10.11.11

El samartín

L’once de payares ye una data perimportante ente les fiestes tradicionales d’Asturies y non namás que d’Asturies, cuando cellebramos a Samartín. Trátase d’una de les figures más veneraes en tola Europa altomedieval, con capielles y santuarios espardíos pelos tarrentorios de los primeros reinos cristianos de la dómina, especialmente n’actual Francia. Por embargo, dellos pué que tean arrequexando anteriores cultos a Marte, el dios romanu la guerra con un nome peraveráu a Martín, que, pela so banda, pué que sustitueran a divinidaes más antigues gales, de calter guerrreru. De fechu, Samartín, enantes de ser obispu, fora militar nos exércitos del emperador Xulián. Como vemos, ye congruente pensar en dalgo más que nuna coincidencia. De toles formes, sía o non un nome figuráu o arquetípicu, sí ye verdá que tamos delantre d’un home qu’esistiere daveres.

La tradición atribuí al santu una montonera prodixos pero de xuru que les histories más espardíes son dos de los sos primeros años. Martín, ñacíu en Sebaria y criyáu en Pavía, ingresara nel exércitu cuando’l so padre, un tribunu militar, fora xubiláu por un decretu de Costantín qu’obligaba a qu’un fíu relevare al so padre. Tando yá na milicia, alcontrárase con un probe n’Amiens que taba dafechamente desnudu y que pidía dalgo ropa. Martín desenvainó la espada y tarazó en dos la so capa, dándo-y una de les metaes al méndigu. Los sos xefes xulgaran aquello como un actu d’indisciplina y condergáranlu a permanecer desnudu y amarráu a un árbole dementres díes. Una d’eses nueches apaiciéra-y delantre Cristo, arrodiáu d’ánxeles y vistíu col cachu capa que Martín-y diera al méndigu. Entóncenes el tiempu camudara ya’l temperu fixérase amorosiegu pa que’l arrogante soldáu nun pasare fríu. D’ehí vien la creyencia nel “branín de Samartín”, un tiempu abondo caliente pa la dómina que ye y que suel tar domináu pol aire les castañes.

La segunda lleenda asitia al santu nel exércitu romanu escontra un poderosu continxente de bárbaros qu’invadiera la Galia. Martín, apellidándose como soldáu de Cristo, tomara’l determín de nun combatir, dalgo que l’emperador Xulián considero preba de miéu. P’amosar qu’actuaba asina por cristianu y non por medranosu, el santu avanzó solu y desarmáu, embaxo un estandarte con una cruz, y trespasó les files enemigues. Al poco los bárbaros rindiéranse ensin condiciones.

Fora entóncenes cuando Samartín dexó la vida castrense y, tres ser ordenáu en Poitiers por san Hilario, viaxó per munches rexones faciendo prodixos y llibrando inclusive en delles ocasiones d’una muerte segura, como cuando, cruciando los Alpes, viérase asaltáu por una banda criminales. Resucitó muertos, exorcizó endemoniaos, curó enfermos de gravedá y, tamién, dedicárase a quemar los templos paganos y a aprofitar les sos vieyes creyencies pal espardimientu’l cristianismu.

Morriera haza l’añu 395, siendo emperadores Arcadio ya Honorio, y lo mesmo Poitiers, onde se fixera monxu, como Tours, onde fora obispu, anduvieron en griesca polos sos farrumeros. Al final, los de Tours garraron el calabre pa pela nueche, sacáronlu per una ventana y, vadiando’l rigu Loira, interráronlu na so ciudá.

Tamién cuenten que Samartín domesticó un osu, faciendo que baillara. De fechu, la raíz “art” significa “osu”, raíz presente en “Martín” y n’”Arturu”. Ye más, nes agora castigaes tierres d’El Valledor, nel conceyu d’Ayande, al osu llámenlu “Martín”.

Les fiestes de Samartín asítiense nos díes centrales de payares, zarrando’l ciclu los muertos y abriendo’l ciclu’l gochu y les castañes, que va acabar al final del mes con san Andrés.

La relación ente’l sacrificiu’l gochu y la festividá de Samartín ye tala que los asturianos llamenlu “samartín”. D’esta miente, anque la palabra “samartín” tien un sinificáu xenéricu, les sos connotaciones siempres mos remiten al gochu, dexando pa otros animales o pa les masacres ente humanos otres pallabres como “matancíu”, “sarracina” y dalgunes más. Por eso, un refrán perespardíu per toa Asturies recuerda que “a tou gochín-y llega’l samartín”.

El samartín taba mui ritualizao y gociaba d’un ríxidu protocolu. Dende dos selmanes enantes al sacrificiu el gochu yera cebáu namás que con castañes y venticuatro hores enantes del mesmu quitábase-y la comida. La castaña ye una fonte grande de caloríes, amái de ser mui astrinxente. Con esa dieta y col ayunu demientres un día, asegurábense los coradores que l’animal nun pasaba fame pero que, a una mesma vegada, tendría les tripes llimpies nel momentu de ser abiertu en canal.

Tamién había un repartu llabores ente homes y muyeres. L’home mataba, pelaba, colgaba, abría, desvisceraba y descuartizaba al animal. El principal llabor de les muyeres yera recoyer el sangre, llimpiar les tripes, picar la cebolla ya’l gordo pa, col sangre, facer les morcielles, embutir los chorizos, etcétera.

Por último, a los neños mandábenlos a les caseríes d’alreol p’avisar de que yá taba fechu en casa’l samartín y llevar, dempués, la preba’l gochu, un cachín de carne. Un par de díes más sero los vecinos quedaben convidaos a sopes de fégadu o adobu, asigún les zones. Y pa dempués, pa cuando otra casería facía’l so samartín, la familia cuerrespondía colos vecinos de la mesma manera.

La importancia de les fiestes de Samartín, que, como vemos, constituyíen rituales de cuerrespondencia, fora aminorgando cola seliquina desapaición de la sociedá tradicional. El gochu yera ún de los pegoyos básicos de la familia campesina porque d’elli aprovechabenlo tóo, hasta’l sangre pa facer morcielles y los güesos pa caldos y potes. Güei yá nun tien esa importancia, puesto que la economía campesina ta integrada nel mercao, amás de que les families yá nun son tan numeroses, lo que supón qu’alimentar gochos yá nun lo pueden facer coles sobres doméstiques, cola esllava, y, per otru llau, los consumidores de casa diben ser pocos. Anguaño, a la escontra de lo que pasaba hai namás que dos o tres décades, criar gochos pa en casa ye antieconómico y los que lo faen ye pa nun francer los vezos o pa sofitar la recuperación de la raza asturcelta, la castra autóctona asturiana, que tuvo nun tris de desapaecer.

Amái, les nueves reglamentaciones sanitaries ponen munchos pilancos al samartín en casa, mientres que la normativa de defensa de los animales obliga a una forma sacrificiu que, torgando la crueldá tradicional, fai inviable l’aprovechamientu completu l’animal. Por exemplu, matar el gochu d’un tiru rifle impide, nes condiciones d’una casería, maximizar el rendimientu’l sangre.

Sí podemos alcontrar criadores caseros nos chigres de delles aldegues, porque nesos casos sí que ye rentable: bonos productos naturales a precios que compensen el sobrocoste’l samartín conforme a la normativa actual y alimentación barato por cuntiar cola esllava d’un restorán. Equí sigui cumpliéndose’l ciclu alimenticiu tradicional: comida-gochu-comida.


























3 comentarios:

  1. He comentar que na mio casa llevamos dos selmanes entamando pa facer el samartín que, con tolos que somos (a trabayar ¡y a comer!), costará la vida de trés gochos.

    Sacantes la especialización del trabayu pol sexu, dao que toos facemos bonamente lo que podemos, caltenemos la tradición bastantina. Tamién hai que cuntar que desque los mios güelos viven solos los gochos mercámoslos nel mataderu en llugar de crialos en casa porque lleva munchu trabayu.

    Por útlimo facer un apuntín llingüísticu, en Morcín, a l'aición de descuartizar al gochu, llamámoslo 'estayar' más que 'descuartizar'.
    Un saludu.

    ResponderEliminar
  2. "Estayar". Nun conocía esi verbu. Como nun teo a mano dengún diccionariu nun puedo comprebar si ye un dialectalismu de pa la zona de Morcín o si ta más xeneralizao. Seya como sía, gracies pol apunte, Pelayu. Y norabona a la to familia por caltener la tradición...

    ResponderEliminar
  3. Nel diccionariu de la Academia de la LLingua:

    estayar: v. Dividir n’estayes. 2 Repartir estayes [pa facer un trabayu]. 3 Trabayar una estaya. 4 Axustar [el preciu y condiciones d’un trabayu]. 5 Escarnar. 6 Partir [un animal en cachos]. 7 Enanchar [una galería o un travesal na mina].

    Pola parte política tócame la parte bona del Samartin, que ye esfrutar la xinta les morcielles de casa. Amás, como la familia ye de Morea d'Ayer, l'actu central del Samartin yera dir a los Humanitarios a fartucanos de fabada y panchón.

    Préstenme muncho estes entraes pedagóxiques asoleyando'l mor de la cultura asturiana. Amás, nestos tiempos onde too asodez tan rápidu y onde'l consumu de too ye instantáneu, ye necesariu parase a conocer les costumes y vezos asturianos. Y si esto mismo s'estudiara nes escueles ya sería perfeutu.

    ResponderEliminar

Nota: solo los miembros de este blog pueden publicar comentarios.