Un diputáu y 1.100 espartanos

Los votantes potenciales del asturianismu, enantes d’apaecer FAC nel panorama políticu, sumaben unos 20.000. Al rodiu los 14.000 sedríen los que votaríen, como lo fixeron en dos ocasiones, al PAS; otros 3.000 vendríen repartiéndose ente los grupos nacionalistes d’esquierda (AA, IAS, UNA); ya otros 3.000 podríen sumase con votantes más o menos asturianistes de centru-drecha y d’esquierda que nun voten o voten otres opciones, IU por exemplu, y que podríen averase a les urnes a votar una coalición amplia o una opción asturianista unitaria, perdiendo asina la sensación de tar tirando’l votu, cosa que consideraben seguro cuando había tres o cuatro candidatures. Inclusive con una bona llista, fecha con xacíu ya ensin tensiones, el númberu de votos podría sobropasar aquella cifra de 20.000.

Resulta que’l pasáu 20 de payares namái hebo –sigo ensin considerar a FAC pel momentu- una candidatura asturianista, estrictamente nacionalista, como yera la propuesta d’Andecha Astur. Pues el casu ye que collechó la roína cifra de 1.100 votos. Esta mesma organización sacara nes ellecciones anteriores 1.300 votos, ya eso qu’entócenes concurría Unidá y PAS, esto ye, que yeren tres a repartir, ensin escaecer tampoco’l puñaín de votos que BPA llevare a la macona d’IU. La primera conclusión ye clara: Andecha Astur caltién namás que’l bloque duru los sos votantes, esos 1.000-1.500 qu’enxamás cambien la so decisión y que yá quedaran na metada o menos de la metada de lo consiguío nes nacionales de 1999 y de 2003. Inclusive podemos pensar que tamién perdiera una parte d’esi bloque firme porque, teniendo en cuenta qu’AA siempres algama dalgunos votos de xente mozo que vota per primera vegada, esa cayía de 200 votos faese más significativa aínda.
Analizar estos resultaos sedría una perda tiempu pa un analista académicu o pa un periodista que publica nun mediu de difusión convencional. Pero a mín interésame porque conozo lo suficiente les interioridaes d’Andecha –sabía más d’ello hai un par d’años, tamién ye verdá- y veo estos movimientos más como un exerciciu de socioloxía de grupos pequeños que como socioloxía ellectoral.

Por embargo, sí que ye interesante analizar en términos políticos la segunda conclusión a la que podemos aportar en viendo los resultaos del pasáu domengu. Esos 1.100 votos indiquen que nin tansiquier un ellector de les otres opciones asturianes votó a la única candidatura que s’afitaba nel so mesmu espectru políticu. Esta circunstancia sí que ye mui significativa. Los votantes de PAS, IAS ya UNA diéran-y la espalda a Andecha Astur. Yo nun esperaba un descomanáu sofitu a esta candidatura, pero suponía que los votos andaríen na rodolada los 2.500 como mínimo. Ye posible que la griesca que’l nacionalismu d’esquierdes vien careciendo dende’l 2006 desalendare a munchos vieyos votantes. L’episodiu tan comentáu y apasionadamente debatíu del artículu –inoportunu pal mio tastu- que Rober Holgado espublizó en plena campaña, nel que removía otra vuelta los pleitos poles siegles, fora un bon exemplu d’una situación envelenada y, na mio opinión, difícilemente resoluble. Tamién una llista como la presentada, que nun yera una llista mui renovada precisamente, provocó ciertu refugu en dalgunos sectores. Pero, de toles formes, nin les antipatíes personales nin les guerres que desangraran a Andecha Astur xustifiquen que, por exemplu, de los 12.000-14.000 votantes del PAS nin tan siquier ún tomara la decisión de votar a Arturu Bermeyu y los sos compañeros.

¿Aú marcharan esos votos?, ¿ónde apararon esos 15.000 votos, como mínimo?. Esi ye l’analís políticu, estrictamente falando, qu’hai facer ya esta ye la circunstancia que les direcciones nacionalistes tienen de valorar, ensin cayer na primera conclusión que yo tocara tres párrafos más atrás y nun perdese peles caleyes del embeleguismu o la descalificación. Ye posible que los votantes notros comicios d’UNA o d’IAS quedaran abellugaos n’abstención o qu’empobinaran los sos sofitos a opciones como IU o Equo. Pela so parte, esa metada de votantes de la mesma Andecha que lleva yá dos convocatories faciendo otra cosa pudo tamién abstenese o votar IU. Pero teo pa mi qu’un númberu significativu d’ellos arribó al puertu de FAC. Nun teo datos nin información pero, como dicía, conozo bastante bien cómo furrula esti yá non tan mozu movimientu y, amás, llevo unos cuantos años trabayando nel analís social. Y, dende lluéu, FAC arrecibiera masivamente los votos qu’enantes diben al PAS, sacantes una minoría abstencionista. Eso quier dicir que los votos asturianistes-nacionalistes contribueron a que la cayía de FAC con respectu a les ellecciones de mayu fora un terciu más pequeña de lo que pudiere ser.

Y agora sí que toca falar de FAC, non precisamente pol so programa o polos sos candidatos, sinón pola percepción que d’esti partíu tien l’asturianismu en xeneral ya una parte más o menos enancha del mesmu nacionalismu d’esquierdes. Porque esa ye la clave na que tenemos qu’analizar les coses los que siempres apostamos pol nacionalismu-asturianismu y que llevamos cinco años dando pasos p’atrás y que viéramos como’l pasáu mes de mayu quedamos derrotaos en tolos frentes ya en toles retaguardies. FAC ta convirtiéndose nel referente principal, por nun dicir l’únicu, del asturianismu o, por si los puristes lo prefieren, de lo más apaecío al asturianismu. Esta ye una realidá tan evidente que negala dende una ideoloxización erma y descomanada, ye como querer derogar la llei de la gravedá porque mos cai mal Newton.

Amás, por el contrario los analises del PP, del PSOE y de los sos columnistes y analistes de cabecera, FAC nun careció una derrota’l 20 de payares. Lo que sí que-y pasara ye que’l so presidente tuvo que facer un exerciciu d’humildosidá política que nun-y debiere prestar un res. En seyes menses los asturianos votaron tres vegaes y fixéranlo de forma distinta en caúna d’elles. Nes nacionales diéran-y la confianza a FAC, nes municipales el PSOE nun arrasó pero caltuvo’l tipu y conservó los sos principales baluartes, sacantes la perda l’emblemáticu conceyu de Xixón, nel que, pesie a tóo, fuera’l partíu más votáu; y nes españoles, siguiendo la corriente del conxuntu’l reinu, votaron al PP. La razón ye cenciella: por primera vegada nun asistimos al bipartidismu imperfectu de PP contra PSOE-IU, sinon qu’apaez una organización d’ambitu asturianu y con una supuesta capacidá pa ganar y gobernar. Y dieron-y’l gobiernu asturianu a FAC y a Álvarez-Cascos.

Pero nes llexislatives españoles cambiaron el votu. La opción del PP paeciéra-yos más fiable, amás de que tóos persabíen que los diputaos de FAC diben sofitar la investidura de Rajoy. D’otra banda, la decisión de FAC de presentase na provincia de Madrid nun fora pescanciada por bastantes de los sos votantes de mayu, que quieren un partíu asturianu que nun ande con esperimentos raros y que nun tienen como asuntu principal la denuncia del Tratáu d’Utrecht pa que la casa de Borbón recupere un Xibraltar qu’entregó pa mantenese nel tronu. Con tóo y con ello, escontra la polarización PSOE-PP y la posición mui recuperada d’IU, FAC sacó un diputáu, convirtiéndose nel primer partíu asturianu que va entrar nel palaciu de la Carrera de San Jerónimo. Ya eso fuera posible porque parte del furacu abiertu nel ellectoráu vino a atapalu el votu asturianista. Con esto la percepción de que Sostres lleva’l mandatu “autonomista” faese más fuerte y, d’otru lláu, los dirixentes de FAC son conscientes –si ye que nun lo yeran entá- de la importancia del ellectoráu nacionalista, güérfanu d’organización dende va un tiempo o igual dende los anicios seminales.

Y agora, ¿qué facer?, ¿qué posición tomar o tomamos?, ¿qué faen los que ven A FAC como un referente asturianista pero considérenlu demasíao de dreches?, ¿qué faen los nacionalistes qu’aceuten que FAC ye rexonalista pero, lóxicamente, españolista?. Nun son entrugues fáciles p’arrepostiar.

Lo primero ye ser conscientes de que’l movimientu asturianista, no especial l’estrictamente nacionalista, si nun ta muertu ta dando les boquiaes. El vientu la historia nun sufló en popa nos últimos trenta y cinco años y nun tien traces de qu’entame a facelo agora. Inclusive’l texíu asociativu, que tanta fuercia tuvo, especialmente el de revindicación llingúística, ta agora embaxo mínimos, esfarrapáu pola incomprensión y la cabezonería d’unos, sí, pero riba tóo polos porgüeyos de los que s’instalaron comodonos na coartada de la creación artística y académica personal o grupal mientres asistíen impasibles, cuando non aidando con enfotu, a la represión y a la criminalización de les señes y finxos identitarios.

Ye necesario repensalo tóo. Hai díes que camiento que tamos entrando nuna edá media, onde namás que mos queda abellugamos nes abadíes y nos monesterios pa salvaguardar la cultura que seyamos quien a rescatar de les manes de los bárbaros. Vienen dómines de trabayu en grupos que poco o nada tean que ver coles cadarmes que nunca fuimos a poner de pie y a daprendeles a caminar. Eses coses yá tan faciéndose, seliquino, ensin munchu ruíu. Hai dalgunes esperiencies y dalgunos proxectos mui “tresversales”, en fata pallabra de la xíriga política pa querer significar llínies d’acción tresdisciplinares y plurales ideolóxivamente.

Polo que cinca a lo estrictamente político, evidentemente, caún puede y debe facer lo que-y pete. Naide ta obligáu a militar nun partíu y, anque paeza raro y mal visto nel nuesu mundín, tampoco naide ta obligáu a permanecer nun mesmu sitiu porque esi ye’l so llugar “natural”. Quien piense que FAC ye la única solución que dé’l pasu y dexe de tener miéu a que los conocíos lu llamen “facha”; y quien camiente que, por exemplu, IU ye la otra solución posible, que faiga lo propio sin llerza a que lu apelliden de “comunista español”. Y los que quieran permanecer nel ámbitu’l nacionalismu d’esquierdes que lo faigan de la mesma forma, ensin medrana a que los califiquen de “talibanes”. Pero, faigamos lo que faigamos, tenemos de ser conscientes de que mientres lo vieyo nun muerra lo nuevo nun va nacer. Dempués de cuasi cuarenta años y nunes ellecciones con namás qu’una candidatura nacionalista sáquense 1.100 votos y con 1.100 persones, yo una d’elles, por mui heroico que lo veamos, nun vamos defender dengún pasu de les Termópiles.

Comentarios

  1. Estimáu David. Paezme perinteresante la to reflexón, pero creo que nun aciertes nel to analís no tocante al votu de la xente d'UNA nestes elecciones.

    Otru cantar ye'l votante mediu del PAS que nunca nun supe mui bien en qué consistía. Nel mio ámbitu familiar y d'amigos esi votu ye (foi) mui poco fiel y venceyáu a la izquierda más epidérmica. Nesos casos foron cambiando (adulces) a PSOE o IU (algunu habrá que votare FAC, pero nun conozo casu talu, más allá de ciertos asturianistes históricos y de trayectoria pendular). Con too, tolo que pueda dicir yo del PAS va prendío con alfileres, porque insisto, nun conozo muncha xente militante o votante d'esa organización.

    Nel casu d'UNA, como afiliáu cuantayá puedo asegurar que nun conozo a naide d'esta organización que votare FAC. Y tampoco Andecha, sinceramente. Obviamente nun conozo a la mayoría de los 6000 y picu votantes (que non 3000) de les autonómiques d'esti añu, y polo tanto sí calculo que munchos d'esos votantes optaríen esta vegada por IU o Equo. Pero de la xente militante d'UNA y Bloque sí conozo y puedo asegurate que fueron más bien pocos los que votaron IU. Votose Equo?? En dellos casos sí. Pero tamién hebo (igual lo que más) votu nulu o abstención.

    Prentender que un militante d'UNA vote a Arturu Bermeyu ye poco menos qu'una broma (de mal gustu, por cierto). Anque sinceramente: nun conozo a naide que conoza a dicha persona que sea quién a votalu (lo que, d'otra manera, había dar que pensar).

    Respecto a FAC vengo observando nos tos escritos cierta "equidistancia". "FAC nun ye lo mío, pero igual ye bono pal país", podría resumir. Reconozo que esa dulda pude tenela yo (y bien me arrepiento) durante 5 minutos de la mio vida, especialmente al ver a ciertos elementos del PSOE fincar la rodiella. Pero más nada David. Y por cierto, FAC ye lo suficientemente grande como pa tener vecinos, compañeros de trabayu o mesmo amigos que tan afiliaos, voten y/o simpaticen con tala organización. Sinceramente, les diferencies sociolóxiques ente FAC y PP son mínimes. Ye más, l'afiliáu mediu de FAC tiende a rezumar más testosterona antiprogre que'l peperu mediu (más acomodaticiu y moderáu desque Rajoy supo que diba gobernar).

    En cualquier casu David, insisto no interesante de la to reflexón y respeto la to esperanza nel FAC o mesmo n'Andecha. Pero somos munchos los nacionalistes que tamos n'otres coordenaes cuantayá.

    ResponderEliminar
  2. Pue ser Reteyón, que nun tuviere mui finu en delles aprosimaciones cuantitatives, pero nun creyo qu'invalide l'analís. Pero sí hai una cosa que nun ye verdá: nun soi equidistante. Tenemos un defectu mui xenerálizáu; confundir descripción con prescripción. La mio descripción puede ser enquivocada, evidentemente, pero nun ye una prescripción. Falo de lo que veo y, con unos añinos enriba, dalgo sé interpretar. Igual tienes razón no que me dices de la UNA, seguramente. Más sabrás tu que yo. Pero, aprovechando esta primera entrada, crítica pero educada (que tantes vegaes s'echa de menos), quiero insistir que nin aconseyo a naide que s'afilie o vote nada concreto ni tampoco, paez mentira qu'haiga de repetilo (nun lo digo pola to intervención), que yo vaiga a dar dengún pasu políticu. La mio vida hai un tiempu que caleya per otros caminos.

    ResponderEliminar
  3. Nesti artículu tuyu ta mui bien que-y vengas a reconocer nel FAC un abellugu pal asturianismu o nacionalismu astur. Querer ñegalo diba ser, claro, separtase del suelu y poner los pies pencima la cabeza. Esa dosis de realismu tuya siempres ye bienllada al allucinóxenu mundu de los nacionaliegos. Decretar que ta dándose les boquiaes esi mundín nacionaliegu ye d´agradecer, masque yera mester tenelo bien afitao yá la nueche mesma de les elecciones de mayu, y non agora. Permíteme la crítica, yá qu´andamos faltos de crítica y autocrítica.

    Yo fícelo esos díes postreros, en mayu, y pa entós recibiera bien d´ataques, afortunadamente cibernéticos. Decreté daquella–ensin paños escalecíos- que´l nacionalismu asturianu tenía necesidá d´una llimpia. Un bañu disolvente pa refundalu dende finxos nuevos totalmente. Quedé como´l malu la película al denunciar bien de vicios que s´esparden y añeren nesti pequenu guetu, vicios y erros qu´entamaben precisamente d´esi noyu de… ¿”espartanos”, dices? Nunca tantos debimos tantu fracasu por culpia de tan pocos, David. Andecha yera un cáncanu, dicía yo en mayu. Andecha nun esiste, ye calabre contaminante digo güei. Nun ye defendible una triba de votu “románticu” como´l que insinúes nesti escritu, realista y ponderáu en too menos en cuantes dediques palabres de ciñu y romanticismu a una formación que nun ye nacionalista nin tien muncho que ver colo qu´antañu fue, porque nun esiste, coime, nun esiste y poro nun paga la pena dedicái más llínees.
    FAC ye un camín, y neso teo coincidencia. Hai abondes diferencies con IU: abrió les manes a los asturianistes, y nun foron éstos los que miagaron entrar (polo que yo sé). Tienen más respetu pola llingua que´´l qu´amosaren nunca los de la “Esquierda plural”. Los del FAC nun tienen traxeutoria de represión cultural y llingüística del asturiano tovía: tán empezando, mentes que´l papelón d´IU (“mui sensibles a la pluralidá nacional” como dicen n´Aruelu) nesti tarrén, ye ominosu. Amás hai en Sostres, Cascos y cía un discursu antisucursalista –o sía nacionalismu exercíu que nun necesita tar representáu retóricamente- bien potente, meyor trabáu que´l victimismu infantilón que s´estiló siempres nel guetu asturchale. En resume: IU yá gobernó, col Bloque, y yá nos amosó´l calter oportunista y traicioneru. Nagüen poles migayes de la FSA, la “casa común” de la esquierda. Pela cuelta, Foro tien agora una especie de gobiernu acorraláu, que cuando quier faer la llimpia tien a tol Duernu encima. Yo creo qu´hai que tar con Foro agora si queremos acabar con esi Duernu , que ye real, que ye´l Réxime imperante dende 30 años p´acó. Teníamos que ser llistos, y amosar a la xente de FAC qu´ente los nacionalistes asturianos esiste xente serio, capaz, xente que pue compartir oxetivos y facer País.
    Gran erru (de mio) predicar la Xuntanza hasta mayu: nun se llogra res multiplicando cantidaes pequenes por cero: el cero ye Andecha pero non solo Andecha: son tola tropa esa de los burros empalmaos, de la izquierda que yá damos en nomar “del bable y la gaita”. Con un estremismu que, dafechu, tien llerza al “nacionalismu” nun se multiplica namás que por cero. Da igual lo grande que sía´l númberu de los convidaos a arrexuntase. Hai que metese, poro, notros escenarios y ser constructivu d´otra miente. De mano, tenemos un retu: que nun vuelva el Réxime. Y esi Réxime (verdaderu escurantismu medieval, David) pue volver mañana mesmo per vía de Moción de Censura col sofitu de tolos satélites piquiñinos d´IU y d´IU mesma, a saber, la Lluna redonda de la FSA. L´estremismu del bable y la gaita ye, va ser, na práutica real, el pequenu sofitu a los que van bombardear al primer gobiernu Asturianu que tuvimos en sieglos.

    ResponderEliminar
  4. ai, el rollu d´arriba ye de CXB. Escaecí ponelo al final. Gracies pol analís que faes, Rivas.

    ResponderEliminar
  5. Hola otra vez David. En nengún momentu entendí la to opinión como prescriptiva, dios me llibre. Pero como opinión (suxetiva) repondítela sin envís nengún d'invalidala (taría bueno), anque sí de criticala parcialmente.
    Lo que sí ye evidente ye que quiéraslo o non la to opinión cuenta y inflúi en xente. Y asina tien que ser. Otro ye qu'esto nun ye París, nun tamos nos años 60 y, sinceramente, nun yes Sartre (nin falta, por cierto).
    Un saludu y norabona pol blogue, mui interesante siempre.

    ResponderEliminar
  6. Si Pelayu nel sieglu VIII tuviere la mentalidá de los nacionalistes asturianos enxamás ganare la Batalla de Cuadonga, porque los sos fieles aperrillaríense ente ellos. Al nacionalismu asturianu faltó-y siempre lo fundamental: enfotu por ganar. Tuvo vértigu a les altures, a ser visible y a lluchar contra l'enemigu españolista faciendo comuña y prefirió regocixase no marxinal y nes guerres tribales. El resultáu d'ello: la tumba. Na mio opinión ta muertu. Cualquier movimientu políticu dayures que se niegue a ganar en realidá muerre primero o dempués. Eso esplica'l fenómenu FAC. Esta formación naz pa ganar y si nun ganen puñen y muerden. Y los nacionalistes que renieguen de lo marxinal ya'l victimismu van empobinando pal partíu casquista yo diría más qu'adulces a carrenderes.
    D'otru llau ta'l tabayu llingüísticu y cultural. Ye una necesidá vital pal país reflotalu basándose na TRESVERSALIDÁ. Nun hai que-y entrugar a naide d'ú vien, sinón qué tien qu'apurrir. Esi trabayu va ser el principal sofitu de la nuestra nación porque ye'l que pue caltener encesu'l caricós de la nuestra identida.
    Mui interesante l'artículu. Saludos a toos.

    ResponderEliminar
  7. L'analis que fae David paezme per bonu y abondo acertau, sicasi lo que pienso ye que l'ellectorau nacionalista-rexionalista d'izquierdes (votos d'UNA, Bloque y demás ensalá de lletres) ta esparcíu ente Equo, IU y l'abstención/nulos/blancos, ensin escaecer que'l PCPE siempres pué pescar d'algún.
    Falar o tener el tropecientos alderique sobre xuicio, siegles y demás paezme ya aburrío, amás que solo a unos pocos y-os convién mantener esta sempiterna engarradiella, cuando al paecer el clamor xeneral ye'l de la xuntanza.
    Los problemes xenerales ya inicales del nacionalismu políticu entamen (ye'l mi puntu de vista) colo de vender la piel enantes de matar l'osu y con una llucha de cabezaleros y cabecillas por tar siempres nes primeres posiciones cuando yegue la tan suañá victoria.
    Nel asturianismu cultural (tamién pasa nel políticu) lo que siempres me paeció qu'hebo foi un cáncer mayor o menor espandíu formáu por xente que, en busca del famosu puestín, de la recoyía de baldre de suvenciones o pola simple pertenecencia al "show business" asturianista (nun vaya ser que de pronto torne n'oficial la llingua y nun lleguemos al repartu).

    ResponderEliminar
  8. Pamique debí ser l'únicu afiliáu d'UNA que votó Andecha estes eleiciones.

    Ta claro que munchu votu asturianista coló pa FAC, dafechu yo mesmu toi ablucáu col calter "asturianín" (porque nun llega a -ista) que tien el partíu de Cascos, anque pamique tien muncho que ver el nomamientu de dellos nomáos asturianistes o xente capaz como Vallaure. Ta claro qu'amuesa bones maneres hasta agora. Ta claro que dempués del "nun vamos pautar col PSOE ensín Oficialidá" IU perdió la credibilidá que tinía pero ...

    Pero por dicir 4 vegaes "país" creo que nun vamos cayer de la burra agora, o quiciabes sí, lo qu'amuesa lo desesperao que ta l'asturianismo si tenemos qu'aferranos a un ex-falaxinsta españolista desterráu a la so pequeña rexón, perdón, país. Nun veo a Cascos como'l nueu Gonzalo Pelaez.

    ¿Eso quier dicir que ye pior qu'el PPSOE-IU? Ta claro que non, porque amás ye un partíu asturianu con voz n'Asturies y agora, n'España. Pero l'amuesa d'esos aires grandones del "Asturies es España y lo demás tierra conquistada" que tien Cascos asoleyose presentándose'n Madrid al empar que n'Asturies. ¿Con un mensaxe asturianista n'Asturies y españolista n'España? Nun cuela. Y pasó lo que pasó.

    Sobre'l nacionalismu asturianu d'izquierdes de xuru que sabéis muncho más que yo. Son munchos años d'observaor y enxamás atopé les rocees ente partíos más que por lluchar pola poltrona que nun tenemos (nin vamos atopar). De xuru qu'un votante d'UNA ta d'alcuerdu col 99% del programa d'Andecha, y lo mesmu al revés. Lo mesmu pasa con IAS, Bloque y demás. Toos queremos lo mesmu, una Asturies d'izquierdes, que lluche pola xente trabayaora que vive n'Asturies, que garre la oficialidá, y que too sirva pa facer un mundiu meyor. ¿Idealista? Claro, por eso tamos como tamos.

    Un exemplu, l'otru día entrugué al Twitter oficial de BloqueUNA (@bloqueUNA) que si nun diben asoleyar un comunicáu de solidaridá pa col asuntu les papeletes n'asturianu nes eleiciones d'Andecha Astur. Pues bien, retrucáronme un "tenemos q u'usar l'asturianu ondequiera y somos solidarios cuando a daquién nun-y permiten usar la nuestra llingua con normalidá". Cagonmimantu, si hasta Mourinho ye más consideráu.

    ¿Tan complicáu ye? Porque agora que tamos baxo mínimos quiciabes ye'l momentu de sentase, falar y facer daqué curiosu. Igual ye meteme onde no me llamen, pero una mesa moderada por David Rivas o Inaciu Llope puede que sia'l primer pasu. Ahi queda.

    Pd: daquien falaba que FAC ta algamando lo que nun algama'l nacionalismu asturianu. Ye una cuestión de perres, namás. Dame'l presupuestu que tien FAC, los sos contactos con empresarios asturianos y facemos una campaña onde garramos un buen puñáu de votantes. Si quiero enterame de daqué de Cascos, lleo LNE, si quiero enterame de daqué d'Andecha lleo InfoAsturies.net. Nun ye lo mesmu.

    ResponderEliminar
  9. Hola a toes y toos. Soi Paco, d’Avilés.

    L’analís que fae David ta bien, valme. El de CXB, val tamién pa muncha xente. El Xanu’l Caborniu fae’l de so y tamién val. Pero otros analís estremaos tamién tan bien. Y si yo, agora, faigo otru analís, pa muncha xente tamién va tar bien. Y asina, toos y toes facemos analís que van tar bien pa sigún qué xente.

    Hai quien arreñega d’Andecha. Val. Hai quien arreñega d’UNA. Val. Hai quien arreñega de BA. Val. Hai quien arreñega de CA. Val. Hai quien arreñega de FAC. Val. Toos y toes tienen razones abondo pa ello.

    Camiento que toos y toes coincidimos en que, a estes altures, falar de xuntances ye falar de daqué que, de toes toes, sí que ta en vía muerta.

    El nacionalismu/asturianismu cultural agora ye “transversal” y anantes, agora y mañana ye imprescindible, pero ensin continuidá política, tampoco va sacanos del pozu onde tamos.

    ¿Qué facer?. ¿Cuálu ye’l camín a siguir?. Paezme que nun queda otra que moyase y dar la cara. Nun me refiero a que lo meyor seya tala o cuala alternativa, sinon a que cada cual escueya la de so, l’asoleye y tire por élla.

    Al que-y preste Andecha, val, pero que lo diga públicamente y que trabaye por ello. Al que-y abulte meyor UNA, val, pero que lo diga públicamente y que trabaye por ello. Al que-y pete’l BA, val, pero lo mesmo. Al de CA, otru tantu. Al que nun vea otra que’l FAC, tamién val, pero que se dexe de disculpies barates, que lo diga públicamente y que trabaye por ello. Y al que nun-y vaiga nada, que se faiga “transversal”, que trabaye por ello y qu’aguante colo que faiga la xente que ta en política.

    Y el tiempu, ensin dubia, va poner a caún y caúna nel llugar que-y correspuenda. De verdá que yo nun veo otra.

    ResponderEliminar
  10. Paco.

    Yá ves, Maribel. Esti alderique nun parez tener el "nivel" que tú esperabes. Ye lo qu'hai. Pero, de xuru, que con dalguna aportación tuya, el nivel podríe subir. Munches gracies y un saludu.

    ResponderEliminar
  11. David, tienes que comprobar meyor los datos primero de facer análisis. Pásate munches veces cuando fales de coses pasaes, que meces coses o das datos que nun son rigurosos. Y ello fai que les tos conclusiones seyan enquivocaes, non por tar mal fechu l'análisis sinon por partir de premises males.
    Pasóte munches veces cuando falasti de la to historia d'Andecha y vuelve pasate agora cuando plantegues qu'hai 12.000 votos del PAS en 2008 qu'agora supones que fueron pa FAC y non pa la candidatura d'andecha (nun entro no de les sigles).
    Pero nun ye asina, porque aparte que diba munchu tiempu que nun se presentaba como PAS, yera URAS-PAS, el PAS nun se presentó a les anteriores xenerales porque vio que nun diba sacar nada.
    Namás hubo candidatures d'Andecha y Unidá en 2008, polo qu'hubo poco más de 2.000 votos asturianistes/nacionalistes, qu'agora queden na mitá.
    Pa mi si hai una conclusión ye que la xente nun ye tan fato y sabe lo que vota, y que los "furacos" nun se rellenen matematicamente, y menos nunes elecciones xenerales, que son otru mundu.
    Eso creo que lo vieron claro agora los del BA-UNA y por eso nun se presentaron, sobre too los de la UNA, depués de lo que pasó en 2008 cuando al nun tar el PAS ellos y Andecha pensaben que diben sacar tayada, y non, daquella esos 12.000 pasiegos votos quedaron.... quién sabe onde, porque nun había FAC. Pero como Andecha y Unidá nun presentaben una cosa "votable" en 2008, pues los asturianistes fuera del circulu mas cercanu nun los votaron.
    Ye lo que pasó agora a Andecha y ye normal depués de tolo que pasó y la imaxe qu'Andecha tien ente "los nuestros".
    Pel so llau en mayu BA-UNA presentaron una cosa más votable, sacaron más de 6.000, y si la ufierta fuera meyor, sacaríen, ellos o cualquiera, 12.000 o 20.000.
    Pero'l votu asturianista como a cualquiera hai que da-y coses fumables. Y por cierto, lo de FAC en unos pocos meses paezme que nun va poder tragase nin con anestesia por muncho que nos preste que Riesgo o Rubiera tean ehí.

    ResponderEliminar
  12. Un poco na llinia de los primeros comentarios voi facer un poco'l mio analís de la situación. Yo voté Andecha, tando en contra de la situación de la sigla, conociendo a Arturu y pensando que nun ye una persona adecuada pa ser la cara visible del nacionalismu d'esquierdes y votélo tres militar n'UNA y votar Bloque-UNA nes asturianes.

    Cuido qu'hai que tener en cuenta una cosa mui importante a la hora de ver los votos que tuvo Andecha y de ver pa ónde foron los votos nacionalistes-asturianistes, una cosa que nun se punxo enriba la mesa tovía y que realmente creo importante y ye que l'asturianismu o nacionalismu (que caún llante la llende u quiera) nun vìa necesaria nin oportuna nenguna candidatura asturianista/nacionalista.

    Nun se vía necesaria porque tamos nun procesu de refundación del movimientu que si nun se fai bien supondrá'l desaniciu. Poro, votar, votamos a Andecha xente de toles edaes (yo teo 19) y de tolos asprectos d'esti movimientín, pero votamos pocos, porque la inmensa mayoría nun vía relevante la presencia del asturianismu/nacionalismu nestes eleiciones. El gruesu de los votantes asturianistes decicieron dexalo de llau, unos abtuviéronse, otros votaron en blancu, otros votaron nulu y otro votaron otres fuercies que tán más o menos averaes a los sos principios xenerales, yá fore IU, FAC, PCPE, PP, PSOE, Escaños en blancu... etc.

    ResponderEliminar
  13. Sigo esti blogue con interés y ciñu dende bien d´años. Agora tengo que decir que nun soi a recuperame de la frustración que me produz esta cabera entrada y esti pseudo-alderique. Como tantos preseos del nacionalismu asturianu, esti blogue (con tol respetu y ciñu) ta manifestando la so inutilidá. Hai qu´esplicar el papel d´esos mil cien "espartanos" nel desaniciu total del movimientu asturianista. Quies dar lexitimidá a unes sigles desprestixaes y perxudiciales pal movimientu. Quies facer ver que yes fiel a ellos, cuando ellos nel fondu tiénente envasáu en formol. Podíes aportar muncho al movimientu si dexaras de gastar enerxía en mostrar una supuesta fidelidá a unes sigles que nun representen nada, o que nun son nada. Nin elles, nin les de la otra Andecha. Nun hai que pelear por nada d´eso. Hai que trabayar d´otra miente. Entiendo que puen existir razones personales que te lleven a dicir "FAC pue ser un camín pero´l corazón téngolu n´Andecha". Porque esti ye´l resume de lo que dices.Pero Andecha ye la disgracia pal movimientu, y como mínimo, represenra´l pasáu. Yá nun son espartanos, son indios faciendo l´indiu. Hai que xugar a ganar, y dexase de victimismu. Que pases de llargo a otru blog ensin retrucar nun ye de recibu. Yo, amigablemente, teo que te dicir que creo yá nun voi entrar más nesti blog. Pudisti dar retruques a lo que se te dixo, pero nada de nada. Que pases de llargo da la midida de cómo ta´l patiu.

    ResponderEliminar
  14. Faigo-vos yo l`analisis del nacionalismu asturianu. ye bien facil.

    Nun esiste.

    A mi llevóme 30 años dame cuenta, pero nun esiste. somos pocos, d`esos pocos unos son estremistes atechaos, otros son nacionalistes hasta los venti años ya dempues alon...
    Cada vez comos menos y cuidao¡ mas raros¡¡ nun se que nos pasa qu`enrarecemos cola edá, y al que nun-y da por una cosa da-y por otra, pero a cual mas rara.
    Digolo en serio. nun ye broma
    berto

    ResponderEliminar

Publicar un comentario