19.12.09

El referéndum catalán y los borbones

Una selmana dempués del referendum catalán sobro la independencia, tenemos opiniones a tente bonete y pa tolos tastos. La primer cosa ye eso de qu’un referéndum non vinculante nun val pa nada. ¿Cómo nun va valir?. Val pa saber lo que piensen los que-yos presta participar nuna consulta, seya o non vinculante. Y, amás, l’estatutu catalán fora aprebáu nel parlamentu catalán, dempués nes cortes españoles y más sero nun referéndum que sí yera vinculante. Pasaran dos años y tamos onde tamos. Entós, ¿de qué tamos falando?. D’otra banda l’asuntu acabó por convertise nun cafarnaún inacostaciable: ¿quién gana?, ¿quién perde?. Pero, ¿ye esi’l problema?.
Lo que los partíos nacionalistes catalanes pretendíen consiguiéranlo dafechamente. Obligaron al nacionalismu español a dixebrase pente los que tachen la consulta de babayada, astracanada o chiste, y los que lo ven como una agresión al orde constitucional, una presión intolerable al más altu tribunal ya un insultu a España. Si ye verdá lo primero, nun atalanto como ye que se-y dan al asuntu tantes páxines na prensa y tantos foros n’internet. Pero si ye verdá lo segundo, nun sé por qué nun intervién d’oficiu la fiscalía cola so policía, los sos mossos o la so guardia civil, asigún falemos de colexos ellectorales urbanos o rurales.
Pero ye que nin ye una babayada nin tampoco un asaltu al orde institucional. Tamos delantre d’una operación mui bien encadarmada y con unos resultaos discutibles pero, na mió opinión, enforma favoratibles a les posiciones nacionalistes catalanes.
De toles considerances que lleera estos díes, pámeque la más razonable fora la de Pedro de Silva nun periódicu asturianu. Dicía’l que fora presidente d’Asturies que los nacionalistes catalanes danse cuenta de que l’algaire nun ye entá un tigre, pero que los nacionalistes españoles ven que’l gatín apellidáu como pequeñucu y minoritariu tien les uñes más afilaes que lo que pensaben. Ye verdá: nin tigre nin múxaru, pero coles garres preparaes.
Convocar un referendum pa dicidir si los catalanes quieren un estáu soberanu nel somantu la Xunión Europea nun val gran cosa si pensamos que lo que pretenden ye conocer la opinión de la ciudadanía. Pero ye fundamental pa saber cuála ye la base cola qu’arranquen pa un procesu d’independencia. Güei sabemos -y persaben ERC y CIU- qu’un trenta por cientu los catalanes son partidarios incondicionales de la independencia y que piensen sofitala en consultes vinculantes o non vinculantes, llegales o allegales. El gatu montés saca les uñes asperando ser mañana un tigre.
Los nacionalistes catalanes saben yá que la metada a lo menos de la ciudadanía sofitaría la secesión. Ye una cenciella proyección estadística de los resultaos del referendum pasáu. Amás conocen bien la xeografía l’independentismu, tienen el mapa catalán colos colores que buscaben. Mentres l’españolismu navega n’augües de grandes pallabres historicistes, el catalanismu va descubriendo onde arrasa, onde empata ya onde pierde. Y resulta que namás pierde onde nun se convoquen refrendos. Por eso nun los convoquen, porque tan pensaos non pa saber sinon ma movilizar a los suyos.
España y los españoles tienen que dir preparándose pa la secesión catalana. De tanto vincular el nacionalismu a la violencia y les gramátiques a les metralletes (Gustavo Bueno dixit), de tanto llenase la boca de democracia y de respetu a les decisiones colectives, escaecieran la posibilidá de qu’una decisión colectiva n’ausencia de violencia pudiere optar por separtase de la “madre patria” d’entamos del sieclu XVI. Pue qu’un país, una ciudadanía, que nun recurrió a la violencia dicida convertise n’estáu. ¿Quién, dende posiciones democrátiques, cola carta la ONX na mano, los puntos de Wilson o la declaración primixenia de drechos, va dicir que non?. Si eso pasa, ¿van mandar a la Legión Extranjera a tomar Barcelona?.
Si Cataluña opta pola independencia toi seguru que diez o doce países de la Xunión Europea reconocen a esi estáu enantes de venticuatro hores. ¿Nun lo van facer Chequia, Eslovaquia, Eslovenia, Lituania, Estonia, Letonia, que vienen de procesos independentistas recientes?. ¿Y qué dicir de Bulgaria, Rumanía, Hungría, Polonia, naciones sometíes al despotismu soviéticu y con una sensibilidá nacional a flor de piel?. ¿Qué votaría Irlanda?. ¿Y Portugal, aliada de Cataluña frente a los borbones, en un episodiu que marcó a fueu la historia portuguesa?. ¿Y Chipre, la parte griega y comunitaria?. ¿Y la mesma Francia, que debilitaría a la cuarta potencia europea y sofitaría a un nuevu estáu d’acrisolada francofilia?. Complicao lo tien España.
Dicen los más españolistes que bona culpia d’esto tienlo Rodríguez Zapatero. Tienen razón. El presidente español ye un verdaderu indocumentáu nestos temes. Desconoz dafechamente los mitos, los ritos y les racionalidaes de les naciones. Fíu d’una ideoloxía española a la bonaz pensaba que la “España plural” yera bastantino pa los nacionalistes. Pero nun lo ye porque, sábese dende l’idealista Fichte ya’l positivista Renan, tou nacionalista aspira a facer de la so nación étnica y cultural una entidá política.
Hai una custión na que poco xente reparara: Artur Mas, magar que sofitando la consulta, consideró que nun yera esti’l momentu. La razón última pa esta consideranza ye clara: el momentu oportunu ye’l momentu de la sucesión na corona. Una Cataluña convocando refrendos, acompangao ello con tensiones pa reformar la constitución y poner na mesa la monarquía, y nun tresfondo de miyones de xuancarlistes güérfanos del héroe la transición, diba ser l’escenariu más afayadizu. Curiosamente, foran les prieses d’ERC y la situación na qu’el PP punxo a l’estatutu, les que precipitaran los acontecimientos.
Pero la llarga solombra de la corona, pué dir más alló. Entovía-y queda a esti modelu una salida, una salida pola que siempres apostara un raposu vieyu como Jordi Pujol. Esa salida ta na monarquía, nel rei. Pujol tuvo l’habilidá de nun cafiar enxamás al rei, nuna idega d’aparentar un pautu directu de Cataluña cola corona. Por exemplu, na nueche’l 23 de febreru de 1981, col congresu nes manes del teniente coronel Tejero y con España ensin gobiernu, Pujol convirtiérase na másima autoridá. Entóncenes llamó a Juan Carlos I (rei d’Asturies, de Llión, de Castiella, de Granada, de Canaries, d’Aragón, de Navarra, de Valencia, de Mallorca, de Murcia, de Galicia, de Nueva España, de Nueva Granada, de Sicilia, de Xerusalén y de Nápoles; conde de Barcelona, d’Atenes y de Neopatria; señor de Vizcaya, de Molina y de Xerona). Nun ye esta retafila títulos un rendivú al rei, por supuesto. Lo que sopelexa esta nómina nobiliaria ye que, perbaxo esa España monolítica, ta la realidá histórica.
Paradóxicamente, l’únicu réxime xunitarista que tuvo España fora la república azañista, pero, por querer facelo racionalmente, chocó col españolismu más xabaz de los Franco, los Mola o los Calvo Sotelo. El güelpe de 1936 tarazó pela freba’l proyectu d’una “nación española” medianamente aceutable. Y la llarga nueche franquista amosó otra vuelta lo que ye’l nacionalismu español.
Los borbones, una dinastía francesa centralista a costa fecha y poco edificante nun sen moral, nun pescanciaron un res de lo que yera’l tarrentoriu que llamamos España. La tradición austracista, heredada dempués pol carlismu, entendió meyor esa pluralidá étnica y cultural. Igual Pujol tinía razón y la única solución pa nun francer tóo ye un modelu confederal nel que les naciones acepten al rei como símbolu común ya’l rei acepte que lo ye de munches naciones si quier siguir sentándose nel tronu de “les Españes”. Nun se ta descubriendo la sopa d’ayu: la raina d’Inglaterra yelo también de Canadá o Australia. Un migayín de pragmatismu británicu nun-y vendría nada mal a la España eterna.

9 comentarios:

  1. home, queríu profesor, dicir qu'un 30% de los catalanes tá dimpuestu a votar pola independencia ye dir un poco llueñe, nun cree? pel momentu votó namás a favor el 94%, del 30% de los que taben llamaos a votar, que seríen el 15-20% del censu electoral catalán. Notres palabres: nada.

    ResponderEliminar
  2. Prestome abondo lleer el to comentariu Rivas.

    Anónimo, miralo d´esta manera, solo un 5% de los votos son favoratuibles a caltener la unión del 30 % de los que taben convocaos. Nun desvíes l´atención, eso si que ye nada, nada de nada. Pudieron dir a votor, pero nun lo ficieron. La propia organización de les consultes ponxo perres pa que los contrarios a la independencia se manifestaran, y nun lo ficieron. Esa ye la postura que fracasó.

    ResponderEliminar
  3. Yo nun sé mui bien cómo interpretar el resultau estadísticamente, pero paezme que lo que diz Yio ye verdá. Amás fiome bastante de les apreciaciones estadístiques de Rivas. Al fin y al cabu, nun ye un inorante nestes cuestiones.

    ResponderEliminar
  4. Pa mi ta claro que fora un triunfu pa los convocantes. Y polo que toca a lo del rei, paezme un planteamientu mui orixinal. Igual ye una cachondada de David Rivas, que ye mui dau a estes coses, pero nun dexa de tener el so aquello.

    ResponderEliminar
  5. Pues igual ye una cachondada provocadora, pero a mi nun me paez una idea descabellada.

    ResponderEliminar
  6. Rivas tien de siempre una visión mui aristocrática del mundu. Paezme un demócrata radical pero si hai duda pesa-y la so raiz nobiliaria. Y nun lo digo como crítica, faigolo con gran respetu. Siempre lu voté y votarialu otra vez.

    ResponderEliminar
  7. ¿Qué ye eso d'aristocráticu? Toos sabemos de siempre que Rivas tien un títulu, conde creo. ¿Y qué?

    ResponderEliminar
  8. Ye Conde de Santa Cruz de Maliayo. Un títulu del XIV. El titular ye so padre. El va selo cuando muerra. Nin bono nin malo. Ye la historia nuestra.

    ResponderEliminar
  9. Nun ye conde ye "Marques de Riscal" dende lluegu cuanta babayada y cuanta pijada . ¿Que coyones importa nestos tiempos si un ye conde o vaqueiru o marnuetu?.A min Rivas prestame en forma pero nun me cae la babaya con tolo que diz (nun creo que seya un ser superior) ye listu y ta preparau y punto y por eso me presta lleelu como a otros como Vilareyo por exemplu que a lo meyor tambien ye aristocraticu y nun presume d'ello .Asina que menos combayar .

    ResponderEliminar

Nota: solo los miembros de este blog pueden publicar comentarios.