Una custión d’interés (a lo menos pa mín)

Hai dacuando envez nes entraes nesti blogue –y n’otros munchos- un debate sobro si ye d’arrecibu dicir asigún qué coses pertrás d’un anónimu o d’un ñomatu, magar que los ñomatos, si se caltienen un tiempu, acaben por revelar la identidá que s’amataga nellos. Yo mesmu participé nesi discutiniu y siempres defendiendo que les coses, sacantes pih.aes, hai que firmales, riba tóo si afleuten a terceres persones.
Pero tamién ye comprensible que dalgunes persones nun quieran “dar la cara y falar n’alto”, como dicía Xosé Nel Riesgo nun a entrada na que, con muncha razón, puntualizaba una opinión de mio. Nun tien porqué ser siempres por motivos inconfesables, namái ye, cenciellamente, porque nun quieren problemas con amigos o conocíos del chigre.
Pero’l casu ye que llevo arrecibiendo privada y discretamente opiniones, datos y documentos que dalgunos camienten útiles porque yo puedo desconocelos o tenelos escaecíos. Llegáronme varies comunicaciones, con firma y desplicación personal, que, la verdá, muncho me prestaron. Y prestáronme por dos razones. La primera, evidentemente, porque m’aíden a la mio propia reflexón, de forma que, cuando fine’l culliebrón y me ponga a redactar el testu definitivu, tendré más elementos de xuiciu. Pero tamién me prestaron porque veo qu’hai persones que, ensin querer dase a conocer, tienen la suficiente confianza como pa saber que, si ye mester, emplegaré lo que m’apurren y respetaré’l so pruyiciu de nun apaecer con nome y apellíu en denguna publicación. Y podéis creeme si vos digo que non namás me lleguen coses d’amigos o de collacios que tovieren na mio banda naquella dómina.
En viendo esto, agradezo les contribuiciones. Pa eso y pa collaborar nuna necesaria xuntanza ye pa lo qu’abrí estes entraes nes que falo de coses igual persabíes pa munchos pero que naide quixo nin quier poner nel escenariu. Y tamién animo a quien creya que pué ser útile –pa mín, evidentemente, pero riba tóo pa dar un poco más d’obxetividá a un rellatu al que los asturianos y los nacionalistes en particular, tienen drechu- pa que m’alleguen lo que-ys pete.
El mio corréu ye davidm.rivas@uam.es.
Un saludu a toes y a tóos.
David M.

Comentarios