Candidatu d’Andecha Astur (y 3)


Y llegamos al mesmu 1999. Puede paicer tolondro pero, nestos dos años, naide nun faló comigo. La primer persona cola que m’entrevisto ye, otra vegada, Xosé Nel Riesgo. Tamos ya a pocos menses de les ellecciones y vémosmos na mio casa, Llábana Prieta, yá de vuelta al conceyu de Villaviciosa dempués de siete estupendos años en Cuideiru. Cola so prosa dramática cargada de raigañu antiguo, tíldame d’”arviragu”, enchípame l’ego y truña otra vuelta. Entós remembro la conversación pixueta de dos años enantes. Yá Inaciu Iglesias anda a otres coses y Victor Fernández Coalla lo mesmo de lo mesmo, sólo qu’el primeru sigue naguando por un escañu dende la so talaya de “Les Noticies”, anque nun sabe mui bien a quién pidí-ylo, ya’l segundu optara polo privao y dedícase a alministrar fundaciones. Dizme entós Riesgo, tomando unos culinos y mentres acaricia dacuando envez a la roxa mastina que ta echada a los mios pies –setenta quilos de perru-, que va facese una candidatura con Andecha Astur, Izquierda Asturiana ya Izquierda Nacionalista Asturiana. Por una vegada veóme aloyeru. Si eso ye verdá igual ye posible una opción real y realista que, si nun ye d’esta, meta en poco tiempu la cabeza na Xunta Xeneral. “¿Y qué quiés de mín?”, entrugo, anque ya lo suponía. “Que lo encabeces”, esa ye la so rempuesta.
La mió desconfianza ye total. Nada me dixeran Fernández Marqués nin Llope, pa mín los interlocutores válidos. Pero Riesgo nun ye un cualisquier. Ye un nacionalista del tiempu primeru, que fora nes llistes d’UNA y d’AA, escritor de los meyores, cercanu a persones importantes en toles facciones del nacionalismu d’esquierdes, falanderu por demás pero honráu y nada cuciu.
Como pescanciando los mios abarruntos Riesgo dizme qu’Andecha acepta con gayola indisimulable la mio candidatura y qu’Izquierda Asturiana pondrá un biecu repunante pa la galería pero que tamién-y paez bien. El problema ta na INA, que me considera un “maquis” d’Andecha. A min aquello diérame risa. ¡INA!, ¡qué gran partíu!. Tal paecía que yo taba pidiendo por favor que me llevaren al parlamentu cuando lo que resultaba yera que me lo pidíen otros y, pa enriba, poníen problemes. ¡Home, ganaría más perres!. Un diputáu gana más qu’un profesor d’universidá y si se caltién nel puestu más de dos años conserva’l sueldu pa siempres, y con ocho pensión máxima. Y pa enriba el primeru trabaya tocando un botón y falando de nun importa qué, mentres que’l segundu ta obligáu a facer un discursu intelixible y criticable. Asina-y lo desplico a Riesgo.
Elli saca otra vuelta lo del “arviragu” y dizme que l’asuntu nun ta nes opiniones de los dirixentes de los partíos sinon nos pruyicios de tanta y tanta xente patriota que nun alcuentra razones pa votar a les organizaciones que se presenten. Cola crudeza y l’humor que lu definen, descalificó a cuasi tolos dirixentes nacionalistes, hasta a los más cercanos a elli. Nun me descalificó a mín igual porque se dio cuenta a tiempu. Inclusive sé que me imita mui bien pero nunca lo fexo delantre de mió. Dispidímosmos col afectu que siempres mos tuvimos pero yo siguí duldiando muncho d’aquella operación.
Les coses entamaron a camudar cuando, por primer vegada, un dirixente políticu me fala nos mesmos términos. Fora Marcos Fernández Marqués nuna xinta en Xixón, en Casa Ataulfo. La verdá ye que’l nacionalismu asturianu tien espíritu de chigre, cosa que pa mín nun ye tan denigrante como munchos estiraos camienten. El chigre ye un centru comunicacional perimportante ya una de les poques instituciones que sobrovivieran al procesu d’aculturación al que vienen sometiendo a Asturies dende van dos sieclos. El casu ye que yo siguía ensin ver claro l’asuntu pero, agora polo menos, taba tratándolo con una persona que sí tinía capacidá y poder dientro d’una de les organizaciones en custión, concretamente la más fuerte de les tres, hasta podríamos dicir que la única verdaderamente esistente. Ye más, Fernández Marqués non namás tinía esa capacidá ya esi poder, ye que yera, en bona midía, el poder fácticu dientro d’Andecha Astur. Si elli vía bien una coalición y vía bien la mio candidatura, la organización diba velo bien.
Fernández Marqués desplicárame cómo taben les coses con un argumentariu que me paeció sinceru y bien estudiáu. La situación yá yera incaltenible dempués de trenta años de llucha y de facer un bon trabayu pero incompletu y con munches coses que tamién se fixeren mal. Díxome que les conversaciones pa una candidatura única diben per bon camín pero reconociérame que nun yera seguro que, como yera de vezu, s’arribara a bon puertu. Pidí-y claridá nuna custión: si podía asegurame que nun diba ser Andecha Astur la que punxera pilancos insuperables. Yo sabía perbién qu’un par de pallabres nun documentu programáticu yeren abondo pa que les conversaciones finaran en nada, cuando non a vergaxaes y provocando una fuérciga más nel yá valtáu edificiu nacionalista. Tamién sabía la gran tradición de los más vieyos andechos de garrase a esi par de términos pa facer descarrilar les coses. La rempuesta gustome. Andecha Astur trataba seriamente d’algamar una alcordada y si nun había consensu nun puntu los sos representantes diben proponer, cenciellamente, nun falar d’ello nel programa.
Acepté la propuesta, pero namás qu’en principiu, en función de que la xuntanza fora un fechu y de qu’el mio nome nun se discutiera más de lo estrictamente protocolario y que diba dar marcha atrás si me sacaben por mayoría y non por unanimidá. Entá me recordaba de la observación que Riesgo me fixere sobro los escuplos d’INA. Amás díxi-y que, de salir les coses bien, quería figurar como independiente y llevar de númberu dos a un militante d’Andecha, al empar que de cabeza pol oriente y pol occidente fuera dalguién d’IAS y dalguién d’INA. D’haber foto, quería que se visualizara con claridá un espíritu de coalición. Al mesmu tiempu quedaba tamién n’evidencia que yera la organización más fuerte, Andecha Astur, la que me cedía’l puestu cabezaleru. Teniendo en cuenta que munchos m’identificaben cola organización con anterioridá, asumir esi papel yera un coste mínimu pa mín y nulu pa ellos.
Too quedó asina. Pero pasaben los díes y naide d’IAS nin d’INA se punxera en contactu comigo. Estrañábame muncho lo d’IAS, dada la bona rellación que siempres caltuviera con Inaciu Llope. Empecé a pensar lo peor: otra vuelta la converxencia ye imposible. Ya una mañana almuerzo cola noticia de qu’IAS ya INA acaben de roblar un pautu col Partido Comunista de los Pueblos de España pa dir a les ellecciones embaxo unes sigles emprestaes, creo que del Movimiento Comunista de España y de la Liga Comunista Revolucionaria, que yeren BIA, Bloque de la Izquierda Asturiana. Aquello dexóme ablucáu. Non sólo nun había coalición nacionalista sinón que dos de los tres partíos formaben otra col caberu partíu estalinista d’Europa y de disciplina averada al centralismu democrático d’un comité executivu que taba en Madrid.
De güelpe quedaba lliberáu de los miós compromisos pero penselo meyor. Dempués de varios años ensin militancia y con poques ganes de facelo decidiera dicir sí a una propuesta d’unidá, lo mesmo que fixera, anque ensin tantu protagonismu, cuando Unidá Nacionalista Asturiana, y lo mesmo que volviera facer –pesie a les mios duldies sobro’l PAS- cuando se formó Coalición Asturiana. Si IAS ya INA diben xuntes a les ellecciones, compitiendo con Andecha, yo nun diba participar en denguna candidatura. Pero’l casu ye que, de manera oportunista, componíen una coalición col PCPE. D’esti mou, namás qu’una organización quedaba en pie nel campu nacionalista. Yá nun yera necesaria denguna xunidá porque nun quedaba nada pa poder xunilo. Creyí que lo más honesto yera caltener el compromisu y aceptar encabezar la llista d’Andecha Astur.
Siempres me quedó la duldia de que si cuando Fernández Marqués me fixo la ufierta yá yera elli consciente de que l’alcordada yera imposible, ya inclusive de qu’IAS ya INA taben n’alderiques col PCPE. Si ye asina, si namái que me dixo una parte la verdá, amosó un bon facer en política ya intuyera que ye lo que yo diba facer escontra esa situación. Si eso fue lo que pasó nun me considero engañáu. Elli y la organización xugaron les sos baces ya yo xugué les míes. Lo qu’amuesa esta posibilidá ye la torpeza d’otros. A dos meses y poco de les ellecciones y con Riesgo d’intermediariu o d’espontániu, que lo mesmo da, namái los más tochos del movimientu desconocíen qu’el mio nome taba na mesa. Una simple llamada de Llope diciéndome que la xuntanza yera inviable y la Operación Rivas quedaba desarticulada.
Na primer reunión dempués d’esto fora una xinta n’El Pigüeña, n’Uviéu, onde mos xuntamos, anque igual confundo delles “farres”, Arturu Bermeyu, Marcos Fernández Marqués, Lali García Rubiera, Germán Abad ya yo mesmu. Tamién taba ellí Antón Fuertes, fundador comigo de Conceyu d’Asturies de Madrid, al que llamé personalmente pa que viaxare de Madrid a Asturies. Comuniqué-ys oficialmente la mió decisión ya entrugué-ys por una cosa que m’esmolecía muncho: la opinión de la mocedá. La presencia mozo n’Andecha yera mui elevada y taba percuriada polos dirixentes más antiguos, particularmente pol mesmu Fernández Marqués. Sé por esperiencia que los mozos intenten a la que pueden matar al padre. Y selo por esperiencia, porque lo fixe y porque yá lo taba sufriendo n’otros ámbitos. A la fin, como dicía Maurois, ye preciso que los mozos seyan inxustos colos homes maduros porque si non, mitificaríenlos ya enxamás se diba avanzar. Ye duro pa persones como yo pero, anque inxusto como bien dicía Maurois, ye necesario.
Amás los mozos muévense muncho pola estética, porque pa ellos la ideoloxía y la vitalidá son cuasi una mesma cosa y, yera evidente, la mio estética personal nun yera precisamente mui asemeyada a la de la mocedá. Estéticamente, ya ensin salir del mundín nacionalista, un candidatu como Rafael Palacios o como Xune Elipe siempres diba ser vistu como más cercanu. Pente’l sombreru y la tarabica, d’un llau, y la chupa y l’espetu, del otru, la cosa taba clara. ¡Hasta la mió fía se fiaría de Elipe enantes que de mín!. Escontra esti esmolecimientue, lo que sentí fora de les meyores coses que me podíen dicir entóncenes. Al paicer la mocedá d’Andecha yera entusiasta partidaria de mí, lo mesmo que lo que podríamos llamar la “vieya guardia”. Namái carecía rocées en dalgún “mediopensionista”. La cosa entamaba bien. De fechu, la primera vegada qu’apaecí nos papeles como candidatu yá oficial, en “Les Noticies” del Día de les Lletres, salí fotografiáu de tarabica. Dalgunos vieyos militantes dixéronme que cómo se me ocurriera semeyante cosa. La verdá ye que, estéticamente igual yere un erru, magar que non menos que si salgo vestíu de “heavy metal”. Pues la reacción de los mozos anduvo pente’l cachondéu más irreverente y la consideranza de llevar un candidatu abondo orixinal.
Dempués de tomar la decisión de dir na llista d’Andecha Astur y de la xinta na cai Gascona, ya yá escontra la xunta nacional de la organización, punxe les miós condiciones particulares. Plantegué que nun quería responsabilidaes orgániques y que namái diría a reuniones de calter ellectoral o politicamente imprescindibles, pero nada de custiones burocrátiques nin conceyos de mil hores. Desixí que, ateniéndome al programa evidentemente, les miós intervenciones podríen ser criticaes “a posteriori” pero que nun diba permitir guiones previos dictaos por un comité. Esti puntu yera pa mín mui importante porque sabía perfechamente la tensión que n’Andecha hebo dende siempres pente autonomía individual y decisión asambleyaria. Naide punxo dengún problema. Allegreme muncho. Estes custiones, especialmente la segunda, sopelexaben la confianza que la organización ponía en mí. Ya yo diba arrepostiar a esa confianza con una total llealtá ya una aceptación ensin reserva mental denguna de los puntos fundamentales de la organización.
Pa finar, nun desixí pero sí defendí que la cabeza de la llista pa les ellecciones europées –que coincidíen nel 1999- la ocuparan Xosé Álvarez Fernández y Antón Fuertes, de Conceyu d’Asturies de Madrid. Nun tuve que dar desplicaciones porque tóos camentaron que yera una idega estupenda. Pa mín aquello tinía una doble motivación. D’un lláu persones emblemátiques de la diáspora asturiana integrábense nuna llista nacionalista que, amás, podíen votala ellos mesmos y les sos families y amigos porque la circunscripción nes ellecciones europées ye única pa tol reinu d’España. De fechu, Álvarez Fernández nun figuraba en denguna llista dende 1979, cuando se presentó de númberu dos pol Conceyu Nacionalista Astur. D’aquella, finales de los setenta, Fuertes amoriaba nun PCE madrilanu del que colara, dempués de décades, con una de les más clares visiones nacionalistes que yo conozo. Pero d’otru lláu yera pa mín una baza asemeyada a la propuesta de les tres cabeces cuando creyía que la coalición diba p’alantre: Álvarez Fernández y Fuertes yeran de los míos. Ensín presencia política d’importancia y fuera del país durante munchos años, la única fuerza que yo tinía –quitando lo académico y profesional- yera la perseveranza dende l’adolescencia ya esa perseveranza caltúvela llueñe d’Asturies colos miós “hermanos mayores”, qu’eso ye lo que yeran Álvarez Fernández y Fuertes, los miós collacios Pin y Antón.
La última condición que punxe tuvo menos éxitu. Yo pretendía una campaña personalizada, sabiendo qu’esto yera poco menos qu’herético n’Andecha Astur. Los cartelos de collorinos, na mió opinión más propios pa un circu que llega a un pueblu, nun sirven pa nada. La xente quier saber a quién vota y nun lleer una sopa lletres insoportable. Amái, hai otra custión que siempres s’escaez: el ciudadanu quier saber quién se responsabiliza de lo que se promete, quién pon la cara por si hai de rompé-yla mañana.
Con frecuencia dicíase que personalizar la campaña –cola semeya d’un candidatu nos cartelos, por exemplu- yera francer cola imax d’organización horizontal y asambleyaria que la organización quería dar. Al respective yo siempres creyera qu’esa opinión yera sincera, que los que la sopelexaben pensaben de verdá asina. Pero también siempres pensé que yeren vezos importaos de movimientos asemeyaos, onde les campañes nun se personalicen aparentemente. Por exemplu, los cartelos d’Herri Batasuna siempres son collectivos y programáticos. Sí pero, ¿daquién hai que nun reconoza la cara d’Otegi, Usabiaga, Idígoras y tantos otros?. ¡Si los conocen hasta en San Sebastián… de La Gomera!. A la escontra nosotros tiníamos que aprofitar los cartelos y los videos ellectorales, porque yera na campaña la única vegada que díbamos tener ocasión de ser visibles, y poco.
Sabía qu’esa condición diba ser difícilemente aceptada pero, al final, aceptose a medies. Los cartelos siguirien siendo como siempres –de xuru que malísimos, pensé entóncenes- pero los videos televisivos taríen personalizaos ya executaos por profesionales, concretamente por Xuan Cándano. Paeciérame bien. Tóo menos volver a les metralletes de 1995. Y, pa que naide se llame a engañu, nesta decisión tuvo muncha importancia la favoratible posición de persones como Arturu Bermeyu o Fernández Marqués, amás del representante de la xuventú, que daquella yera Andecha Mocedá pero que nun me recuerdo quien yera concretamente.
Imprimir

Comentarios

  1. Nesti momentu la siceridá ye perbono. Bien por David

    ResponderEliminar
  2. Dos cuestiones, por facer la información más iguada y porque igual a Rivas-y falten datos.
    Voi tentar que seyan fechos contrastaos:

    1. Andecha Astur siempre impunxo que l'alcordada de la que fala Rivas fuera baxo'l nome "Andecha Astur". Tolo más que Marcos Abel Fernández taba dispuestu aceptar yera, cediendo enforma, Andecha Astur-Otra cosa, pero nesa Cosa, yera otra condición inegociable, nun podía figurar el nome de nengún partíu IAS o INA. Nun escaezamos que siempre se negaba la "existencia" de les otres dos organizaciones polo que se consideraba que que figuraren los sos nomes yera regala-yos propaganda. Esto podrá corroboralo cualquier militante d'Andecha que tuviera nes coraes de la organización.

    2. El BIA nun yeren unes sigles emprestaes de naide. Ye verdá qu'hebo una coalición que llevó nos 80 esi nome, pero como coalición que yera nunca tuviera llegalizada. El BIA del que fala David yera una federación de partíos llegalmente constuyida ente IAS ya INA. En realidá yera parte de lo que dende IAS ya INA se pensaba que podía ser esi alcuerdu de nacionalistes d'izquierda, pero Andecha punxera les condiciones del puntu 1. Como anécdota chocante, el PCPE nunca tuvo llegalmente, esto ye nel rexistru de patíos, nel BIA.
    El PCPE pidió la integración depués, de fechu, llegó haber una manifestación del 8 setiembre nel que'l PCPE inda nun taba nel BIA.
    Aceptó los puntos mínimos y, acertada o enquivocadamente, los otros componentes aceptáronlos.
    Esti puntu ye contrastable dafechu, porque hai abondos papeles.

    3. Si a David-y contaron qu'IAS y INA prefirieron al PCPE como sociu, primero qu'Andecha, nun ta bien informáu, o más bien falta-y esi datu, les condiciones innegociables.

    4.Esti puntu ye suxetivu: En cualquier casu la impresión que se tenía en IAS ya INA yera qu'Andecha nun quería alcuerdu, too yeren problemes, la terminoloxía, les perres... paecía una carrera d'obstáculos destinada a que la cosa nun saliera.

    De toles maneres l'odiu que-y teníen a Rafa Palacios yera africanu, de xuru que nunca acetaríen tenelu nuna llista. Agora ya pasaron años, pero daquella andaben llamándolu lladrón pela cai.

    Espero aportar con esto dalgún datu constructivu y nun abrir mancaures vieyes que en munchos casos tan superaes dafechu, polo menos ente muncha xente que daquella taba n'IAS y Andecha.

    ResponderEliminar
  3. Munches gracies poles anotaciones. Aídenme muncho, a mín y a tóos. Yá dixe dende l'entamu que namás taba falando dende'l mio conocimientu personal. Delles coses que dices ye mui posible que seyan asina. Otres non tanto. De toles formes, lo que sí me paez ye que tas meciendo dos momentos distintos. Polo que yo conozo, la discusión sobro les sigles ye más bien de les ellecciones del 2007, cuando la posible xuntanza.

    Evidentemente yo nun teo tola información y dalguna que otra pue ser inclusive mentira. Pero les coses de la vida son asina. Pero nun creo que falar d'esto serena y tranquilamente seya abrir feríes. La "verdá" nunca va ser completa pero ensin contrastar postures la mentira ye cuasi segura.

    ResponderEliminar
  4. L'actitú sectaria de l'Andecha Astur de la dómina del BIA pa con IAS y INA ye cierta. Yera la dómina na que con más furor se dicíen aquelles coses como "españoles, galleguzos, mamporreros, puestinos y perres, la contra, etc."

    Poro, tamién ye verdá que'l mesmu sectarismu, magar que con más educación y modales, esistía n'IAS (la INA yera cuasi inesistente). Aquella AA y aquel PCPE tiníen un tamañu en númberu de militantes/afiliaos asemeyáu y desplegaben una actividá cuantitativamente tamién asemeyada, pesia les diferencies polítiques (masque tamién delles coincidencies, por exemplu nel planu obrerista). Siendo estes dos fuercies aprosimadamente igual de "importantes", IAS nun tinía problemes en reconocer la entidá del PCPE, pero minimizaba la d'AA. Dicíen coses como "pero si son cuatro gatos, nun tienen tanta xente como dicen".

    Taría bien que daquién representativu d'aquella IAS diera la so versión, por exemplu de les postures nel discutiniu internu sobre la incorporación del PCPE, porque muncho estraño sería qu'hubiere unanimidá cincante a la suma dun partíu coles característiques del mesmu naquella dómina. O cómo yera posible que, sacante'l movimientu de reivindicación de la llingua, nun se viera a IAS cuasi que'n nada que se tuviera moviendo. Eso de xuro que tamién aidaba a minusvalorar a IAS (o si se prefier a dispreciala, otros diríen a valorala na xusta midía).

    Seguiremos pendientes del culebrón.

    ResponderEliminar
  5. Esto entama a animase jeje.
    Mirái esto ye de setiembre de 1998.

    http://asturiesllibertaria.blogspot.com/2009/07/8-setiembre-dia-de-la-nacion-asturiana.html

    Ye la crónica de les manis del BIA (IAS-INA) y Andecha dende un puntu de vista "anarquista".

    Yo creo que'l momentu del que fala Rivas nel que decidió ser el candidatu d'Andecha nun ye cuando se monta el BIA. Ye cuando'l PCPE entra nel BIA, que ye distinto.

    Creo que tolos que faláis dicis qu'INA yera una mierdina y nun ye tan verda. Cuando INA sal lleva consigo practicamente'l 100% de los conceyos d'Andecha d'Avilés y Llangréu, que yeren un bon piñu de militantes y que teníen muncha actividá.


    Y esto creo que ye de 1999:
    http://www.ias.as/alantre/alantresp.pdf

    Ye una pena que d'andecha nun quede casi nada na rede d'aquella dómina.

    Ye guapo y presta acordase agora, pero daquella lo qu'había qu'aguantar...

    ResponderEliminar
  6. http://www.ias.as/alantre/alantresp.pdf

    ye del añu 2.000.

    ResponderEliminar
  7. You agradezo muncho estos trés insiertos. Pa min valme pa entender muncho meyor l'actual situación del asturianismu políticu, ya n'especial el d'izquierda.

    Habrá xente que lo tome a personal. Peor pa ellos.

    Pero creo que val pa conocer un pouco más esti movimientu políticu. De la que se fala de "Xuntanza" ou unidá del asturianismu (d'izquierda) ta bien lleer estos testos, d'un cabezaleiru de primera mano; llueo cadún vedrá lo que quiera ver, ya entender lo que quiera entender.

    Gracias.

    ResponderEliminar
  8. Home, you lo que más en claru saco yía lo prestoso l'asturina cola tarabica. Esi inxiertu queda guapu abondu. You propongo l'asturiana entarabicada comu enseña del asturianismu inteleutual.

    L'outro que sentimos sobre la hestoria d'esas fuercias políticas, diz pouca cousa del nacionalismu asturianu. Amarrazas, xarabatadas d'insultos ya mentiras, mal xeitu, infantilismu ideolóxicu. Nada nun atoupamos de provechu. Valnos más esqueicer lo que tan mal feito ta y entamalo tou dende un principiu.

    ResponderEliminar
  9. Hola David :
    Con esti tercer capitulo , eches el piesllu a esta “saga” o triloxía que si mal nun recuerdo yera :
    Candidatu d’Andecha Astur (1,2,3), Europa de los Pueblos (1,2), El final de l'acción política (1,2,3,4).
    Espero sinceramente, qu'aina se produzan acontecimientos, qu'empobinen a un capitulo primeru d'otra “saga” que se llamara, el camín dempués de la xuntanza , asina entamamos a llegar a les instituciones , asina gobernamos y cambiamos el país los patriotes asturianos …..etc
    Pero volviendo del suañu , quería matizar una cosa que dixo Anónimu y que ye verdá :
    Andecha Astur siempre impunxo que l'alcordada de la que fala Rivas fuera baxo'l nome "Andecha Astur". Tolo más que Marcos Abel Fernández taba dispuestu aceptar yera, cediendo enforma, Andecha Astur-Otra cosa, pero nesa Cosa, yera otra condición inegociable, nun podía figurar el nome de nengún partíu IAS o INA.
    Andecha Astur entendía que nun yera custión de sigles , la xente d'andecha , entendía a la organización no como un partíu políticu mas , sinón como un preséu p'algamar determinaos llogros pal país . Dicho d'otra miente , la xente d'Andecha entendía a la organización como un paragües onde podíen tener abellugu tolos nacionalistes . Esa pode ser una idea equivocada , pero a lo que ta fuera de toa dulda ye que yera una idega honesta . ¿Si toos tábamos d'alcuerdu nos oxetivos a consiguir y ya había una organización con cadarma y posu , pa qu'había que facer otres?.D'otra manera yo personalmente senti a Marcos Abel mas d'una vegada , qu'Andecha Astur podía ser perfectamente una coalición pero respetando'l nome . Como digo ye una postura valida y honesta como cualisquier outra .
    Tamién me prestaría dicir aquí y eso ya lo comentasti tu David ,que'l sectarismu y la desconfianza yeren a partes iguales nes diferentes families nacionalistes.
    Diéronse entós tres clases de comportamientu:

    ResponderEliminar
  10. - Los d'Andecha que yeren principalmente trabayadores por cuanta ayena , xente independiente no económico , con fondos principios ideolóxicos no nacional y no social y nacionalistes de vieyo, que ya veníen escaldaos del fracasu y les traidoraes d'outros proyectos (nun quiero entrar en detalles , pero yo tamién soi nacionalista vieyu y tengo memoria ) .Eses coses igual influyeron na desconfianza que teníen a tolo nuevo que se facia dientro'l tarrén nacionalista y nos xeitos de facer política de dellos dirixentes de la organización.Pensaben de la xente d’IAS que yeren unos presumíos y unos vagos , que nun sabíen pa onde soplaba l’aire , mui teóricos pero yera'l momentu de facer non de dicir mas o menos .

    -Los d'IAS , yera xente mozo , mui bien preparada intelectualmente falando (xeneración JAPS ) , mui educaos y correctos nos sos comportamientos y con fondos principios ideolóxicos no nacional (no asina no social , la mayor parte d’ellos nun teníen rellación col mundu llaboral , cosa que los disculpa) .
    Fondamente adanistes y presumíos , nun-yos valía nada de lo que s'había fecho , nin de lo qu'había entós . Nesto comparten pensamientu con una parte importante d'escritores de la llamada segunda xeneración de surdimientu ( y neses tamos tovía) .
    Pa ellos , los andechos , yeren xente tosco y basto , ensin muncha preparación , lo que se suel llamar burrinos de carga de los sos dirixentes , imprevisibles y kamikazes. Xente pa dir a inundes a la fin . Yeren complicaos hasta nel asturianu qu'emplegablen (bien tapecío y abegoso , como una xerga , qu'ellos llamaben con coña , asturianu puxarra).

    -Dempués taben los socialcristianos de la INA que son xente que-yos val cualaquier cousa pa facer nun se que supuesta revolución social . Un día son insumisos , otru día son milikaka , otru día son palestinos , saharauis , feministes ……….un exemplu d’esta familia yera'l casu de Paco Iglesias (mas conocíu como Paco Chiruques) de nacionaliegu tenia mas bien pouco , yera d'esi sector d'estrema izquierda que taba n'Andecha como podía tar en Lliberación , PCPE .... qu'amuesen un gran radicalismu no que dicen defender , pero que-yos dura poco l'enfotu porque tan en munchos frentes a la vez y cada ciertu tiempu ,cambien de pareya (son un poco calientes nesi sen ).Como me dixo una vez unu , “a mi lo del bable me suda la polla yo lo que quiero ye da-yos caña” . En fin creo qu'esto lo diz too , agora creo qu'últimamente cambiaron el discursu y tan na onda del PP (puestos y perres ) maricón l'últimu qu'esto s'acaba .

    Bueno David , prestábame defender un poco a Marcos Abel , un home honestu , acertáu o equivocáu , pero honestu . Al que-y dieron hosties por riba y por baxu , con llevantos ya insultos personales , a el y a la so familia que ye lo peor . Tamién a Arturu Bermeyu que paso polo mesmo . Yo que tuvi n’Andecha a lo primero , nun via nin la táctica nin la estratexa que siguía Andecha , pan un molestar, fui apartándome seliquinamente que ye como me presta pasar pola vida .

    La verdá ye que menuda chapa solté , tienes que perdoname , pero ye que'l tema da pa ello y muncho mas . Esti blog y el de Xuan Xosé (col que munches veces nun toi nada d'acuerdo) , ye de lo meyor que se pueda lleer na llingua del país .

    ResponderEliminar
  11. Nestes entraes tamos viendo los intentos d'axuntar fuerces nesta etapa que describes y les torgues a los mesmos. Adeprender d'ello pa iguar los errores y nun los repetir ye una asignatura qu'inda tenemos pendiente. Y soi de los que piensa que la tenemos qu'aprobar aína. Porque la historia nun destaca por ufiertar oportunidaes indefinidamente.

    ResponderEliminar
  12. Mui interesante too, anque eso de sectarismu a partes iguales nun lo comparto.

    Sí había desconfianza, pero creo qu'el sectarismu yera claramente por una parte.

    Nun hai más que ver les postures d'unos y otros y sobro tou pa los que lo vivieron la forma d'actuar y de difamar xabazmente d'unos y otros.

    Ye una opinión, pero creo que nun ye bono interpretar la historia con equidistancia, como si too fora igual. Hebo erros per toes partes pero los comportamientos, les actitúes, el sectarismu... nun yera comparable. Y por eso hubo xente que decidió facer otra organización que superara eso. Y por eso pasó dientro d'Andecha lo que pasó depués. Porque esa forma d'actuar ye incaltenible si se quier medrar.
    Ye la mio humilde opinión.

    ResponderEliminar
  13. Agora qu'acabé col asuntu de como llegué a encabezar una candidatura, agradézvomos muncho les vueses interevenciones. Pero quiero poner una cosa clariquino. El qu'opine queda neso, n'opinión. Pero quien da datos -o datos supuestos- nun puede abellugase nel anonimatu. Por exemplu, esi anónimu que me falo de puntos (1, 2, 3, 4) seguramente que tien razón en delles coses. Pero yo soi David M. Rivas ya elli o ella ye "anónimu". Voi tener en cuenta la so opinión, porque los que nun somos anónimos opinamos en llibertá ya en responsabilidá. Pero mañana voi siguir escribiendo lo mesmo qu'escribiera agora. Porque d'un anónimu nun puedo fiame.

    ResponderEliminar
  14. David como supongo que lo dices por mi agradezote que tengas en cuenta lo que digo anque seya anónimu. Asegurote que toi opinando con llibertá y responsabilidá.

    Nun te pido que te fíes. Yo doite unos datos anónimos por si los quies emplegar o contrastar, más nada. Apetezme aportar pero nun m'apetez dicir quien soi, anque igual si te veo un día en persona coméntotelo.

    Pero estes coses creo que son contrastables con xente que de xuru conoces:

    1. El BIA yera lo que te comenté. Ye incontestable, ta nes hemeroteques y nos rexistros oficiales. Nun hai mas que ver la cronica d'Asturies llibertaria lo que se pretendía que fuera'l BIA, anque depués salió lo que salió. De fechu IAS dexó depués el BIA nel que quedaron INA y PCPE.

    2. La posición ofical d'Andecha, como Churchill corrobora, yera que'l nome de cualquier cosa conxunta había ser Andecha Astur. Nun la xulgo, namás la esclario. Esa foi la posición tamién nes europees y duró hasta les elecciones de 2007, na qu'una parte de la organización decidió cambiala. Por nun falar de los calificativos que se ponía a tolo que taba fuera d'Andecha o que cuestionaba esa llinia.

    Y lo de la INA tamién te digo que nun yeren tan pocos nin tan mataos. En Xixón había tamién un grupín curiosu de militantes.

    Nes crítiques a IAS tamién veo gran parte de razón, pero veo que nun se fala de la edá, que yera otru factor. La mayoría de la xente d'IAS nun trabayaba porque gran parte d'ellos yeren estudiantes. Y la mayoría d'ellos sí teníen un componente social fondu. De fechu la xente d'IAS tenía la percepción, nun digo que fora verdá, que n'IAS lo de la izquierda yera un elementu argumentáu y trabayáu, mentes que n'Andecha la izquierda yera daqué más estético y mas "cañero" pero más superficial. Falo de les percepciones, non de les realidaes.
    Tamién me paez que les descripciones que faes de lo que pensaben unos d'otros, tu y otra xente que comenta, básense muncho nun grupín de persones que tresmitíen información y facíen de "ponte" pa lo bono y lo malo. El propiu Riesgo, Llope... que munches vegaes nun taben nes coraes de los partíos. Ten en cuenta que'l mesmu Llope daquella nun yera portavoz d'IAS y nun participaba activamente na organización, anque sí yera un referente por razones obvies. Duldo que Riesgo tuviera contactu con naide d'IAS más que con Llope y de casi d xuru que nengún contactu con INA pa saber a quién aceptaben o non.

    Otru tema imporante daquella yera l'aparatu de propaganda/ventilador d'un grupín pequeñu d'andecha que difamaba gratuita y sistematicamemte y eso yera lo que más dinamitaba, creo yo, les posibilidaes d'averamientos. Llegaba al esperpentu. A raíz de lo de Unidá xente d'Andecha enteróse que munches coses que siempre se dixo de la xente d'IAS yeren mentires ensin fundamentu nengún. De xuru que tu mesmo les creisti dacuando.
    Y con eso nun disculpo actitúes d'IAS paternalistes, xeneralizadores, prepotentes, infantiles, etc.

    Lo dicho David, aprovecha lo que tu pruya, y lo que non que lo coma la rede.
    Salú.

    ResponderEliminar
  15. Gracies, Anónimu. Contrastaré lo que pueda. Yeren aquellos años mui confusos, a lo menos pa mín. Soi persona prudente pero tiendo a confiar na xente que comparte comigo coses básiques. Ye más, pesie a tolo pasao, seguramente volvería a confiar, non en tóos, pero sí en bastantes. Por eso ye posible que diere por bones dalgunes desplicaciones que nun lo yeren tanto. Pero de tolos bandos, que quede claro.

    ResponderEliminar
  16. Como dixo David, yo taba nel conceyu del Pigüeña. Acuerdome poco de lo que se faló ellí, pero sí de les condiciones que puso David. Pero de lo que m'alcuerdo perbien ye que nos conceyos de les Xuntes Executives d'Andecha Astur siempre se falo de que "nun gustaben les sopes de lletres", esto ye: "enxamás se diba a poner nuna papeleta AA-IAS-INA". Pero Andecha Astur diba tener la "generosidá" de permitir que la xente d'otros partíos fuera nes nueses candidatures. Lo de Andecha Astur- otra cosa tampoco se veía (toi falando de 1999, no de 2007). Ye decir, de boca pa fuera queríamos dir xuntos a les elecciones, de boca pa dentro, ni de coña. Poníense toles torgues posibles pa nun llegar a un alcuerdu colos otros partíos nacionalistes.
    David, yo yera y soi una persona mui confiada, siempre pensé que la xente ye bona, pero sigo diciendo que Marcos tien una capacidá de engañar y manipular a la xente impresionante. Sean amigos o non.

    ResponderEliminar
  17. Hola David. Enteréme de que tabes asoleyando estos artículos y tan prestándome asgaya y lleendo coses que nun dexen de sosprendeme como ye lo de nunca tuvisti afiliau. Mira qu'hebo rifirrafes colo d'iguar la militancia d'Avilés pal Conceyu del 2007 porque presuntamente dábense irregularidaes y sumábemos militantes pa tener más representantes y resulta que nun taba tol mundu afiliau como pensáramos, nel conceyu Xixón. Asina son les coses, nun se miden toes col mesmu raseru. Espero más entregues con ganes. Un saludu.

    ResponderEliminar
  18. Pirullìn del Nora8 de febrero de 2010, 1:08

    David; nun te conozo personalmente, Pero que un dirixente nacionalista diga estes coses ye rompedor. Espero les tos entraes de mañana.

    ResponderEliminar
  19. Marcos Abel aparez nomáu nos tres articulos. Camiento que la so figura ye perinteresante p'afondar nella nun articulu, por que pa bien o pa mal, el so determináu pesu condicionó'l pasáu del nacionalismu d'izquierda enforma. Los sos esitos n'Andecha, esitos mui ente comilles por que ehi tan los resultaos elleitorales, sumaos a la incapacidá de los otros axentes del nacionalismu d'izquierda pa facer daqué diferente y meyor, yo creo que fue, mui a grandes rasgos, les causes de la relevancia d'esta persona, que pa la mio opinión ye clave pa entender el fracasu d'esti movimientu.

    Quiciaves agora, con una Andecha Astur desplazada del so llugar central nel nacionalismu d'izquierda, s'abra un nuevu periodu pa la izquierda nacional onde l'alcuentru ente los distintos grupos y grupusculos que la formen seya más dinámicu y prósperu. Y si esto pasa, toos sedremos a poner nel so esautu llugar a esta persona y a quien lu arrodia.

    Toi a la espera de ver los tos articulos de los caberos tiempos d'Andecha, enantes d'Unidá. Nun espero que faigas sangre, pero oxalá des el pasu y pongas los puntos enriba de les "i", tanto pa unos como pa otros.

    ResponderEliminar
  20. Saludos, amigu y profesor (y claro que m’alcuerdo de ti cola maleta, nel Alsa, un día de torbonada, recién llegáu de los madriles namás que pa ver al Sporting de los nuesos enfotos!!!).

    Saludos sinceros tamién pa los amazcaraos.

    Namás que quería comentar un par de coses, p’aclariar el mio papel nesta película:

    - Tanto nos fechos que narres, como notros intentos nel 2007 (nel que tamién se tocó a Los Verdes), yo fui llamáu a mio casa, por terceres persones implicaes que me pidieren permediar ente tirios y troyanos por mor de la mio supuesta credibilidá personal pa unos y pa otros nel trasiegu de los mandaos. Y fíxate que digo persones (en plural) y non organizaciones. Éstes persones decíen actuar en nome de les diches organizaciones polítiques: si nun yera verdá, engañáronme. Nes dos ocasiones aceuté, y volvería a facelo si pensare como pensaba d’aquella que pagaba’l tiru intentalo… Poro, “d’espontaniu”, como dices, nada,
    - De la entós INA, nadie nun faló conmigo. Con quien sí falé, n’Avilés, foi con MAF, dos vegaes, pa da-y treslláu d’una propuesta. La so postura coincide dafechu colo que se diz equí: lo que fuere pero embaxo les sigles d’AA, esclusiva ya innegociablemente. Y elli tamién contestaba d’aquella en nome d’AA, ensin facer llamada dala a nadie. Igual que facíen los demás “interlocutores”. De toles meneres, mesmo pa un lláu que pal otru, lo que me decíen o contestaben los supuestos “representantes” d’esta o aquella organización, desautorizábenlo con declaraciones públiques o privaes otros colos que yo nun traté.
    - De too ello pue deducise lo que vien darréu: 1) Nun había con quién tratar, y que cada cual faiga la llectura de la frase que-y convenga, que va acertar de xuru, po. 2) El mio papel nun ye que seya “secundariu” nesta película, ye que nun llega nin tan siquier al de “figurante”.
    - P’acabar: lo del “Arviragu” yera una comparanza pa qu’entendieres qu’a ti nun te quedaba otra qu’aceutar ser el “escoyíu” pol destín pa lliderar a toles tribus. Lo que nun sabíemos tu y yo, d’aquella, ye que cada cual nesta historia ye una tribu en sigo mesmo. Y cuatro o cinco nun faen un “partíu”, faen una confederación de naciones indies…

    Salú, y que naide nun espere que cuente nada, que tengo mas que facer (nun vos ofendáis, que ye verdá). Por ciertu, ¿qué mieu hai a falar a cara descubierta, h.oder?

    ResponderEliminar
  21. Toi mui contentu cola marcha d'esto. Entraes como les d'Anónimu y de Xosé Nel Riesgo xustifiquen lo que faigo. Gracies a estes entraes soi a aquilatar meyor la situación. Y quédome col últimnu apunte de Riesgo: ¿por qué nun podemos falar a cara descubierta?. Eso ye lo que yo, modestamente, trato facer. Un saludu a toos.

    ResponderEliminar
  22. Soi l'últimu anónimu.

    Si nun participo "a cara descubierta" ye por que na rede, llugar onde la contradicción alcuentra'l so estáu más puru, les pallabres de cada ún gracies a l'anonimatu d'otros puen convertise en pura dinamita. Nel so día fice dalgún articulín y amosé dalguna opinión firmandola col mio nome y nun valió más que pa que la gandaya cargara contra la mio persona. Y nun entendais esto que ye miéu ¡faltaría más! ye ganes de nun s'enredar la vida nunes batalles nes que lo que se pue ganar ye práuticamente nada y lo que se pierde en forma de ver como ataquen la to persona ye muncho.

    Nel nacionalismu cibernéticu hai gandaya, si nos punxeremos a cuantificar de xuru que nun lleguen a 15 persones y yo equí podría poner 10 nomes d'esos 15 de xente de la que creo que ta tol día enredando y enmierdando pela rede y de xuru que nun mínimu d'un 80% acertaría. Ye asina, tres de dellos años conozse a la xente y tristemente suelen ser los mesmos y siempre arreyaos a la mesma corriente política: l'Andecha de MAF, dacuando una escuela d'odiu.

    Dificilmente sedrá, pero de ser, dalgún día coincidirá y tomando unes botelles charraremos a cara descubierta.

    ResponderEliminar
  23. Prestaríame , pidir respetu pa esta bitácora y pal que la fai posible . El (David) ye un exemplu de chapeta y bon facer . Esti blogue ye una lluz , nesta nueche na s'alcuentra somorguiáu, intelectualmente l'asturianismu .Claro qu'hai gandaya por estos caleyos , pero "coyones" nun nos portemos , como esa gandaya a la que criticamos dende l'anonimatu y amas d'ello dando nomes de persones ( amigu anonimo eso ye impresentable , dígotelo con tou ciñu ) .
    Somos munchos los qu'esperamos nueves entregues d'esta saga .

    ResponderEliminar
  24. Home "Churchill", precisamente por eso nun punxe nomes. Lo único que fice foi desplicar por que dalgunos, tamién ye'l to casu, preferimos l'anonimátu na rede y pa eso ye menester desplicame, camiento que me desplique nidiamente na entrada anterior.

    Yo tamién espero más entregues.

    ResponderEliminar
  25. Taresa de Calcuta (sic) dixo...

    Yo, David, nun sé si ye que- amás d'anguañu-, soi de los tiempos de Pink Floyd y nun puedo escaecer "la cara oculta de la luna", nesti casu la cara tapecía del nacionalismu asturianu. ¿Por qué Rubén Fernández, aquel guah.e de la Cuenca'l Nalón que "creó" -como quien diz- AA nesa Cuenca, desapaeció del panteón de los prohomes del nacionalismu asturianu? ¿Quién quedó na "lluz" de la hestoria? ¿Qué pasó con Pin Bermeyu y el famosu documentu éticu? ¿Tiró daquién la primera piedra? ¿Ubi sunt... aquellos vendedores, vendíos a IU, mentirosos, traidores y bla bla bla... (toos tienen nome)? ¿Cuántes muyeres queden, non consortes o parientes, nesti asuntu asturianu? ¿Militantes o diletantes? ¿Una xuntanza... de qué ingredientes? Asturies vese dende fuera como nun ye. Claro que n'otros tiempos nun esistíen l'autopista del Huerna, el móvil nin l'internet y nun nos quedó otra que tocar tierra cuando volvimos.
    Entrugues pa la reflexón. Y, si non, fíos, siempre nos quedará una batallina pa contar a los ñetinos, que la imaxinación ye llibre.
    Espero la siguiente entrega, David, y nun voi facete un penexíricu porque yes un bon amigu; y como n'Asturies entre l'héroe y el mártir hai un pasu... yá sabes.

    ResponderEliminar
  26. Entiéndote bien, madre Teresa. Les claves que das podrán discutise pero son clares.

    ResponderEliminar

Publicar un comentario