17.7.17

Chupa Chups como lleición de teoría económica



Hai yá más de siete años hebo un movimientu de desllocalización industrial que causara una gran conmoción n’Asturies, non tanto pola importancia que la empresa tinía na so aportación al PIB nin pol descomanáu númberu de puestos de trabayu perdíos. La importancia d’aquella marcha radicaba en que tinía una gran influencia na rexón na que taba instalada, una rexón con una intensidá baxa-media d’industrialización. La segunda razón pola que yera llamativa aquella marcha nun yera otra que l’aparente falta de motivos económicos pa qu’asina fuera. Tamos falando de la afuxía de Chupa Chups dende Villamayor haza Cataluña.

Entóncenes el mesmu teniente d’alcalde de Piloña, el socialista Andrés Rojo, quexábase con amargor del mal comportamientu de la empresa. Nuna esclariadora entrevista a un diariu asturianu, de xuro qu’ensín ser consciente, taba dando una lleición de teoría económica o, más bien, desplicando les falacies que tan escondíes embaxo una disciplina tan ideoloxizada. El periodista que resumiera la entrevista entítulárala, entecomillando, “Chupa Chups tien equí una manu d’obra más barato y nada conflictivo”. Yera un bon titular polo llamativo y porque facía referencia al principal problema deriváu de la decisión empresarial: l’incrementu del desemplegu. La empiria evidenciaba, otra vuelta, que la recesión, qu’entós entamaba con fuerza, nun la provocaba’l coste salarial nin el mercáu llaboral. La empresa treslládabase a Cataluña, onde diba pagar salarios más altos ya onde la conflictividá social yera mayor. Primera lleición de teoría económica: el coste’l factor trabayu nun ye determinante nes decisiones empresariales, anque ye meyor pa la empresa cuanto más baxu seya.
Dicía tamién el conceyal que nel últimu plan xeneral urbanu de Piloña calificárase tola rodolada de Chupa Chups como tarrén industrial, col maxín puestu nun futuru enantu de la fábrica, lo que bien perxudicó a los usos tradicionales agropecuarios y a posibles usos terciarios. En definitiva: qu’hebo tratu favorable a una empresa concreta dexando al debalu a dalgunos sectores nuevos y a tolos sectores tradicionales. Segunda lleición de teoría económica: les decisiones polítiques nun determinen les decisiones empresariales, anque ye meyor pa la empresa que-y seyan favorables.
Diba más alló entá el  conceyal, reconociendo que fora autorizada la supresión d’un pasu a nivel de Feve col envís d’ameyorar la seguridá de la estrada que llevaba a la fábrica y que toles meyores que se fixeran na política d’augües, depósitos incluyíos, pensáronse en función del consumu hídricu de Chupa Chups. Otra vuelta la empresa como beneficiaria cuasi única de, nesti casu, dalgo tan fundamental como ye l’augua. Tercera lleición de teoría económica: les inversiones públiques nun determinen les decisiones empresariales, anque ye meyor pa la empresa que tean orientaes a favor d’ella.
Y terminaba don Andrés asegurando que Chupa Chups siempres tuviera tol sofitu del gobiernu asturianu y de tolos partíos políticos y sindicatos d’Asturies. Cuarta lleición de teoría económica: si les instituciones son débiles y nun tienen programa concretu pal país, les sos posiciones nun determinen les decisiones empresariales, anque mui contenta queda la empresa con alministraciones que dan perres ensín asegurar proyectos y con sindicatos más preocupaos por quitar y poner dirixentes na universidá, na banca o nel senáu español.
Un edil d’un conceyu pequeñu en collaboración con un periodista d’una cabecera d’ámbitu poco más que llocal, taben clavándo-ys la espuela a los economistes de la oferta, los nomaos neolliberales, y, al empar, poniendo pates arriba al mesmu Keynes, padre de los economistes de la demanda. Pero, riba tóo, ponía na mesa l’ausencia de política industrial de los gobiernos asturianos y los sos compañeros de parranda, mariscada y gintonic, que yeran bastantes y mui dstintos, como tamos viendo n’actualidá. El casu de Chupa Chups ye un casu paradigmáticu de cómo se tomen les decisiones dalgunes vegaes. La industria y, en xeneral, el modelu económicu diseñaos n’Asturies fuera la d’un parchéu permanente y la del desbarde de miyones d’euros procedentes de la Unión Europea en pan pa güei y fame pa mañana, en proyeutos faraónicos ya en caprichos d’alcaldes, diputaos, sindicalistes y empresarios subvencionaos, cola pretendía racionalización de dalgún qu’otru departamentu universitariu.
Agora, por si nun fuera abondo con tolo anterior, la empresa alfréntase a dalgo que dengún economista perllistu viera, ún d’esos que nun faen valoración de los recursos primordiales, como son los ambientales. Resulta que nunca naide nun pensara nel principal ingrediente de los polos col palín: l’augua. Como yera barato y amás, l’ayuntamientu cuerría con tola inversión necesaria, ¿pa qué esmolecese? Pues resulta que l’augua catalana, mui rico en cal escontra l’augua blando piloñés, fixo que los carambelos seyan peores y con deformaciones. Destamiente, perdieron dalgunos mercaos de países desendolcaos y tuvieron que buscar otros nueos de más baxos estándares de calidá. Total: una perda d’imax de marca nel mercáu internacional. Última lleición de teoría económica: pa llocalizar una industria hai pensar nel augua y nel clima como elementos esenciales, riba tó si ye d’alimentación. Ya un apunte final: tampoco la política asturiana nunca nun pensó nesti asuntu como ventaxa competitiva.



No hay comentarios:

Publicar un comentario

Nota: solo los miembros de este blog pueden publicar comentarios.