13.6.14

San Antoniu


La tradición de san Antoniu ye relativamente de recién n’Asturies y debémosla a los franciscanos. Esta orde espardiera pel país un cultu a ún de los sos santos –les ordes relixoses son mui ególatres- aprofitando l’antigua veneración a san Antón, ametiendo zurriburri ente la xente y calteniendo pa ún de los suyos el ser abellugador del ganáu. De fechu, hai una oración a san Antoniu pa cuando se perde una vaca o un caballu, una oración que recita una vieya. Ye una oración llarga y si la vieya nun tien enquivocos na xaculatoria l’animal va apaecer, pero si escaez o tracamundia dalguna pallabra ye siñal de que l’animal fora comíu polos llobos o los osos. Con variantes, ye una xaculatoria espardía per tol país. Hai pieces en Casu, en Villaviciosa, n’Ibias… Asina reza una recoyía por Berto Peña en Monesteriu’l Coutu, na collación de Veigal.lagar, nel conceyu de Cangas del Narcea, de boca de Dora Lago, con 75 años el 18 de mayu del 2012:

“El gloriosu san Antoniu de Padua,
abogáu de las cousas perdías.
Si buscas millagros, mira.
Muerte, erru, desterraos,
miseria, ¡oh, Dios!, lleprosos, enfermos y sanos.
La mar asosiega la so ira.
Bienes perdíos recobren mozos y ancianos.
El pelligru retira, los probes son remediaos.
Que ta’l ganáu nel monte.
Que caminos y senderos
los defiendas de l.lobos ya l.lobas,
de raposos ya raposas,
d’osos ya d’osas.
Ya tolos pelligros malos
hasta que los miós güeyos lo vean.
Amén”. 

Esta engarradiella por facese con devotos fora causa de pergrandes alderiques na ilesia porque llevaba arreyao una bona acumulación de riqueces pola parte d’ordes, monesterios y abadíes. Por dicilo en reuto, nel mercáu de la fe tratábase d’allegar “clientes” pa enllenar los arcones d’unos y d’otros.

Asigún la tradición, san Antoniu ye proteutor de la salú no xeneral, lo mesmo de la humana que de l’animal. La so festividá ye una de les primeres del branu ya en dalgunos llugares compite cola fiesta de san Xuan en ellementos ritualísticos, como puen ser les grandes fogueres. En definitiva, por san Antoniu entama yá la final del ciclu llunar que va desembocar en siete-diez díes nel solsticiu. Daes estes carauterístiques nun ye raro que san Antoniu seya día grande en munchos pueblos d’Asturies, anque les folixes de más renome son les de Candás y, riba tóo, les de Cangues d’Onís.
En Candás marchen haza la ermita’l santu qu’entama bien de mañanina y na que los romeros depositen nos sos pies cirios encesos como promesa o como aición de gracies. La romería va acompangada de música y baille tradicionales, amái de cuntar con una descomanada en xente puya’l ramu, na que tienen sonada importancia les marañueles, les primeres n’entrar na puya. Trátase d’una triba rosquiella con una forma ente “númberu ochu” y “lletra b” y que nun se sabe mui bien aú fuera inventada, si nel conceyu de Carreño o nel so vecín de Gozón. Los de Candás, caro, tiénenlo mui claro. Dempués y hasta bien entrada la nuechi zámpense grandes cantidaes de bollos preñaos, vinu y sidre. A medianuechi, ente pólvora y fuéu, cellebren un guapu concursu de danza prima, nel que lo normal ye que participen munchos grupos.
Polo que fae a Cangues les fiestes de san Antoniu entamen con un pasucais mui abarrotáu de xente y dempués un cafarnaún col desfile de xigantes y cabezones. Pa pola nuechi, na carbayera de san Antoniu, cellébrase la verbena de la h.oguera y, a les doce, quemen el roza. Entóncenes, conforme a la tradición, los mozos salten perriba’l fuéu. Al alborecer faese una descarga de pólvora ya entama un desfile de gaites qu’acaba al meudí, al empezar la misa. Dempués de la ceremonia relixosa san Antoniu sal en procesión peles cais de la ciudá –Cangues tien título de “ciudá” por ser la primer capital d’Asturies- acompangáu de ramos y d’homes y muyeres que porten vestimentes tradicionales. Al acabar la procesión pasen a la puya’l ramu y quemen el xigante. Dende 1794 faen una puya de pan d’escanda. P’acabar, el domengu desiguiente más cercanu a san Antoniu los vecinos marchen a Contranquil –escenariu de la definitiva batalla onde los ástures derrotaran a los árabes y llibraran a Asturies del xugu del islam- a comer y tornen pa pola nuechi pa la descarga de fueos d’artificiu sobro la ponte románica que salva’l rigu Seya.   

3 comentarios:

  1. Faltóu San Antón en Tinéu, que tamién se celebra, ya agora yía la fiesta del barriu de Picos de Vil.la (foi pasando de ser la fiesta de la Vil.la a la fiesta d'un barriu).

    Cuntase qu'esa fiesta foi perdendo popularidá frente a la de San Roque porque nun conceyu tan ganadeiru cumo'l de Tinéu la xente pa San Antón taba a la herba, mentres que pa San Roque yá la l.levaban andada. Nun séi si la esplicación será verdá, pero eso me cuntanon.

    ResponderEliminar
    Respuestas
    1. Yá lo sé, amigu. En Facebook punxe toles fiestes que conozo, pero equí centreme en desplicar estes dos. Y lo que me cuentes de san Roque nun lo sé, pero como toi actualizando el mio llibru de fiestes, mirarelo. Agradézotelo-

      Eliminar
    2. De todas maneras mentite. Díxetelo (ensin querer) mal. La fiesta de San Antón yía del barriu de Picos de Vil.la. Igual que San Xuan yía la del barriu de San Xuan, tamién en Tinéu, ou outras de los barrios d'esa vil.la.

      La fiesta que yera de Tinéu yía San Pedru, qu'esa yía la fiesta del pueblu enteiru de Tinéu, la que foi perdendo pesu énte San Roque Confundí las duas fiestas.

      Eliminar

Nota: solo los miembros de este blog pueden publicar comentarios.