La economía de los babayos: Asturies ye Bulgaria

Toi acabante d’entrar na páxina d’Aruelu y nun soi salir del mio plasmu. Resulta que recueye un “estudiu” nel que se diz que si Asturies s’independizare diba tener el mesmu productu interior bruto (PIB) que Bulgaria. Pero lo único búlgaro qu’hai nesti país –y que nun me salga el de siempres cola historia de qu’Asturies nun ye la “provincia de Oviedo”, que yá lo sé y toi d’alcuerdo- ye la forma de furrular del gobiernu ya’l parlamentu. Vivimos “a la búlgara”, pero de cuando Bulgaria yera l’últimu monu’l socialismu realmente esistente, modelu que nun resultó socialista, nin real nin esistente.
El PIB nun mide la bayura d’un país sinón la producción d’un país. Embaxo esa consideranza ye evidente qu’un país col tamañu de los Estaos Xuníos va tener un PIB muncho mayor que’l de Suecia. ¿Ye mayor el desendolcu o’l bientar de los nortiamericanos que’l de los suecos?. Tamién el PIB d’España ye mayor que’l de Dinamarca. ¿Tamién tan los daneses pior que los españoles?.
L’indicador ye, como poco, el PIB per cápita, que mos amosa qué se produz con cuánta xente. Hai unos menses espublizárase una llista de países ordenaos asigún el PIB per cápita y resultaba que’l País Vascu –igual me sal el de siempres diciendo que’l Pais Vascu nun ye la suma de les tres “provincias vascongadas”, que yá lo sé y toi d’alcuerdo- taba nel mesmu nivel que los países nórdicos.
Asturies ta güei, más o menos, na media la Xunión Europea y, dende lluéu, más d’un cuarenta por ciento perriba Bulgaria. Y nun falemos de les Baleares comparaes con Guatemala. Yo trabayo con frecuencia en Guatemala, onde los neños siguen morriendo de fame y l’analfabetismu runda’l sesenta por ciento la población maya. ¿Y qué dicir d’un Madrid nel nivel de Sudáfrica?.
Espublizar estes babayaes namás qu’ameten confusión al yá de por sigomesmu tracamundiáu alderique sobro financiación y repartu rentes. Una población pequeña nun territoriu pequeñu tendrá, necesariamente, un PIB pequeñu. Asigún la clasificación d’estos patayos, un país como Suiza taría al altor d’Uruguai y mui perbaxo de la India. Mentanto, China sedría cuasi como los Estaos Xuníos, y Rusia quintuplicaría los datos de Suecia y triplicaría los d’Alemaña.
Perbaxo esti mapa que mos diz que la capital de Camerún ye Santander y la de Kazajstán ye Valladolid, arrequéxase un noxu anticatalán mui de moda nos tiempos que cuerren. Esti mapa ta pensau p’amosar los malos malones que son los catalanes, que quieren ser como Dinamarca y condergar a los canarios a ser vietnamites y a los aragoneses a ser llibios. Namái nesta babayada antinacionalista y tremendamente nacionalista españolono hai una bona noticia: Melilla ye la Micronesia. Eso sedría una suerte pa Melilla, una de les comunidaes más abandonaes del reinu.
Pero ye más. L’indicador que s’emplega dende va más de vente años ye’l de desencolcu humanu (IDH), col que comparar Andalucía con Tailandia o La Roxa con Xamaica ye un insultu a la intelixencia y faer risión del subdesendolcu, la fame, la esplotación y la enfermedá. Como chiste ye malu pero como intención política ye inaceptable, noxante y miserable.
Imprimir

Comentarios

  1. Nacionalista fartucu4 de diciembre de 2009, 21:01

    Esti nacionalismu nuestru, como siempres. Páxines asturianes dando como noticies estes babayaes. Menos mal qu'hai xente con cabeza. Aruelu: estudiá-y un poco o pidir conseyu. Tais como burros.

    ResponderEliminar
  2. Normalmente nos blogues éntrase pa lleer opiniones. Nesti tuyu éntrase tamién p'adeprender coses como nesti casu. Espuesto d'una manera cenciella y fácil d'entender. Un llabor importante daveres. Saludos.

    ResponderEliminar
  3. Profesor de filosofía4 de diciembre de 2009, 22:46

    Paez ser que Rivas va poner una escuela pa que los neñucos nacionalistes con periódicos dixitales entiendan lo que ye'l PIB. Yá lo dixe hai unos díes: seria bono un manualín d'andar per casa sobro estes coses. Qué ye verdá, que tamos como burros.

    ResponderEliminar
  4. Home, dicir que teniendo en cuenta'l PIB per cápita los países nórdicos ya Euskadi tan al mesmu nivel paez un poco aquello. Yo conozo los dos sitios y ente'l nivel de vida nórdicu y el vascu hai un cachu. Un saludín.

    ResponderEliminar
  5. Profesor de filosofía4 de diciembre de 2009, 23:22

    Anónimu: yo sé mui poco d'economía, por nun dicir que nun sé nada. Igual David Rivas se tiró neso un poco a la pistina. Lo del Pib per capita vascu y nórdicu. Pero'l debate nun ye esi. L'alderique verdaderu ye que páxines nacionalistes recueyen babayaes como la que Rivas denuncia. Amás vivir nun sitiu tampoco da patente de conocimientu. Miles d'asturianos viven n'Asturies desde que nacieron y nun comprenden nada. David Rivas espón criterios con indicadores y tu observaciones personales. ¿Con quién quiés que me quede?. Yo el miércoles tengo qu'esplicar estes coses a los chavales de bachiller.

    ResponderEliminar
  6. Sí, home, yá se cuál ye'l alderique. Yo sólo quería dicir que, arriendes del PIB per cápita, hai otros indicadores: distribución de la renta (diferencies sociales), calidá de los servicios que recibe la xente, cohesión social, nivel cultural, etc., etc. Dalgunos puen oxetivase y otros non. Nun ye más qu'eso, nun t'enfades. Na mio modesta opinión vívese meyor en Dinamarca que n'Euskadi, pero claro, de xuru qu'abondos vascos opinen lo contrario, porque unos valoren más unes coses y otros otres. ¡Cuántos españolones nun piensen que viven meyor que los suecos porque salen toles díis "de cañas" anque vivan en 40 metros cuadrasos!

    ResponderEliminar
  7. Un profesor de filosofía4 de diciembre de 2009, 23:49

    La mayor parte de los qu'entrais nestes páxines sois mozos. Selo mui bien. Soi profesor d'un institutu'l centru d'Asturies. Tenéis ocasión de falar anónimamente con una persona importante n'Asturies (poco valorada nesti putu mundín pero mirá-y'l so curriculum na páxina la UAM o na uquipedia) y mui reconocíu en munches universidaes d'América y d'Europa.

    ResponderEliminar
  8. Al profe de filo del centru d'Asturies, teo 16 años y curso 2u Bachiller, por ello nun entro equí pa "desprestixar" a Rivas.

    Como dicía El Xanu entro pa siguir formando la mio opinión. Nin que dicir tien que la diferencia de bientar ente Dinamarca y Euskadi ye bultable, anque'l PIB sía asemeyáu que nun lo sé; pue qu'ellí Rivas se llanzare a piscina. Pero préstame muncho ñavegar pela rede ente los blogues de la xente y dir viendo maneres estremaes de pensar lo mesmo.

    Asturies ye un ermu de reconocencia, emprimando pola llingua y acabando por Asturies mesma, nun conozo a naide (pa bien o pa mal) que tea la reconocencia que merez. Una pena, axallá lo camudemos.

    Un saludu, Pelayu!!

    ResponderEliminar
  9. Ye verdá que l'indicador de PIB per cápita nun diz muncho más de lo que diz. Tamién yo pienso que los daneses viven, en términos xenerales, meyor que los vascos. Lo que quixe dicir ye, precisamente, qu'hai tener procuru col emplegu d'indicadores económicos. Cola presunción de ser "científicos" acaben siendo ideolóxicos. Cataluña ye Dinamarca y Madrid ye Sudáfrica. Por cierto, profesor de filosofía, gracies poles opiniones tan favoratibles. Entiendo lo que quies dicir pero, como sabes bien pola to profesión, los mozos son duros cuando opinen, magar que tean poco fundamentu. Pero ellos mesmos saben que ye asina. Pero, taremos d'alcuerdo, val más un rapaz qu'opine anque s'enquivoque qu'esa mayoría pataya que tenemos nes aules. Amás a mín nun me cafien pa nada, tolo contrario. Un saludu a toos.

    ResponderEliminar

Publicar un comentario