De la mentira al sacrificiu

Diben “refundar” el capitalismu y acabaron por amosar que’l “neocapitalismu” –términu pa mín más desplicativu que’l de “neolliberalismu”- marcha trunfante, dempués de derrotar a una socialdemocracia a la que namás-y queda’l matrimoniu homosexual ya’l debate sobro’l “hiyab”. Pero, si yo nun lleí mal a los clásicos socialistes –dende Proudhon hasta la nueva esquierda norteamericana-, les polítiques “progesistes” mídense poles sos polítiques económiques. La socialdemocracia europea, firía yá de muerte pente una drecha enchipada ya una esquierda anticapitalista emerxente, sucumbiera escontra la gran mentira supraestructural qu’escuende a la que Marx llamaba “estructura determinante”, la estructura económica.
Los gobiernos enllenaron les maseres de los bancos con dinero público a un tipu mediu d’interés del 1 por ciento, nel envis de que dieran lliquidez al sistema, con préstamos y creitos a families y a pequeñes empreses. Pero la oligarquía financiera lo que fixo fora comprar delda público al 4 por ciento. Con ello ganaba un diferencial de tres puntos y ametía-y más delda a los estaos. Círculu viciosu de llibru. ¿Por qué los gobiernos socialdemócrates nun optaron por una banca público cola que da-ys el dinero a les families y a les empreses directamente a esi 1 por ciento, o al 2,5?.
Un poco dempués, les axencies de calificación –entidaes privaes tocaes pol suflu divín y que nun acertaran nin una cuando entamó esta cris- decidieron atacar al euru pela vía más fácile: poniendo na picota a Grecia y, en menor midía, a Portugal ya España. ¡Qué casualidá qu’estes axencies tean asitiaes nos Estaos Xuníos y na Gran Bretaña!. Tamos falando del complexu dólar-llibra, al que mui bien-y vendría un colapsu del sistema monetariu européu. Por eso nun cargaron contra’l Reinu Xuníu, que tien una delda equivalente al 68 por ciento’l so PIB (España un 53) ya un déficit del 12 por ciento’l PIB (España un 11 y Grecia un 14). Por cierto, que Francia tien una delda d’un 78 por ciento’l PIB.
Entamaron con Grecia, metiendo-y un axuste de cura caballar impulsáu por Alemaña, axuste que, a nun tardar, va llevar al país a una deflación que podrá poner en pelligru la estabilidá mesma de la Xunión Europea. Bien podría lleer la canciller Merkel el llibru que Keynes escribiera en 1919, “Les consecuencies económiques de la paz”, nel qu’allertaba de que les draconianes condiciones impuestes a la vencía Alemaña diben provocar en pocos años una catástrofe n’Europa. Naide-y fixo casu y del tratáu de Versalles saliera’l nazismu, el revanchismu alemán ya otra guerra mundial. Agora Alemaña fae lo propio con Grecia, que cometiera’l dellitu, non de perder una guerra, sinon d’entrar na xunión monetaria ensin tar preparada pa ello y que yá nun puede devaluar la so moneda, como fixo Lituania hai unos menses nun 25 por ciento.
Dempués de que los griegos tuvieren qu’aceptar una brutal política antisocial, pagando la nefasta política económica y les mentires contables del gobiernu drechista anterior, tienen que aguantar les declaraciones del vicepresidente socialdemócrata, Theodoros Pangolos (“adorador de dios nel meyor mundiu posible” en traducción lliterario-chabacano), echando-ys la culpa a los trabayadores y a les clases populares. “Diez miyones de griegos robamos al estáu y agora hai de pagalo”, dixo l’esquierdista gobernante. Ablucante na so estupideza y na so estulticia.
Y agora llega Rodríguez Zapatero. El “tuntu” (la versión ayerana de “tontu” a mi préstame muncho) que pretendía pasar a la historia como’l más dignu continuador d’Azaña, va pasar como’l primer presidente español que baxa los salarios nominales. Por si fora poco, el presidente d’un estáu que “xugaba la Champions” hai un añu, apaez como un capataz obediente a los propietarios de la mina, la Obama Merkel Sociedá Anónima. D’ello deduzse daqué ellemental: ¿pa qué val esti reinu qu’económicamente ye un protectoráu?. Si’l gobiernu real ta en Bruxelles, ¿pa qué queremos Madrid?. Uviéu, Compostela o Barcelona pa lo cercano y la ciudá flamenca pa lo llonxano. Pa intermediarios ensín poder de verdá válenmos Álvarez Areces, Núñez Feijóo y Montilla.
Pero, d’un mou paradóxicu, esti pretor de provincia plantega unes midíes preñaes de xacobinismu yá que decide (en poco más de cuarenta y ocho hores, escontra tres años mexando contra’l vientu) ensin cuntar coles comunidaes autónomes nin colos ayuntamientos. La decisión de baxar el sueldu a los funcionarios alfréntase a una entruga: ¿quién-y baxa’l sueldu a un policía municipal d’Uviéu si nun ye l’alcaldía popular?, ¿quién fae lo propio con una secretaria’l cabildru tinerfeñu si nun ye’l gobiernu nacionalista?.
El programa a siguir ye mui clariquino. Díxolo’l pasáu 11 de mayu’l mesmu “Washington Post”, un periódicu non precisamente mui conservador. Dicía nel so editorial: “Europa, como preciu pola so salvación, tien de reescribir el so contratu social, que dende la posguerra fore xenerosu colos trabayadores y colos xubilaos”. Si hai un programa más claru que dalguién me lu desplique. Europa, la última trinchera del estáu social de drechu, a puntu ser asaltada polos bárbaros neocapitalistes.
Ya empiecen les midíes concretes. Los funcionarios, como son unos privilexaos porque tienen trabayu fixu (sólo formular esta fras yá diz bastantina de munches coses), que vaigan cobrar un 5 por ciento menos esti añu y tol añu que vien. Con cálculos un poco a la brava eso significa que dalgunos funcionarios –la universidá, por exemplu, de lo que dalgo sé- pondranse con sueldos reales de 1997. Y los xubilaos, que poca presión puen facer (una fuelga pensionistes namás diba afleutar a los bares onde tomen copes), qu’apechuguen pol privilexu de cobrar tolos meses, escaeciendo que cotizaron tola vida y que la revalorización de les pensiones ta amparao por una llei orgánica.
Pero nada dixo’l capataz d’endosá-ys dalgo de la cris a los causantes de la mesma, a los que, obscenamente, s’arrequicieron dementres l’espoxigue económico y nun contribueron pa nada socialmente. Nada dixo de xubir los impuestos especiales, nos qu’España ta a cinco puntos de la media europea y a doce o más de los casos de los países nórdicos o d’Olanda. Nada dixo de reinstaurar l’impuestu sucesiones, que suprimió demagóxicamente pa quitá-y una baza a Esperanza Aguirre nes anteriores ellecciones, nin muncho menos de reformar l’impuestu sobro padremoñu. N’algunos países del nuesu entornu ta plantegándose, por exemplu, gravar col 50 por ciento a partir d’un ingresu d’ocho mil euros mensuales. Tampoco d’eso faló Rodríguez Zapatero, el gobernante más “esquierdista” dende Largo Caballero.
Y nada dixo tampoco de lluchar contra’l fraude fiscal d’unos empresarios que declaren un ingresu mediu menor que’l declaráu por trabayadores y funcionarios. Y tamos falando d’un fraude fiscal que, ensin programes específicos pa decubrilu, reportó –gracies al trabayu d’inspectores y subinspectores fiscales, funcionarios que van perder al rodiu d’un 9 por ciento de sueldu- a la tesorería público 8.500 miyones d’euros l’añu pasáu.
El que tien que tar contentu ye Rajoy. El PSOE va facer la política’l PP, siguiendo les recomendaciones que vien dando l’equipu de Montoro dende hai dos años. Amái, arma un “pandemónium” nel Congresu acusándo al gobiernu de facer polítiques antisociales. P’acabar, va ganá-y les elecciones porque funcionarios y pensionistes, riba tóo estos últimos, son colectivos mui sensibles a la política salarial y a la política fiscal.
Pero, pente les midíes alternatives que Rajoy propuso, que son el chocolate’l loro porque nun lleguen a representar un aforru de 150 miyones d’euros, tampoco apaecen los impuestos especiales, los impuestos de sucesiones y padremoñu, la llucha contra’l fraude fiscal o la penalización de los grandes beneficios. Ya una cosa chocante: propuso, como gran descubrimientu, una aminorgación de los gastos de les comunidaes autónomes en dellos capítulos, como les misiones comerciales o les delegaciones permanentes nel esterior. Aprovechemos la cris pa reespañolizar el modelu políticu. Pero hai una entruga: si eso ye parte la solución, ¿porqué nun lo fixeron los gobiernos del PP en Galicia, en Valencia o en Madrid, que siguen eses polítiques dende siempres?.
En fin, que mos piden sacrificios. Como igual eso del “sacrificiu” significa coses estremaes nes distintes llingües, busqué “sacrificio” nel diccionariu de la Real Academia Española y resultó tener tres acepciones: “ofrenda a una deidad en señal de homenaje o expiación”; “acto de abnegación inspirado por la vehemencia del cariño”; y “acto del sacerdote en la misa al ofrecer el cuerpo de Cristo”. ¿Cuálu de los tres ye’l que mos piden?. Yo, personalmente, esi 5 por ciento que me van quitar prefiero entregá-ylu a los dioses o a Cristo, porque nun m’inspira “la vehemencia del cariño”.

Comentarios

  1. Un artículu mui claru ya ilustráu.
    ¿Nun te parez que les axencies de calificación, más que nun acertar cuando entamó la crisis, podemos dicir que fueron xunto a la banca los causantes de la crisis?

    Hai dos conceptos que tan emplegándose munchu y prestaríame que los desplicares d'una manera tan entendible como lo faes nesti artículu. Trátase de les diferencies qu'hai ente Deuda y Déficit.
    La xente tracamúndialo munches veces
    Gracies

    ResponderEliminar
  2. Ye cosa clara que los bloques mundiales del capitalismu tán reorganizándose. Frayar Europa p´axigantar los EEXX énte China. Esto foi un ataque al euru en toa riegla y una "sudamericanización" de la X:E., entamando polos estaos "PIGS", ente los que se cuenta´l pocu seriu Estáu Español, domináu pola "Economía Mediterránea", colos rasgos que yá describí en dellos artículos. Gochería de la clase política, dineru prietu, neoesclavismu pa colos emigrantes, etc. Van empezar pol Sur d´Europa, pero los escuadrones del FMI siguirán colos demás. Naide se va salvar. Los EEXX quieren recolonizar Europa, domeñala. Qu´esti Estáu pocu seriu, corruptu y neofranquista, ye un Protectoráu, quedo claro col alderique Obama- Zapatero d´esta selmana. El mesmu protectoráu que col 23-F, col Referendum d e la OTAN, y tanto, tanto...CXB

    ResponderEliminar
  3. Los sueldos, baxen. Los precios, xuben. Los beneficios d'Alimerka, la Telefónica, el Corte Inglés o'l Banco Santander siguen siendo altos.

    Qué noxu da esti país.

    ResponderEliminar
  4. Llámame muncho l'atención lo bien que despliques les coses. Ya lo dixo alguien nesti blogue, yes un economista al que s'entiende. Cada artículu d'economía que pones ye una clase pequeña. Interésame muncho lo del nacionalismu pero la verdá ye qu'estos artículos son los que más me presten.

    ResponderEliminar
  5. Mui bono, como siempres. Tuve un tiempu descolgada del to blogue pero yá toi otrea vuelta equí. Un saludu del to amigu que tengo por padre.

    ResponderEliminar
  6. Toi d'alcuerdu con Polesu. Faes perfáciles coses que pa munchos son enguedeyaes. Sigues siendo'l number one.

    ResponderEliminar
  7. Ya se que ye muncho pedir pero, como dixeron otros, vendríamos bien dalguna clase qu'otra. Yo piérdome cola deuda y'l déficit, col gastu públicu y la inversión pública, con munches coses. Los políticos y los economistes abusen de la xente, coles sos palabres rares. Y, como dixo otru, pa un economista claru que tenemos n'Asturies...

    ResponderEliminar
  8. Esta ye la mio opinión ...

    http://cosiquina.blogspot.com/2010/05/p-esie-que-lasuntu-ye-enforma-grave-nun.html

    ResponderEliminar
  9. ¿Pero hai de verdá una alternativa a esti modelu? Porque yo nun lo veo. Les crítiques son munches veces atinaes pero les soluciones non tanto. Supongo que tu, Rivas, sabes más qu'esos izquierdistes típicos y tópicos que repiten día tres día lletaníes vacíes. Prestaríame saber dalguna opinión tuya más nesi sen.

    ResponderEliminar
  10. y agora formalizase la fusión ente CaxAstur cola CAM, Caja Cantabria y Caja Extremadura. Eso pide una opinión del señor profesor d'estructura económica... ¿Va beneficiar esta fusión a Asturies? ¿O va ser un pufu?

    ResponderEliminar
  11. Como siempre, muy lúcido. Ya sabes que los útimos días de mes, si estása en Madrid, puedes venir a comer a casa para ahorrar unas decenas de euros y notar menos la cuchillada. Los liberales somos así de solidarios. Je, je. Un abrazo.

    ResponderEliminar
  12. Esto que fae el PSOE ye una puta miseria. Si lo ficiera la drecha taba armada. ¿Qué diz la UGT y Comisiones? Nada, callen como afogaos. Na mio empresa tamos pactando una rebaxa salarial pa que nun echen a los más nuevos que son inmigrantes la mayoría. Yo voi perder unos cien euros pa que un rapaz croata pueda quedase por una puta mierda. Saludos, Rivas. Sigue asina. Polo menos sabemos que tamos na mesma trinchera.

    ResponderEliminar

Publicar un comentario