Una güeyada personal al nacionalismu d’estos años

Güei teo reconocer que taba enquivocau sobro esti asuntu los blogues. Yo abriera esti de mio cuasi emburriáu por amigos y collacios que pensaben que la mio opinión tinía la so importancia na blogosfera asturiana. Nunca pensé qu’eso fore verdá porque lo que yo vía yera mui asemeyao al xuegu’l telégrafu que yo prauticaba cuando yera neñu. Yá se sabe: ésti díxome que…, ésti díxome que,.. ésti díxome que.., y al final nada yera lo que paecía.

Yo nun pescancio otra manera d’entrar na rede que p’analizar con cancallu, magar que con menos rixideces de les qu’obliga un llibru o una esposición nel aula, un tema. Nun me veo ametiendo un post pa falar del problema de Michu, pesie a que soi un fuboleru ya un esportinguista encamentáu. Paezme qu’eso ye una perda tiempu. Por eso entendí esti blogue d’otra manera. Hai quien me critica un tonu demasiao profesoral y que tiendo a escribir munchos párrafos. Igual ye verdá, pero ye que abondo faigo con emplegar estes tecnoloxíes como pa enriba dexar de ser cómo soi. De toles formes, la mayor parte de les entraes de los que me lleen danme un pocoñín la razón de que la xente ta enforma fartuco d’opiniones y quier ver reflexones y analises.


Llevo un tiempu escribiendo un llibru sobro la mió evolución política, que ye daqué asina como una “memoria sentimental del nacionalismu”. Nun ye una historia del nacionalismu asturianu nin lo pretende. Eso queda pa historiadores científicos. Ye un cuentiquín nel que s’amosa cómo lo viví yo, en primera persona. Falo de cuasi toles persones que pinten o pintaron daqué nesti ámbitu, ya unes salen meyor paraes qu’otres, anque intento nun escarnecer más de la cuenta. Ta quedando bien, pienso pa mín. Va ser un llibru con nueve capítulos.


Como ta abiertu l’alderique pa les prósimes ellecciones, pensé espublizar nesti espaciu qué fora lo que pasó –siempres subxetivamente- nos años anteriores, concretamente dende 1999, que fora cuando yo encabecé la llista d’Andecha Astur. Trátase de tres capítulos que, como son mui llargos tuvi de partilos en cachos pa dar aire nel blogue. Son los siguientes: Candidatu d’Andecha Astur (1,2,3), Europa de los Pueblos (1,2), El final de la acción política (1,2,3,4).


Nesta ocasión prestaríame especialmente que los que seguís el blogue nun entréis en descalificaciones, anque los miós amigos de rede sois mas bien tranquilones. Pero si sería mui interesante qu’aportaráis les vueses opiniones o percepciones, porque van ser importantes pa la redacción final del llibru, cosa, evidentemente, de la mió ermuna responsabilidá. Amás, tenemos de ser conscientes de qu’esti debate qu’abro forma parte d’un seriu alderique abiertu dende hai unos meses poles organizaciones nacionalistes y por munches persones esmolecíes pol futuru d’esti país.


Veréis que les miós opiniones, inclusive les más dures, nun traten de mescabar personalmente, anque sí delles vegaes políticamente. Yo pienso que toles persones son respetables pero, evidentemente, non toles idegues y toles estratexes son respetables.


De toles formes la razón pa colgar estos testos nesti momentu nun ye tanto pa desplicar el pasáu –que se va entender meyor nel llibru completu- cuanto pa amosar erros y aciertos d’una xente ya unes organizaciones que deben alfrentase nos meses vinientes a unes decisiones polítiques perimportantes. Nun fora posible la xuntanza. Nestes páxines pongo na mesa la mio visión, non la verdá, que ye cosa estremao. Pero si daprendemos, igual mañana esa xuntanza definitiva, ensín trampa nin cartón, ye una realidá. Yo sigo creendo que ye la única posibilidá y qu’el tiempo cuerre a la contra de nueso.
Imprimir

Comentarios

  1. Collaciu David (perdón pola confianza), vas tener arreguilada media rede nel to blogue. Ruego a los vieyos dioses ástures que nun entre naide puñando, descalificando, nin insultando. Y que la xente de bon xacíu apurra les sos reflexones que, de xuro, van ser provechoses pa toos.
    Saludos.

    ResponderEliminar
  2. Pues a min encántame falar del tema ya sintir a daquién que sepia lo que fala.

    Colo de la Xuntanza famosa muncho se lleva escribíu na rede, pero presta qu'agora un cabezaleiru del asturianismu (David Rivas) fale, ya suelte pola bouca. You vou siguir la reflexón colos güeyos abiertos ya ensin perder miga, ya de pasu, dar ánimu a Rivas por esti exerciciu.

    Ya, cumo tamos falando d'asturianismu, habrá xente que lóxicamente descalifique, porque esto yía asturianismu, non outra cousa. Pero chitón, a siguir.

    Salú

    ResponderEliminar
  3. Estimáu David: comu tu dixisti nun artículu d´esti mesmu añu "namái queda una vía": La Xuntanza. Eso sí, hai que la facer bien, curiando errores del pasáu, atorniellando bien les tuerques, con altor de mires. Lo que nos cuentes, va ser mui tomao en cuenta por (cuasi) toos. El bon xacíu va acabar espolletando.
    Carlos X. Blanco (CXB)

    ResponderEliminar
  4. Préstame qu'entres nestes coses, David. Pero, como t'estimo, nun sé que pensar. A lo meyor vas metete nun barullu que namás te va dar esmolecimientu en viendo lo que tenemos nel nacionalismu. Suerte y que seya pa bien.

    ResponderEliminar

Publicar un comentario