18.2.10

Notes pa los amigos que siguen esti culiebrón

Yá ta acabada la parte de cómo llegué a encabezar una llista ellectoral. Quiero recordavos que lo que toi faciendo ye un llibru qu’arranca de les mios preocupaciones de poco más qu’adolescente, siendo estudiante, y que van hasta’l francimientu d’Andecha en dos metaes cuasimiente simétriques.
Les aportaciones que toi faciendo –yá lo dixe pero pétame repetilo- arrepostien a les entrugues que xente como Carlos X. Blanco y la so compaña vienen faciendo pola xuntanza dende va unos meses. Por eso toi falando de los momentos nos que los nacionalistes –¿qué nacionalistes?, ¡los asturianos!- mos vimos el focicu.
Les contribuciones de dalgunos valiéranme muncho. De fechu yá tan modificaes delles coses nel testu que, un día, seguramente que pa les navidaes vinientes, tendrá forma de llibru. Lo que nun sé ye quien querrá espublizar un testu que, pesie a la mio bona voluntá, ye un pocoñín incómodu pa munchos. Pero yo soi optimista.
Hai dellos capítulos que nun voi meter na rede porque interesen menos nos tiempos que cuerren. Unu ye la mió evolución personal y les mios andances nel Madrid universitariu de la transición y les mios contradicciones –tremendamente suxerentes y vivificantes- pente un nacionalismu surdiente en Conceyu d’Asturies ya un anarquismu militante nun atenéu llibertariu.
Más sero tuve na formación de la Federación Progresista y na mesma fundación d’Izquierda Unida. Sí, sí… yo tuve na fundación d’Izquierda Unida, con Gerardo Iglesias, Ramón Tamames, Alonso Puerta, Ignacio Gallego y tantos otros.
Tamién falo nel llibru de cómo se vía entós dende la Federación Progresista la singularidá d’Asturies. Ye más, esa singularidá condicionó un congresu porque los representantes d’Asturies lo forzamos. Ya esa singularidá condicionara tamién la discusión sobro les llistes qu’Izquierda Unida presentara por vegada primera.
Estes son histories que namás conocen los más averaos a ún. Pero formen parte de la historia. Recuérdome de cuando la campaña la OTAN, la más guapa campaña, y recuérdome de los vieyos amigos. Fora la cabera vegada na que participaran los vencíos de la guerra. Güei tan tóos muertos.
Pa finar: toles contribuciones son bienveníes. La mio historia ye única, pero tamién ye colectiva.
Munches gracies por siguir esti blogue.
David.
Imprimir

16 comentarios:

  1. Tas apurriendo información mui valoratible. Los que nun tenemos esa triba d´esperiencies polítiques, nin por asomu, que tienes tu, David, siguimos con gustu esti filandón. Gracies. C.X.Blanco

    ResponderEliminar
  2. Conocer la historia siempre ye importante p'adeprender d'ella, iguar los errores y valorar los aciertos. Entre a comentar o non, sigo'l to relatu y los comentarios al mesmu dende l'otru llau de la mio pantalla como un clavu.
    Saludos.

    ResponderEliminar
  3. Gracies a ti per apurrinos y compartilo con nós.

    A esti pasu voi tener que facer una estaya tuya na mio biblioteca jeje

    Salú

    ResponderEliminar
  4. David , yo poca cosa tengo qu’apurrir , a esto que tas contando . Eso si prestame como a llambedor , porque ye una parte de la historia del nacionalismu asturianu que ta sin peñerar .
    El mio desapegu a esto de la política , entamo nun conceyu d’Andecha Astur en Xineru de 1991 , cuando se voto si dir a les elleciones nacionales del mesmu añu . Había dos postures , una yera la de dir a les elleciones , pan un dexar tol campu a Coalición Asturiana(UNA-PAS) y otra qu'apostaba por un trabayu d'afitamientu y desenrollu d'Andecha , que tenia ocho meses de vida y esi debía ser el trabayu prioritariu y non “gastar enfotos” en dir a unes eleiciones donde nun Había nada que rascar . Bueno , pues na votación ganamos los de nun dir a les eleiciones , pero la xente que perdio esa votación , nun lo acepto y al final ficieron qu'Andecha fuera a les eleiciones . Nesi momentu dime cuenta que con esa manera de facer les coses díbamos a niundes . Como ya nun me prestaba aquello , dexe Andecha sin mas . Bueno yo voi siguir tolos ensiertos d'esti cuadernu , como siempres , escriba daqué o non .
    Gracies , fonderes David , por esti cuadernu tan prestosu . Por mor d’elli , tuvi esqueirando nel desván , nunes carpetes que tenia escaecíes y nes qu’alcontré , los llistaos de militantes del Ensame , propaganda político del Ensame y de la UNA , papeletes ellectorales n’asturianu del PSOE y PP de les elleciones estatales de 1986 (¿alcuérdeste de la xugada?) , fotos , pegadielles , en fin la de coyer . La verdá que m'emocione un poco viendo estos recuerdos y xente que ya nun ta ente nos . En fin la pequeña historia de los que nunca ganamos una batalla , asina que solo por eso , por esqueirame na memoria ya pago la pena .

    ResponderEliminar
  5. Amigu Churchill: nun me recuerdo de lo de les papeletes del PP y del PSOE. Nun me doi cuenta de lo que tas falando, de la "xugada". Muncho t'agradecería que me lo desplicases. Nos caberos ochenta y primeros noventa son los años nos que tuve más descolgáu d'Asturies y teo llagunes de solombra na memoria.

    ResponderEliminar
  6. Alla va la esplicación :

    Nel añu 1986 había ellecciones xenerales nel Estáu Español . D’aquella n’Asturies , había entós la mesma represión llingüística qu'inda padecemos güei. Un grupu de ciudadanos(autodenomau “Comandu Colasón”) , decidío llevar a cabu una aición , cola que denunciar esa situación de falta de derechos civiles .l'aición consistiría en , facer papeletes ellectorales n’asturianu , pal congresu de los Diputaos . A mas d'esto , decidío qu'eses papeletes fueren solo del PSOE y de Coalición Popular (AP , PDP Y PL) . Con esto la xugada yera doble , d’una banda denunciáben la situación d'aparheid llinguisticu na que taba'l país, y d'otra , sedríen esos dos partíos (los mayores reponsables de la situación ) los que sufrieran el “perxuiciu ellectoral” , ya qu'esos votos deberíen ser consideraos nulos , ¿O NON? , al nun tar les papeletes en Español .
    Lóxicamente l’aición consistía en dar “el cambiazu” d'unes papeletes por otres , nes cabines de los colexos electorales , asina ayudábase a la xente a votar n’asturiano .
    Bueno pues paez ser, según les cróniques de la domina, que l'aición , asina se fexo y bon revuelu que s'armo .

    Cambiando de tema, nun se que coyones vos dieron de mamar, a los de Conceyu Asturies en Madrid . Pero salistis una bona camada si señor , solo hai que vete a ti o a Xuan Cándano (que bon trabayu ta faciendo cola revista Atlántica XXII ) . “Que bon trabayu'l de Pin “ .

    ResponderEliminar
  7. Pues nun ye por nada pero a mi prestaríame ver los otros capítulos. Sobre too el d'Izquierda Unida. Tengo interés en saber cómo se fundó. Yo yera un neñu. Amás, David, ye que cuentes les coses mui bien. Paez una novela d'intriga.

    ResponderEliminar
  8. Pues lo bono ye la historia de Conceyu d'Asturies y les historietes del Madrid d'entós. Anda que nun les oyí yo munches veces. Yo, David, animariáte a contalo tóo. Amás ye divertidísimo.

    ResponderEliminar
  9. Desde el Ateneo de Madrid. Me acuerdo de cuando Heribert Barrera vino por aquí, invitado por el secretario Rivas. El viejo republicano catalán estaba entusiasmado con su anfitrión. Yo, que no soy nacionalista en absoluto, soy un comunista de Ciudad Real, estaba encantado con aquello. Fueron los dos a la Tertulia Republicana de La Cacharrería y fue una gozada. David, ya se que no quieres volver, pero muchos añoramos el tiempo en que tú dirigías la política de esta, cada vez menos, Docta Casa.

    ResponderEliminar
  10. Churchill: ye verdá que lo de Conceyu d'Asturies diera una bona camada. Yéramos, y asina mos llamábamos, "conceyeros". Nun quiero tirame'l pegolete pero toi seguru que, nel asturianismu d'entóncenes, yéramos lo meyor.

    Pin Álvarez Fernández. Yá nel somantu de Llug y de Taranis. ¿Qué voi dicir d'elli?

    Antón Fuertes. Sociólogu urbanista y agora, en Madrid, altu asesor de la confederación de pymes.

    Robertu González-Quevedo. Secretariu de l'Academia, antropólogu ya escritor.

    Fonsu Velázquez. Escritor de lo meyor y versu llibre onde lu haiga.

    Xuan Cándano. Periodista de RTVE y alma de la revista Atlántica, amás de comprometíu políticamente nel so conceyu de Muros.

    Javier Cuartas. Igual el menos identificáu pero asturianista perafitáu nel so periódicu.

    Xulio Llaneza. Un poco apartáu agora pero un gran escritor y que volviera, fiel como mastín, a la so cuenca minera.

    Chema Rodríguez. Bien casáu y colocáu en Madrid y de lo meyor na novela en llingua asturiana.

    Xicu Díaz Yepes. Conceyal nacionalista en Villaviciosa.

    Carme Tinéu. Fo secretaria xeneral del Centru Asturianu.

    Xelu Neira. Presidente de la zona rural de Cagüeñes (Xixón).

    Yo. El rei del mambo... o daqué asemeyao.

    ResponderEliminar
  11. Los del Conceyu d'Asturies mamaron lo que teníamos que haber mamado todos, la diáspora, la lejanía, la ausencia de la Tierra, si eso hubiéramos mamado... otru gallu nos hubiera cantado.

    ResponderEliminar
  12. Toi con Jacopo Comín: pelín de cosmopolitismu, salir del corripiu y la quintana.

    ResponderEliminar
  13. Pues yo eso nun lo veo asina . Conocí y conozo , munchos llabradores d'esos del corripiu y la Quintana como tu dices . Mas ilustraos y mas cosmopolites , que dalgunos de los que nos gobiernen , cosmopolites ellos y namoraos de tolo de fuera . ya lo diz el refrán "Per natura non da,Salamantica non presta" o como dicía mía buela (que yera por cierto llabradora , de bona casa eso si , con Molín ,Fragua ya batan) , pues como dicía mía buela "El que burru vei a Sevilla , burru vei ya burru vien).
    Lo que si-yos facia falta a munchos asturianistes y defensores del asturianu , que lo son de salón y ciudá . Lo que-yos facia falta yera dar una vuelta, pola zona rural del país . Lo que se llama pisar boñica , non dir de turismu rural , sinón enterase un poco de cómo ven el mundu los llabradores . Asina igual entamaben a conocer el país y la xente que nelli vive y además dexaríen de tener una imaxen de que nel campu solo hai miseria y xente atrasao .

    Salú

    ResponderEliminar
  14. Toi d'alcuerdo en parte colos dos. David y casi toos los de Conceyu d'Asturies tienen más coses en común que tar fuera. Toos provienen de zones rurales o villes pequeñes. ¿Nun véis que dengún ye d'Uviéu, Avilés o Xixón?. Los únicos de Xixón son Xicu Yepes (pero del Somió entá mui rural) y David (de cuyu ruralismu toos sabemos y que sigue viviendo nuna aldea de Villaviciosa).

    ResponderEliminar
  15. Home, cuando falaba de "corripiu" y "quintana" dicíalo en sentíu metafóricu, nun falaba de gochos nin de cuchu. Ye evidente qu'un corripiu tamién puede ser una tertulia lliteraria o pasar el día xugando a la vídio-consola. Ye bien cierto que muncha xente d'aldega tien más xacíu que dellos "urbanites" -nel fondu, munchu desertor de l'aráu, acomplexáu-, como los que dexamos que nos gobiernen. A esos sí que-yos presta'l turismu rural (ensin cuchu, que güel mal, y ensin caleyes, qu'enllamuerguen les botes).
    Pero, claro, a los neo-románticos nun nos basta'l bon xacíu. Prestaríanos qu'Asturies estuviere enllena de Peter Camenzind y qu'el saber académicu completara'l círculu.

    ResponderEliminar
  16. Cuando hablo sobre las bondades terapeúticas de la "diáspora" no me refiero a la gente concienciada, (que no creo que necesiten de esa terapia), me refiero a todos los demás puesto que de todos es sabido que siempre valorarás más aquello tuyo que se te muestra lejano e inalcanzable. No sólo habría que alejar a los asturianos de Asturies si no que habría que obligarles a luchar o sufrir para volver, y una vez retornados es seguro que las cocas no serían iguales que en el estadio anterior, además la experiencia me dice que cuando ves algo desde fuera de su plano se mejora la perspectiva.

    ResponderEliminar

Nota: solo los miembros de este blog pueden publicar comentarios.