Una distinción pa dos universidaes diferentes

Como asturianu y como profesor de la Universidad Autónoma de Madrid arrecibí con satisfacción la calificación como “campus d’escelencia” -nun entiendo que s’emplegue’l términu “campus” envede “universidá“, pero debe ser cosa de les modernidaes terminolóxiques coles qu’arrecostinamos- lo mesmo a la mió universidá que a la universidá’l mio país. Pero, por desgracia pa la segunda, nun tamos falando de lo mesmo nin la escelencia ye equiparable.

En términos xenerales, pa centramos nos términos precisos, a l’Autónoma cuerrespónde-y un campus d’escelencia internacional (CEI 2009 a seques) mentanto qu’a la d’Uviéu cuerrespónde-y un CEI 2009 d’ámbitu rexonal. Y son coses perestremaes.

Nel primer casu tamos falando d’una universidá con altu potencial p’algamar un nivel d’escelencia internacional una vegada que se ponga en marcha el proyectu. Nel segundu casu de lo que se fala ye de la potencialidá d’algamar un nivel d’escelencia rexonal. De fechu, l’Autómoma tién como obxetivu entrar na nómina de les cien universidaes punteres del mundiu enantes del 2015. Pola so parte, Uviéu nun punxo como horizonte masque un difusu pruyiciu por contribuyir al espoxigue d’Asturies.

Por eso la campaña de la universidá asturiana fora básicamente política, colos alcaldes de les dos principales ciudaes faciéndose la semeya afayadiza, xunta’l presidente d’una Cajastur que poco se comprometiera -por frente a un Banco Santander que punxo tola so fuerza enriba la mesa pa sofitar la candidatura de Cantabria- ya una patronal que figura pente les más acomodaticies del reinu. A la escontra, l’Autónoma basó tola so campaña nel ámbitu académicu y científicu, arrecibiendo’l sofitu de trece premios Nobel.

Nel casu l’Autónoma valorárase muncho la continuidá’l campus, concentráu en Cantoblancu, municipiu de Madrid, ya espardiéndose pel norte: Alcobendes, Colmenar Vieyu, San Sebastián de los Reis, Tres Cantos, Miraflores de la Sierra. Por frente, la Universidá d’Uviéu presenta una de les distribuciones espaciales más alloriantes, namás comparable a la novísima Universidad de Castilla-La Mancha: tres campus n’Uviéu (Santuyanu, El Cristu, Llamaquique), dos en Xixón (El Parchís, Viesques), otru en Mieres del Camín y nun sé si escaezo dalguna qu’otra llocalización. Esti ye’l coste de facer de la universidá una materia politiquera: los fondos mineros, los chanchullos sindicales, los rixinos d’un alcalde, la consolidación del réxime.

Hebo hai unos años la posibilidá de facer un campus fuerte n’Uviéu con tola ciencia y les humanidaes, mentres s’afitaba una bona politécnica en Xixón coles inxeneríes, la marina y les nueves tecnoloxíes. Pero los cazurrismos d’unos, los estupendismos d’otros y los ugetismos somáticos de los de más alló dieron cola racionalidá nel caxón de la ceniza.

Pero entá hai más. La Universidad Autónoma de Madrid fixo un apueste por un campus científicu-tecnolóxicu cola collaboración del Consejo Superior de Investigaciones Científicas. Y ganó l’apueste. Lo mesmo fixeron les universidaes catalanes, que presentaren estremaos campus con estremaes especializaciones. Pela so banda, la Universidá d’Uviéu, enchipada d’una historia tres vegaes centenaria, nun fora quien a iguar una alcordada. Maxinemos esta situación: Cantabria, Uviéu, Llión y Santiago presenten una candidatura conxunta. Sedría la universidá “española” que mira pal norte, la universidá atlántica. Non namás presentaríen una ufierta amplia y complementaria, sinon que taríen poniéndo-y un biecu cariñosu a los evaluadores escandinavos, xermanos y anglosaxones. Conclusión: los madrilanos y catalanes son -somos, que yo profeso n’Autóma- de rangu internacional y con quince miyones d’euros, y los demás son de rexonal y con siete miyones.

Llaméntolo pol rector Gotor, que me paez un bon alministrador y que, de toes toes, ye un bon científicu. Llaméntolo por Santiago Álvarez, vicerrector y amigu dende hai munchos años. Llaméntolo por una universidá que merez más de lo que-y ta tocando. Pero l’alma mater asturiana tienlo merecío. Una universidá gubernamental y na que los sindicatos ponen y quiten autoridaes académiques namái pode rispir por ser de rexonal. Con perdón de Gotor, la Universidá d’Uviéu nun “xuega la champión”. La Universidad Autónoma de Madrid sí.

Allégrome como profesor. Duelme como asturianu.
Imprimir

Comentarios

  1. Pocu hai qu´esperar d´una Universídá, l´Asturiana, que ye la cume del nepotismu, del enchufismu y de la falta de rigor y obxetividá dientro del Estáu d´España (y mira que yá ye decir). Yo fui profesor de la d´Uviéu y puedo dicir que taba controlada por una serie de bandes emparentaes consanguíneamente, con places creaes ad hoc pa fíos, ñetos y sobrinos de caderalgos yá daquella(im)puestos por Franco. Llueu tán les rémores, les bisarmes que nun se quieren xubilar, los filo-facistes que gocien del placet de la "prensa rexonal". Nun hebio denguna llimpia, denguna Transición na Universidá uvieía, qu´amás sigue ensin ser asturiana. (CXB: Carlos X. Blanco). Salú.

    ResponderEliminar
  2. La Universidá asturiana nun ye otra cosa qu'el reflexu más gráficu del repartu del pastel. Y ehí entren toes eses figures rexonales de vocación vetustense :políticos de tres al cuartu, clanes profesoriles con proyeición embeliguista, alcaldes de villes con enfotos de capitalidá pero ensin "caput", SOMA ensin "anima"... y una sociedá a velo too nun sé si venir o colar. ¿Qué Universidá va esperase de mosaicu talu?

    ResponderEliminar
  3. ¿Qué le vais a contar a David Rivas que no sepa? Los que lo conocemos de la Autónoma sabemos de sus intentos de trabajar en Asturias y de los vetos que siempre tuvo en Oviedo. Y eso a pesar de que trabajaba en áreas científicas emergentes (desarrollo sostenible, por ejemplo) y que tenía un curriculum muy superior a los catedráticos y altos cargos que lo vetaban. Afortunadamente para nosotros, se quedó en la Autónoma de Madrid. La pena es que gasta más en tren, avión y autobús que en vivienda.

    ResponderEliminar
  4. Lo d'Uviéu fora una triba rebatina. De la escelencia, anque seya "rexonal", nun va quedar nada. Yá lo comerán los de siempres. Como si nun supiéramos como furrula esta universidá fundada por un inquisidor. Al tiempu.

    ResponderEliminar
  5. David Rivas ofrecía a la Universidad de Oviedo todas las relaciones internacionales en economía ecológica y desarrollo sostenible que mantenía desde el principio de la polémica. Su tesina ya era de estas materias, cuando nadie lo estudiaba. Su tesis fue la primera en relacionar economía y ecología (no el primer estudio pero sí la primer tesis doctoral). Podeis entrar en la página de la UAM y ver su curriculum, sobre todo el de los años en los que casi nadie trabajaba en estos temas. Yo fui alumna suya en el doctorado y fue miembro del tribunal de mi tesis. Ahora no estoy en la universidad. Es un profesor extraordinario, de una cultura enciclopédica impresionante. Sus publicaciones son referentes, especialmente las de desarrollo sostenible en países subdesarrollados. Ahora ya menos. Seguramente un poco harto prefiere escribir cuentos eróticos en asturiano. También en eso es original. Total: un profesor demasiado incómodo para una universidad tan rancia como la de Oviedo.

    ResponderEliminar
  6. ¿Por qué nun tendría yo un profesor asina? En tola carrera d'económiques n'Uviéu solo me paeció interesante Germán Ojeda. A José Alba nun lu tuve, que ya sé que ye amigu y collaborador de David Rivas.

    ResponderEliminar
  7. La Universidá d'Uviéu ye un reflexu de la sociedá asturiana. Como lo ye la clase política asturiana, o los sindicatos, o la manera de funcionar cualquier otra institución del país. Esa sociedá ye la llosa au guaña tolo demás. Y el gran cáncanu de l'Asturies actual tien los raigones fundíos no social. Tenemos un gravísimu problema de Sociedá Civil, de Ciudadanía.

    ResponderEliminar
  8. Germán Ojeda sí foi un gran profesor, a min pouxome clas, yía ún de los poucos que pagan la pena de la Facultá d'Económicas (de la especialidá d'Economía) de la Universidá d'Uviéu

    Yía de vergoña aquella facultá, sigui anclada na Edá Media.

    Pepe Alba yía de Salas; teolo sentío falar ya tamién paez mui bon profesor, nun tuvi la suerte de que me diera clas, pero tamién teo bonas referencias d'él.

    En cuanto al dueñu d'esti blogue, la inxusticia yía que nun puenga clas n'Uviéu, na Universidá; Caderalgu d'Estructura Económica ya miembru de l'ALLA, pero en fin, qué queréis, esto yía Asturias, non Suecia, non País Vascu, non Alemania.

    Cumo dixo outru gran docente que me pouxiera clas, nesti casu nel institutu, Armando Graña, "nin siquier yía Sicilia; que de Sicilia polo menos faen películas".

    ResponderEliminar
  9. Ciudadanu hasta los mesmísimos30 de noviembre de 2009, 13:07

    Una universidá y una intelctualidá que quixo poner a Gustavo Bueno a l'altor de Lévi-Strauss yá diz abondo d'ella mesma. Una universidá que nun se preocupa por recuperar "cerebros" que tan perende, como'l mesmu Rivas (na, collaciu, con un par de botelles queda paga la propaganda), fala de lo mesmo. Pero tien razón Xanu'l Caborniu: mentres nun haiga ciudadanía poco se puede facer. Pero diendo a lo positivo, entá queden abellugos y llumes pequeñines: esti blog, delles páxines lliberales (anque hai vegaes que se pasen un pelín gordu), los blogues de los de la "xuntanza", que choquen col zopenquismu de los partíos nacionalistes, yaeso.

    ResponderEliminar
  10. Respecto a la Universidad de Oviedo no puedo opinar porque sólo fui alumna de la misma y desde esa perspectiva no se "ven" más que algunas cosas que cantan demasiado. Bastante teníamos con ir sacando adelante la carrera.
    Respecto a David Rivas, tanto lo que dice un compañero como una colega, tengo que corroborarlo. He leído libros suyos, he escuchado conferencias, he charlado con él de lo divino y lo humano, y sí puedo aseguraros que su mente es una de las más claras que pueblan (o sólo medio pueblan, qué lástima) Asturias. Decir que su cultura es enciclopédica se queda casi corto ¡es que sabe de todo y en profundidad! Además tiene una capacidad para ver dónde los demás no vemos, asombrosa. Y es una persona estupenda. Cuando lee algo de algún colega escritor, si le gusta no tienen ningún reparo en decirlo, no es la envidia uno de sus defectos.
    He leído también muchas cosas escritas por él. Es un autor con un estilo atractivo, fácil de leer, tanto en castellano como en asturiano; fácil de leer, sencillo pero de una gran intensidad y hondura, apasionado en lo que defiende, pero siempre con argumentos, respetuoso con los que no piensan igual...
    Espero, de verdad, que junto con Humberto Gonzali y otros asturianistas sinceros y convencidos, sigan defendiendo y poniendo en valor esta tierra nuestra, "Paraíso Natural" por los Cuatro Puntos Cardinales.
    AGR

    ResponderEliminar
  11. ¡Hostia, David!, saliérate una novia na rede. Non, si esto de los blogues ya me paecía a mí...

    ResponderEliminar

Publicar un comentario