Van caendo les mázcares: equí tamos los de la madreña

Hai poco más d’un mes el gobiernu municipal de Xixón dicidiera remover la direición del festival de cine. Yo, personalmente, nun teo opinión sobro’l tema. Pol mio llabor académicu nun ye pa min habitual tar n’Asturies cuando esti certame, polo que probe opinión soi a tener. Dicen que ye un festival mui valoráu nel mundín cinematográficu y que’l so direutor hasta güei tamién ye recoñocíu. Sedrá verdá, nun lo sé. A Cienfuegos, el direutor saliente, namái que lu teo visto y al nuevu, Nacho Carballo, nin tansiquier lu coñozo. Del equipu d’anguaño namái sé de Chus Parrado, pol que teo alta estima y del que sé que ye gran especialista en cine, como comprebo tolos años cuando trabayamos xuntos nel ciclu “Peor… imposible”. En definitiva, que de tóo lo que pasara namás me presta ver ehí a Chus Parrado, “Baretta” pa los amigos, pal que-y me peta lo meyor. De les custiones polítiques… nin la más cenciella idega.

Ye normal, nuna democracia representativa, qu’un cargu nomáu arbitrariamente seya removíu tamién arbitrariamente cuando camuda’l gobiernu. Ye posible qu’esa persona fora estraordinariamente eficaz nel so trabayu, inclusive lo meyor de lo meyor, pero’l so cargu debía-ylu a un políticu que-y tinía confianza. Y, agora, dexara de tener esa confianza. Esta custión, cenciella pa países democráticos, nun lo paez tanto n’Asturies. La esquierda divina saliera a la cai pa protestar polo que nun se sabe mui bien qué. Por cenciella morbosidá, pasé pela Plaza Mayor pa ver quién andaba pellí. Sacantes Ramón, un profesor d’institutu mui poco politizáu, nun viera a naide coñocío. Ya eso qu’equí somos cuatro. Paezme que taben los paniguardaos y les sos families.


Aproveciendo que’l conceyal de cultura, Carlos Rubiera, ye escritor y compositor en llingua asturiana, los xacobinos del PSOE y d’Izquierda Unida, ya inclusive dalgunos grupúsculos que se autonomen “nacionalistes”, cargaron contra la identidá asturiana. Alfrentaron un certame “internacional” de cine a “la madreña”, como si la culpia de les decisiones polítiques fore de los que defienden la cultura popular asturiana. Dicíalo mui bien Xurde Morán: “non, si agora va resultar que los culpiables somos los del bable”.

Los medios de comunicación más averaos a la esquierda tampoco quedaran mancos. “La Voz de Asturias” –que nun sé si tará nos quioscos cuando esta nota s’espublice nel blogue- permitió un artículu del “periodista”, por llamalo d’alguna miente, Miguel Barrero, que yera un llibelu mui cerquino de la “prensa roso”. Ametía esti Barrero una montonera coses: empreses, partíos políticos, families… Pero consideraba que l’asociación L’Arribada, que tién como presidente a Berto Peña y como tesoreru a la mio persona, figuraba nun entramáu políticu-comercial que, evidentemente, taba aconchabada con Rubiera y, dafechamente, con Álvarez-Cascos. Pero nel so argumentariu nun apaecíen estos cargos –nin Peña nin yo tábamos mentaos- sinon que yera un pretestu pa cargar les tintes n’Humberto Gonzali, pol simplayu fechu de que ye militante’l PP. Hebo quien llegara escribir que “equí llegó l’inefable Humberto cola idega de que normalizar l’asturiano ye doblar películes de John Wayne”. Entós, si doblar películes nun ye “normalizar”, ¿qué cosa revesosa, que diría Teodoro Cuesta, ye “normalizar”?. Lo de siempres: “argumentatio ad hominem”. Y, por supuestu, nesa gafienta rede clientelar l’enllaz nun diba ser otru que Xosé Nel Riesgo, de los “beleñecos” de tola vida. El círculu taba trazáu y namás que faltaba la escuadra ya’l compás. Tóo yera una conspiración. En fin, que la escuela de Stalin y de Beria paez que sigui tiniendo bonos alumnos.

Tamién los medios españoles, qu’enxamás miraran p’Asturies. esmoleciéranse nesta ocasión. “El País” y, sobromanera, “Público”, asoleyaron esta “cacicada” de Cascos. Llaboral, Niemeyer, Semana Negra, Festival de Cine…, enxamás Asturies se viera tan representada na prensa madrilano. Por cierto, que bona perda ye que “Público” dexe de salir. Yera una ventana de llibertá. Soi llector d’esti periódicu dende que saliera a la cai y llamento muncho’l so triste destín. Pero, polo que cinca a Asturies, fora un periódicu sectariu a más no poder. Por exemplu: delles páxines pal Niemeyer, pal cuate Taibo, pal festival de cine… y nada pa Riopedre, conseyeru encarceláu por corrupción. Enxamás una notina sobro, pongo por casu, la manifestación del Día de les Lletres y páxina sobro páxina al rodiu los cien “intelectuales” que sofiten el Niemeyer o a la direición del festival de cine. Con “Público” pásame lo mesmo que col PSOE: sácame de madre la so federación asturiana. Igual ye que partíu y periódicu andaben de la mano.

El casu ye que la esquierda divina, mui bien pagada pela vía les subvenciones, alcuñó pa los que nun comulgamos coles sos ruedes de molín un arquetipu: “los de la madreña”. La intervención nel festival de cine yera cosa de “los de la madreña”. Tóo yera cosa de esos putos ruralistes que nun soporten la posmodernidá, la cultura cosmopolita y la multiculturalidá. Hasta vieno Almodóvar ya unos cuantos más a dicimos a los asturianos lo que tiníamos que facer, firmando una epístola-panfletu nel que “nun recoñocíen” a la direición actual del certame. ¿Pero quién ye vusté y los sos amigos pa “recoñocer” o “nun recoñocer”?. ¿Nun sabe que l’ayuntamientu de Xixón representa, por vía d’urnes, a la ciudadanía d’esi conceyu?. El gobiernu municipal podrá faelo bien o mal, inclusive cagala, pero saliera de la llibre decisión de la xente. Vusté, almiráu per otra banda, Almodóvar, sedrá dalguién en Hollywood, pero en Contrueces ye namái qu’un puntu que sal pela televisión.

Esti alderique ye enforma zoquetón, pero toviera una gran virtú. Yá queda claro quién ta nun lláu y quién ta n’otru. Hai toa una “cultureta asturianista” qu’amosara a les clares aú ta, que ye lo mesmo que dicir d’aú cobra. Nun me presta dicir nomes, como saben los que siguin les miós intervenciones, pero tampoco me fairía muncha llaceria llantar equí una nómina, porque tener téngola, colos númberos de cuenta. Esta ye una de les poques ventaxes de dir pa vieyu y tener colegues que van pa vieyos. Llevamos tiempu abondo arrecostinando con esta gandaya ya entama ser hora de baxala de la burra. Naide ye fíu de muyer virxinal –yo tampoco- pero paezme que yá ta bien, que yá valiera.

Y políticamente, lo mesmo. Jesús Iglesias, el comisariu políticu d’Izquierda Unida, ensin que naide-y entrugara nada, dixo que-y llamaba l’atención qu’haiga xente qu’anduviere esmolecía pola toponimia y non pol paro. ¡Mira que tienen manía estos biempagaos del erariu con dicimos qué ye polo que tenemos que preocupamos!. Son tan simplayos que namás que-yos cabe una preocupación. Si toi paráu nun me dexen los políticos andar esmolecíu pol Sporting o pola salú’l mio gatu. Repito que nadie-y entrugara por custiones llingüístiques. El xacobín españolista que lleva dientro saltára-y como un resorte y buscara esi exemplu: colo que ta caendo hai xente que tien como zuna la babayada de la toponimia… Amás de remembrá-y a esti estalinista que tuvo gobernando col PSOE hasta hai un añu, convién recomendá-y qu’estudie y se documente. Qu’Iglesias ye persona poco cultivao ye persabío y qu’Izquierda Unida ye una de les últimes piles de cucho de la esquierda europea tamién. Ya ye que, dempués de dicir tolada tala, arranca con que’l so grupu políticu pretende llamar a les urnes al militante “asturianista”. ¿Al de Gijón o al de Xixón?, ¿al paráu imbécil que quier iguar la toponimia o al paráu consciente que namás que suaña con un gobiernu PSOE-IU pa que faiga la “política socializante” que yá fixeren?.

Enanties dicíen los del PSOE que yera meyor estudiar inglés qu’asturiano. D’ehí sácase, racionalmente, que como nunca pudimos estudiar asturiano tóos nosotros falamos inglés. Pero resulta que, conforme a estudios estadísticos, les persones qu’estudiaron asturiano falen, como mínimo, dos llingües más. Y voi poner les coses en primera persona: la mió fía Aida, que yá tien trenta años y que vive en Barcelona, fala perfechamente asturiano ya eso nun-y torgara falar tamién español, catalán, inglés y sueco. Ye más, el fechu de falar asturiano permíte-y entendese con gallegos, con portugueses y con rumanos.

Mire, illustrísimu diputáu Iglesias, yo vivo nuna aldega que se llama Argañosu. Hasta hai tres años yera oficialmente Argañoso. Agora ye oficialmente Argañosu, y non precisamente por iniciativa de los comunistes. Pero, de verdá, “tovarich”, si por volver a ser Argañoso llegamos al plenu emplegu, yo, un nacionalista d’esquierda encamentáu, fírmolo agora mesmo. Vusté ye’l que fixo’l paralelismu, non yo.

En fin, que, como dicía, van caendo les mázcares. Cuando vienen dures, les persones saquen les sos verdaeres identidaes: l’asturianismu de los dirixentes d’Izquierda Unida, la catadura moral d’hipotéticos asturianistes, el sectarismu de tantos esquierdistes, la necesidá de salir en defensa del que paga… Dicía Baltasar Gracián –habrá quien diga que se me nota muncho la educación xesuítico- que “tolos fatos son arrechos y la so mesma simplayada, que-yos estorbisa a lo primero na alvertencia pa los reparos, quíta-yos más sero el sentimientu pa les descantaes”.

Y agora, diez de la mañana, voi dir pa la llosa. Tamos iguando la güerta porque la primavera va vinir en cosa de tres díes. Ya, evidentemente, voi dir de madreñes. Siempres hai que llevar el calzáu más afayaízu pa cada ocasión. Na universidá calzo zapatos pero pa la tierra nun hai como les madreñes.           
Imprimir

Comentarios

  1. Que razón tienes,David, prestome munchu lleer esto.

    ResponderEliminar
  2. Amén, mui estimáu David. A ver si asina a dalgunos "progresistas" se-l.lys cain las oureicheiras que nun-l.lys dexan ver. Güei, el cínicu Iglesias tien la pouca vergüenza de dicir estu en El Comercio

    ResponderEliminar
    Respuestas
    1. Coñocío o "paniguardao", faciendo amigos27 de febrero de 2012, 13:59

      Es un grave problema para la ALLA el recorte de la subvención por parte del gobierno de FORO. Mayor que el hipotético cinismo o "sinvergonzonería" de ese señor.

      Eliminar
  3. Dende la pila cuchu. Taba ñidio va tiempu que naguabes por metenos una camá palos como la de güei nel to blogue. Magar les primeres engarradielles nueses notábase lo estremao del nuesu pensamientu al tiempu de la coña y el buen rollu. Güei, camarada David, dasnos a retorcer, y, tengo que decite, col coral doloríu, que ties tola puta razón. Cagonrós. Me cagüen la puta manía de apareyar los derechos humanos colo demás. Vergoña, vergoña asgaya. Pal mes d'Abril, n'asamblea, de xuru, que la armo. Mentantu queda queda pila por cuchar.

    ResponderEliminar
  4. Sabía yo que diben salir chispes y tou por nun faceme casu, mira que vos lo dixe:! Nun xugar co les madreñes!, que se empiaza po la madreña, se pasa por Stalin, lueo po los xacobinos y to amestau fina con una andanada palos...

    ResponderEliminar
  5. Perfecho, Richi. Anque nesta ocasión tocaba la camá palos, nun escaezo que nel vuesu grupu políticu tamién hai xente, supongo que bastante, que nun da esi perfile babayu, que sabe onde llevar playeros, onde zapatos ya onde madreñes.

    Y agora, por asociación d'idegues, vienme al maxín una fras del gran Pixi: "la culpia ye de los padres, que los vistes d'asturianistes"

    ResponderEliminar
  6. Conocíu o "paniguardao"27 de febrero de 2012, 13:47

    ¡Uy! Sí que caen, sí.
    Una pena.

    ResponderEliminar
  7. Al que -o la que- diz que peor ye'l recorte a l'Academia... Esti ye l'argumentu que nun podemos emplegar. Nun ye peor nin meyor, sinon que forma parte de la mesma historia. Nos mesmos díes de la patochada de "los de la madreña" tengo declarao a la prensa la mio indignación pol recorte d'un 21 por ciento en política llingüística. Nun ye necesario dir perdonándose de mano. Si la babayada fora d'Iglesias ye que fora d'Iglesias... Mañana diré otra cosa si mester ye sobro otra persona o sobro otru partíu. Nun ye la primera vuelta que carezo de rocea inclusive pela parte de "los míos". O somos a estremar pente la crítica a A ensin tar compadrerando por eso con B, o nun vamos dar un pasu.

    ResponderEliminar
  8. Ai David, cómo te quieren en twitter. El gacetilleru xacobín Miguel Barrero diz que nel artículu fales de coses que nun dixo, y que yes el fundador d'AA. Y al filu sígui-y l'estalinista Xabelón y llanta qu'entames a paecete nel escribir a Humberto Gonzali. A esti pasu van metete en dalguna causa xeneral porque yá-yos resultes un pocuñín menchevique.

    ResponderEliminar
  9. Ye lo que pasa cuando aparecen los papeles (http://aruelu.com/spip.php?article2867). Nun busquemos otra desplicación. El gacetilleru y demás probes infelices tán al serviciu del "partido".

    ResponderEliminar

Publicar un comentario