueses aspiraciones na nevera. Pa entamar, una fuelga de controladores aéreos en Baraxes torgó que yo, como representante d’Andecha, llegare a tiempu al conceyu de Barcelona.
A midía que se diben aprosimando les ellecciones pente los partíos presentes n’Allianza entamaron delles discrepancies, motivaes especialmente pol pautu que’l BNG fixera con CIU y PNV pa formar una coalición. Chocó enforma la decisión del BNG, coles sos estrelles bermeyes nes banderes y agora nuna formación de dreches y alfrentándose a los vieyos collacios de la esquierda nacionalista. Asina y con eso, Esquerra Republicana de Catalunya, Eusko Alkartasuna y Chunta Aragonesista entamaron a encadarmar una opción política que diba acabar col nome d’Europa de los Pueblos. Al poco picó a la puerte de la coalición el Partido Socialista de Andalucía.
Los dirixentes del BNG viéranse como estadistes al algamar un pautu con partíos de gobiernu, unos partíos que, como’l PNV y CIU, confundíense dafechamente cola nación. Dicir PNV yera dicir “Euskadi” y dicir CIU yera dicir “Catalunya”. Pol contrario, dicir ERC o EA yera dicir oposición improductivo. El BNG amosaba la so idega d’identificación entre patria y partíu, más propia del faxismu que de la organización progresista que dicía ser. Nel fondu, el BNG yera un mecigayu de llínies que la minoría socialdemócrata de Beiras texó con puntaes ensin filvanar y nesta ocasión impúnxose l’alma’l vieyu galleguismu populista y reaccionariu, dempués del defenestre’l mesmu Beiras y la so vieya guardia universitaria.
Esta visión de la postura’l BNG ye, camiento, poco discutible y de xuru que criticable dende un puntu d’agüeye ético, pero fora’l primer pasu pa llevar a los nacionalistes al gobiernu de Compostela. La imax d’un BNG de la mano de CIU y PNV diéra-y un aquello de partíu de gobiernu, seriu, centráu y responsable. Por eso, andando’l tiempu ya espulsáu del gobiernu pola mayoría absoluta’l Partido Popular, el BNG destexó como Penélope y buscó l’abellugu n’Europa de los Pueblos nel 2009. Pero d’eso yá falaremos.
Mientres tanto n’Andecha Astur movíense les fiches rápido, polo menos más rápido de lo que yera davezu. La organización nun decidiere nada entá y les firmes taben buscándose pa la eventualidá de que tuviéramos de dir solos a les ellecciones. Pero, al empar, multiplicáramos les conversaciones con ERC ya entamamos a teneles tamién con EA. Les llamaes telefóniques d’aquelles selmanes sumaran hores y los viaxes pa un lláu y pa otru custiones cuotidianes. D’otra banda, aprofitando les mios estancies en Madrid, les visites a los parlamentarios catalanes facíense ca poco. A la fin conseguimos que mos convidaran a roblar la constitución de la coalición.
Agora quedaba la decisión nes manes de la xunta nacional d’Andecha Astur. Nun mos costara muncho a los más firmes partidarios de la coalición convencer a una organización previa y dafechamente convencía. Namás hebo un votu a la contra, el de Daniel Cueli, un de los representantes de Villaviciosa. Pero la posición de Cueli, qu’elli mesmu desplicó nun artículu un tiempu más sero, nun yera una oposición a participar n’Europa de los Pueblos sinon que con ello amosaba la so idega de qu’Andecha tinía de dir sola en toles convocatories. Esi mesmu argumentu diba emplegalu dos años dempués cuando se discutiera la coalición con IAS. Pámeque hebo una abstención, quiciavis la de Gonzali Llechosa, pero nun toi mui seguru.
Tamién se decidió francer cola alcordada d’unos años enantes, asigún la cual Antón Fuertes encabezaría la llista nes europées, Germán Abad les centrales ya yo les nacionales. La xunta nacional consideró que yera importante que, daes les circunstancies, fora yo quien toviere presente na llista d’Europa de los Pueblos. La mio trayectoria política –pequeña de toles formes- , les miós relaciones fuera d’Asturies, la mio vieya relación con ERC –Heribert Barrera, al marxe yá pero col pesu la historia, faló de mín delantre los sos collacios como falaría un güelu- ya’l mesmu papel que xugara nes negociaciones, aconseyaben camudar l’alcordada. Naide más cumplía eses condiciones sacantes Pin Bermeyu, al que, como yá dixi, se-y debía cuasi tóo lo fecho. Pero Bermeyu tinía más interés na cadarma organizativa, cosa qu’a mín enxamás m’interesare.
Hebo total entendimientu y complementariedá pente les dos persones que presentaben perfiles asemeyaos, anque teo reconocer que’l perfil de Bermeyu yera más políticu que’l míu, que siempres cayera más del lláu intelectual. Agora, pasáu un tiempo, igual me paez meyor candidatu elli que yo. Pin Bermeyu vivía pa la política ya yo soi mui escépticu en cuasi tóo. Pero él andaba guetando controlar Andecha, la solombra la política, y a mín prestábame más tar al sol. Bermeyu apuntaba al corazón del partíu, a la secretaría d’organización, directamente a pelealo con Fernández Marqués. Eso diba condicionar dalgunos episodios posteriores. Pel mio lláu, yo, más idealista o más inxenuu, apuntaba al aire, a la militancia ya, indamái, a la ciudadanía. Igual me tinía por muncho. Hai vegaes nes que la cencielleza nun ye otra cosa qu’arguyu amatagáu. Seguramente que Bermeyu sabía más de política que yo. Pero’l casu ye que la organización fiábase más de mí, cosa que ye una garantía cuando t’alfrentes a unes ellecciones con poques perres y los “media” en contra. Eso sí que yera pa min perimportante: la muncha confianza que sopelexaben los militantes d’Andecha nel so candidatu… por más que’l “personalimu” los cafiare.
Total, qu’esa decisión de dir n’Europa de los Pueblos y col mio nome de banderín fora pa mín un pasu perimportante, tanto no personal como no colectivo…

Imprimir

5 comentarios:

  1. David, yes mundial. Siempre pensamos que lo d·ERC yera cosa tuya. Y reconoces que fue Pin Bermeyu el que lo fixo. Siempres me paiciste un bon políticu. Pero agora se que yes un paisano. Nun quies apuntate lo que nun ye tuyo. Con tres coyones.

    ResponderEliminar
  2. Hmmmmmmmm.

    Too eso yía carne de llibru. Ou poudiera ser.

    Anque meyor non, si lo faes un llibru nun lu lleei naide, esto yía Asturias.

    La rellación David Rivas (ya por outru llau)- ERC ya AA cola izquierda abertzale; esto yía l'AA d'esa dómina de la que falas con ERC por un llau, ya por outru llau la rellación hestórica d'AA, ya inda más, del nacionalismu asturianu cola izquierda Abertzale, paezme mui interesante.

    Paezme qu'hai bien de mitos; nun vou dicir que nun heba rellación, quizabes más romántica cola izquierda abertzale; pero yía bona verdá que nel fondu, eiquí siempre se miróu "con güeyinos" a ERC.

    Pero claro, ERC, partíu hestóricu, fundáu nel 1931, casi nada...

    Si me permites, esti artículu podría tamién apellidase "AA (ou si se prefier "La izquierda nacionalista asturiana") ente ERC ya la Izquierda Abertzale".

    Pena que si lo titulas asina van entender dalgunos por "Izquierda Abertzale" la banda terrorista ETA.. en fin, esti artículu, cumo tolos que pones, prestome muncho, ya eso; ente EA ya ERC, ente la izquierda nacional de Catalunya ya d'Euskal Herria. Que tamién había que ver hasta que puntu EA ye izquierda... pero eso yía outru tema.

    Un saludu

    ResponderEliminar
  3. ¿alcuérdeste qu'el PAS, anque nun te preste (cosa respetable), ye nacionalista?
    Eso sí, herieda abondes coses del republicanismu federal.

    ResponderEliminar
  4. Nepocianu, nun escaezo nada de lo que dices. Yo, a la contra de munchos collacios, siempres consideré al PAS como un grupu nacionalista y, pesie a les discrepancies, siempres valoré (no toles vegaes en positivo) la llabor de Sánchez Vicente. Pero nesi tiempu del que toi falando la so política taba mui lloñe de lo que yo pensaba. Nunca me negué a un acercamientu al PAS y munchos de los mios compañeros tampoco. Entós (falamos de entamos del sieclu XXI) fora'l PAS el que refugó cualisquier tisbiu d'alderique porque tinía por seguro que tornaba al parlamentu solu o cola URAS, pero ensin los "pesaos" del nacionalismu. Por cierto, yo tamién teo una bona parte d'heredá del republicanismu federal.

    ResponderEliminar
  5. Alégrame muncho que revindiques a Pin Bermeyu. Ye verdá que ye raru pero metiéron-y fasta l'alma. Rivas y Bermeyu yera lo meyor que teníamos. Igual Pin taba un pco celosu de David, pero eso yera tontería. David, yes un paisano diciendo lo que dices de Pin. Yo vivilo, nun me lo contaron.

    ResponderEliminar

Nota: solo los miembros de este blog pueden publicar comentarios.