2.11.11

Ye hora de facer presión

La victoria de FAC el pasáu mes de mayu revolviera el piteru pero bien. Los equilibrios políticos, fosilizaos dende la transición, francieran como naide lo esperare unes selmanes enantes d’aquel domengu 22. Y tamién ximielgárase dafechamente esi mundín, más o menos grande asigún pensemos, que ye l’asturianismu. Los asturianistes, inclusive munchos nacionalistes d’esquierda, anden caleyando ente la esperanza y la desconfianza. De fechu, ye cuasimente que de risión ver como dalgunes señalaes personalidaes del movimientu dicen en privao lo que más lluéu nun s’atreven dicir en público. Hai un “casquismu” perestendíu, non por simpatizar con Álvarez-Cascos necesariamente, sinon pola hixene que supunxo esti cambéu na política asturiana.

Dende’l puntu vista cultural, figures como Emilio Marcos Vallaure al frente de la conseyería de cultura, o Carlos Rubiera na conceyalía en Xixón, o Xosé Nel Riesgo dirixendo la fundación de cultura xixoniega, suponen un saltu cualitativu de gran importancia, dempués de les décades de mescabu, despreciu ya escaezu pa col “etnos” del país.

Pero ye, otra vuelta, la hora de la presión. Nun podemos dexar de lláu la reivindicación más vieya y fondera d’esti pueblu: la oficialidá de la llingua asturiana. Nun podemos siguir adicando pa esti gobiernu ya esperando que faiga daqué. Ye necesario desixir con tola xixa posible l’estatus d’oficial pal asturiano. Hai que volver a dicir lo mesmo que llevamos diciendo dende metanes los setenta: nun hai otru camín que la oficialidá. Persabemos qu’esi estatus nun salva la llingua mecánicamente, pero ensin esi estatus la so muerte ye un fechu a mediu plazu.

Voi poner un exemplu qu’igual dalgunos de los llectores qu’entren nesti espaciu nin tan siquier conocen, por custión d’edá. Nos años ochenta yera normal que, enantes d’allegar al aeropuertu de Santiago’l Monte, sintiéramos esta fras: “señores viaxeros, nunos minutos vamos aterrizar nel aeropuertu d’Asturies; pónganse los cinchos, apaguen los pitos, pongan tiesos los sos asientos y atiendan a les indicaciones de la tripulación; orbaya y la temperatura ye de nueve graos”. Güei, trenta años dempués, yá namás que sentimos español ya inglés en delles ocasiones. ¿Qué pasó?.

Pasaran munches coses y diba ser un exerciciu mui abegosu desplicar la complexidá, pero una custión evidente ye que nos últimos años la ciudadanía dexó de facer presión y, en parte, dexolo por poner la so confianza en determinaes persones o determinaos grupos políticos.

Cuando Amelia Valcárcel asumió la conseyería de cultura, munchos asturianistes y nacionalistes pensaron que la custión llingüística taba nes manes d’una “de les suyes”, anque tamos falando d’una militante del PSOE, el partíu más antiasturianu de tolos qu’esisten, polo menos hasta la fundación del neofaxista UPD. La presión baxó, la complacencia fixo que les movilizaciones aminorgasen. Avanzárase en dalgunes coses, caro, pero l’obxetivu la oficialidá quedó pa práu. Valcárcel marchó dexando l’estatus de la llingua nel mesmu sitiu que taba cuando llegara.

Más sero llegó Izquierda Unida al gobiernu, sofitando a Álvarez Areces. Otra vuelta un sector importante l’asturianismu pensó que agora, agora sí, taben nel executivu “los de so”. Esto supunxu otru frenazu a la movilización. La Xunta pola Defensa de la Llingua, otres formaciones más pequeñes y la mesma Academia de la Llingua Asturiana cedieran tarrén. El nomamientu como director de política llingüística de Ramón d’Andrés, otru de “los nuesos”, cebó la esperanza hasta’l puntu de creyer que la oficialidá taba doblando la esquina. Non namás nun s’algamare l’obxetivu sinon qu’entrose na dómina de más grande amarraza ente los asturianistes. Les engarradielles propies de los departamentos universitarios llegaron a la sociedá, qu’entamó ver aquello como un conflictu filolóxixu, exemplarizable na griesca Seminariu de Llingua Asturiana “versus” Academia de la Llingua Asturiana.

Por si fore poco, Izquierda Unida, na so esquizofrenia de gobernar en palaciu y manifestase na cai contra los actos de gobiernu, sacó de la manga’l Conceyu Abiertu pola Oficialidá (y l’autogobiernu), nel que la mesma Academia implicose hasta velo y dexalo. Otru choque nel asturianismu: los nacionalistes quedaron fuera d’esi aconceyamientu, metá por dignidá y metá pola so afición al autismu. Esta vuelta sí, esta sí, diba venir la oficialidá de la mano de Quico Valledor y Noemí Martín. Pero, evidentemente, tampoco fora d’esa.

Lo que llama l’atención d’esta dómina ye la cuasi unánime oposición de los defensores de la llingua a les úniques midíes que valieren pa dalgo, les qu’aprebara’l gobiernu de Marqués col sofitu’l PAS de Sánchez Vicente. Ye llamativo qu’a estos nun los consideraron como “de los nuesos” cuasi denguna de les organizaciones y aconceyamientos vivos nesos años. Puede entendese la perceguera de los grupos estrictamente nacionalistes (Andecha Astur, IAS), pero los demás, ¿por qué?.

El capítulu caberu llega cola entrada de BPA nel gobiernu. Magar que Rafa Palacios asume competencies de cooperación internacional, cosa rara pa ser, teóricamente, el primer nacionalista que “toca poder”, vuelve la ilusión… y cede la presión. Con Consuelo Vega, otra “de les nueses”, en política llingüística, otra vuelta la oficialidá pa dientre cinco menses. Esi gobierno PSOE-IU-BPA-LV cayera en mayu d’esti añu y la situación ye la mesma. O pior, porque foran los años del inventáu conflictu de les tierres pente l’Eo ya’l Navia ya inclusive –un prestoxosu escritor fixo abondes incursiones- apaeciera un “castellano montañés” pellí peles Peñameyeres.

La culpia de les persones responsables ye evidente, pero esi nun ye’l problema central. Teo la mio opinión bien formada de caún y de les sos polítiques, pero la custión ye otra. La custión ye que por afinidaes ideolóxiques o por porgüeyos económicos –que tamién lo hai- la sociedá dexó de presionar. La desmovilización fora cuasi total, quedando namás dellos “irredentos” que, en más de dos y de tres ocasiones, foran apellidaos de tóo sacantes de guapos.

Agora pue tar pasando dalgo asemeyao. Hai entusiasmu enforma coles posibilidaes de FAC, por muncho que lo digan cola boca pequeñuca los asturianistes d’esquierda. Confío muncho más n’Emilio Marcos Vallaure, Carlos Rubiera o Xosé Nel Riesga qu’en la tropa “cosmopaleta”. Pero nun m’engaño. Hai de retomar la presión. L’asturianismu cultural tien puxu y siempres lu tuvo. Agora hai de volver a amosalo.

¡Oficialidá!.

13 comentarios:

  1. ¿Daveres piensa daquién que FAC va traenos la Oficialidá?
    Yo piqué col "ensín oficialidá nun hai pautu de gobiernu" de Valledor pero más bien por desesperación.

    El problema de la oficialidá ye que ta mal desplicada por nuesa parte y perbien pola d'ellos: la xente piensa nel "ye caru y hai delles prioridaes", "solo val pa problemes d'imposición", "son 4 bablistes que quieren colocase d'ello" y'l "total, si naidie lo fala puro".

    Nos podemos falar y falar, cansanos a desplicar y demostrar que tou ye mentira, que nun ye asina, pero demientres nun haiga nenguna "personalidá política" qu'asoleye pela TV esi pensamiento, y más, faciendolo n'asturianu, vamos siguir asina.

    La oficialidá namái va venir por presión social, y más presión que coles manifestaciones qu'hubiera de les 25000 persones nun vamos algamar. Agora ta la crisis, el paru ... ¿cuántos vamos agora a les manifestaciones? ¿2000? ¿Y con qué presencia nos medios asturianos? Casi nenguna. Ye que ya nin entruguen a los políticos pol tema del asturianu, ya nin esiste, ya ta perdío.

    Suena pesimista, pero ye lo que pienso. Nun val salir na TV falando que tas a favor de la oficialidá, colos cartelo de detrás n'asturianu demientres fales un perfeutu castelñán. Nun val Llamazares. Nun val ver a Rafa Palacios encabezar les manifestaciones si depués sal falando'n perdayuri'n castellán ensín falar de la represión qu'ufrimos n'Asturies.

    Per una vegada, PPSOE son coherentes y nun van de viendemotos. Y FAC más de lo mesmu, falen de sofitar y puntu. Nun vamos algamar más. Pero eso, na siguiente manifestación, ehí taré, otru añu más, glayando OFICIALIDÁ.

    ResponderEliminar
  2. Saludos David. Voi a entrar el primeru equí. Lo primero dicite que yo tamién -y cola boca grande- veo qu´esti ye´l gobiernu más asturianista que nunca esistió. Y nun lo oculto. Dicir que, vista la Lloria que domina esti "asturianismu" y esa "esquierda nacionaliega" colos sos pleitos de sigles unipersonales y unifamiliares, pue haber más discursu identitariu nun rexonalismu del FAC qu´en toa esa pequena tropa cibernacionaliega. Hasta ehí creo que toi contigo. Otra cosa ye la "presión" qu´invoques. Nun hai presión dala, David. Teo dalguna esperiencia de trabayu a comuña por faer coses pala llingua, y a los llamamientos a trabayar, ren de ren. La xente mátase a escribir tochaes nos foros cainites, pero apurrir noticies de discriminación llingüística, faer informes, solicitar testos n´asturiano, acudir a conceyos... Eso nada de nada. ye mester ser autocríticos y nun dexase autoengañar. Como dicía Vicente Oliva, ¿quién va a los actos culturales asturianistes? Contaos. ¿Cuántos lleen a los nuesos escritores? Colos deos de la mano. Y a la Manifestación Litúrxica pola Oficialidá ¿cuánta xente va? Representamos lo que somos, namás una minoría. Ye mester que nos curemos de tou victimismu y visión allumada de la realidá. Simpatía pola llingua? bayura d´asturianos. ¿Necesidá imperiosa d´oficialidá? Namás qu´unos pocos irredentos, y menos entá nun contestu de crisi bederre, un paru galopiante y un esbarrumbe xeneral del sistema. Nestes condiciones la Oficialidá nun va tar en primer planu, nun s´engañe naide. Foru necesita mayoría, más estabilidá institucional y un consensu social bien afitáu p´algamala. Pa eso ye preciso afitar socialmente que l´asturianu nun ye la llingua oficial del Exércitu Asturianu pala Lliberación Nacional, nin un arma toupoderosa contra les "fuerces d´ocupación". En suma: menos infantilismu, más realismu pala política asturianista, que ye ridícula y fedionda, y un cambeu de réxime más afitáu onde FAC vaya cobrando personalidá rexonalista y transversal. Abrazu. CXB

    ResponderEliminar
  3. Desque los anguaño axuntaos nel tripartitu del duernu, fundamentalmente la "izquerda plural" escurrieron meter nel clientelismu a una parte del asturianismu, de mano cultural y dempués políticu entamó'l principiu del fin de la presión social. Equí unos a pola subvención, otros a publicar el so llibrín, otros a ocupar el puestiquín y toos a engardise por un puestu nel peselbre. Nun va haber más presión social de la que pueda haber güei. Esi tren yá pasó. Pa que'l FAC dea'l pasu d'oficializar la llingua tien de pasar tiempu a embute, afitase, medrar, dir cuayando la so propuesta política del llau'l rexonalismu. Y asina y too, col PPSOE escontra, nada de nada. L'asturianismu personalista y la izquierda del bable y la gaita son calabres políticos que nun van resucitar enxamás. Llevólos la güestia nes últimes elecciones autonómiques y alón. Queda saber si l'asturianismu cultural va esmucise del clientelismu y ser quien a entamangar organizaciones abondoses en medios materiales y humanos pa puxar en forma o si non. Yo pienso que non. ¿Salides?. Nesti momentu y per munchu tiempu nun veo nenguna.

    ResponderEliminar
  4. El cáncer de la reivindicación llingüística del nuesu país foi'l confundir roxes con frisones . La reivindicación llingüística tien que tar percima d'enclinos políticos, l'asturianu nun ye de dereches nin d'esquierdes, nin tien de venceyase a nenguna d'estes, L'asturianu ye de los asturianos; nacionalistes, rexonalistes… pero tamién d'aquellos que sintiéndose dafechu españoles quieren asumilu como propiu.

    La verdadera normalización social del asturianu llegara cuando los nuesos fíos aguellen con normalidá, como daqué propiu la so llingua , consiguir esto implica un cambéu de mentalidá en nós y una tresmisión oral d'esta llingua nel ámbitu familiar acompañada una reconocencia explicito de la esistencia d'esta llingua milenaria.

    Si…, tamos na xeneración perdida, los nuesos güelos falaben asturianu y “nós” (ente comines) consideramos llargu tiempu la llingua como daqué pocu cultu, aldeanu y más propiu del leguaje de chigre, cerrando nel meyor de los casos el so únicu usu a temes de cultura de casa , perdiendo con ello la ferramienta de la transversalidad llingüística .

    Nes nueses manos esta'l cambéu, nes nueses cases la oportunidá de realizalo y de xacíu na cai, cola mas alta esixencia a les instituciones publiques pa la so oficialidá, y sobremanera cola nuesa presión nos colexos y l'universidá pa que les nueves xeneraciones nun cierren l'escuru circulo qu'emponga a la nuesa llingua na desapaición.

    ResponderEliminar
  5. Dafechamente d'alcuerdu con vosotros, mui n'especial col últimu Anónimu. Esi ye'l camín. Prestome muncho lo de confundir "roxes con frisones".

    ResponderEliminar
  6. ¡Qué raro que colo repunantes que somos, naide me riñera! Escapóseme lo de Peñameyera, siendo como ye Peñamellera... Un saludu.

    ResponderEliminar
  7. Yo sí voi ser repunante, anque n'otru sen: DMR confunde (nun sé si interesadamente) el PAUTU POL AUTOGOBIERNU Y LA OFICIALIDÁ de la segunda metá de los 90, que foi vampirizáu y mangoniáu polos camaraes d'IU y polos mandones de l'Academia de la Llingua Asturiana, col CONCEYU ABIERTU POLA OFICIALIDÁ de mediaos de los 2000, onde IU nun tuvo'l protagonismu que quixeron (y qu'intentaron tener) y onde l'ALLA s'abstuvo de participar.
    Dicho sía pa que prevaleza la veracidá de los fechos, si nun ye muncha molestia.

    ResponderEliminar
  8. Repu: tienes razón. Confundí los dos aconceyamientos. Referíame al primeru d'ellos. Pueo asegurate que nun hebo mala intención. Pido esculpies a los que se dieran por ofendíos. Gracies pola rectificación.

    ResponderEliminar
  9. Venga da-y vueltes pa nun dir a nenyures. El problema tien analís bien cenciellu. Nel asturianismu cultural hai unos pocos que caún trabaya por un cientu, mientres el restu dedícase a iguar les coses del país en chigre o a mangar pilancos. Dicho con otru xeitu, tamos atacaos de vagos, bocayones y torgaores, y faltos de xente serio.

    ResponderEliminar
  10. Hola a toes y toos. Soi Paco (Avilés).

    Puede ser que, comu dixeron otres presones equí, la oficialidá y la normalización social del asturianu va llegar cola tresmisión de xeneración en xeneración, ensin entrar n’enclinos políticos y faciendo del nuesu idioma un padrimoniu común de tolos asturianos y asturianes, dixebradamente de la opción política que se tea. Puede ser; nun digo que non.

    Pero, ensin ñegar eso, paezme que con ello, más qu’un camín a siguir, lo que se ta plantegando ye un deseyu de que les coses fueren d’otra manera a comu son na realidá.

    Les presones tienen idegues polítiques y eses idegues influyen en tolos aspeutos del so pensamientu y del so llabor práuticu. Ye imposible (polo menos pa mí) garrar y dicir, por exemplu: “bono, yo soi nacionaliegu d’izquierda, pero pa esto de la oficialidá nin voi ser nacionalegu nin voi ser d’izquierda, voi ser namás asturianu”.

    Ensin facer de menos dengún comentariu que se fexo, camiento qu’hai un alderique por facer. Y ye que si les encuestes (y lo que, polo menos yo, palpo perende) falen de grandes estayes de la población asturiana a favor del so idioma, ¿por qué les organizaciones polítiques nacionaliegues y les asociaciones que trabayen pola oficialidá, tienen tan poco sofitu?.

    La mio opinión presonal ye que la oficialidá va venir, si ye que vien, pola suma d’un conxuntu de coses, pero la esistencia d’una organización política nacionaliega y d’izquierda que seya referente, nun va haber oficialidá nin recuperación nin normalización del asturianu.

    El porqué de qu’esa organización política nun llega a cuayar, camiento que ye l’alderique qu’hai de tener.

    ResponderEliminar
  11. Paco (Avilés).

    Perdón. Nel anterior comenteriu quise dicir que:
    ensin la esistencia d’una organización política nacionaliega y d’izquierda que seya referente, nun va haber oficialidá nin recuperación nin normalización del asturianu.

    ResponderEliminar
  12. Pues yo camiento qu'a la población d'Asturies nun-y importa un res la oficialidá de la llingua. Si la ponen, nun va reburdiar, y si nun la ponen, queda tan panchu. Total, piensen que ye dicir cuatru "yes" y acabalo too'n -u y mientres los fios estudien lo que ye un pegoyu o qu'Octubre ye Ochobre, tan contentos. Nun supón problema pal asturianu mediu qu'el asturianu nun seya oficial, y per eso la clas política asturiana ta tan afayaiza.

    N'Avilés, Uviéu y Xixón, cada vegada fálase menos asturianu, daqué más en Xixón, pero poco. Pola cuenca o los pueblinos presta pasiar y oyer a la xente falar o los cartelos nos comercios, pero repito, tan bien con esi status. Naidie-yos diz nada por falar asina (non como enantes que te calcaben un par d'hosties nos colexos), poco a poco van barrutando que falen daqué dixebráu del castellán pero nun-yos supón, camiento, nengún conflictu nun algamar la oficialidá. La xente ta cómoda col amestu esti que falamos.

    Y sí, toos sabemos que tenemos una sociedá asturiana analfabeta na so propia llingua, que nun s'apriende nos colexos y que cada vegada perdemos más falantes. Toos sabemos el camín correutu ye escolarizalu obligatoriu al mesmu altor qu'el castellan, y ye más, de xuru que ye no poco no que ta d'alcuerdu l'asturianismu, na xera p'algamar la oficialidá.

    Por eso sigo pensando que la oficialidá nun la va trayer nengún políticu ensín la presión de la sociedá, y la sociedá nun va pidila mentres tolos políticos salgan falando'n perfeutu castellán. Y Cascos nun ye Fraga. Asina que tamos fodíos.

    ResponderEliminar
  13. Nun confío un res en que FAC vaya de momentu a da-y puxu a la oficialidá. Pero nun mos engañemos, a pesar d'ello ye'l gobiernu más asturianu que tuvimos nunca y yo polo menos toi ilusionau en la posibilidá que tenemos de tener grupu propiu en Madrid.
    Nun toi d'alcuerdu con Paco (d'Avilés) en que pa que haya oficialidá tien que venir un gobiernu nacionaliegu d'izquierda. Más bien pienso lo contrario, ye más fácil que venga d'un gobiernu de centru-derecha. Solo hai que mirar p'atrás y ver el casu que fizo la izquierda a la cultura asturiana na historia.
    Ye hora d'entender que'l sentimientu asturianista nun ye de dreches nin d'izquierdes. ¿O ye más asturianu un asturtxale que solo fai presión nos foros qu'un paisanu que llee lliteratura asturiana, cuida'l so horru, la so güerta, paña les manzanes de la so pumará, ... pero siéntese tamién español?
    Yo como asturianu que nun ye d'izquierdes nunca me vi identificau poles estremaes fuerces nacionalistes... Ye hora d'echar abaxu esi mitu.

    ResponderEliminar

Nota: solo los miembros de este blog pueden publicar comentarios.