7.6.10

La teoría económica d’Andrés Rojo

De toles noticies al rodiu la posible marcha de Chupa Chups d’Asturies quédome, ensin duldia, coles opiniones del teniente d’alcalde de Piloña y alcalde de la parroquia de Villamayor, onde s’asitia físicamente la factoría. Diz Andrés Rojo, asigún espublizaba “La Voz de Asturias” el sábado 5 de xunu, que “Chupa Chups tien equí una mano d’obra más barato y nada conflictivo”. Con esta declaración convertía en titular pol redactor ya’l restu les sos declaraciones, Rojo, l’home confianza l’alcalde Camilo Montes (PSOE), ta dando –igual ensin sabelo- una llección de teoría económica.
Ye evidente que la cris nun la provoca’l coste salarial nin el mercáu llaboral, por muncho que’l nuesu modelu rellaciones tea ineficiencies y disfunciones a trompatalega. Dizlo Andrés Rojo: la empresa treslládase a Cataluña onde va pagar salarios más altos ya onde la conflictividá social ye mayor. Primera llección de teoría económica: el coste’l factor trabayu nun ye determinante nes decisiones empresariales, anque ye meyor pa la empresa cuanto más baxu.
Diz dempués el conceyal socialista que nel últimu plan xeneral urbanu de Piloña calificárase tola rodolada de Chupa Chups como tarrén industrial, col maxín puestu nun futuru enantu de la fábrica, lo que bien perxudicó a los usos tradicionales agropecuarios y a posibles usos terciarios. Segunda llección de teoría económica: les decisiones polítiques nun determinen les decisiones empresariales, anque ye meyor pa la empresa que-y seyan favorables.
Amete’l conceyal Rojo que s’autorizó un pasu a nivel de Feve p’ameyorar la seguridá de la estrada que lleva a la fábrica y que toles meyores que se fixeran na política d’augües, depósitos incluyíos, pensáronse en función del consumu hídricu de Chupa Chups. Tercera llección de teoría económica: les inversiones públiques nun determinen les decisiones empresariales, anque ye meyor pa la empresa que s’orienten a favor d’ella.
Termina Andrés Rojo asegurando que tienen tol sofitu’l gobiernu asturianu y de tolos partíos políticos y sindicatos d’Asturies. Cuarta llección de teoría económica: si les instituciones son débiles y nun tienen programa concretu pal país, les sos posiciones nun determinen les decisiones empresariales, anque mui contenta queda la empresa con alministraciones que dan perres ensin asegurar proyectos y con sindicatos más preocupaos por quitar y poner dirixentes na universidá, na banca o nel senáu español.
Andrés Rojo, lo más probable qu’ensin sabelo, acaba clavá-ys la espuela a los economistes de la oferta, los nomaos “neolliberales”, y pon pates arriba al mesmu Keynes, padre de los economistes de la demanda.

5 comentarios:

  1. Perguapo. Nin pallabra más.

    ResponderEliminar
  2. Como siempres l'economista radical. Un saludu.

    ResponderEliminar
  3. Verdaes como templos. ¿Ye que nun queden yá economistes que seyan a interpretar les coses ensin repetir les frases feches de siempre o ensin dar la tabarra estalinista? ¿Solo ta nesa posición crítica David Rivas n'Asturies? Ye imposible, tien qu'haber más. Pero nun sabemos onde tan

    ResponderEliminar
  4. Llamame l'atención que nestes coses d'economía nun entra naide y que en lo d'Israel o lo del gallego entren a morir. Ta claro.

    ResponderEliminar
  5. Con el presidente peor valorado de España, los sindicatos más domesticados, los empresarios más acomodaticios y la universidad más apalancada no me extraña nada lo que os pasa. Asturias nos saldrá de una reconversión eterna. Esta vez es ya de chiste: os quitan hasta los caramelos. Es una pena, sabes lo que quiero a Asturias (mis abuelos eran de Parres). Un saludo.

    ResponderEliminar

Nota: solo los miembros de este blog pueden publicar comentarios.