Namái queda una vía

El nacionalismu asturianu d’esquierdes caltuvo siempres una dialéctica nun resuelta satisfaitoriamente pente les dos almes que lu definen: la identitaria y la esquierdista. Esta calterística ye igual la única que comparte colos demás nacionalismos, especialmente col catalán, con una ERC balanceándose de contino pente la idega de república catalana ya los principios del socialismu.

Esi alderique o dicotomía faese más presente entá cuando, polo xeneral delantre d’un procesu elleitoral o dempués de sacar los mesmos votos de siempres o menos, se planteguen les perconocíes estratexes de xuntanza, unidá, refundación y tantes y tantes pallabres de les que la mayoría tamos yá un pocoñín fartucos. Dende’l fracasu d’Unidá Rexonalista (finales de los setenta) y de Coalición Asturiana (finales de los ochenta) de xuru que nun hebo añu o bieniu nel que nun se discutiera esti asuntu.

Asina, la llucha pente les dos almes traducíase na tensión esistente pente averase al nacionalismu-rexonalismu de centrodrecha (PAS especialmente ya URAS más sero) o intentar un pautu cola esquierda clásico de basa comunista (PCPE fundamentalmente ya otros grupos más o menos organizaos). La yá nomada Coalición Asturiana (UNA y PAS) fora l’únicu intentu nel primer sen, mentanto que’l Bloque d’Izquierda Asturiana (IAS, INA y PCPE) representara la otra vía. Pa finar, diba haber otra esperiencia asemeyada cola plataforma Unidá (IAS, parte d’Andecha Astur y Los Verdes) que careció tovía d’un mayor escalabru que les anteriores.

El casu ye qu’agora alcontrámonos na siguiente situación: dos organizaciones d’esquierdes y una coalición de centrodrecha. D’un llau, Andecha Astur, resultante de quedase coles sigles la parte que nun marchó pa Unidá, y la nueva Unidá Nacionalista Asturiana, reconversión de l’anterior Unidá embaxo la cesión de les sigles de l’antigua UNA pero ensin Los Verdes. Del otru llau, un PAS esfarrapáu vertical ya horizontamente ya una URAS que marcha haza’l PP en cuasi toa Asturies. Total: que tamos onde tábamos enantes de Coalición Asturiana, hai d’esto venti años.

Ya entóncenes, como siempre, dempués de sacar pente toos la metada de lo qu’Andecha Astur algamó en solitario –y que tampoco yera pa tirar voladores-, volvemos al alderique de la xuntanza. Y vuelven a aparecer les dos almes del yá vieyu nacionalismu d’esquierdes.

Pero agora alfrentámosmos a una situación distinta. La opción más identitaria, la qu’antepón lo nacional a lo socioeconómico, nun tién munches víes posibles. URAS y PAS, a lo menos los sos principales representantes, o tan camín de les sos cases particulares o camín de casa de Mariano Rajoy, custión na que tan trabayando perbién los seutores asturianistes del PP. Poco queda onde apautar pela drecha pa Unidá Nacionalista Asturiana y Andecha Astur, quitando esperimentos llocales en dalgún qu’otru conceyu.

Pero pola esquierda tamién les coses camudaron. Les elleiciones europées amosaron que les coaliciones a la esquierda de la socialdemocracia son posibles y que, en dellos países, dan resultáu. Pente nós nun pasa lo mesmo porque Izquierda Unida nin vive nin muerre colo que sigue axuntando votos d’esa esquierda alternativa que notros sitios d’Europa marchó pa organizaciones verdes, altermundistes y anticapitalistes. Pero ye bien posible que la resquiebra final d’IU nun tea llonxana y que los nuevos dirixentes del PCE lleven a lo que quede de la coalición a un pautu col PCPE ya otros grupos y refundan d’esta manera la esquierda non socialdemócrata. Con un movimientu verde ya ecoloxista dixebrau y con parte d’ello gobernando col PSOE, ye más que probable que l’alternativa verde s’avere a esa refundación. Poco queda entós pa la maniobra del nacionalismu asturianu pela vía estrictamente esquierdista.

Ya entá mos alcontramos escontra otra custión qu’enrarez la situación clásica del nacionalismu asturianu. La facción teóricamente más obrerista ya esquierdista, la que machaconamente nun diz asturianos sinon pueblu trabayador asturianu, representada por Andecha Astur, ya amosara la so perceguera a facer una alternativa cola esquierda comunista, a la que siempres tilda d’españolista. Pela so banda, los teóricamente más culteranistes, averaos a les asociaciones de recuperación llingüística y, en xeneral, a les entidaes de aición cultural y de llucha identitaria, representaos por IAS, vienen faciendo precisamente lo contrario.

Con estos antecedentes, la solución vese mui difícile. Ya ello ensin ameter les custiones personales y personalistes que, anque yo siempres camenté que se-ys daba demasiada importancia a la hora de desplicar el probe resultáu, esisten en dellos casos. Pero la evidente dificultá nun puede llevar a la inaición y al desdexe. Esiste una basa sociolóxica sobro la que trabayar pero que tienlo más claro que les organizaciones nacionalistes.

Hai una basa social de centro más o menos asturianista que sofitaría una opción nacionalista pero a la qué-y da medrana la fraseoloxía clásica de la esquierda. Nin se reconocen como pueblu trabayador, muncho menos proletariáu, nin se consideren socialistes, nin tienen ganes d’alfrentase abiertamente col sistema, anque tampoco a munchos d’ellos nun-yos guste. Y hai otra basa social d’esquierdes más o menos asturianista a la que-y da voltura la fraseoloxía nacionalista por pescanciala burguesa y etnicista, cuando non conservadora y racista. Amás, les dos bases tan d’alcuerdo en que conceutos como autodetermín o independencia nun tienen xacíu, y si lu tienen ye notres llatitudes pero non n’Asturies. Otra vuelta queda’l nacionalismu asturianu fuera xuegu.

La única aparente opción que-y queda al nacionalismu asturianu ye facer comuña colo que güei ye Andecha Astur ya Unidá Nacionalista Asturiana. Pero, siendo esto asina, por más que s’algamara dicha xuntanza, la esperiencia dizmos que los sos votantes diben ser poco más que’l sumatoriu de los votantes de cauna de les organizaciones.

Nuna sociedá como l’asturiana, na que l’espoxigue demográficu ye nulu o negativu y de la qu’afuxen de contino les xeneraciones más preparaes y, al empar, posiblemente más concienzaes, les coses nun poden plantegase como nuna sociedá dinámica como, por exemplu, la catalana. P’apurrir un votu a les macones nueves hai d’arrancá-ylu a l’abstención o a otru partíu. Eso ye perdifícile. Les postures polítiques n’Asturies son mui conservadores ya’l votante del PSOE, del PP y d’IU nun camuda y, si lo fai, va pa l’abstención. Paralelamente, l’abstención tradicional –especialmente no que cinca a la mocedá- ye igual de conservadora, mui inmóvile.

Namái queda una posibilidá que, pola so naturaleza, nun pode ser de curtiu plazu: l’entamu d’una nueva vía. Esti camín ye’l de guetar una mayoría social comprometida, anque nun entamu seya políticamente confusa, un especie de magma nel que tuviere sitiu toa persona o movimientu que, cenciellamente, quiera tar ehí. Pero, evidentemente, sería quimérico pensar qu’esto puede facese despreciando lo qu’hai y lo qu’hebo. Eso quier dicir que cualisquier forma de surdimientu nun pasaría por xuntances nin refundaciones, pero tampoco pasaría por escaecer el camín andáu pol nacionalismu y que güei ta espeyáu n’Andecha Astur ya Unidá Nacionalista Asturiana.

Por too ello, volvemos a les paradoxes. Unes organizaciones culpables en bona midía de la situación na que tamos son fundamentales pa salir d’ella. UNA y AA tienen d’asumir la responsabilidá d’encabezar una rexeneración del movimientu políticu que nagua por una Asturies estremada no nacional y no social. Pero, al empar, los sos dirixentes tienen de saber que ta fináu’l tiempu de la relixón de les sigles y del sectarismu partidista. Munchos militantes d’eses organizaciones saben perfechamente qu’esto ye asina, que nun hai más vueltes que dar. Sabelo ye importante. Agora falta un pasu más: facelo. Los homes y muyeres d’Andecha Astur y d’UNA y, riba tóo, les sos cabeces visibles tienen agora escontra sigo un retu importante: dar un pasu p’alantre y amosar, con más enfotu que nunca, el so patriotismu.
Imprimir

Comentarios

  1. Paezme un bon analís, sobro too porque vien de quien vien. Rivas ye un de los meyores conoceores del nacionalismu, por años y por responsabilidaes. Préstame muncho que, dempués de tantu tiempu calláu, entre en xuegu.

    ResponderEliminar
  2. El procesu tendríen qu'empobinalu xente del altor de Rivas. Lo malo ye qu'aparte de David Rivas nun conozo a naide con esa preparación. Veo munchu indocumentáu nel nuesu nacionalismu. Soi perpersimista.

    ResponderEliminar
  3. ¿Nun vos paez qu'esta opinión, nel so blogue y non n'infoasturies o aruelu, ye una señal? A lo meyor nun ye más que que ta cabreáu polo que ta pasando pero...

    ResponderEliminar
  4. Facía tiempu que nun entraba nos foros, pero lleíalos. Toi con Ayerán. Pero dudo que David quiera metese en más fregaos.

    ResponderEliminar
  5. Toi con Ayerán. Va siendo hora de que se xunten dalgunos y faigan lo que hai que facer. Ya ta bien de mamoneo.

    ResponderEliminar
  6. Esto ye lo que necesita'l nacionalismu asturianu, alderique. Toi dafechamente d'alcuerdu con Rivas, namás falta una cosa, xente qu'encabece esi procesu. Y esa xente válida llámase Rivas...¿y quién más? Porque a los dirixentes d'Andecha y de la UNA nun los veo yo mui pola llabor...
    Pero nun hai más salida qu'esta, tamos xugándonos la esistencia como Pueblu con más de 1000 años d'hestoria. Nun hai más que construyir esta nuea vía de la que fala Rivas, si tira p'alantre yo voi ser el primeru que tea ehí.
    ¡¡Puxa Asturies llibre!!

    ResponderEliminar
  7. Sí señor, hai que dexase de mamonaes, tien razón maliayés. Yo propongo que dende les fuercies nacionaliegues d'esquierda se faiga un exerciciu de xenerosidá y patriotismu. Primer pasu: dimisión de les direutives d'UNA Y AA. Segundu pasu: un comité de notables con Rivas de cabezaleru pon orde y llanta la cadarma pa un nuevu proyeutu sólidu y que xenere esperanza.

    ResponderEliminar
  8. Toi con Porasturies pero tóo nun ye yan fácil. A Rivas conózolu. Nun somos amigos pero conózolu bastante. Nun me paez que quiera encabezar nada, ta mui al marxen de les coses. Pero sí podía facer de ponte porque ye mui responsable y sabeor de que, más o menos, tola xente d'esti movimientu tien-y respetu personal.

    ResponderEliminar
  9. ¿Respetu personal? Pero si ye casi lo único respetable que tenemos nesti marabuyu d'irresponsables. Hai otros tamién eh, nun solo esti. Pero ye l'únicu que caltuvo una posición responsable nes milenta crisis poles que pasamos. Pa mi que nun lo fizo bien del tóo dexando la candidatura, soi votante d'Andecha, pero qué diba facer. Dexáronlu en pelota. Ná, Rivas, que toi contigo y que tienes pagues un par de botelles en Sotrondio.

    ResponderEliminar
  10. ¿Cuanto pueden aportar Andecha y UNA a esa xuntanza? ¿3000 y 4000 votos cada una? ¿Unos 8000 votos como munchu ente les dos?
    Tan mui lloñe d'algamar daqué.
    El PAS tien una basa d'unos 10000 votos, cualesquier posibilidá asturianista pasa por xuntase con ellos. Nun ye un partíu que me guste, y pa xuntase con ellos habría dexalo X.X. Sanchez Vicente (¿¡como puede llevar más de venti años de cabezaleru del partíu!?), cosa que nun depende nin d'Andecha nin d'UNA y que me paez poco probable qu'ocurra.
    Asina, una xuntanza solo con Andecha y UNA nun mos diba valir de muncho, magar sedría un pasu perimportante.
    Otru tema sedría cuantos votos podría aportar si s'incluyere el Bloque por Asturies, paro nun me paez que quieran dexar a los sos collacios d'IX.
    Esta xuntanza ye necesaria, ye mui probable que nes prósimes eleiciones a la Xunta Xeneral entre un partíu ultraespañolista como ye UPyD, anguañu más que nunca fai falta algamar un diputáu.
    D'otra parte les televisiones, los periódicos, les radios, ...,tan a toes hores criminalizando'l nacionalismu, na sociedá hai una visión xeneral que venceya nacionalismu con terrorismu, asina qu'autodenomate nacionaliegu, defender la dixebra, una economía socialista dafechu ,..., acoyona a la xente. Los más de los asturianos nun son ni d'estrema derecha ni independentistes, si se quier algamar daqué hai qu'asitiase nel centru izquierda o na izquierda moderada y autonomismu o federalismu.

    ResponderEliminar
  11. David Rivas sedría un cabezaleru respetáu de la xuntanza del nacionalismu d'esquierdes. Esti analís ye una preba de la fonda conocencia que tien del país y del movimientu nacionaliegu. A min tamién paezme qu'axuntaría más xente la tendencia identitaria nacional que la de la esquierda radical.

    ResponderEliminar
  12. Que Rivas se ponga les piles y pegu un puñetazu na mesa. Que llame a Llope, que son amigos, y a los nuevos d'Andecha (Arbesú, Cueli), que tamién tienen bona relación, y ponga fin a esta mierda.

    ResponderEliminar
  13. Anque llego enforma tarde a esta sección de comentarios, pienso que ye importante que xente reconocío y con ciertu respetu pente'l nacionalismu vos posicionéis. Toi d'alcuerdu coles llinies xenerales d'esta entrada de to.

    ResponderEliminar

Publicar un comentario